Matsiyù 9
9
Yesù mùrùkù kpiri sɔn cɛrɛmabeu min niì
(Marikì 2.1-12; Lukì 5.17-26)
1Àyìwà, Yesù yè dɔ̀n konkoron sɔn doùn tɔ̀un, è yu blàa sèè fuu, è dɔ̀n be e re wɔ̀ rɔ̀n. 2À bèu dzi mɔn, yè kpiri murùkuuma sɔn sen na à re, tɔ ɲɛɔ̀n ɲaange tsɛ. Yesù y'à jàu ci twɛy mòdzin neè ɲɛun wò ra tà tsuru min niì, è dzin mùrùkù kpir'là rà ci: «Maà a duungoo do waa n dzin, wo re gooɲaantsiɛ mɛɛy bou wo vu ra.» 3Tɔ̀un, Sàrìryà Kaamoo reè swey yè dzin e duùn ci: «Nèe Ŋaablà tsoo bar'la dɛ !» 4Yesù yè è duùn naà jàu tà tsuru min niì, è dzin ci: «Feera nèe duungoo ɲaan kaatsi rèe ni ye duùn ? 5Àwà min ye tey ɔ, e dzin ci: "Wo re gooɲaantsiɛ mɛɛy bou wo vu ra", tà ko "Fù e jìì", kɛ̀n ni de dzi twɛy fiɛ̀ ɲàn ? 6Àwà, ye nà à tɔ̀, ci à dzi ni Adamà dziàn nà, è gooɲaantsiɛ mɛɛy bo mòò vu ra dzɔ̀nxɔɔ̀ tsɛ.» Tɔ̀un, Yesù yè dzin mùrùkù kpir'là rà ci: «Fù, a re ɲìnìnkɔ̀ɔ̀n seen gèè sen, e b'à re tsii !» 7Kpir'la yè fù, è dɔ̀n be e re tsii. 8Jàmaà tɔ̀ jàu min niì, yè shi. Yè tsoo dzi ɲɛn Ŋaa tsɛ, kàtsu, à tɔ̀ tsuru dzibaabe siun adamàdzin mòdzin neè rà.
Yesù Matsiyù kiriu min niì à y'à bà e re kàràndzin
(Marikì 2.13-22; Lukì 5.27-32)
9Àyìwà, Yesù bou mɔn tɔ̀un, à dɔ̀n bokɔɔn min sɔn, è xɔnsɔɔntsibaa sɔn tsuuŋma jà xɔnsɔɔntsigbaà doùn, tɔ̀ tsoo Matsiyù. È dzin à ra ci: «A gban n kpɛyn.» Tɔ̀ yeè fù, è gban à kpɛyn. 10#Luk 15.1,2.Àwà, è bè wɔ Matsiyù rè tsii. Tɔ̀un, à tsùuŋmaà ɲwɛɛ̀n nà gbàà doùn, xɔnsɔɔntsibaa giri, ko mòdzin faadzii ɲaan neè giri sa na ni ɲwɛɛ̀n nà à ko e re kàràndzin neè ka. 11Faridziɲɛn rèè tɔ̀ jàu, y'à re kàràndzin neè tey ci: «Feera ye kàrànfaà, ko xɔnsɔɔn tsi reè, ko mòdzin faadzii ɲaan neè yè bà ɲwɛɛ̀n ɲɔɔ̀n esire ?» 12Yesù tɔ̀ myɛ̀un, è dzin ci: «Cɛrɛma reè màgoo na ni janfabaà rà waa, ɲìnìnkɔɔn reè rìì màgoo ni à ra. 13#Mat 12.7; Ukk 6.6.À deò Ŋaablà re Goomaa doùn ci: "sani ye saaka bo mun ne, ye màtsuru. Mun gaa tɔ̀ rii là." Tɔ̀ goomaa dzuɔn nìi dèe, ye bè tɔ̀ gaa tɔ. Nìì reè y'à jàa ye tereòn, mun nà kuàn na twɛy waa. Ŋà, gooɲaantsiɛ ni nìì reè vu ra, mun naɔ̀ twɛy rìì kiri yè tsi.»
Yesù teroun sun goo mà min niì
(Marikì 2.18-22; Lukì 5.33-39)
14Tà doùn, Mòdzìn Jààràfoobaa Yùxanà rè kàràndzin neè yè nà e kpɛrɛ̀ Yesù rà, Y'à tey ci: «Feera ɲe ko Faridziɲɛn rèè sun giri wɔɔ̀, ŋà, wo raa kàràndzin neè na wɔɔ̀ waa ?» 15Yesù yè dzin è ra ci: «Kɔnɲɔn kpir'là ko e dzyeèsi rèè ni dzi ba ni esire à dzyèèsi rèè taama yè ŋununbe o ? Ŋà jisee nàa, nìi doùn, kɔnɲɔn kpir'là nà sen bo è ɲan. Tɔ̀ sii sèè, è nà sun wɔ.
16Mòò pɛn na vya ye ka vya bɔrɔɔ tsyɛɛ̀rɛɛ waa. Tɔ̀ ye fa, yeu riì ka bɔrɔɔ tsyɛ̀ɛ̀rɛɔ̀, tɔ bɔrɔɔ sɔ̀ɔ̀n vyɛ̀ɛ, à vyɛ̀maà si yè tsi. 17Mòò to na dɔ̀ɔ̀ yɛy jia yu vɔrɔ bɔrɔɔ ì doùn waa. Tɔ̀ ye fa, vɔ̀r'leè vyɛ̀ɛ, dɔ̀ɔ̀ yè kon, vɔ̀rɔ̀ goo dòu. Ŋà, dɔ̀ɔ̀ yɛɛ̀ jia vɔ̀rɔ̀ ye ì rìì doùn, tɔ̀un, gèsɔn na boò è pɛn ne waa.»
Tàan sɔn ne tsììnàban dòu min niì, ko Yesù tàànmɛ̀yn sɔn fun kpunaun min niì
(Marikì 5.21-43; Lukì 8.40-56)
18Àwà Yesù ni twɛy gooma reè dèè rà è ra, Dzyèèsìbee mòdzin neè kùntsii sɔn yeè nà, è kunun gban à bììn, è dzin à ra ci: «Mun dzin taan yè e xɔn bou dòonen ɲan, ŋà nà, e nà a si rèè tsùù à tsɛ. Tɔ̀un à nà sèè bà jaama.» 19Tà doùn, Yesù yè fù è gban à kpɛyn, à ko e re kàràndzin neè. 20Tàan sɔn na ni mɔn, tsììnàbaan tɔ̀ byɛɔ̀n, è bè tàrà fɔ jii teeŋ fii. Tɔ̀ yeè e kpɛr'na Yesù bònè, è nà e dzyɛn à re vyaà dziikuan nà. 21Taàn na dziàn e duùn ci: «Min dzyɛunma tàrà à re vyaà bàsɔùn nà, mun nà cɛrɛmabe.» 22Yesù yè e jaa kereu à y'à jà min niì, è dzin ci: «Maà a duungoo do waa n dzin taan, wo ɲɛunmaà mun na tɔ wo cɛrɛmabeu.» Tɔ̀ waatsi rɔn ko e sa, taàn yè cɛrɛmabe. 23Àyìwà Yesù bèu dzi kùntsiɛ̀ rè tsii rɔ̀n, è gwɛ̀yn fyɛ reè jà, tà ko jàmaà, yè bà ni màànkaan nà. 24È dzin ci: «Ye bo mìin ! Tàànmɛ̀yniɛn na saɔn waa, à ciɛ̀ rìì.» Tɔ̀un mòdzian yè jiraàn à mà. 25Jàmaà boumaà shɔ̀ùn da rɔn, Yesù yè dɔ̀n, è tàànmɛ̀yniɛn kun e si ra, à y'à kpunan. 26Tɔ̀ goò goomaa yè dzi jàmaàn min niì sapɛ.
Yesù jaana kpiri fii jaa dzii saun min niì
27Àwà Yesù bou mɔn, à bèkɔɔn jaana kpiri fii yè e gban à kpɛyn, yè dziàn à ra fààn na ci: «Màsà kpiri Dawudà tsua dziàn, màtsuru mùn na.» 28Yesù wɔumaà tsii rɔ̀n, twɛy jaana reè yè e kpɛrɛ̀ à ra. Tɔ̀un, à yè è tey ci: «Ye ɲɛɔ̀n à ra ci mun dzia ye jaa rèè dzii san ɔ ?» È ci à ra ci: «Ɔ̀ɔn Tsìfaà.» 29Yesù yè e dzyɛn è jaa rèè rà tɔ̀un, è dzin ci: «È fa e re a ci ye ɲɛun à ra nìi tsuru.» 30Tɔ̀ nɔ̀nkɔɔrɔn ko e sa, è jaa rèè yè san. Tɔ̀ ɲan à y'à dè màxɔbe è ra ci: «E maà à to mòò pɛn y'à tɔ̀.» 31Ŋà è dziu bo min niì, Yesù nìi fau, yè tɔ̀ goomaa ka jàmaàn sapɛ labo.
Yesù bobo kpiri kweykɔɔn sɔn cɛrɛmabeu min niì
32Àwà, twɛy kpiri fiɛ̀ bokɔɔn y'à wa, yè nà bobo kpiri kweykɔɔn sɔn ka Yesù rè. 33Tɔ̀ kweè kaa boumaà kpir'la kpɛyn, è maa è goomaa. À goò yè ji jàmaà dzii tsɛ, fɔ yè bè dziàn ci: «Nèe tsuru na ja jà Isirayɛli jamaan doùn ŋe fyeu !» 34#Mat 10.25; 12.24; Mar 3.22; Luk 11.15.Ŋà Faridziɲɛn rèè, twɛy na dziàn ci: «Kwey rèè kùntsii blàa rìì baraka ɲan, à kwey rèè kaa boò mòdzian kpɛyn.»
Jàmaà ɲììɲii Yesù kuun min niì
(Marikì 6.34; Lukì 10.2)
35 #
Mat 4.23; Mar 1.39; Luk 4.44. Yesù na tsyeere beè wɔ̀ blà bla reè ko wɛ̀ɛ̀rìì reè sapɛ doùn, è mòdzian kàràn beè è re ŋaablabegba rèè doùn. À Ŋaablà re Màsàbee kùnàgoo dziɔ̀ dè beè, è mòdzian rè ɲìn'nèè kuan sapɛ cɛrɛmabeè, ko è byɛnma rèè sapɛ. 36#Dɛk 27.17; Mak1 22.17; Mbk2 18.16; Ezk 34.5; Mar 6.34.Àwà Yesù jaadzin ɲɛun jàmaà mà, è ɲììɲii y'à kun. È ɲììɲii y'à kuun, kàtsu è na byɛɔ̀n, è gɔn yè bà vuɔ̀ a ci sàà kuru, kplatsuubaa na ni nìì reè rà waa. 37#Luk 10.2.Tɔ̀un è dzin e re kàràndzin neè rà ci: «Shìmaan gaaramaà giri, ŋà faagoo fa reè dzyɛ̀n. 38Ye dzùtsià màfyɛ̀n, è faagoo fa reè tɛ̀y gaa be dzù rɔ̀n, y'à re shìmaan gaa.»
© 2024 Église Évangélique Mennonite du Burkina Faso (EEMBF) et SIL International