Nau Ntơm Nau ngơi nhhơ
Nau ngơi nhhơ
Rplay nchih khlay Nau Ntơm nâm ntĭt jêng “ntơm bơh saơm”. Ndrom samƀŭt aơ nkoch nau rhăk njêng trôk jêh ri neh ntu, ntơm bơh geh kon bunuyh, ntơm geh nau tih nđâp ma nau rêh ni lam bri ta neh ntu, jêh ri ma nau Brah Ndu dăp nkra ma kon bunuyh. Ndrom Samƀŭt Nau Ntơm dơi tâm pă geh bar kô̆ khlay: (1) Nau rhăk njêng trôk, neh ntu jêh ri nkoch bri nau ơm kon bunuyh bơh kăl e. Kô̆ aơ nkoch tay nau nkoch bri ma Y-Ađam jêh ri H'Êva, Y-Kain jêh ri Y-Abel, Y-Nôê jêh ri dak lêng, nđâp ma nau tât ma ngih gung Ƀaƀel (kô̆ 1-11). (2) Nau rêh jêng chô yau bơh phung Yuđa. Ntơm saơm jêng Y-Abraham, bunuyh geh nau khlay ngăn ngên yor ma nau chroh jêh ri nau păng tông bâr Kôranh Brah. Jêh ma nây jêng nau nkoch bri ma kon bu klâu Y-Abraham jêng Y-Isăk, sau kon bu klâu Y-Abraham jêng Y-Yakôb (dơi ntơ đŏng jêng Israel), jêh ri jât bar nuyh kon bu klâu Y-Yakôb dơi jêng jât bar kôranh mpôl ma jât bar ntil mpôl phung Israel. Ndrom samƀŭt khlay aơ nchih ma nau rêh Y-Yôsep, du huê tâm jât bar kon bu klâu Y-Yakôb, jêh ri lĕ nau tât njŭn Y-Yakôb ndrel ma lĕ rngôch rnăk vâl păng hăn jŭr gŭ rêh ta bri Êjipt (kô̆ 12-50).
Nđâp tơlah ndrom samƀŭt Nau Ntơm nkoch ma nau rêh kon bunuyh, ƀiălah nau khlay păng jêh ri lĕ rngôch ndrom samƀŭt aơ nchih nkoch ma lĕ nau kan Brah Ndu hŏ ƀư jêh. Ndrom samƀŭt ntơm nau n'hêl nê̆ pô aơ Brah Ndu hŏ rhăk njêng jêh trôk neh ntu jêh ri nglĕ dŭt đah nau ton pô aơ Păng mra rvê đŏng tât ma kon bunuyh. Lĕ tâm ndrom samƀŭt ăn saơ Brah Ndu jêng bunuyh tơm, Nơm phat dôih jêh ri rmal lĕ phung ƀư tih, ntĭm jêh ri kơl phung ƀon lan Păng. Ndrom samƀŭt ơm aơ nchih tay nau nkoch bri nau chroh bơh du phung ƀon lan gay kơl khân păng mât mray jêh ri ndray nkoch nau chroh nây.
KÔ̆ DĂP
Nau rhăk njêng trôk neh ntu jêh ri kon bunuyh (1:1 – 2:25)
Nau ntơm geh nau tih jêh ri nau rêh ni (3:1-24)
Ntơm bơh Y-Ađam tât Y-Nôê (4:1 – 5:32)
Y-Nôê jêh ri dak lip toyh (6:1 – 10:32)
Ngih gung Ƀaƀel (11:1-9)
Ntơm bơh Y-Sem tât Y-Abram (11:10-32)
Phung chô yau: Y-Abraham, Y-Isăk, Y-Yakôb (12:1 – 35:29)
Noi deh bơh (36:1-43)
Y-Yôsep jêh ri phung oh nâu păng (37:1 – 45:28)
Phung ƀon lan Israel ta n'gor bri Êjipt (46:1 – 50:26)
© 2023 United Bible Societies. All rights reserved.