Gié 12
12
Ké deddu Jak, ké debu Piér duro gerngang bu’
1A kiddin lé na, kelma Hérod osum gelé ga pena cindegé a duro yaué go Kumu koi. 2Ddi deddu Jak go Jâ kermi dang gesengar. 3Kiddin ga ddi ba sol ca kual la mougé ga Juib gusugé na, ddi jogu ’yom Piér. (Na soré go kederé cindi go ké lé wo basé subugu.) 4Kiddin ga Hérod ba ’yom Piér na, ddi debi duro gerngang, ddi bi kuaba assengeriyong poddin, poddin ca poddin ca kandia magai. Ddi ’erem ca ’yomoiang dong cin kalang kara soré go kederé cindi lé. 5Ké magu Piér duro gerngang, ama yaué go Kumu koi wa olé dang meregdé cai.
Kangito dor Piér dong
6Soindo do Hérod ba dar ca ddia da ’yom Piér cin kalang dong na, Piér woi kung duro asengeriyong sua. Ké saddiei dang kunja sua. Ga magei ’eré kebu kulu dong ca magé gerngang lé kebi bu’. 7Kobipadda kangito go Bagulong koi ’eré dur Piér, arinwa arin duro kulu lé, ddi gegeddé Piér pedelai, ddi lebi to kung dang, ddi yei wa: Sa dang, kunja puderong a kalndi dugo. 8Kardené kangito lé yei wa: Sadda bbala goin bua, si giabé gain gondin bu’. Piér lé main kain. Kangito lé yei wa: Si badigé gain ga gumu gusin, kubangang. 9Piér kobu kangito lé andong dong. Ddi ’erem ca henga ga kangito ba wa lo na, na henga ga cindi ’eno. Ddi ’erem na soné go beram beram wa loi. 10Ké hal asengeriyong ga magé gerngang lé ga tumu dang ga sua, kardené ké ’yé kebu kulu kebi go helma go andong duro gulong dong, kebu lé hangong dang macai tumoigé, ké andong dong. Ké hangdu giyong pena, kobipadda kangito lé ’yé ddé Piér.
11Kiddin ga Piér ddaindi gesin dugo na, ddi yé wa: Cakcak kua ’enung sol carara ca na cindi Bagulong na giang kangito goi ca minyang a kuaba Hérod, dang isinwa do ga Juib wa daré loangang na.
12Kiddin ga ddi ba sol kual lé toi ddar na, ddi ’yé ta Maram do Jâ go ké ba di tembaldi Mark ’yoi. Kalang combu yau wo kené ca olé. 13Kiddin ga Piér wa ddagé kulu kebi na, turmo do gié do pena, gusonda Ruda ’yé ca hangé kulu kebi lé 14Kiddin ga to ba jé Piér noi na, guso mowa, to hanga kulu kebi lé ’eno, to boi ca geré jogu kulu, to yégé wa: Piér ’eré wo dong. 15Ké ya wa: Mé lé mam. Ama to magu kual lé terang, to yé wa: Na cindi. Ké ya wa: Na tenddi. 16Ama Piér wa ddagé kulu kebi ddang ddang. Kiddin ga ké hangu kulu kebi soli na, ké sol kagelokemo. 17Ddi légé kobi kandia sugoia, ddi dorgé kual go Bagulong ba durgai a duro gerngang dong, ddi jogu yégé wa: Ga yai Jak kual lé dang karmana kané bu’. Kardené ddi andong ’yé kiddin ga dang.
18Kiddin ga kiddin ba wol na, kual sai duro asengeriyong bbani ’eno, ké ’enger gusugé wa? Piér kaiyong tola andi ga? 19Hérod gi dari ama ké waiai ’eno. Ddi ’enger asengeriyong ga magei, kardené ddi yégé kandia deddegé. Kardené Hérod sai a Judé, ddi ’yé Sésaré, ddi jom kené.
Maré go Hérod koi
20Hérod kederei homi nain ca kalang ga Tir dang Sidon. Kalang lé nyan kualang gusugé ca oré waiei. Ké ’yé nyané kual dang Hérod koi go kebi kak Balastus tumu jua, kardené ké ’yé gusu kelma ca daré labia ca gesong gagé, cawa ké wai do a ca kelma gesong gai.
21Wolé go Hérod ba dori ca ka da yau kené na, ddi si badigé ga termala gusi, ddi jom ca pogu goi, ddi dorgé kalang kual. 22Kalang soi noigé gomso, ké yé wa: Na kema wa yo kual ’eno, na Kumu. 23A kiddin lé padda na, kangito go Bagulong koi sombu Hérod cawa ddi bi Kumu hormo ’eno. Subong di, ddi ma.
24Ama kual go Kumu koi aju tumu tumu.
25Kiddin ga Barnabas kang Saul ba ka gié gogé a Jorsalem na, ké boi caigé. Ké gol Jâ go ké ba di tembaldi Mark.
© Alliance biblique universelle (United Bible Societies) 1978.