लूका 24
24
मरबे के बाद ईसू कौ जि उठबों
(मत्ती 28:1–10; मरकुस 16:1–8; यूहन्ना 20:1–10)
1सप्ताह के पैहले दिना इतबार कूं सबेरे सबेरेई बे औरतें खुसबूदार चीज जो बिन्नें तैयार करी हतीं, उन्नें लैके बे कब्र पै पौंहची। 2और बिनैं कब्र के मोंह पै रखौ भयौ बड़ौ पत्थर हटो भयौ मिलौ। 3और बिनैं भीतर जायकै देखौ और पिरभू ईसू की ल्हास कब्र में नांय मिली। 4तब जि देखकै बिन्नें बड़ौ अचम्भौ भयौ, तबई ऊजरे कपड़ा पैहने भये दो आदमी मांपे खड़े भये दिखाई दये। 5बिन आदमिन कूं देखकै बे डरप गईं और अपनों मौंह धरती माऊं झुका लियो, तब बिन्नें नें औरतन ते कही कै, “तुम जीबित आदमी कूं मुरदेन में चौं ढूँढ रहीयौ? 6#मत्ती 16:21; 17:22,23; 20:18,19; मर 8:31; 9:31; 10:33,34; लूका 9:22; 18:31–33बू जीबित है गयौए, बू य्हांपे नांय। याद करौ जब बू जीबित हतो तब गलील में बानें का कही हती। 7बानें कही हती, कै मैं, ‘मनुस्य कौ बेटा’ पापिन के हातन में पकरबायौ जाऊंगौ और क्रूस पै लटकायौ जांगो और तीसरे दिनां जी उठूंगौ।” 8तब बिन औरतन्नें बू बात याद आई।
9तब बे कब्र पैते लौट आई और बिन्नें जि बात ग्यारह भेजे भये चेलान और बिनके सब संगीन कूं बताईं। 10जिन्ने भेजे भये चेलान ते जि बात कही हती, बिन औरतन में मरियम मगदलीनी, योअन्ना और याकूब की माँ मरियम और बिनके संग औरऊ औरत हतीं। 11चेलान्ने बिनकी बात पै भरोसौ नांय करौ और चेलान नें बिनकी बात कहानी समझी। 12पर पतरस भागतौ भयौ कब्र पै पौंहचौ और बानें झुककै देखौ तौ बाय सफेद मल मल कपड़न के सिबा मांपै और कछू नांय दिखौ। और बू मांते अचम्भौ करके अपने घर बापिस लौट गयौ।
इमाउस गांम के रस्ता पै
(मरकुस 16:12–13)
13बाई दिनां बिनमें ते दो चेला इमाउस नाम के गांम में जाय रये हते। बू गांम येरूसलेम ते चार कोस दूर हतो। 14-15बे बात मांपै भईं हतीं बिनके बारे में बे बात करते भये जा रये हते, तबई ईसू बिनके संग आयकै बिनके संग संग चल दियौ। 16और बिनकी आँखन पै ऐसौ परदा सौ पर गयौ कै बे बाय पैहचान नांय सके।
17तब ईसू नें बिनते कही, “कै तुम आपस में का बात कर रयेऔ? जो तुम आपस में चलते कर रये हो, बे उदास खड़े रैह गए।” 18जि सुनकें किलौपास नाम के एक आदमी नें कही, “कै तू का जा येरूसलेम में नयो आयोए। तोय नांय मालूम कै इन दिनान में का याँपै भयौए?”
19तब ईसू नें बिनते पूछी, “कै ऐसौ का भयौए?”
बिन्नें बाते कही, “बात ईसू नासरी के बारे में है, बू एक ऐसौ मनुस्य हतो बानें जो कहौ बेई करौ और बानें परमेस्वर और सब लोगन के सामने जि दिखा दयौ, कै बू एक महान परमेस्वर की ओर ते बात बतायबे बारो हतौ। 20और यहुदी पिरधान पुरोहितन्नें और बड़े पिराथना घर के अधिकारिन नें बाय पकड़बा दियो कै बाकूं मौत की सजा दी जाबे और बू क्रूस पै लटकबाय दियो। 21जि तीन दिन पैहले की बात है। हमें तौ जि आसा हती कै बू इसरायल कौ उद्धार करबे बारो हतौ। 22-23कैऊ औरतन्नें जो कब्र पै गईं हतीं उन्नें मांपै ईसू की ल्हास नांय मिली। बिन्नें हमकूं अचम्भे में डाल दियो और बिन्नें हमते जि बात कही कै, हमते सुरग दूतन नें कही,कै ईसू जीबित है गयौए। 24तब हमारे कछू संगी मांपै कब्र पै गये और हमनें माँपै बैसौई देखौ जैसौ बिन औरतन्नें हमते कही हती, पर ईसू कूं नांय देखा।”
25तब ईसू नें बिनते कही, “अरे निर्बुद्धीयौ परमेस्वर की ओर ते बात बतायबे बारेन की बातन पै भरोसौ ना करबे में तुम मन्द बुद्धीयौ। 26का जि जरूरी नांओ कै, मसीह दुख उठायकै अपनी महिमा में आबे?” 27तब ईसू नें मूसा ते लैकै और दूसरे परमेस्वर की ओर ते बातन्नें बतायबे बारेन तक पूरे पबित्र सास्त्र में ते अपने बारे में जो बात लिखी हती बिनकौ अर्थ समझायौ।
28इतने में बे बा गांम में पौहच गये, जा गांम में बे जाय रये हते और ईसू नें ऐसो बरताब करो कै बू बिनते आगे जायबो चाह रयौ है 29पर दोनों चेलान नें जि कैहकै रोक लियौ कै “हमारे संग रह चौंकि सन्झा हे गयीए, तब बू बिनके संग रहबे भीतर गयौ।”
30जब बू बिनके संग भोजन करबे बैठो तब बानें रोटी उठाई और धन्यबाद करके तोड़कै दैबे लगो, 31तबई बिनकी आँखन को परदा हट गयौ और उन्नें ईसू कूं पैहचान लियो और बू बिनके सामने ते गायब है गयौ। 32तब चेलान नें एक दूसरे ते कही, “जब बू हमनते बात कर रयौ हतो और पबित्र सास्त्र कौ अर्थ समझाय रयौ हतो तौ का हमारे मन में ज्बालाएं नांय भड़की हती?”
33और बे बाई समै माँते उठके येरूसलेम कूं लौट गए और मांपै ग्यारह चेलान और दूसरे संगिन कूं इकठ्ठौ पायो हतो। 34और माँपै बैठे भये लोग कैह रये हते कै, “सचमुच में पिरभू जीबित है उठौ है और सिमौन कूं दिखाई दयौ है।” 35तब बिन दोनोंन नें इमाउस के रस्ता में भईं हती बे सबरी बात बताईं और कैसै जब बानें रोटी तोड़ी हती तब हमनें ईसू कूं पहचान लियौ हतौ।
ईसू अपने चेलान के सामने पिरकट भयौ
(मत्ती 28:16–20; मरकुस 16:14–18; यूहन्ना 20:19–23; प्रेरितन के काम 1:6–8)
36बे सब इन घटनान की बात कर ही रये हते, कै ईसू बिनके बीच में आयकै खड़ो है गयौ,और बिनते बौलो, “कै तुमें सान्ती मिलै।”
37पर बे ईसूए देखकै घबरा गये और डरप गये चौंकि बे समझ रये के बू काऊ भूत कूं देख रये है। 38तब ईसू नें बिनते कही, “चौं घबरा रयेओ और मन में सन्देह चौं कर रयेओ? 39मेरे हात और पामंन कूं देखौ मैं बेई हूं। भूतन के हाड़-माँस नांय होतई मोय छूकै देखौ।” 40जि कैहके, ईसू नें बिनैं अपने पांम और हात दिखाये।
41तब बे खुसी के मारे अबऊ भरोसौ नांय कर पा रये हते कै, हम बाय देख रये हैं और बे अचम्भे में हते। तब ईसू नें बिन्ते कही कै, “तुमारे जोरै कछू खायबे काजै हतै।” 42तब बिन्नें भूजी भयी मछली कौ एक टुकड़ा बाकूं दियौ। 43और मछली के टुकड़ा कूं ईसू नें बिनकेई सामने खायौ।
44ईसू नें बिनते कही, जब मैं तुमारे संग रैहतो हतो तब मैंनें तुमते कही हती, “जो कछू मूसा नियमन में और परमेस्वर की ओर ते बात बतायबे बारेन की किताबन में और भजन की किताब में मेरे बारे में लिखौ है, बू सब पूरौ होनों जरूरिए।”
45तब बानें बिनके मन को अंधेरौ दूर करते भये पबित्र सास्त्र कौ अर्थ समझायौ। 46तब ईसू नें बिनते कही, “ऐसौ लिखौ है कै मसीह दुख भोगैगो और तीसरे दिना मरे भयेन मेंते जि उठेगौ। 47और येरूसलेम ते लैके धरती के सब लोगन में मन फिराब कौ और पापन की छमा कौ पिरचार बाई के नाम ते करो जाबैगौ। 48और तुम सब इन बातन कै गबाह होगें। 49#प्रेरि 1:4और देखौ जा पबित्र आतमा देबे कौ बादा मेरे पिता नें करौ है, मैं बाकूं तुमारे ऊपर उतारूंगो। पर जब तक तुम सुरग ते सामर्थ ना पाय लेओ, तब तक जा सहर में ही ठहरे रहना।”
ईसू कौ सुरग में जाबों
(मरकुस 16:19–20; प्रेरितन के काम 1:9–11)
50 #
प्रेरि 1:9–11
जाके बाद ईसू बिन्नें बैतनियां तक बाहर ले गयौ और अपनों हात उठायकै बिनकूं आसीस दियो। 51और बू आसीस देते भयौ बिनते अलग हो गया और ईसू कूं सुरग में उठा लियौ गयौ। 52और बे लोग ईसू कूं दन्डबत करकें बड़ी खुसी के संग येरूसलेम कूं लौट गये। 53और सबरो समै परमेस्वर की स्तुति करते भये बड़े पिराथना घर में बितायबे लगे।
NonCommercial-NoDerivatives 4.0 International (CC BY-NC-ND 4.0)