John 5
5
Jung bung na atak taqhal aa
1Ethi jitho, Jesu Jehudi tang kut aa kan rangma Jerusalem náng kata. 2Jerusalem na Kelwut Kalung relthina jung bung angta, bara Hebrew raaq na Bethzatha ta raaq aa. Eshina banga nángtong him angta. 3Eshina daqhan ataksa, miikduk, jakung, etho jak ajaa may thamot moq miqtang aa jungmot tha tungmang eq tong ta. 4Chammatakoi khakla rangham ang ajo Teyhungwa rangkamwa thu eq jung tha jin thamot ta. Jung mo ajo utang jakho jungshi náng ka ajo piq ma chamlang tak asa ang ajo tho, piq tha uqhal angta. 5Eshina miq ashey angta, bara pang roktom pang ashat wang sey taksa ta. 6Jesu aa eshi miqwa tha khita etho piq daklot pang wang sey taksa ta sam eq piq thima pitta, “Nang uqhal angma unuk ang u i?”
7Eshi atak wa they Jesu ma thawel batta, “Tangteywa, baluk o jung mo ajo jung bung náng solkat tey miq ijamna ahung; nga jung bung relnáng sey thu ang jo miqdak i jakho jung bung náng kachak aa.”
8Jesu aa piq ma batta, “Shat u, ba qhamsa ni tun u, etho qhing eq lang u.” 9Eshi miq tha eshi rangham tho qhalta, etho piq uqhamsa tha tun eq qhing chey ta.
Eshi saal tha Sabbath saal angta. 10Ethirangma uqhal angta wa thima Jehudi tang they batta, “Thaney aa Sabbath saal, nang aa qhamsa tun som eq qhing raa qhal moq. Iri tang thaji raa thong na qhal moq.”
11Piq aa thawel batta, “Barey nga taqhal taphang piq aa ngama batta phang, ‘Ba qhamsa ni tun u eq qhing u.’ ”
12Ning aa piq ma pitta, “Qhamsa tun eq qhing u ta, nang ma battey miq shi utang aa?”
13Etharin uqhal angta wa they Jesu utang angta ta sam moq angta, chammatakoi eshi haq thina miqtang daqhan ang rangma Jesu eshiwang thalat qhingchu wangta.
14Iri raaq jio, Jesu aa eshi miq tha rangnuk himna chongta. Jesu aa piq ma batta, “Siin u, nang uqhal sey angtu; ngarey nak sey wey som ka u, etha ang moq ang ajo eshi phey náng eq aliq tsamnang nang ma mok thuk ang phana.”
15Eshiwa tha ka eq Jehudi tangma piq taqhaltey wa tha Jesu ta batchak ta. 16Req Jehudi tang aa Jesu tha phang tahikham ta, chammatakoi Jesu aa iri tang thaji raa Sabbath saal tho som ta. 17Jesu aa thawel batta, “Iwa salwet jaksom aa, etho nga tho jaksom som chey ro eq náng.”
18Eshi tungkang o Jehudi tang aa piq tha tikwat ma ahan wey tathinta, chammatakoi piq aa Sabbath saal o thong chen tashit moq angta, etharin Shkewa ma Iwa ta raaq eq Shkewa rol piq tha shingta.
Miqwasa jakkhung na
19Req Jesu aa thawel batta, “Nga nangma asing sing batphang, Miqwasa piq tinthin o chamtho jinsom moq, piq aa Uwa som atha ukhi eq esha hun jinsom aa; chammatakoi chamlang jaksom Uwa som aa sha Miqwasa tho eshimal hun som aa. 20Chammatakoi Uwa Miqwasa ma tinmat shing aa etho bara piq aa thanga som aa, thaji sha piq aa takhi aa. Etho nang patja angma piq aa Usa Miqwasa ma ajong jaksom takhi na. 21Uwa utiktey tang tashat aa etho ning ma rollung kot aa, eshimal hun Miqwasa tho barima nuk aa eshima rollung kot aa. 22Uwa sha utang ma tho khaphung moq, etharin khaphung jaksom thaji sha Miqwasa ma kotchak ta. 23Irimal ang ajo thaji miq eq Uwa sha rangka aa shimal Miqwasa sha tho rangka eq na. Utang eq Miqwasa rangka moq, barey Miqwasa takat tapha Uwa sha tho rangka moq.”
24 “Nga nim ma asing sing batphang, utang eq iraaq tat eq nga takattey Iwa ma han aa, ning ma pattuk rollung etho ning ma khaphung ahung; etharin ning aa utik tha jan eq rollung náng ka aa. 25Nga nim ma asing sing batphang, eshi rangham tha uthok sey ang chey pha, etho amáng tang aa Shkewa Miqwasa raaq tat rangham tha uthok sey angta, etho utang eq tatna ning ma rollung atha. 26Chammatakoi chamal Uwa piq ni piq o urollung shing aa, eshimal piq aa Miqwasa ma tho piq ni piq sha urollung atha angma raaqkhat kota; 27Piq aa Miqna Sa ma khaphung ma raaqkhat kota, chammatakoi piq sha Miqna Sa. 28Irima nak patja inn; chamtan máng bungching na amáng tang shey piq raaq tatma rangham tha sey thutapha. 29Etho ning máng ching wang thalat na. Utang eq jaqhal somlo ta, ning wey jey angna; utang eq jashit somlo ta, ning tasamnáng kap rangma wey jey angna.”
Jesu ma miikkhi tang kot
30 “Nga itinnuk eq chamtho jinsom mong. Shkewa ngama batta phang shimal hun khaphung ang; etho ikhaphung sha asing, chammatakoi nga itinnuk o som mong etharin itakattey Iwa tinuk wang somlo ang.”
31 “Nga irangma miikkhi kot ang jo asing ang moq angna. 32Imiikkhi kottey ashey adak atha, etho nga sam eq ang, barey imiikkhi kotta piq miikkhi sha asing. 33John ching náng nim aa raaq pit ma takat tin etho chamlang asing sha piq aa hun miikkhi kota. 34Etharin nga miq miikkhi sha tháng eq ang ta nim aa nak tathin inn; etharin nim ulun kap rangma nga iri raaq tang raa batphang. 35John ujung nia ulip nalpang angta, etho nim ma chomrey rangma piq alit sho sungrang ang sha jaqhal angta. 36Etharin ijakna barey miikkhi raa, esha John miikkhi phey náng eq ajong; chammatakoi bari jaksom raa Iwa ngama tahom ma kot taphang bara nga som ang, Iwa nga takat taphang rangma esha imiikkhi. 37Nga takatteywa Iwa, piq atho imiikkhi kot aa. Nim aa baluk otho piq raaq kap tat min ang tin, etho piq sham kapkhi min ang tin, 38etho piq raaq nim tin na ahung, chammatakoi piq aa bara takat tapha nim aa piq sha han min. 39Nim aa asang likwit na bi inn, chammatakoi eshina pattuk rollung kapni ta nim aa tathin inn; etho eshi likwit shey hun imiikkhi kot aa. 40Etharin nim rollung kap rangma irelnáng katma nuk min.”
41 “Nga miqtang eq rangka shima nuk mong. 42Etharin nim tin na Shkewa tinmat ahung ta nga sam eq ang. 43Nga Iwa miing o kataphang, etho nim aa nga tháng phamin. Etharin adak piq ni piq miing o kapha jo utháng eq nin. 44Nim aa ashey eq ashey tasapsey ma nuk inn etho ashey dang tasapsey bara Shkewa chingko wang shima nuk min, nim aa nga chammal eq han pha nin? 45Nga Iwa rel o nim ma jashit ta raaq phang ta nim aa nak tathin inn, nim ma jashit ta raaqteywa tha Moses, eshima nim aa han shing inn. 46Chammatakoi nim aa Moses ma han tin jo nga raa tho uhan eq wang tin, chammatakoi piq aa itung aa raaq kata. 47Etharin nim aa piq likka tha han min ang inn jo nga batphang sha chamal eq han nin.”
CC BY-NC-ND 4.0