Yohanes 21
21
Yesus en At ane welagwi menda eneyave 7 enadema inuk lagagi wene
1Anderogo ogagya lagagirik, hivis Yesus en At ane welagwi menda inamut yanggadek inis Tiverias akoma werekma, At eyave ambi inim inuk era wagagi. Inuk era wagya dugwit, ogagagi ako yi: 2At Simon Peterus inim, Tomas inis ambi Embet Labwa salek ako inim, Nataniel o Galilea awi Hana menda ako inim, at Sevedius aburi inim, ap Yesus ane welagwi menda mberen inim, ambekma wonggalek dugwit, 3at Simon Peterus en it yugirigya dugwit, “Avyak wai! An ikan wari layogon.”
Yugirigya lagagimu, “Ninim lasogom,” yugugu lagagwarik, wunggugwa. Wunggu lagagwarik, mburis vaga nunggugu lagagwarik, o hup o hari andi vaga enasum jala ikan warisagwi menda wombabagek ogagagwa ovara, ikan ambiat ogo watugwabuk.
4Inasum jala ako wombabalit lagusigik, vage o yanggok yup at agya hegek, At Yesus ako is omban vaga mendek yi wagagirik hegek ovara, At ane welagwi menda akoen, “Andi Yesus-at,” yedok hegetek welagagwa. 5Yedok hegetek werekma, Yesus en it yugirigya dugwit, “Naburi wai. Hit ikan ambi watip a, dek a?”
Yugirigya lagagimu, “Mondok ambiarogo watitek.”
6Yugugu lagagwama, At Yesus en, “Yum andi, mburis venak hininggis amotkan vikit andoma wombabas. Wombabagu hiniselok, ikan warusogom.” Yugirigya lagagimu, wombabagu lagagwarik, ikan wisane yetlagagirikmu, anggin en nggigilogo mburis vaga legego badagawarup mondok meyanat agagi.
7Legego badagawarup meyan agya lagagimu, At ane waliga menda ambi Yesus endawi hunik welagagi akoen Simon Peterus yugugu dugwit, “Avyak! Ap andi Nenasin-at haliga,” yiluk, yugogogi. Yugogogi ako at Peterus aruk hobaluk, sogwesum weram menda nggolalek ako yikhedelok mburis ako hekbaluk ima soklok wombagagi. 8Wambigya lagagirik, lagya hegek, is omban vaga horok un 100 meter welagagirikmu, Yesus ane welagwi menda nin akoen yum ikan elagapaga yidik ako mburis vaga liriluk wunggugwa. 9Lirogo wolok is ombanma bawunggu lagagwama, hali enggen vaga ikan inim, erom roti inim, vage weraklagya inil hagagwa. 10Hugu lagagwama, Yesus en it yugirigya dugwit, “Avyak wai. Ikan hit yuguri watip ako nin wolok omanes.”
11Yugirigya lagagimu, at Simon Peterus mburis ako vaga nunggwigya lagagirik, ikan eneyave ombok-ombok 153 yum jala elagapaga erogo yetlagagi ako, lirogo weram is ombanma bawinggigi. Ikan wisane yidik welagagi ovara, yum jala libilagetek welagagi. 12Yum ako is ombanma bawunggu lagagwama, At Yesus en it yugirigya dugwit, “Henagarom nomanes,” yugirigya lagagimu, “Nenasin aro,” yiluk, yedok hugu lagagwarik, it ambi en, “Hat sa?” yugurup enalon en mbup yagagwa. 13Enalon en mbup yugu lagagwama, At Yesus en erom roti wigya lagagirik, wogeragagi. Wogirigya lagagirik, ikan ogo anderogoat wogeragagi.
14Anderogo ogagagi ako andi, Yesus hambuluk lendagwima en iluk akluk mendek iri lagagirik, At ane welagwi menda At eyave enadema inuk lagagi ako andi, endak ndugwis mberen vaga enugirigya lagagirik, hivis ndugwis ambi enadema inuk lagagi ako yiat.
Yesus en Peterus yugogogi wene
15Erom nunggu lagagwama, At Yesus en Simon Peterus ako yugugu dugwit, “Yohanes abut Simon wai! Hat haswemuni yi, horok madugat enendawi hunik oknitusigik, hat andi An ninim hendawi hunik ombok erogo okneraliga a, dek a?”
Yugugu lagagimu, at Peterus en, “Avyarat, Nasin. An nendawi hunik okheraliga ako, Hat hilup aro.”
Yugugu lagagimu, At Yesus en, “An nanggom ndomba maridugi malenombogo dogwen.” 16Yugugu lagagirik, ambi inim yugugu dugwit, “Yohanes abut Simon wai. Hat An hendawi hunik okneraliga a, dek a?”
Yugugu lagagimu, at Peterus en, “Avyarat, Nasin. An nendawi hunik okheraliga ako Hat hilup aro.”
Yugugu lagagimu, At Yesus en, “An nanggom ndomba des erogo malenombogo dogwen.” 17Elap mberen vaga yugugu lagagirik, eke, elap ambi inim yugugu dugwit, “Yohanes abut Simon wai. Hat An hendawi hunik okneraliga a, dek a?”
Yugugu lagagimu, At Yesus elap henggam vaga, “Hat An hendawi hunik okneraliga a, dek a?” yugogogi ako vaga, at Peterus endawi burup iri dugwit, “Nasin. Hat yi wene ndi wene hilup atma, an nendawi hunik okheraliga ako Hat hilup aro.”
Yugugu lagagimu, At Yesus en, “Nandomba malenombogo dogwen. 18Hat sawe dugwit, hayum yikhedelok o hunogoma laup imbitigindikmu akoma lagya lagagin. Anderogo ovara, hivis hanggok agya dogomindik, hinggis welalogo avakwa wogirigya dogomima heda makhitu dogomundik, hat laup hanggon ombasigama akoma-at bagalasogom o, yiluk, mondok avyarat yukhisiga,” yugogogi. 19Anderogo yugogogi ako, at Peterus nggarogo okbaguselok, hambisogon ako vaga Ala siyabaup yiluk, yugogogi. Peterus ako yugugu lagagirik, “Ninim lasogom,” yiluk, yugogogi.
At Yesus ane waliga menda ambi ako avok yagagi wene
20Yugugu lagagimu, lagu dugwit, at Peterus elose endenogo yokhigya lagagirik, At Yesus ane waliga menda ambi endawi hunik ako enamusek wagya il hagagi. At andi, endak erom nunggusim, Yesus iperen herarek horaik werekma, “Nasin wai. Saen harupwak yiluk, yugerayogon?” yugogogi ako arat. 21Higya lagagirik, Yesus yugugu dugwit, “Nasin. Eke, ap andi, nggarogo oklarimi?”
22Yugugu lagagimu, At Yesus en, “An lagya dogomindik, hivis An warugwis andi vaga, at yoma iluk dogop sek o, imbita neyalok andi, iluk dogop segat. Eke, dek halok andi, degat. Anderogo ogarup ako, hat hova dombok dek. Hat andi, ninim lasogom,” yugogogi.
23Anderogo yugogogi ako, Yesus ane waliga menda ambi andi, “At hambisogon dek, yagaliga,” yiluk, aswei wolok-wolok ane enaruk hunggugwa ovara, At Yesus en, “Ap andi, hambisogonbuk o,” yiluk, yugigitek. Ata, Aren, “An lagya dogomindik, hivis warugwis andi vaga at yoma iluk dogop An sek imbita neyalok andi, hat hovadombok dek,” yiluk, Peterus yugogogi.
24Ap Peterus en Yesus ane waliga menda ambi ako il helok, Yesus yugogogi ako andi, an neyalok-at yugogogi. An akoen nil higya lagagis ako vagalogo yukhirigya, eke, dirup warogo bigigu, ogagi yi ako, avyarat yukheraliga andi, nit ovok ninilup aro.
Wene atok dirup watigi wene
25At Yesus ogagya lagagi menda nin wisane ogagya lagagi ovara ovok erogo mbilinogo mbuku vaga dirup waklipmu en, o wen vaga yoma mondok hobo iri dugwit o ngga baup erek aklip ombasiga o.
