लुका 24
24
1ओहाङःसैको येसु सीनम् दीन्कोः चीत्सैलो आइतेबार् दीन्हाङः ओउः येसुकायः पाम्ह्ओ योती मुओ मोमःचोःलम्इ न्याम् थोङ्खयःओ बेलाहाङः च्योक्ती ओउःमयःइ ङ्हा र्ययःती गम्ओ पेओ सातीलम् लात्ती येसुकोः तेस्ताङ् आल्आकाय्। 2ओउःकोः तेस्हाङः आल्ती दाह्आक्तीको ओउः घाङ्कोः ल्होप्ती गम्ओ बाङ्पाय् ओउः तेस्घाङ्सै तुलुती आलःओ च्यवःआकानी। 3ओउः घाङ्पाय् फोल्ती मुओ ओउः मोमःचोःलम् घाङ् भीत्र पोक्वाङ्इतो भीत्रहाङः येसुकोः म्हाङ्पाय् मुल। 4येसुकोः म्हाङ् मुमाःत झ्यान्ते ओउःमयः आन ग्याङ्ह्आकाय् ओहाङःसैको ओउःमयः ग्याङ्ह्ती मुतोक्हाङः रोमो तोकोलेः नीस्चाक् आन भाम् फीर्लीक् त छोओ नाय् लावओ मान्तालम् च्यवःआकानी। 5इत च्यवःती ओउः मोमःचोःलम्पाय् आन रैती युम्ह्ती झ्यान्ते खुङःती मुआकाय्। ओउः नीस्चाक्इपाय् ओउः मोमःचोःलम्कायः तोती “दोह् हायःतीतेः नीङ्इ सेलः मुओचाक्कायः सीओ मान्ताकोः थाव्हाङः बोङःतेःनानी। 6येसुपाय् इहाङः मुल उह्ती च्योक्ओ लेःआः बा। ओउःपाय् सीधाङ्माखाहाङः गालील वाह्ती मुतोक्हाङः 7‘लौ ओउः मान्ताकोः चोः त तोओकायः पेमालो मान्तालम्कःताङ् दाक्ती ल्हासा खेःतो। ओउःमयःकःताङ् दाक्ती ल्हाआक्तीको ओउःकायः क्ल्याय्ओ सीङःहाङः योकोःती सात्सा खेःतो। सात्नम् दीन्कोः चीत्सैलोहाङः ओउःपाय् उह्ती सेलः स्याव्ती च्योक्लेःनाः’ त दाय्ह्ती येसुइ तोतेःआकाय् माः र। इत नीङ्इ गीलतेःनानी” त दाय्ह्ती तोआथास। 8ओहाङःसैको ओउः मोमःचोःलम्इ येसुइ ङ्हा तोओ कुरापाय् गीलती 9ओउःमयः तेस्घाङ्सै ग्ल्युङ्ह्ती मेस्लो च्यवःओ कुरापाय् येसुकोः एघारजन छ्युङ्ह्ओमयःकायः सबै ल्हाक्ती तोलाङ् पाय्ह्आकाय्। 10ओउः मोमःचोःलम्पाय् मरीयम् माग्दालामा योआनामा याकुब्कोः आमा मरीयम् त तोओमा खेःइतो। ओहाङःसैको ओउःमयः पाय्ह्ती वाङ्आक्तीको ओउः मोमःचोःनीस्इमा ओउःनीस्कुस् मुओ मोमःचोःलम्इमा सबै कुरापाय् येसुकुस् वाह्ओमयःकायः सबै ल्हाक्ती छ्यानःनीतो 11ओउः मोमःचोःलम्इ ल्हाक्ती छ्यानःओ कुरापाय् “इ आह्रे तोओ लेःआः” त दाय्ह्ती अरुलम्इ दोह्मा ङ्हाम्थासल। 12पत्रुस्खे चीङ्ती येसुकोः तेस्राङ्ताङ् तन्ती आल्ती येसुकायः पाम्ह्ओ घाङ्ताङ् खुङःती भीत्रहाङः योआकान्। भीत्र योतोक्हाङःपाय् येसुकोः ह्रावःनाय् ह च्यवःआकान् येसुकोः म्हाङ् मुल। इत च्यवःती पत्रुस्पाय् आन ग्याङ्ह्ती लयःकोः कीम्ताङ् पाय्ह्आ।
13ओहाङःसैको ओउः आइतेबार् दीन्हाङःमा अरु नीस्चाक् येसुकुस् वाह्ओमयः एमावुस् त तोओ गाव्ताङ् आल्ती मुओ खेःतो। ओउः गाव्पाय् यरुसालेम्सै एघार कीलोमीतर्च्युक् लोक्तो खेःतो। 14ओहाङःसैको आल्तोक् बेलाहाङः ओउःनीस्पाय् आल्दा आल्दा ल्याम्हाङः वाह्तोक्हाङः सबै येसुकायः स्याव्ओ कुरालम् लयःमयः नोःकाय्आकाच। 15इत नोःकाय्तोक् बेलाहाङः येसुपाय् लयःलेः ओउःनीस्कोः चीनःसै दाह्ती वाङ्ती ओउःनीस्कुस् वाह्इतो 16“इपाय् येसु लेःआः” त ओउःनीस्इ तय्ह्आक्चुलु। 17ओहाङःसैको “लौ इ ल्याम् वाह्तोक्हाङः नीङ्जी दोह् दोह् त नोःतेःकाय्तेःआकाज” त दाय्ह्ती येसुइ व्हत्आथाच। इत व्हत्आक्तीको ओउःनीस् ल्हुङ् लीह्ती न्यास्आकाच। 18“तेन्छ्याङ् स्याव्ओ कुरापाय् यरुसालेम्हाङः मुओलम्इ सबै चीःनानी बा। नाङ्इ तोहालेः वाङ्ती झ्यान्ते नाङ्इ ह इ कुरातेः सायःतेःनीली यादो” त दाय्ह्ती यात्चाक् क्लेओपस् त तोओइ त्याङ्ती तोआथै। 19“दोह् कुरालो” त दाय्ह्ती येसुइ फेरी व्हत्आकान् “नासरेत् गाव्सै वाङ्ओ येसुत तोओकोः कुरालेः। ओउः येसुपाय् परमेस्वर्कोः कुरा पेतो चीःती परमेस्वर्कोः मीक्हाङःमा सबै मान्तालम्कोः मीक्हाङःमा ओउः कुरा छ्यानःतीलेः तोमाआकान् आन ताङ्ह्ओ ग्याङ्ह्राय्लम् जाङ्ह्माआकान्। 20इ पेतो हायःओ येसुकायः ङीकोः ताङ्ह्ओ मान्तालम्मा पुरोहीत्लम्इमा रोमी सर्कार्कोः मान्तालम्कःताङ् दाक्ती ल्हाती ओउःकायः गाल्तुम्ती तोआक्तीको क्ल्याय्ओ सीङःहाङः योकोःती सात्ताक्आथै। 21ओउःमयःखे सात्ताक्आथै ङीखे ओउः येसुपाय् इस्राएली मान्तालम्कायः दुस्मान्सै दल्ताक्सा खेःओ ख्रीस् लेःआः त ङीइ ताःङुसुतो द्याह् ओउःपाय् सीओ लेःआः। माः है ओउःकायः सात्आक्तीको द्याह् सुम् दीन् स्याव्आ। 22ओहाङःसैको तेन् बीहानहाङः यात्नीस् ङीकुस् मुओ मोमःचोःलम्इ आन ग्याङ्ह्सीःओ कुरा ल्हाक्ती तोआताङी। ओउःमयःपाय् बीहान च्योक्तीलेः येसुकोः तेस्ताङ् आल्ताङःइतो 23ओहाङः दाह्आक्तीको येसुकोः म्हाङ्ताङः च्यवःताङःनीली। ‘ङीइपाय् परमेस्वर्कोः लाङ्कासै ल्होक्ओमयः च्यवःआलाङी ओउःमयःइ “लौ येसुपाय् सेलः मुलेःनाः” त दाय्ह्ती तोआताङी’ त दाय्ह्ती ओउः मोमःचोःलम् द्यान्ह्ती तोलाङ् पाय्ह्आकाय्। 24ओउःत झ्यान्ते यात्नीस् अरु ङीकुस् मुओलम्मा येसुकोः तेस्ताङ् आल्ती ओउः मोमःचोःलम्इ तोओलो लेखालेः सोह् घाङ् ह च्यवःताङःआकानी येसुकायः च्यवःताङःनीली” त दाय्ह्ती ओउः नीस्चाक् एमावुस्ताङ् वाह्ओलम्इ येसुकायः ल्हाक्ती तोआथै। 25ओउःत सायःआक्तीको “अ नीङ् चीःमालो मान्तातेःआः इ। परमेस्वर्कोः कुरा छ्यानःओमयःइ ङ्हा तोओ कुरापाय् दोह् हायःतीतेः इत पेतो ङ्हाम्तेःनीली। 26ओउः मान्तालम्इ परमेस्वर्कोः आखरःहाङःपाय् परमेस्वर्इ ङ्हा तोती गम्ओ कुरा ख्रीस्कायः तोती ‘ओउःपाय् आन लीह्सीःओ गोरःती सीआक्तीको परमेस्वर्कुस् अङ्ग थङ्ग त आन पेतो स्याव्सा खेःनाः’ त दाय्ह्ती लेखती मुनाः माः र” त दाय्ह्ती येसुइ ओउः नीस्चाक्कायः तोआथाच। 27ओहाङःसैको मोसाइमा परमेस्वर्कोः कुरा छ्यानःओमयःइमा उय्ह्लेकोः आखरःहाङः लेखओ कुराहाङः लयःकायः दोह् दोह् लेखती मुनाः त येसुइ ओउःनीस्कायः छ्यानःआथाच।
28ओउःत हायःदा हायःदा ओउः नीस्चाक् येसुकुस् वाह्ती आल्ती ओउः नीस्कोः गाव्ताङ् दाह्आकाय्। ओहाङः दाह्खेःतोक्हाङः येसुखेइ ओउःनीस्कःसै वेङ्ती आल्सा बोङःगार्उतो 29इत च्यवःती ओउःनीस्इ “खेःल है नीचीकुस् एनःलाङ् वाङ्अ दै। द्याह् न्याम् याह्आतय्ही” त दाय्ह्ती ओउःकायः होम्ती तोआकाचु। इत होम्ती तोओ ग्याती येसु ओउःनीस्कुस् पाय्ह्आ। 30ओहाङःसैको पाय्ह्आक्तीको ओउःमयः कीम्हाङः दाह्ती पोक्ती जेःती मुओ खेःतो। जेःती मुतोक्हाङः येसुइ लाङ् रोत्ती परमेस्वर्कायः “च्युता” त दाय्ह्ती लुङ्ती तोआकान्। तोआक्तीको ओउःइ लाङ् फन्ह्ती ओउः नीस्चाक्कायः वेःती बयःआथाच। 31इत हायःतोक्हाङः “इपाय् येसु लेःआः रैस” त ओउःनीस्इ तय्ह्आकाचु। येसुकायः तय्ह्ओ कुस्ब्रक्त ओउःपाय् मीह्ती ज्याल्आ। 32येसु मीह्आक्तीको “दोङ्सीलेः नीची ल्याम्हाङः वाह्तोक्हाङः ओउःइ परमेस्वर्कोः आखरःहाङः लेखओ कुरा छ्यानःती तोओ बेलाहाङःपाय् नीचीकोः ल्हुङ्पाय् आन रोआलाङःच माःर” त दाय्ह्ती ओउःनीस् नोःकाय्आकाच। 33ओहाङःसैको इत नोःकाय्आक्तीको ओउःनीस् चीङ्ती यरुसालेम्ताङ् द्यान्ह्ती आल्आकाच। ओहाङः द्यान्ह्ती दाह्आक्तीको येसुइ छ्युङ्ह्ओ एघारजनलम्मा अरु येसुकुस् वाह्ओमयःमा यात् कीम्हाङः हुम्ती मुओ क्रुस्आकाच। 34ओउःमयः क्रुस्तोक् बेलाहाङः “लौ ङीकोः प्रभु येसुपाय् दोङ्सीलेः सेलः स्याव्ती च्योक्ओ लेःआः बा। सीमोन् पत्रुस्कोः मीक्हाङः ओउःपाय् मेस्खा थाओआः बा” त दाय्ह्ती हुम्ओ मान्तालम्इ ओउः एमावुस् गाव्सै दाह्ओ नीस्चाक्कायः ल्हाक्ती छ्यानःआथाच। 35“नीचीइमा ओउःकायः च्यवःआलाङःचु। लाङ् फन्ह्ओ बेलाहाङः नीचीइ ओउःकायः तय्ह्आलाङःचु” त दाय्ह्ती ओउःनीस्इ सबै ल्याम्हाङः स्याव्ओ कुरामा लाङ् फन्ह्ओ कुरामा ल्हाक्ती सबैकायः छ्यानःआथास।
36ओहाङःसैको इत छ्यानःती नोःकाय्तोक् बेलाहाङः रोमो तोकोलेः ओउःमयःकःहाङः येसुलेः थाती वाङ्आ। थाती वाङ्तोक्हाङः “लौ ल्हुङ् धोमाय्तोलेः मुन दा” त दाय्ह्ती येसुइ ताथासतो 37“इपाय् दोह्लो रीःया दोह्या” त म्हर्ती आन रैआकाय्। 38“दोह् हायःतीतेः ‘इपाय् दोह्लो’ त ल्हुङ्हाङः म्हर्ती इत रैतेःनै। 39लौ ङाकोः क्रुत् दोम् योनाङ्स ङा लेःआः बा। ङाकोः मायःमा दीन्ह्ती योनाङ्स। रीःलम्पाय् ङालो लेखा ह्रुस् मायःपाय् नाःल बा” त दाय्ह्ती 40येसुइ लयःकोः क्रुत् दोम् आङ्पाय् छ्यानःआथास। 41ओउःकोः आङ् छ्यानःतोक्हाङः ओउःमयः ग्याङ्ह्गार् ग्याङ्ह्गार् चोङाय्तीलेः “इपाय् गत स्याव्चाः” त ल्हुङ्हाङः पेतो ङ्हाम्माःत म्हर्आकाय्। ओउःमयः इत म्हर्तोक्हाङः “लौ ङाकायः जेःगा गम्तेःनेःनानाङ्सया” त दाय्ह्ती येसुइ तेती तोआथास। 42ओउःमयः येसुकायः खाङ्ओ ङाः बयःआथै 43ओउः ङाः येसुइ त्याक्ती सबैकोः मीक्हाङः जेःआकान्। 44ङाः जेःआक्तीको “ङा नीङ्कुस् ङ्हा मुतोक्हाङः ‘लौ मोसाइमा परमेस्वर्कोः कुरा छ्यानःओमयःइमा भजन्हाङःमा ङाकायः लेखती तोओ कुरा सबै ताप्तो स्याव्सा खेःतो’ त ङाइ दाय्ह्ती स्यान्नेःआलाङ्स” त दाय्ह्ती 45येसुइ परमेस्वर्कोः आखरःहाङः लेखओ कुरापाय् फेरीलेः छ्यानःती चीःताक्आथास। 46“परमेस्वर्इ तोती गम्ओ ख्रीस्त तोओलेः ‘लीह्सीःओ गोरःती सीसा खेःतो। सीआक्तीको सुम् दीन् पुत्आक्तीको ओउः उह्ती च्योक्लेःनाः’ त दाय्ह्ओ लेखती मुनाः। 47ओहाङःसैको यरुसालेम्हाङःमा लोने सबै देस्लम्हाङःमा ‘लौ रेव्ओ काम्लम् फेती ख्रीस्इ तोओ कुरा ङ्हाम्ओ त खेःया रेव्ओ काम् जाङ्ह्झ्याङ्कोः क्युम्ह्ती वाय्सालेः स्याव्नाः’ त दाय्ह्ओ सबैकायः तोसा खेःतो। इ कुरा परमेस्वर्कोः आखरःहाङः लेखती मुनाः। 48ङाइ स्यान्ओ कुरामा नीङ्इ सायःतेःआकानी ङाइ जाङ्ह्ओ कुरामा नीङ्इ च्यवःतेःआकानी ओउःत झ्यान्ते इ कुरापाय् नीङ्इ अरुलम्कायः छ्यानःसा खाय्तेःनानी। 49लौ परमेस्वर्कोः ग्वम्पाय् ङाकोः आपाइ तोती गम्ओलो लेखा ङाइ लोने दोःताक्तेःनै। ओउःइ त्यावःअसै दोःओ ग्वम् बयःतेःनै ओउः बयःधाङ्माःच्युक्कायः इ यरुसालेम् सहर्हाङः ल्युङ्ह्ती मुन” त दाय्ह्ती येसुइ तोआथास।
50ओहाङःसैको इत तोआक्तीको ओउःकुस् वाह्ओमयःकायः येसुइ सहर् बाहीरताङ् आलःती बेथानी गाव्ताङ् वानःआथास। ओहाङः दाह्ती वानःआक्तीको येसुइ परमेस्वर्कायः क्रुत् पालाहाःती लयःकुस् वाह्ओमयःकायः आसीक् बयःआथास। 51ओहाङःसैको आसीक् बयःतोक्हाङः ओउःमयः योयोबालेहाङः येसुपाय् लाङ्काताङ् लनःओ खेःतो। 52ओहाङःसैको येसु ओउःकुस् वाह्ओमयःकःसै वेङ्काय्आक्तीको ओउःमयः येसुकायः ताङ्ह्आक्तीको चोङाय्तीलेः यरुसालेम्ताङ् द्यान्ह्ती पाय्ह्आकाय्। 53यरुसालेम्ताङ् पाय्ह्आक्तीको ओउःमयः मन्दीर्ताङ् छ्युह्तीलेः आल्ती ओहाङः परमेस्वर्कायः ताङ्ह्ताक्तीलेः तोझुङ्आकानी।
© 1993 Wycliffe Bible Translators Inc., All Rights Reserved.