Tegagia 13
13
I Burama ka i Lo'oti mensua
13:1-18
1Ka i'amba i Burama melungka inso i Masiri lumako i wita Nege saru beineno ka luwuno arataano; i Lo'oti mbo'u meronga saru onae. 2I Burama tedoa kaea, hadio pinotuwuno, salaka, ka wulaa. 3Onae melempa inso i wita Nege, inso a mperatoa lumako a mperatoa, hawe umpeda i Beteli, po'iangano kemano amba-ambano pinontade, olono Beteli ka kota Ai, 4ka po'iangano meda pontunua pesomba anu wineweuno i ndi'ipua. I tu'aimo i Burama moboio nee-Do i Ue. 5I Lo'oti, anu tumondao i Burama, hinao mbo'u asa bawaa bembe bimba, bawaano sapi ka kema. 6Sine wita atuu nahi tasompo po'iangado meronga-ronga, hangano arataado tedoa hadio, onaemo pu'uno nahi dopokompo'ia meronga-ronga. 7Ka i'amba gagiomo pe'u'uaado puu mpopakambino i Burama ka puu mpopakambino i Lo'oti. I tempo atuu to Kana'a ka to Perisi mpo'ia i wita atuu. 8Motaeomo i Burama ndi Lo'oti, ”Siimo ihina pe'u'uaa i oloku ka omue, ka i olodo puu mpopakambiku ka puu mpopakambimu, hangano ontae ndio mepe'etu. 9Kombake luwuno wita andio kongko i aromu? Moikoomo omue mensua inso ndi ongkue. Tewala omue lumako i manggali, ongkue i koana; tewala omue lumako i koana, ongkue i manggali.” 10#Teg. 2:8-10Ka i'amba i Lo'oti mengkita ngkoraane, ka ikitao luwuno Lembono Yarade hawe i Soari, se'eluno napi Dopokotampulao i Ue Sodomo ka Gumora. Lembono atuu hadio uwoino kana bonde-Do i Ue, kana wita Masiri. 11I Lo'oti binikio tiano luwuno Lembono Yarade atuu. Ka i'amba melungka te'aro i sabaano oleo ka dopensua. 12I Burama rodo mo'ia i wita Kana'a, ka i Lo'oti rodo mo'ia a luwuno kota i lembono atuu ka mekema umpeda i Sodomo. 13To Sodomo tedoa melambaha ka ntehala ndi Ondae i Ue.
14Mansano mensua i Lo'oti inso ndi Burama, mepau Iramo i Ue ndi Burama, ”Pengkitamo ngkoraane ka kitaomo inso a mpentadeamu i utara ka i selata, i sabaano oleo ka i sumooano oleo. 15#Tin. 7:5Hangano, luwuno wita anu kinitamu atuu, Aku weeakomu ka inulemu ranta nahina tampulaano. 16Aku mokogagio inulemu kana awu wita hadiono. Ba hinao mia mokodoao awu wita, inulemu mbo'u pinokodoa. 17Lakomo, lempao wita atuu, moiko ondauno maupo maluano, hangano ndi omuemo Aku meweengakono wita atuu.” 18Ka i'amba i Burama lumimbao kemano ka rodoomo mo'ia umpeda a hadio keu tarabantino i Mamere, umpeda i Heberoni. I tu'ai ipowangu meda pontunua pesomba ndi Ondae i Ue.
LAI 2021