Luk 11
11
Tamatan a Mlin Lilad
(Matiu 6:9-15; 7:7-11)
1Arna napn iamk, a Iesu itu tamat arna nut iamk. Sarei, m'ertuan iamk ivr ani, kavr ti a, “Mlin, pav'iv'en navanel na ti p'vtu tamat, ipanep'a nut a Sun itv'iv'en sarei anr m'ertuan inap'ei.”
2Laha, ivr anr kavr ti a, “Naran pavtu tamat pavvr ti a,
Tetiam'em' klak eia,
Nvrn ti naham ipav'a eia.
Nvrn ti v'anuam ipama.
Nvrn ti sei krni ipaiak arna nadep' kanap'ei eia. 3Patu kam'em' tim'ah ipaviviln arna napn udlani. 4Kamhmah a kam'em' arna si stuam'em'.
Sena ti kam'em' nvmhmah a m'ertu uraur arna si stu avani a kam'em'.
Mam'ahu a ti si kinkin ipandina kam'em'.
V'eti palev'la kam'em' arna nut huan a Sitan.”
A Iesu isran v'nen ivrur dui iamk imiman sei a p't lihat
5Laha, ivr anr kavr ti a, “Ipavr ti kam'i kinkin ipav'a asn tv'aln p't lihat kavr ani, kavr ti a, ‘Tv'alk, patu kana p'ret ipatl. Kana p'etu m'lnen ml anh. 6Sena ti tv'alk kinkin iv'el kadama asnk, v'eti kana tim'ah ihei a ti p'etau ani.’ 7Laha, ipavr ti tv'aln ipavrprani dan eim kavr ti a, ‘Mautakm a kana, ntp'leskar sera liu, a natk udlani nvm'atr m'er. Kana nkathal katau anh.’ 8?Ipanap'i? Nvr a kam'i, Ikathal katau ani sena ti iv'i tv'aln, v'eti ipathal katu si udlani ani irni, sena ti imimani ihua ihuadau.
Pamiman sei, patala sei, paspspa liu
(Matiu 7:7-11)
9Nvri lera kavr a kam'i, Sei pavmimani, apatu kam'i, sei pavtala ani, pavpaslei. Pavspspa liu, laha, apaiela liu a kam'i. 10Sena ti m'ertu udlani imiman sei, ipalav'i. M'ertu itala a sei, ipapaslei. M'ertu ispspa liu, apaielei asnn. 11?Kam'i kvv'i tatei, ipavr ti aupam'i ipamiman p'ret asnm'i, pavtu nav'et ani? ?V'aha, ipavr ti ipamiman tilau, pavtu nmat ani, ipaua m'lna tilau? 12?V'aha, ipavr ti ipamiman nahadrl ntu asnm'i, pavtu hutrir ani? 13Kam'i kvv'i m'ertu stu, v'eti kvrndu ti pavtu si p'as anr a netm'i. A Tetiam'i ilak eia, hin ilil aranam'i karndu ti ipatu M'im'iln P'as anr m'ertu avmimani.”
Nl nam'el itupr hin ikap'tir
(Matiu 12:22-30; Mak 3:20-27)
14Arna napn iamk a Iesu isran m'im'iln stu iamk la iani ti m'ertu iv'i napt ha. Sarei, naran m'im'iln stu itruh, napt nen iv'anadau. Laha, nelnal avtah ani. 15#Mat 9:34; 10:25.V'eti hir kinkin avvr ti a, “Hin isran m'im'iln stu arna nut huan a Pielsipup, iv'i mlinar m'im'iln stu.”
16 #
Mat 12:38; 16:1; Mak 8:11. M'ertu uraur avhlhalei kavmimani a ti ipan pari lil ki ipamk ipandan eia. 17V'eti hin irndu v'ahienar kavr anr kavr ti a, “V'anu udlani ipamlen hin ipars kahiris, v'aha ipavr ti nl nam'el ipamlen hin, ipars. 18?Ipavr ti a Sitan ipamlen hin, v'anuan ipap'tir ipanap'i? Sena ti kam'i kvvr ti Kana nsran m'im'iln stu arna nut huan a Pielsipup. 19?Ipavr ti Kana nsran m'im'iln stu arna nut huan a Pielsipup, m'ertuam'i avsrani arna nut huan ak? Sena si lera hir apavv'iv'en si stuam'i. 20V'eti ipavr ti nsran m'im'iln stu a lm'an Atua, v'anuan Atua itama sarei asnm'i. 21Naran dui hua ip'aur nmahan kaua su naur, sian udlani iter ip'as. 22V'eti naran m'ertu uraur ihua mau aranan ipama asnn kutakm ani kasiv'i, ipalev'la su nauran udlani iv'ah ti ihua aranan katupapr sei iv'nahi. 23#Mak 9:40.M'ertu iasapa Kana, imlen Kana, v'aha m'ertu iap'lt m'a Kana katupien m'ertuak, iani ti avamkma.
M'im'iln stu im'alet ml
(Matiu 12:43-45)
24Naran m'im'iln stu iruh a nl m'ertu, iunanut arna nut kaka katala nut iparnrn hin, v'eti naran iapaslei ivr ti a, ‘Kana p'ahum'alet ml al nmahak ntruh sarei a nln.’ 25Laha, naran im'alet ml, ila ti athsrasr sarei katmhmah sarei ani. 26Sarei, iv'el kalev' m'im'iln stu avsaru la avstu kavsiv'i ha, kavrav'a a nln kavlak atlera. Laha, silv'iena m'ertu lahara ima kastu isiv' itauamu.”
Paua v'nenan Atua ipahua
27Naran ivr si lera, tav'et iamk asnr nelnal iv'ana eia kavr ani, kavr ti a, “U, tav'et ilav'h katu nunu anh, hin iparn ipap'as.”
28V'eti hin ivr ti a, “Aau, v'eti m'ertu avrn v'nenan Atua kavuadei, hir apavrn ipap'as mau.”
M'ertu kinkin avmiman pari lil kinkin
(Matiu 12:38-42; Mak 8:11,12)
29 #
Mat 16:4; Mak 8:12. Dav'a naran m'ertu avrama kavp'lt kavstudau, ivr anr kavr ti a, “Arm'ertu avsilv' hilaha avstu. Avrn ti p'en pari lil kav'iv'en nut huan Atua, v'eti p'ev'iv'en pari lilan a Suna uaki, iv'i pruvet. 30#Suna 3:4.Sena ti Kana, nv'i Net M'ertu, p'ev'iv'en nut huan Atua asnr m'ertu avsilv' hilaha, ipanep'a nut a Suna iv'iv'en nut huan Atua asnr m'ertu a Nineva tituei. 31#1 Armlin 10:1-10; 2 Krun 9:1-12.Tav'et iv'i mlin arna nut a Saut ipap'tir arna napn Atua ipav'ana hua m'a m'ertu udlani arna nadep', kavr anr m'ertu avsilv' hilaha, kavr ti avan si stu. Sena ti hin iendan arna pna nadep' a ti iparn v'ahien p'asan a Sulumun, v'eti pavlei, Kana nlil mau kasiv' a Sulumun. 32#Suna 3:5.Ardu a Nineva apavp'tir arna napn Atua ipav'ana hua m'a m'ertu udlani, kavvr anr m'ertu udlani avsilv' hilaha kavvr ti avan si stu. Sena ti hir avvav nlr naran a Suna ivrp'ep'a v'nenan Atua, v'eti pavlei, Kana nlil mau kasiv' a Suna.
Lait na p'ak natei
(Matiu 5:15; 6:22,23)
33 #
Mat 5:15; Mak 4:21; Luk 8:16. M'ertu kinkin iatu nap' a lait katutuani v'aha katavkari a paket, v'eti itaui eia arna m'lnen, a ti m'ertu la apavrama eim ha apavla nut ren na laitam. 34M'eta natei iv'i lait na p'ak natei. Sena si lera, ipavr ti m'atam ilvlvar, p'akm udlani ipalini a nut ren, v'eti ipavr ti m'atam ipastu, p'akm udlani ipalini a m'alk. 35Sena si lera, pav'ahah a ti nut ren la iter a nlm ha imav'i m'alk. 36Ipavr ti p'akm udlani ipalini a nut ren, pnen ikav'i m'alk, p'akm udlani ipar ipanep'a nut lait ip'lp'lah inap'ei.”
A Iesu iv'ana hua m'er arvarisi m'er ardu na v'nen hua
(Matiu 23:1-36; Mak 12:38-40; Luk 20:45-47)
37Naran idv'ana uam, Varisi iamk imiman a ti ipahatat asnn. Laha, iv'a eim kalak kahatat. 38V'eti Varisi lahara itah istudau naran ila ti ihatat, v'eti iasisil.
39V'eti a Mlinad ivr ani, kavr ti a, “Kam'i kvv'i Varisi kvsila mamh tah panikin m'a tah p'let, v'eti kvlini a v'nv'nahien m'a si stu arna nlm'i. 40Kam'i kvnini. ?Kaavrndu ti Atua la ien p'ak sei ha, Hin ien nl sei ml? 41Ip'as a ti pavtuvn a sei kviak ani anr m'ertu siar ihei, laha, pavrni, si udlani asnm'i ipama kanep'a ti atsila sarei.
42 #
Livai 27:30. V'eti usa, nrn istu a kam'i kvv'i Varisi. Sena ti kvlev'la nki iamk arna nki inal arna ru si papa udlani ataui al tim'ah, la nahar iv'i min v'aha ru ha, kavtaui iv'i nkan a Mlin Eia, v'eti kaavv'ahur p'kl viviln, v'aha kaavlap'as an Atua. Ip'as a ti pavan si lera, v'eti iap'as a ti paln p'kl viviln m'a p'kl ti alap'as an a Mlin Eia. 43Usa, nrn istu a kam'i kvv'i Varisi, sena ti kvlap'as a napl lil al nmah tamat nakl, kavrn ti nelnal apavvr ip'as a kam'i arna nut aulul a sei nakl. 44Usa, nrn istu a kam'i kvv'i dui na v'nen hua m'er Varisi, kam'i kvp'ip'en lamuru. Sena ti kam'i kvnep'a nut atin m'ertu, v'eti akala nut nen. M'ertu avluvn a nut lera, v'eti ahavrndaui.”
45Sarei, dui na v'nen hua iamk ivrprani, kavr ti a, “Tisa, naran kvr si lera, kv'ana hua m'a kam'em' ml ra.”
46Laha, ivr ti a, “Usa, nrn istu a kam'i ml, kvv'i dui na v'nen hua, sena ti kvtu si dv aranar m'ertu a ti apavuei, la ihua ihuadau ha, v'eti kam'i kaavier si dv lera arna nirh lm'am'i ipamk. 47Usa, nrn istu a kam'i, sena ti kvmhmah a nut avtin pruvet, v'eti a tetiam'i avrpep'nr. 48Laha, kvv'iv'en a ti kvm'ahu a pariar a tetiam'i, sena ti hir avrpep'nr, v'eti kam'i kvmhmah a nut avtinr. 49Sena si lera, arna v'ahienan Atua ivr ti a, ‘Kana p'etep'a dui na v'nenak m'er apusel asnr. Apavrp ki kavtp'ev' ki.’ 50A ti Atua iputakm a m'ertu avsilv' hilaha sena di dui na v'nenan udlani la atvrp sarei naran Atua ien nadep' dav'a ier dika ha. 51#Ap'u 4:8; 2 Krun 24:20,21.Itudina hin naran din a Eip'el irarev' dav'a ier naran din a Sakaraia irarev', la avrpi a p't nut na nev'etet m'a nmah tamat. Nvrdaui, nvr a kam'i, Atua iputakm a m'ertu avsilv' hilaha sanan.
52Usa, nrn istu a kam'i kvv'i dui na v'nen hua, sena ti ktvlev'la sera kii na v'ahien p'as. Kam'i kaavrav'a eim, v'eti kvtukar m'ertu avrn ti apavrav'a eim.”
53Naran ivr si lera anr, ardu na v'nen hua m'er arvarisi nlr irer, kavmlani ihuadau, kavtp'i a ti ipavr v'nen ipanelnal. 54Kavtrah ti apavpasla v'nen kinkin apavv'ana hua m'ei sanan.
© 2023 Presbyterian Reformed Church of Australia