Tegagia 9
9
Pedandia-Do Ue Ala saru i Noho
9:1-17
1 #
Teg. 1:28
Ondae Ue Ala rumonsoo i Noho ka luwuno anano, saru mepau ndi ondae, ”Impo'ulemo ka intetiangimo hadio ka imebuketio tolino. 2Luwuno kondehora mo'ila, luwuno manu-manu i laro meene, luwuno kondehora anu melelu i tolino ka luwuno bou a ntahi, ira medoito ka mpondende ndi omue. Luwuno atuu pineweengakoomo a ngkaemu. 3Luwuno anu melelu, anu tuwu, ta gagi kaangamu. Kuweeakomumo luwu atuu kana mbo'u luwuno pinopaho mololowulu. 4#Ima. 7:26-27; 17:10-14; 19:26; Win. 12:16, 23; 15:23Butu bau anu da saru reano, onaemo penaano, si mengkaano. 5Sine, a reamu, onaemo penaamu, Aku motuntu pombalo; inso a luwuno kondehora, Aku tumuntuo, ka inso a sompo mia, Aku tumuntuo penaano pe'asa miano. 6#Teg. 1:26; Pel. 20:13Isema mo'uwu reano mia, reano ira me'uwuo mia, hangano mia pinokogagi, montonda gambara-Do Ue Ala. 7#Teg. 1:28Ka omiu impo'ulemo ka intetiangimo hadio, ranta nahi pinokodoa hadiomiu i wawontolino, oo, intetiangimo hadio i wawono.”
8Mepau Iramo Ue Ala ndi Noho ka a luwuno anano anu merongaakono, 9”Menteeano Aku moweweu pedandia-Ku saru omiu ka inulemiu, 10ka saru luwuno anu tuwu anu perongamiu: luwuno manu-manu, pinotuwu ka kondehora mo'ila anu perongamiu, anu mpeluarako inso a bangka atuu, luwuno kondehora i tolino. 11Kupakosio pedandia-Ku saru omiu, nine mompu'u andio luwuno anu tuwu nahi ta pinokotampulaako mbo'u lolowi, ka nahi ta hina mbo'u lolowi rumopuo tolino.” 12Ondae Ue Ala mepau, ”Ndiomo tondonino pedandia anu wineweu-Ku i olo-Ku ka omiu saru luwuno anu tuwu anu perongamiu, mapa'api-api inule ranta nahina tampulaano. 13Toro'ue-Ku Kunaao a nseru gagi tondonino pedandia olono Ongkue ka tolino. 14Tewala mompotii Aku seru i wawontolino ka toro'ue atuu tengkita a nseru, 15Aku rumambeo pedandia-Ku anu hinaomo i olo-Ku ka omiu saru luwuno anu tuwu, luwuno anu hinao penaano. Nahi ta hina mbo'u uwoi anu gagi lolowi ta rumopuo luwuno anu tuwu. 16Tewala toro'ue atuu kongko a nseru, Aku koa kumitao, ka rumambeo pedandia-Ku anu nahina tampulaano i olo-Do Ue Ala ka luwuno anu tuwu, luwuno anu tuwu anu kongko i tolino.” 17Mepau Iramo Ue Ala ndi Noho, ”Ndiomo tondonino pedandia anu wineweu-Ku i olo-Ku ka luwuno anu tuwu anu kongko i tolino.”
I Noho ka luwuno anano
9:18-29
18Luwuno anano i Noho anu mpeluarako inso a bangka onaemo i Semu, i Hami ka i Yapeti. I Hami, onaemo amano i Kana'a. 19Ondaemo atuu otolu ira anano i Noho ka insomo ndi ondae tesiarawo luwuno palili anu mpo'ia i tolino. 20I Noho gagi puu mpelere; onaemo anu amba-ambano moweweu lere anggoro. 21Mansano mo'inu anggoro, onae molangu ka kolambe-lambe a laro ngkemano. 22I Hami, amano i Kana'a, kumitao anuno amano, ka i'amba tumutuluo a orua ira pepaekompono i bungkuno. 23I Semu ka i Yapeti umalao asa lewe sawu ka dowileo a oweado orua ira. Ka do'amba melempa monsuka, ka dotutuwio anuno amado saru wolilio rupado, kasi dokitao anuno amado. 24Mansano telike i Noho inso a molanguno, ka ito'orio hapa anu wineweuno anano anu tompasusu, 25motaeomo,
”Tetotonaaomo i Kana'a,
onae ta gagi ata anu tedoa pinokongkodei a luwuno pepaekompono.”
26Ipotae mbo'u,
”Inunde-unde Iramo i Ue, Ue Alano i Semu!
Po'ineeomo i Kana'a gagi atano.
27Po'ineeomo Ondae Ue Ala mokomaluao po'iangaano i Yapeti.
Po'ineeomo ipo'ia a laro luwuno kemano i Semu, ka i Kana'a gagi atano.”
28I Noho da tuwu tolu etu ka lima pulu nta'upo mbo'u, umarino lolowi. 29Gaagi, tinuwuno i Noho hawe sio etu ka lima pulu nta'u, ka i'amba mate.
LAI 2021