मरकुस 10
10
तलाक के बारे में ईसू की सिछा
(मत्ती 19:1–12; लूका 16:18)
1जाके बाद ईसू वहां ते उठकै यहुदिया के छेत्र में और यरदन के पार आयौ, और एक बार फिर भीड़ वाके जौरें फिर इकठ्ठी है गई और बू अपनी रीति के अनुसार बिनैं फिर ते परमेस्वर के वचन कि सिछा दैवे लगौ।
2तब फरीसियन नें जौरें आयकें ईसू कूं फसायवे के काजै बाते पूंछी, “का हमारौ नियम में काऊ आदमी कूं अपनी औरत कूं तलाक दैबे की छूट है।”
3ईसू नें बिनकूं जबाब दियो, “जा बारे में मूसा नें तुमैं का आग्या दयौ हतो?”
4 #
मत्ती 5:31
फरीसियों नें कही, “मूसा नें त्याग पत्र लिखकै अपनी औरत कूं तलाक दैबे कौ आग्या दियौ हतो।”
5ईसू नें बिनते कही, “मूसा नें तौ तुमारे हठीले मन के कारन जि आग्या लिखौ हतो। 6पर सृस्टी की सुरुआत ते परमेस्वर नें मनुस्य ए आदमी औरत के रूप में बनांयौ है। 7जाके मारे आदमी अपने मा-बाप ते अलग हैके अपनी औरत के संग रैवेगौ, 8और बे दोनों एक सरीर होंगे। अब बे दो नांय एक सरीर हैं। 9जाई मारे परमेस्वर नें जिनैं जोड़ो है बाय आदमी अलग अलग नांय करै।”
10जब बे बापस घर में आये तब चेलान नें जा बात के बारे में ईसू ते पूंछी। 11#मत्ती 5:32; 1 कुरि 7:10,11ईसू नें बिनते कही, “जो कोई अपनी औरत कूं तलाक दैकै दूसरी औरत ते ब्याह करै तौ बू अपनी पैहली औरत के बिरोध में व्यभिचार करतै। 12और अगर औरत अपने आदमी कूं तलाक दैकै दूसरे आदमी ते ब्याह करै तौ बू अपने पैहले आदमी के बिरोध व्यभिचार करतै।”
ईसू कौ बालकन ते पिरेम करबौ
(मत्ती 19:13–15; लूका 18:15–17)
13एक दिना कछू लोग बालकन कूं ईसू के जौरें लाये, कै बू बिनपै हात रखकै आसीरबाद दैबे, पर चेलान नें बिन लोगन कूं फटकारौ 14ईसू कूं जि देखकें चेलान पै गुस्सा आयी, फिर बानें नें बिनते कही, “कै बालकन कूं मेरे जौरें आन देओ, बिनैं मना मत करौ। चौंकि परमेस्वर कौ राज्य ऐसैन कोई है।” 15#मत्ती 18:3मैं तुमते सच कहतूं कै, “जो कोई इन बालकन की नांई परमेस्वर के राज्य कूं नांय अपनावे, तौ बू बामें कबऊ नांय जाय पावेगौ।” 16और फिर ईसू नें बालकन कूं गोदी में लियौ और बिनपै हात रखके बिनकूं आसीरबाद दयौ।
एक अमीर आदमी
(मत्ती 19:16–30; लूका 18:18–30)
17ईसू जब मापै ते निकरिकें रस्ता ते जाय रयो, तौ एक आदमी वाके जौरें भागत भयौ आयौ, और बानें घुटअन गिरकें बाते पूछी, “हे भले गुरू मैं कबऊ नांय खतम हैबे बारे जीबन कूं पाबे काजै का करूं?”
18ईसू नें बाते कही, “तू मोय अच्छौ चौं कैह रयौ है? परमेस्वर कूं छोडकै कोई अच्छौ नांय। 19तू हुकमन नैं तौ जानतै, कै हत्या मत करियो, झूंठी गबाही मत दियो, व्यभिचार मत करियो, चोरी मत करियो, धोकौ मत दियो और अपने मा-बाप को आदर करियो।”
20बानें ईसू ते कही, “हे गुरू मैं इन सब हुकमन कौ पालन तौ बालकपन ते करतौ आयौ हूं।” 21ईसू नें बा आदमी की तरफ पिरेम ते देखिकें बाते कही, “तोय अबऊ एक और काम करवे की जरूरत है। तू जा, और जो कछु तेरे जौरें है बाय बेचके वाके पईसन कूं गरीबन में बांट दै जाकौ फल तोय सुरग में मिलेगौ और आयकें मेरे पीछे चल दै#10:21 ईसू के पीछे चलवे कौ मतलब, कबऊ नांय खतम हैबै बारे जीबनए पावौ। ।”
22जि बात सुनकें बा आदमी कौ मौंह उतर गयौ, और बू दुखी हैके चलौ गयौ चौंकि बू भौतई अमीर हतो।
23ईसू नें चारौ लंग कूं देखके अपने चेलान ते कही कै, “जिन लोगन कौ मन धन-दौलत की ओर लगौ रैहत है बिन लोगन के काजै परमेस्वर के राज्य में जायबो भौत कठिन है।”
24चेला वाकी बातनें सुनकें अचम्भे में पड़ गये, ईसू नें बिनते फिर कही, “हे मेरे बालकों परमेस्वर के राज्य में जायबो भौत कठिन है। 25जैसै ऊँठ सूंई के छेद में ते नांय निकर सकत, बैसेई धनबान आदमी कौ परमेस्वर के राज्य में जावे भौत कठिन है।”
26चेलान कूं भौतई अचम्भों भयौ और आपस में कहवे लगे, “फिर किनकौ उद्धार#10:26 उद्धार पाप कि सजा ते मांफी मिलबौ और परमेस्वर के राज्य में जाबो है। है सकतै?”
27ईसू नें बिनके मांऊ देखकें कही, “आदमी अपने आप अपनों उद्धार नां कर सकै, पर परमेस्वर सब कछू कर सकतै।”
28तब पतरस ईसू ते कहवे लगौ, “कै देख हम तौ सब कछू छोड़कै तेरे पीछे है लिये हैं।”
29ईसू नें बिनते कही, “मैं तुमते सच कैहतूं कै जो कोई मेरे काजै और मेरे सुभ समाचार के काजै अपनों घर, भईया, बहन, मा-बाप, अपने बालक, खेत और अपनों सब कछू छोड़तें, 30तौ जो कछु बानें छोड़ौ है बू जाई युग में अपनों घर, भईया, बहन, मईया, बालकन और खेतन पै सौ गुना आसीस पावेगौ, पर बाय जा युग में संसार ते दुख मिलिंगे। इतनोंई नांय पर सुरग में वाके काजै कबऊ नांय खतम हैबे बारौ जीबन है। 31#मत्ती 20:16; लूका 13:30पर भौत ते जो पैहले हैं, बे पीछे है जावेगें और जो पिछले हैं बे पैहले होंगे।”
अपने मौत के बिसय में ईसू नें तीसरी बार बतायौ
(मत्ती 20:17–19; लूका 18:31–34)
32फिर ईसू अपने चेलान के संग येरूसलेम जाते भये, रस्ता में अपने चेलान ते आगे-आगे चल रयौ हतो। चौंकि बे येरूसलेम जा रये हते जाके मारे चेला अचम्भे में हते और वाके पीछे चलवे बारे डरप लगे। तब बू बिन बारह भेजे भये चेलान नें अलग लै जायकै अपने संग हैबै बारी बातन के बारे में बताबे लगौ। 33ईसू नें बिनते कही देखौ, “हम येरूसलेम कूं जा रये हैं, मैं, ‘मनुस्य कौ बेटा’ बिसबास घात ते यहुदी पिरधान पुरोहितन और सास्त्रन कूं सिखाबे बारेन के हात में सौंप दियौ जाऊंगो और बे मोय मौत की सजा सुनायकै जो यहुदी नांय बिनके हातन में मारबे काजै सौंप दिंगे। 34और बे मेरी हसी उड़ावेगे, मोपै थूकेगें, मोय कौड़ा मारिंगे और मोकूं मार डारिगें पर मैं फिर तीसरे दिना जीबित है जाऊंगौ।”
ईसू ते याकूब और यूहन्ना की बिनती
(मत्ती 20:20–28)
35तब जब्दी के बेटा याकूब और यूहन्ना नें ईसू के जौरें आयकै बिनती करत भये कही, “हे गुरू हम चाहतैं है कै जो कछु हम तोते मांगे बही तू हमारे काजै कर।”
36ईसू नें बिनते कही, “तुम का चाहौ कै मैं तुमारे काजै करूं?”
37बिन्नें बाते कही, “कै हमें जि अधिकार दै कै तेरे महिमा भरे राज्य में हम मेंते एक तेरे सिंगासन के दाहिने ओर और दूसरौ तेरे बांए बैठे।”
38 #
लूका 12:50
ईसू नें बिनते कही, “तुम नांय जानतई कै, तुम का मांग रये हौ? जो दुख भरौ कटोरा मैं पीने को हूं, का तुम बाय पी सकौ? या जो बपतिस्मा मैं लैवे कूं हूं, तुम बाय लै सकतौ?”
39बिन्नें ईसू ते कही, “हम बैसा कर सकतें” फिर ईसू नें बिनते कही, “हाँ जो दुख भरौ कटोरा मैं पीवे पै हूं तुम बामें ते पीयौगे, और जो बपतिस्मा मैं लैवे पै हूं, बाय तुम लोगे। 40पर मेरे दांयें और बाये बैठवे की जगह दैबो, मेरे अधिकार में नांय। परमेस्वर नें पैहले तेई जि जगेह बिन आदमिन के काजै दई है जिनके काजै तैयार करी गई है।”
41जब दूसरे दस चेलान नें जि सुनी, तौ बे याकूब और यूहन्ना पै रिसियावे लगे। 42#लूका 22:25,26तब ईसू नें बिनकूं जौरें बुलायकै बिनते कही, “तुम जानों हौ कै जो राजा यहुदी नांय बे लोगन पै धोंस जमाय कै परभुता करतें और बिनके सरदारऊ बिन लोगन पै अपनों अधिकार जमातैं। 43#मत्ती 23:11; मर 9:35; लूका 22:26पर तुम ऐसे नाँओं जो कोई तुम में बड़ौ बननों चाहबै बू तुमारौ सेबक बनें। 44जो कोई तुम में पिरधान हैबो चाहै, बू सबकौ दास बनै 45चौंकि मैं, ‘मनुस्य कौ बेटा’ जाके मारे नांय आयौ कै मेरी सेबा-टहल करी जावें, पर जा काजै आयौ हूं कै दूसरों की सेबा-टहल करूं। और भौतन के छुटकारे काजै अपनों पिरान बिनकी जगैह पै दै दऊं।”
एक आँधरे भिखारी कूं आँखें देवौ
(मत्ती 20:29–34; लूका 18:35–43)
46बे यरीहो में आये, जब ईसू और वाके चेला और लोगन की भीड़ यरीहो ते निकर रयी हती, तब तिमाई को बेटा बरतिमाई नाम को एक आँधरों भिखारी सड़क के किनारे बैठो हतो। 47बानें जि सुनी कै जे नासरत सहर कौ ईसू है, तब बू चिल्ला चिल्लायकें कहवे लगौ, “हे ईसू! दाऊद की सन्तान मोपै दया कर।”
48भौतसे लोगन नैं बाय फटकारौ कै चुप रहै, पर बू औरऊ जोर ते चिल्लावे लगौ, “हे ईसू! दाऊद की सन्तान मोपै दया कर।”
49तब ईसू नें रुककै कही, “जाय बुलायकै लाऔ।” और लोगन नें बा आन्धरे ते जायकै कही, “खुस हो जा, उठि बू तोकूं बुलाय रयौ है।” 50बू अपनों कम्बर फेंक के तुरन्त उठौ, और ईसू के जौरें आयौ।
51तब ईसू नें बाते कही, “तू का चाहबै कै मैं तेरे काजै करूं?”
आँधरे नें ईसू ते कही, “हे गुरू जि कर कै मैं फिर ते देखबे लगूं।”
52ईसू नें बाते कही, “चलौ जा तेरे भरोसे नें तोकूं ठीक कर दियौ है।” और बू बाई समै देखवे लगौ, और रस्ता में वाके पीछे चल दियौ।
NonCommercial-NoDerivatives 4.0 International (CC BY-NC-ND 4.0)