Yohanes 15
15
“Yo eve adem andi, Anat,” yiluk, yagagi wene
1Yugirigya lagagirik, Yesus en At ane welagwi menda ambi inim yugirigya dugwit, “Yo anggur eve adem andi, An aro. Eke, yo anggur eve andok andi, An Nasin-at. 2Yo inggis abwak ambi An ninim hunik dugwit, enggen yigitek halok, Nasin en mbalogo baliga. Eke, yo abwak ambi vaga enggen yugu halok, ambi inim yugu dogopwak yiluk, wererogo baliga. 3Eke hit andi, An Ala wene yukhirigya lagagis ako vaga wererogo bigigirikmu agipik. 4Hit An ninim hunik dogones. Eke, An hit hinim hunik dogosogon. Yo abwak adem vaga hunik dek halok, adik dugwit enggen yiligadek ako hak, hit An ninim hunik dek halok, enggen yugu dogosogonbuk. Abwak adem vaga hunik halok adigat enggen yiliga.”
5“Yo adem andi, Anat. Eke, inggis abwak andi, hirat. Hit An ninim hunik, eke, An hit ninim hunik halok andi, enggen wisane erogo yugu dogosogom. Hit An ninim hunik dek hiniselok andi, hit ambi ogarup mondok dek. 6Abwak mbalogo bagarwikmu mbuk agya halok, avakwa en wonggalogo hali abyama beyak hanungguguselok, hali naliga hak, hit An ninim hunik dek hiniselok, anderogoat okbigigayogon. 7Hit An ninim hunik, eke An nane henendawima agarik andi vaga, ‘Nit andi menda woknerapwak,’ umbutu dugwit, nggino yuknugu hiniselok, andiat An wokhirigya neyagup. 8Enggen wisane yugu dogosogon vaga hit An nane welagwi menda avyarat henombarusogom, andi vaga An Nasin inis ombok arisogon.”
9“Nasin en endawi hunik oknitigi hak, An ogo anderogoat nendawi hunik okhinipigis. Eke, An nendawi hunik okhinipigirikmu, ninim hunigat dogones. 10Nasin en, ‘Yerogo ogarup, nderogo ogarup,’ yuknogogi ako An ogagya lagagis vaga endawi hunik okneraliga ako hak, Anen, ‘Yerogo ogarup, nderogo ogarup,’ yukheraliga ako ogagu hiniselok, nendawi hunik okhinivisogon atma, ninim hunigat dogosogom.”
11“Wene yukheraliga yi, An nendawi adenggen ombasiga ako ndatak, hit henendawi adenggen umbutu dogop, eke henendawi adenggen ombogat hugu dogovovok yiluk, yukheraliga. 12An nendawi hunik okhinipigis ako hak, hit nendawi-hendawi hunik ogagu dogovovok yiluk, wene ombok andiat yukheraliga. 13Avakwa en enaswei enendawi hunik oginivisagwi andi, un horogat ovara, ap ambien aswei enagap wendarogo enake hambigya halok andi, aswei mondok endawi hunik eve ombok erogo imbita dugwit, ogasiga atma, aswei endawi hunik ogasiga andi mondok iya yiluk ombarup. 14Hit An nane, ‘Yerogo ogarup, nderogo ogarup,’ yukheraliga ako ogasagwi halok andi, hit An naswei-at henombarisogon. 15Asin ogasiga ako ayelomani inunggut agarwik ovara, An yi wene ndi wene ovok erogo Nasin en yuknogogi ako yukhirigi atma, yogak yi hudien, ‘Nayelomani,’ yiluk, yukherayogonbuk. Ata, ‘Naswemuni aro,’ yiluk, yukheraliga. 16Hiren An miknetetek. Ata, Anenat hit mikhinipu lagagirik, hit enggen wisane erogo mondok dogop menda yilin lagu dogovovok yiluk, denogo bigigis. Anderogo ogarit lagu dugwit, ‘Andi menda wokniru o,’ yiluk, An ninis vaga Nasin nggino yugugu hiniselok, Aren wokherayogon aro. 17Nendawi-hendawi hunik ogagu dogovovok yiluk, wene ombok andiat yukheraliga o,” yiluk, yugeragagi.
“Avakwa wema menda en mondok enanggon hinumbutu dogosogom,” yiluk, Yesus en yugeragagi wene
18Yugirigya lagagirik, Yesus en At ane welagwi menda ambi inim yugirigya dugwit, “It o wen vaga yoma agarwik akoen enanggon hinumbutuselok, it endak An enanggon numbutu lagagwa ako henape wenggelop. 19Hiren it avakwa o wen vaga yoma agarwik ako menda duklip en, iren, ‘Nit menda aro,’ yiluk, vage enendawi hunik okhinivilip ovara, hit it menda dekma, eke, it ako inigik, An denogo bigigis atma, enanggon henombasagwi. 20Asin sovalek hegek, ayeloman siyalek agarikbuk, yiluk, yukheragagis ako dibas. It wen vaga menda en An weyak okbanunggu lagagwa atma, hit ogo, anderogoat weyak okbugugu dogosogom. Eke, it ninen An nane wugu lagagwa halok, hit ogo, henane wugu dogosogom. 21At lakbani wagagi ako it inunggutmu, weyak okhinivusogom ako andi, adem An vaga-at okhinipu dogosogom.”
22“An it enadema waklibuk en, wene yugirigya duklibuk, it weyak enovaga duklipuk. Anderogo ovara, yugeregek wagagis atma, yogak it weyak ogasagwi ako andi, ‘Nit weyak ogagetek o,’ yup andi, nggarogo yup. 23It avakwa en An enanggon numbutuselok andi, An Nasin ogo, enanggon-at ombasagwi. 24An it enanggelekma dugwit, nggarogo ogarubuk menda ogagya duklibuk en, it weyak enovaga duklipuk. Anderogo ovara, yogak andi, An ogagya lagagis ako, it vage neyagu lagarwik ovara hegek, An Nasin niperenat enanggon nenombasagwi. 25#Mazmur 35:19; 69:5 yokhanes. Enanggon nenombasagwi ako andi, Ala wene endak warek it vagago agarwik ako vaga, Ala en iri dugwit, ‘Adem dek hegek enanggon nenombarisagwi o,’ yiluk, yagagi dirup warek ako, ayat andi atma des yupwak yiluk, enanggon nenombasagwi.”
26“Hit yonggat-hinipu dogopwak yiluk Ala Averiniki avyarat wene Ala avok yukheraliga menda Anen Nasin werekma en hit henadema lakba wagya dogomindik, An navok vagalogo yukhirigya dogosogon. 27Hit o endak en ninim welagyo atma, hit ogo, An navok vagalogo yugeregek nagu dogogup o,” yiluk, yugeragagi.
