John 14
14
Uwa relnáng wangma Jesu raa lam
1 “Nim tin nak tashit inn; Shkewa ma kam shing inn etho ngama tho kam shing inn. 2Iwa himna himkhok daqhan ang aa, ahung angta jo nga nim ma bat kot eq chak wang taphang, chammatakoi nga nim rangma haq ban kacha wang ang. 3Nga wang eq nim rangma haq ban kacha wang ang jo nga wey kaphang jo ijamoq nim sol chuwan phanáng, nga barina tong náng eshina nim tho utong angnin. 4Nga bari náng ka ang eshi lam sha nim aa sam eq inn.”
5Thomas aa piq ma pitta, “Teyhungwa, nang bari náng ka u sha í aa sammi, lam shi chamal eq sam ni?”
6Jesu aa piq ma batta, “Nga raa hun lam, asing etho rollung; nga lit eq utang tho Iwa relnáng jin thumoq. 7Nim aa nga usam eq taphin jo Iwa sha tho usam eq nin. Etho thang wang hun piq tha usam eq inn, etho nim aa piq tha ukhi eq tin.”
8Philip aa piq ma batta, “Teyhungwa, í ma Uwa takhi phu, í ma esha hun lali.”
9Jesu aa piq ma batta, “Philip, nga nim jamna chamtan saal wang sey, etho nang aa nga raa sam phamu i? Utang eq nga khitaphang, piq aa Iwa sha tho ukhi eq ta. Nang aa chamlang ma bat u, ‘Uwa shi í ma takhi phu?’ 10Nga Iwa jamna etho Iwa ijamna ta nang aa han mu i? Nga bara raaq tang sha, itinmong wang raaq mong etharin Iwa bara ijamoq tong aa, piq jaksom tang sha somlo chey aa. 11Nga Iwa jamna etho Iwa ijamna ta nga kam phin, etha ang moq ang ajo ijaksom tungkang o nga kamphin. 12Nga nim ma asing sing batphang, utang eq nga kam shing aa, bara nga somlo ang jaksom tang sha ning atho usom eq na, iri pheynáng eq ajong jaksom somlo na, chammatakoi nga Iwa relnáng wang ang. 13Chamlang otho nim aa imiing o chu nin nga usom eq náng, eshimal ang ajo Iwa phun amun sha Miqwasa o takhi na. 14Nim aa imiing o chamlang chu inn jo tho nga somlo eq náng.”
Asang Tsija rangtum
15 “Nim aa ngama tinmat angta phin jo i raaqkhat tang sha utat eq nin. 16Nga Iwa ching wang chu ang jo, piq aa nim ma adak rok nongtey kot na, piq salwet nim jamna tong na. 17Piq Asing Tsija, bara Shkewa asing sha nim ma takhi na. Mingkang miqtang eq piq sha jin kap moq, chammatakoi ning aa piq tha khimoq etho sammoq. Nim aa piq usam eq inn chammatakoi piq nim jaktung o tong aa, etho piq nim o angna.”
18 “Nga nim raa nu hung wa hung sa mal shingchak phamong angnáng; nga nim relnáng kapha náng. 19Chomrey sa jio, mingkang eq nga raa baluk otho khipha mong angpha náng, etharin nim aa nga khi eq phanin, chammatakoi nga atharang tungkang o nim tho atharang tong nin. 20Ethi saal tho nim aa usam eq nin, Iwa ijamna etho nga nim jamna thimal nim ijamna.”
21 “Utang eq iraaqkhat han aa etho iraaqkhat tat eq tong aa, piq aa hun ngama tinmat shing aa. Iwa tho ning ma tinmat shing na; nga tho ning ma tinmat shing náng etho nga ning ma takhi náng.”
22Judas (Judas Iscariot ang moq) aa piq ma batta, “Teyhungwa, náng aa í ma takhi phanu, etharin iri mingkang ma takhi mu angnu ta chamal eq ang aa?”
23Jesu aa piq ma thawel batta, “Utang eq ngama tinmat ajo piq aa iraaq utat eq na. Etho, Iwa piq ma tinmat shing na etho hiqni piq jamnáng kani etho hiqni him hun eq piq jamoq tong ni. 24Utang ngama tinmat phamong, piq aa iraaq sha tat moq. Etharin bari raaq raa nim aa tat inn, esha iraaq ang moq; esha Iwa ching kowang thupha, barey nga takat taphang.”
25 “Iri raaq tang raa nga nim jaktung o tong eq nim ma batta phang. 26Etharin Rapnongtey Asang Tsija sha Iwa imiing o takat phana, piq aa nim ma thaji raaq sha tatal kopha nin, etho chamtan nga nang ma bat taphang tang sha piq aa nim ma tasik kot phanin.”
27 “Nga nim ma nungmay sha ko phang, inungmay sha nim ma kochey phang. Mingkang eq chamal kot aa nga nim ma eshimal kopha mong. Nim tin nak cham shit aa etho nim nak cho inn. 28Nga batta phang sha nim aa tat eq tin, ‘Nga uwang ang chey ang etho nim relnáng wey kat ang phang náng.’ Nim aa ngama tinmat shing tin jo nga Iwa relnáng wang ang ta raaq shima nim sungrang ang wang tin, chammatakoi Iwa iphey náng eq ajong. 29Nga iri tang raa ang wey moq jakho nim ma bat eq taphang, irimal ang ajo esha thupha jo nim aa kam nin. 30Nga thanga nim jamoq daqhan raaq jin wan phamong, chammatakoi iri mingkang jaktáng o shingtey kachey pha. Piq sha nga pheynáng eq tarong ang moq. 31Etharin nga Iwa ma tinmat shing ang ta mingkang eq sam rangma angta; Iwa ngama raaqkhat chamal batta phang ethimal hun nga thaji somlo ang. Kaphin, iri wang shat i.”
CC BY-NC-ND 4.0