LUKA 22
22
Yesu Ri Thoutheung Phajhi" Khyau" Khyoo:
(Mat 26:1-5; Mar 14:1-2; Yoh 11:45-53)
1Lhid: kaid pui" ga: da" doo cid" abo da zooyho' zoo: pui" ju" wa zi jhang loo bye. 2khainjung agyi moo": yi yo"- Tarha" sara" yi gi byu phung: yi ri gyoug yoomo Yesu ri yo" gau" said pyam wa da" akhyoo" shoo: go" nyid.
Yessu Ri Ab Byid: Pyam Wa Yuda Fain" Lo" Khyoo:
(Mat 26:14-16; Mar 14:10-11)
3Hau: thang: ri satan gi cangzoo: daxe: eig yug moo bo da" Isakarud ga: myheing da" Yuda da" nheigloem: moo vang loo" bye. 4Houg: su" nghoid yoomo nyang: gi Kyu" mho' yhoem: moo zung" lhug: da" dab, vhoeb zoug: yo' khainjung zeing yi yi jhang khyoo: yhe: lho: Yesu ri nyang: khasu" koid: fain" lho: ab byid: wa da" khyoo: ri yhe: sham: goo" nyid. 5Nyangnu" gi gyo: goug yoomo nyang: ri ngei zheung: byid: boem bye. 6Yuda gi gyo: veing" yoomo byu phung: yi asi sho' Yesu ri nyangnu" da" lo, moo ab byid: wa ge da" ayo, ri sho: nyid bye.
Yesu Lhid: Kaid Pui" Voem: Zoo: Shid Re" Soin Nyheung Khyoo:
7Doo cid" abo da" zooyho' zo: pui" moo lhid: kaid da" yang nu" ri said lho: xoin" to' byid: wa da" bidnyid ju" lo. 8Yesu gi Peteru yo" Yohan eig yug ri ngoonu" zo: wa shid' re" lhid: kaid myen" xoin: ri lo" nyheing lang" ge' ga: nhang: kaid.
9Nya: eig yug gi kha: joyoo moo lo" nyheing too" wa lha"» ga: zheing: myid.
10Nyang: tid zi gi nanu" voo khoug: moo vang lo" ri gyid jhuang: dang loo lang" su: yug gi dayug yo" shau" goo" wa. Nya: thang: moo cang lo" lho: nyang: vang lo" da" yhoem: moo bo vang loo" ge'. 11Cangzoo: yi yo" dage" lhid: kaid pui" myen" xoin: ri zoo: wa shid' re" kha: yab moo gi wa lha"› ga: sara: nang ri tid nhang: kaid» Ein: tid kyoo" lho: yhoem: seing: ri tid we'. 12Hau: yug gi «atho' pyam: moo nyheing shoung: to" da" yab zeing: ri toin" shid wa hau: yab moo nyheing ge» ga: tid.
13Cangzoo: eig yug gi thu' lo" lho: Yesu pyeung: kaid ziyo' dakhyoo" shau" goo" yoomo lhid: kaid pui" myen" xoin: rikhyag nyheing too" bye.
Aseing: Da" Myen" Xoin: Zo: Pui"
(Mat 26:26-30; Mar 14:22-26; 1 Ko 11:23-25)
14Ayo, ju" lang" Yesu gi lagyoo: yi yo" dage" zoobue" moo zhoung: jo. 15Nyang: tid zigi ngoo gi kyi" khyeug akhem' shi" da" uri he: da" lhid: kaid myen" xoin: zo: pui" ri nanu" yo" dage" zoo: wa shid' re" gye myid vho. 16Nanu" ri ngoo tid nau da" zigi lhid: kaid pui" koid: da" akhyoo" gi Mangso da" mungdain: moo pui" zeing: koid wa bidnyid aju" shi" uri ngoo gi lhid: kaid myen" xoin: ri khanham we' azoo: loo: wa.
17Hau: thang: ri Yesu gi zabyid khu, ri yu lho: Mangso da jeju" ri bain coung" nghei lang" he: zabyid yhid khu, ri yu ge' nyang: cang" nyang: gam shug goo" ge ga: tid. 18Nanu" ri ngoo tid zigi akhid" mo wigi Mangso da" mungdain: aju" ri" ri" gi ngoo he: zabyid yhid: ri ashug loo: wa: ga: tid tid.
19Hau: thang: ri nyang: gi zooyho' ri yu lho: Mangso da" jeju" ri bain coung" byid: lang" zooyho' ri phe, yu wigi cangzoo: yi ri byid. He: zooyho' gi nanu" shid' re byid: pyam da" nga" gung nghoid. Ngoori myid: boin: nyid wa shid' re" hid: su" koid: ge" ga: tid. 20Houg: yo' dakhyoo" ti" myen" xoin: bain zo: thang: ri zabyid khu, ri doem yu lho: he: da" khu, gi nanu" shid' re shoin: pyam da" nga" suid" moo zhoug: to"- Mangso da" dang: theing" tarha" seig nghoid ga: tid.
21Houg: su" nghoid loug we' yu" ge'- Ngoori gyivoo yi da" lo, moo ab byid: pyam wa su: gi ngoo yo" dage" zoobue" moo nyid. 22Byu da" nya: zoo: gi Mangsoo nyheing soin to" ziyo' dakhyoo" ti"- byu nya: zoo: gi shid: kham: wa. Nghoidloug we' byu da" nya: zoo: ri ab pyam su: koem gi jeom: loo" wa zi nghoid ga: tid.
23Hau thang: ri-angzoo: yi gi nyangnu" mo kha: yug gi hid: su" koid: wa lha"» ga: nyang: cang" nyang: myid: go" nyid.
Kha: Yug Je Gyi: Khyoo: Ngeing Go" Nyid
24Cangzoo: yi gi nyangnu" mo kha: yug gi aya: je gyi: su: nghoid da: khyoo:- ngeig go" nyid boem. 25Yesu gi mougmyid khokham" yi gi mung" byu yi tho' moo yo" seing: vhoeb khang" se' nyid. Amyeing" ci: mo, we' nyang: nya: da" gung ri meing byu yi ri pang" thoug bang: ga: tid nhang: nau nyid boem. 26Nghoid loug we' nanu" nyang: cang" nyang: moo koem gi houg: su" abui" nhang: goo. Nanu" mo gyi: thang su: gi je nge thang su: yhangti" bui" ca. Vhu" jhung: bui: noug mo, gi dei: zoo: lo, nyab, yhang: ti" koid bui" ca. 27Kha: yug gi je gyi: lha" zoobui" moo zhoung: jo, su: la". anghoid lang" dei zho" nyid su: la". zoobui" moo zhoung: jo, su: gi je gyi: su: anghoid la". Nghoidloug we' ngoo gi nanu" mo dei zho" da" zooshang: yhangti" nghoid nyid.
28Nanu" gi ngoo yo" dage" jhu, phyo' lhu: pyang shau" nyid mo, nghoid da. 29Phoo Mangsoo gi ngoori vhoeb khang" wa da" amyeing" byid: to" ziyo' dakhyoo" ti"- ngoo we nanu" ri vhoeb khang" wa da" amyeing" ri byid: bye. 30Nanu" gi nga" mungdain: khoug: moo-zo: shug nyid doem wa. Hau: tho' moo gootu: Tarha" zhungtang tho' moo zhoung: lho: Israela byu daxe: eig koung: bang: ri yo" vhoeb khang" ci: boem wa zi nghoid.
Yesu Ri: Peteru Ngeig Pyam Wa Khyoo: No" Re" Tid Kyo".
(Mat 26:31-35; Mar 14:27-31; Yoh 13:26-31)
31Simun we"- Simun we"-tam" gyoo: we' yoothung" gug soem: yo" gug moo, ge ziyo' age ziri khyeung yhangti"- nanu" dangain" mo, ri khyeung yu" wa shid' re" satan gi amyeing" yoo" bye. 32Houg: yoomo Simun e" re" da" loem" jeing" nheigloem: emyid geing: teing wa shid' re" ngoo akyu" mho' byid: bye. Nang doem boin: gyeing: lo da" uri re" mang: nhung" yi ri yoem: doem lung: byid: ca" wa"- ga: tid kyo.
33Peteru gi Aseing: we"- ngoo gi thung: yhoem: ju" loo" loug we' shid: wa joyoo moo ju" loug we' Aseing: yo" dage" cang loo wa jen" jen" anghoid ga: phoug tid.
34Peteru we" nang ri ngoo tid ba:- akhei myen gyo, atoin: shi" ri nang gi ngoori asi ga: soem" lheing: ju" sho' ngeig pyam wa zi nghoid ga: ga: Yesu tid.
Ngei Thung: Thung: Nghoi" Yo" Sham: Byang
35Hau: thang: ri Ngoo gi nanu" ri ngei thung:- thung: vhui" khyid: baid aci: nhang: loo: danhang: kaid. Hau: uri nanu" moo daja: ja: ca" goo" la"» ga: nya: cangzoo: yi ri myid.
Cangzoo: yi koem gi ci: aca" ga: doem tid boem.
36Yesu doem tid zigi akhid" nanu" gi ngei thung:- thung: vhui" yo" ri ci: ge'. Sham: ayo" rigi byi: mi oung" pyam lho: sham: qei ci: ge'. 37Nanu" ri ngoo tid zigi hau: yug gi byu said mo, da" zhayen" moo yo" bo ga: da" jhoem: dang: yo' dakhyoo" ti"- ngoo moo bui" wa nghoid. Khasu" wim gari nga" khyoo: ri lhid" to" ziyo' dakhyoo" deing" deing bue" loo yoomo nghoid.
38Cangzoo: yi koem gi «Aseing: we" yu" we' hid: moo sham: eig cam" bo» ga: tid boem. Nyang: gi «hau: gu: gi" bye:» ga: doem phoug tid
Zhainlun Boem Tho, Moo Yesu Akyu" Mho' Khyoo:
(Mat 26:36-46; Mar 14:32-42)
39Yesu gi lhoung koid ziyo' dakhyoo ti" zhainlun boem tho' khyoo: do, yhe: lo. Cangzoo: yi we' nya: thang: moo cang yhe: lo. 40Hau: joyoo moo ju" yhe: lo" boem ri Yesu tid zigi Nanu" gi jhu, phyo' mhoid" shu" lo" jang" moo abo loo" wa shid' re" akyu" mho' nyid ge" ga: tid.
41Hau: thang: ri cangzoo: yi yo" lug go, daloem: du" fi, moo doem yhe: lo" lho: wigi poid thug thoug akyu mho' zigi 42O"- nga" phoo we"- nang nau nghoid rigi he: da: shen" yhen kyi" khyeug da" goem ri nga" jang" mo ve, pyam byid: we'. Nghoidloug we' ngoo vho: khyo" anghoid nang myid: vho: khyo" za: bue" loo baja". 43Mougkhung: tho' mo moug: lagyoo: dayug gi ju" thu' lo lho: nyang: ri yoem: re" byid. 44nyang: gi atho' tid loo: sho' nheigloem: moo kyi" khyeug nyid wigi soo" soo" akyu" mho' nyid. Houg: yoomo nya: da" bidkyu" khyi, gi suid" zo, yhangti" myidjang: moo gyo" nyid.
45Nyang: gi akyu" mho' nyid da" jang" mo to' lho: cangzoo: yi jang" moo doem lo" yu" ri nyangnu" gi gye" myoung: dau zoore"- yhoeb' pyo: jo, lang" ziri lo" myang. 46Nyang: tid zigi nanu" ci: koid: yhoeb jo, goo" lha"- too ge'- jhu, phyo' mhoid" shu" lo" jang" moo- abo loo" wa shid' re" akyu" mho' nyid ge' ga: tid.
Yesu Ri: Myheig Lo" Khyoo:
(Mat 26:47-56; Mar 14:43-50; Yoh 18:3-11)
47Houg: su" ga: Yesu dang: da tid nyid shi" uri nyang:- byu phung: daphung: jure" boem bye. Cangzoo: daxe: eig yug moo boo su:- Yuda gi houg: bang: ri shu" vhu" she: re. Nyang: gi Yesu ri boobug bug wa ga: yu: tain" re. 48Nghoid loug we'-Yesu gi Yuda we"- nang gi boobug boug khyo" byu da" nya: zoo: ri gyivoo yi da" lo, moo ab pyam wa la"» ga: myid.
49Nya: cangzoo: yi koem gi akhyoo" ri zheing: se' yu yoomo Aseing: we"- ngoonu" gi sham: yo" zheing: khaid jab wa la"» ga: myid: boem. 50Cangzoo: dayug gi Khainjung agyi pho, da" join dayug ri jab' kaid ri hau: youg da" lo, yo shoid mo nukhyab byid' gyo" lo.
51Houg: lang" nga: gi gi" bye: ga: tid. Yesu da" lo, wigi hau: byu da" nukhyab doem koid: tab byid: ri houg: jang: doem ge lo.
52Hau: thang: ri Yesu gi nyang: ri myheig wa ga: jure" da" Khainjung agyi zeing yi No ku" yhoem: moo" zung" nyid da" gyizoug: yi yo"- Phoung: vhu" jhung: yi ri Nanu" gi khyangtoug: ri myheug yhangti"- ngoori myheig wa shid' re" sham: we' thung" keing: we' dari" go" rhe. 53Ngoo nyid" khang" moo"- No' ku" yhoem: moo" khoug: moo nanu" yo' dage" nyid da" uri nanu" gi ciwim ngoo riamyheig go" Nghoidloug we' he: da" ayo, gi nanu" da" ayo,- moug coid da" phung yoeb nghoeb ci: da" ayo, nghoid ga: tid.
Peteru Yesu Ri: Ngeig Pyam Khyoo:
(Mat 26:57-58,69-75; Mar 14:43-54,55-72; Yoh 18:12-18,25-27)
54Houg: bang: gi Yesu ri yo" myheig yu lang" khainjung agyi moo" da" yhoem: khyoo: khe: shu" yhe: lo" boem. Peteru gi vi" vi: moo cang re" nyid. 55Byu dayham" gi tarha" yung" agung moo myi: moid gang go" nyid. Peteru gi nyangnu" da" agyoo: moo bo vang zhoung: jo. 56Nyang: houg: su" bo vang zhoung: jo, ziri dei dei da" myiyi: zoo: dayug myang wigi Nyang: ri yu" zhug to" lho: he: yug gi Yesu yo' nyid yen" su: nghoid ga: tid.
57Nghoidloug we' Peteru gi myiyi: zoo: nang we"- hau: yug ri ngoo asi lhe"- ga: ngeig pyam.
58Hau: thang: daso' myang" lho: ri Byu dayug we' Peteru ri myang wigi nang we' houg: bang: phung: moo boo su: dayugnghoid ga: tid.
Nghoidloug we' Peteru gi Byu phoo nang we"- hau: byu phung: moo ngoo aboo ga: doem ngeig pyam.
59Hau: thang: ri da nayi koo: myang" lang" Byu gootu: dayug gi He: yug gi galile mung" byu nghoid lho: Yesu da" byen cang" phoo nghoid zi ci: loem" shoid cang aboo ga: tid.Khasu" wim gari nyang we' Galile byu dayug nghoid nghoid loug we' Peteru gi byu nang we"- nang cenoem tid ziri ngoo ase' gyoo:- ga: doem ngeig pyam.
60Houg: jang: nyang:- hid: su" tid nyid da" uri gyo, toin: loo bye. 61Aseing: gi Peteru ri lheing: yu" kaid. Houg: lang" Peteru gi naakhoomyen gyo, atoin: shi" ri nang gi ngoori asi ga: soem" lheing: ngeig pyam wa ga: tid to" da" Yesu dang: ri myid: boin: lo 62Houg: yoomo nghe: shoid khyoo: thu' lo" lho: nheig koug wigi ngau nyid.
Yesu Ri: Juang" Yi Baid Pyoug Khyoo:
(Mat 26:67-68; Mar 14:65)
63Yesu ri zung" nyid mo, gi nyang: ri juang" yi youg baid boopyug pyoug to" boem. 64Nyangnu" gi nya: myonhoo: moo nghoeb too" byid: lho: ri baid zi hang" nghoid Lapi: pe: yu" we' ga: tid boem. 65Dang: gootu: khyo" we' nyangnu" gi nyang: ri juang" yi nyid boem ago".
Yuda Tarha" Kongsi Moo- Yesu Ri: Shu" Re" Khyoo:
(Mat 26:59-66; Mar 14:55-64; Yoh 18:19-24)
66Myo, myang lo da" uri Yuda byumyu" vhu" jhung: yi nghoid da" khainjung agyi yi yo"- tarha" sara: yi gi zeing: foem: nyid abye: go. Hau: thang: ri Yesu ri nyangnu" nya: da" tarha" kongsi: moo khe: shu" lo" ago". 67Nyangnu" tid zigi nang gi Meshia nghoid la". ngoonu" ri tid kyoo" we' ga: myid: boem.Nyang gi ngoo tid ri nanu" loem" jeing zi anghoid. 68Ngoo nanu" ri dang: myed: ri nanu" we' phoug tid wa zi anghoid. 69Nghoid loug we' akhid" mo wigi Byu da" nya: zoo: gi yoem: moo" bo da" Mangso da" lo, yo shoid moo yo" zhoung: jo, wam: bye: ga: tid.
70Houg: bang: gi houg: su" nghoid lang" nang gi Mangso da" nya: zoo: nghoid la"» ga: myid.
Nyang: nyangnu" ri doem phoug tid zigi nanu" tid ziyo' da khyoo" ngoo nghoid.
71Houg: lang" nyangnu" gi ce: sagsi: shoo: ca" shi" la". ngoonu" nyang: nya: dang: ri shaug" gyoo: bye: gootu: sagsi; ashoo: ca" loo.
Lacid Bible © Bible Society of Myanmar, 2009.