যোহন 6
6
হাজাৰ বৗঙা মাৰাব গাস্বাহনি
(মথি ১৪:১৩-২১; মার্ক ৬:৩০-৪৪; লুক ৯:১০-১৭)
1উন জিখৗমায় যীশু গালীল চিকাবৗৰৗই মানে তিবিৰিয়া চিকাবৗৰৗই উম্পাতাঙা লৗয়ৌ। 2আৰা তৗক্রৗই মাৰাব উনি জি-জিখৗম লৗয়ৌ। আতাঙা অনোক উম্রা ৰোগী মাৰাবদোনি পিৰায় আচাংকা কৗম তৗৰৗইঙি নৗকতানা। 3আৰা যীশুৱা হৗচুৰ পিৰাঙা দুংনাঙৌ উম্প্রিং উবায় নগমি শিষ্যদোমৗন আম্বাকৌ। 4উ সমায় জকঙি পৰবনি যিহুদীদোনি পৰবনি দিন খৗতৗয়ৌ। 5আৰা যীশুৱা মৗকৗৰ পিৰাং কাতাওমৗন, তৗক্রৗই মাৰাব নগমি খৗতৗইঙা ফৗইতোঙি নৗকৗইমৗন ফিলিপৱো ব্রাকৌ, “অনোঙি স্বাহনি ফাব বিবায় পৗৰৗইং গৗমৗন মান্না?” ( 6ই ক্রৌ উম্রা উৱো থাক লানি গৗমৗন ব্রাকৌ, আতাঙা উম্রা উতুং তাং নিগা, উৱো আপৗন দাসামানা।)
7ফিলিপৱা উৱো জবাব লাওমৗন ব্রাকৌ, “অনোং গৗমৗন গ-গসা ভৗগায় ক্রৗই বেনেন, তেওবান শʼঅৗংনিং অৗধিলিনি ফাব সায়বেনেন দংচানা।”
8উনি শিষ্যদোনি মাজাৰায় সাকসা, শিমোন পিতৰনি আজং আন্দ্রিয়ৱা, উৱো ব্রাকৌ, 9“ইবায় সাকসা স্বাবেক তৱা, উনায় গমনি ফাব কাৰবৗঙা আৰা নাʼ মৗংনিং তৱা, নাত্নে ইপাংকায় মাৰাবনি গৗমৗন উৱো উতুং দংঙা?”
10যীশুৱা ব্রাকৌ, “মাৰাবদো আম্বাং দিমি।” উ হাদামায় তৗক্রৗই শামফাং তৱা। উম্প্রিং মিʼদোসৗন লেকেনায় হাজাৰবৗঙা গানা মাৰাব আম্বাকৌ।#6:10 মিচিক আৰা স্বাবেকদো লেকেন সায়চান। 11আৰা যীশুৱা উ ফাব লায়মৗন কৗঞ্চৗকঙি শুৰমৗন, যি মাৰাবদো আম্বাকতানা অনোঙা ফায়লাৱৌ; আৰা নাʼমৗংনিংবান অনোক যেপাং পিয়া উপাং লাৱৌ। 12অনোক অফানি জিখৗমায় উম্রা নগমি শিষ্যদো ব্রাকৌ, “বৗচৗইতানি গুন্দ্রৗইদো ৰুবুং, যাতে অৗদ্রি সায়চা।” 13উম্প্রিং অনোক ৰুবুঙৌ, আৰা উ ফাব কাৰবৗঙায়প্রিং মাৰাবদো স্বাহইমৗন বৗচৗইতানিদো ছিনিং কাদাহোগ সায়ৌ।
14উম্প্রিং উ মাৰাবদো উনি আচাংকা নৗকৗইমৗন ব্রাকৌ, “ইয়ৗন খৗন্তৗকৗন জগতৱায়ঙি ফৗই নিগিনি শুংসেতগিৰা।” 15উ সমায় যীশুৱা দাসমানৌ যে, অনোক উৱো ৰাজা বানায় গৗমৗন লৌনাং নাপতা, উনান গৗমৗন আপায়সা হৗচুৰ পিৰাঙা লৗয়ৌ।
চিকা পিৰায় লৗজৗমি
(মথি ১৪:২২-৩৩; মার্ক ৬:৪৫-৫২)
16জিখৗমায় ৰাসান লৗইমৗন উনি শিষ্যদো চিকা হাসামায় লৗয়ৌ, 17আৰা ক্রাংসা ৰুঙায় দুঙৗইমৗন চিকা উম্পাতাং কফৰনাহুমাঙা চৗবৗত নাঙৌ। উ সমায় আন্ধাৰ সায়বেনেন, যীশুৱা অনোক নাঙা ফৗইচান। 18আৰা খৗব নাম্পাৰ জেপায়মৗন চিকা জুৱায় চিকা ঢৌ তপ্লাকৌ। 19উম্প্রিং মাইল গসা অৗংনিং পিজানাঙা লৗইমৗন, অনোক যীশুৱা চিকা পিৰতিয়া লৗজৗমমৗন ৰুং খৗতৗইঙা লৗইতোঙি নৗকৌ; উম্প্রিং অনোক খৗব খিৰৌ। 20নাত্নে উম্রা অনোকো ব্রাকৌ, “তাʼখিৰ আংসে!” 21উম্প্রিং অনোক উৱো ৰুঙায় গুদুং গৗমৗন ইচ্ছা সায়ৌ; আৰা অনোক যিবায় লৗইতা, ৰুঙা উ হাদামায় তাপৗন সকায়ৌ।
স্বৗর্গায়ঙি আহাৰনি বিষিনায় তৗৰৗং লাওঙি
22জিসিংমৗন যি মাৰাবদো চিকাবৗৰৗইনি উম্পাতাঙায় চাপতানা, অনোক নৗকতানা যে, উ হাদামায় ক্রাংসা ৰুং চাৰা আতাং ৰুং তংচা, আৰা যীশুৱা শিষ্যদোমৗন উ ৰুঙায় দুঙৗইচান, খৗলি উনি শিষ্যদোসৗন লৗইতানা। 23নাত্নে তিবিৰিয়ায়প্রিং ক্রাংনিং ক্রাংথাম ৰুং, যিবায় প্রভুৱা কৗঞ্চৗকঙি শুৰমৗন মাৰাবদো ফাব সায়তানা, উ হাদাম খৗতৗয়ায় সকফৗয়ৌ। 24উনান গৗমৗন মাৰাবদো জেলা নৗকৌ, যীশুৱা উবায় তংচা, উনি শিষ্যদোবান তংচা, উম্প্রিং অনোক ৰুং গজকৗইমৗন যীশুৱো লামমৗন কফৰানাহুমাঙা লৗয়ৌ।
যীশুৱৗন চৗল্পাকনি আহাৰ
25আৰা চিকাবৗৰৗই হাসামায় উৱো বঙায়মৗন ব্রাকৌ, “ৰব্বি নৗং বিবা ইবায়ঙা ফৗইতানা?”
26যীশুৱা অনোকো জবাব লাওমৗন ব্রাকৌ, “খৗন্তৗকৗন, খৗন্তৗকৗন, আং ননোকো ব্রাকাং, ননোক আচাংকা চিন নৗকৗইমৗন আঙো লামতা উৱো দংচা; নাত্নে উ ফাব স্বাহইমৗন অফতানা ব্রাকায়মৗনসে আঙো লামতা। 27চামায়মৗন লৗইঙি আহাৰনি গৗমৗন তাʼদাহায়, নাত্নে বুসুঞ্চা লাগেত যি আহাৰ পাংঙা, উন গৗমৗন দাহায়। উ আহাৰ মাৰাবনি স্বাৱা ননোঙা লাওঙা, আতাঙা আৱা ঈশ্বৰা উৱোন চাব তকৌ।”
28উম্প্রিং অনোক উনায় সৗঙৌ, “নিং যাতে ঈশ্বৰনি কৗম তৗৰৗইং মানা উন গৗমৗন উতুং তাং নিগা?”
29যীশুৱা জবাব লাওমৗন অনোকো ব্রাকৌ, “ঈশ্বৰা যি মাৰাবো বেসেততানা, উৱো বিশ্বাস গাসায়োন সায়তানা উনি লামতোঙি কৗম।”
30অনোক উৱো ব্রাকৌ, “নিং নৗঙো নৗকৗইমৗন বিশ্বাস গাসায় গৗমৗন, নৗং উতুং চিন্ন তৗনৗং মানা? নৗং উতুং কৗম তৗৰৗইতা? 31#চৗবৗ 16:4,15; চায় 78:24 নিঙি অৗগিনি আৱাদো তৗলৗয়ায় মানা স্বাহইতানা যেগেনান সুকতানি তৱা, ‘উম্রা স্বাহনি গৗমৗন অনোঙা স্বৗর্গায়প্রিং স্বাহনি আহাৰ লাওতানা।’ ”
32যীশুৱা অনোকো ব্রাকৌ, “খৗন্তৗকৗন, খৗন্তৗকৗন, আং ননোকো ব্রাকাং, মোশিয়া স্বৗর্গায়প্রিং উ স্বাহনি আহাৰ লাওৱৗইংচান, নাত্নে ইনি আৱাসে ননোঙা স্বৗর্গায়প্রিং খৗন্তৗক স্বাহনি আহাৰ লাৱা। 33আতাঙা যি আহাৰা স্বৗর্গায়প্রিং বৗৰৗইমৗন ফৗয়া আৰা জগতৱানা চৗল্পাক লাৱা, উৱৗন ঈশ্বৰা লাওতানি আহাৰ।”
34উম্প্রিং অনোক উৱো ব্রাকৌ, “প্রভু নিৰিখৗন উ আহাৰ নিঙা লাও।”
35যীশুৱা অনোকো ব্রাকৌ, “আঙৗন উ চৗল্পাকনি আহাৰ। যি মাৰাবা ইনি খৗতৗইঙা ফৗইঙা, উম্রা হেঙান ইফিচানা, আৰা যি মাৰাবা আঙো বিশ্বাস গাসায়ঙা, হেঙান নৗঙনাওচানা। 36আং ননোঙা দুনতানা যে, ননোক আঙো নৗকৗইবেনেন বিশ্বাস গাসায়চানা। 37আৱা যি যি লাওতানা, উ বেবাকন, আং নাঙায়ঙা ফৗইঙা; আৰা যি মাৰাবদো ইনি খৗতৗইঙা ফৗইঙা, আং উৱো হেঙান বৗৰাং বাকায়চানা। 38আতাঙা আং অৗপিনি ইচ্ছা পুৰণ গাসায় গৗমৗন আং স্বৗর্গায়প্রিং বৗৰৗইমৗন ফৗইংচান; নাত্নে যি মাৰাবা আঙো বেসেততানা, উনি ইচ্ছা পুৰণ গাসায় গৗমৗনসে। 39আঙো বেসেততানি মাৰাবনি ইচ্ছা ইয়ৗন, উম্রা যিদো আনা লাওতানা, উদো গসানান যাতে মায়মৗন লৗইচা, নাত্নে বুসুননি দিনায় উৱো পায়চকা। 40আতাঙা ইনি আৱানি ইচ্ছা ইয়ৗন যে, চাংবা স্বাৱো নৗকৗইমৗন বিশ্বাস গাসায়া, উম্রা যাতে বুসুঞ্চা চৗল্পাক মানা; আৰা আঙৗন বুসুন্নি দিনায় উৱো পায়চকঙা।”
41 “স্বৗর্গায়প্রিং বৗৰফায়তানি আহাৰ আঙৗন,” উম্রা ই ক্রৌ ব্রাঙান গৗমৗন, যিহুদীদো উনি পিৰায় ৰাগ সায়ৌ। 42উম্প্রিং অনোক উৱো ব্রাকৌ, “ইমাৰা যোষেফনি স্বা যীশুৱা দংচা কনায়, যি মাৰাবনি আমায় আৱা নাং দাসামানা? উগুৰৗন তি উম্রা বিগিনা ব্রাকবিয়া, ‘আং স্বৗর্গায়প্রিং বৗৰৗইমৗন ফৗইতানা’?”
43যীশুৱা জবাব লাওমৗন অনোকো ব্রাকৌ, “ননোক নৗঙো আঙো তাʼঅলোক। 44আঙো বেসেততানি আৱা বৗতচাৰৗন সাকসাবান আং নাঙা ফৗইং মাঞ্চা আৰা বুসুনায় আং উৱো পায়চকঙা। 45#যি 54:13 শুংসেতগিৰদোনি লেখায় সুকতানি তৱা, অনোক বেবাকৗন ঈশ্বৰনায় তৗৰৗং মাসানি সায়ঙা। চাংবা আৱানায় নায়মৗন তৗৰৗংতানা, উম্রা আং নাঙা ফৗয়া। 46চাংবা আৱাৱো নৗকৌ, উৱো দংচা; যি মাৰাবা ঈশ্বৰনায়প্রিং ফৗইতানা, উম্রাসৗন আৱাৱো নৗকতানা। 47খৗন্তৗকৗন, খৗন্তৗকৗন, আং ননোকো ব্রাকাং, যি মাৰাবা বিশ্বাস গাসায়া, উম্রা বুসুঞ্চা চৗল্পাক মানৌ। 48আঙৗন চৗল্পাকনি আহাৰ। 49ননোঙি অৗৱৗই অৗচুদো, তৗলৗয়ায় মানা স্বাহইতানা, আৰা অনোক চিʼমৗন লৗয়ৌ। 50মাৰাবা স্বাহইমৗন চিʼমৗন লৗইচানি গৗমৗন, স্বৗর্গায়প্রিং বৗৰতানি চৗল্পাকনি আহাৰ ইয়ৗন। 51স্বৗর্গায়প্রিং বৗৰতানি চৗল্পাকনি আহাৰ আঙৗন। চাংবা যুদি ই আহাৰ স্বাহআ, উগুৰৗন উম্রা বুসুঞ্চা লাগেত হেংঙা, আৰা আং যি আহাৰ, জগতৱায়ঙি মাৰাবদোনি গৗমৗন লাওঙা, উৱৗন ইনি কান।”
52উম্প্রিং যিহুদীদো নৗংমৗন আংমৗন তর্ক বিতর্ক সায়মৗন ব্রাকৌ, “স্বাহনি গৗমৗন ই মাৰাবা বিগিনা অৗপিনি কানো, নাঙা লাও মানা?”
53যীশুৱা অনোকো ব্রাকৌ, “খৗন্তৗকৗন, খৗন্তৗকৗন, আং ননোকো ব্রাকাং, মাৰাবনি স্বা-নি কান স্বাহচাৰৗন আৰা উনি ছিঃ নৗঙচাৰৗন, ননোক অৗপিনায় চৗল্পাক তংচা। 54যি মাৰাবা ইনি কান স্বাহআ আৰা ইনি ছিঃ নৗঙা, উম্রা বুসুঞ্চা চৗল্পাক মানৌ, আৰা আং উৱো বুসুনায় পায়চকঙা। 55আতাঙা ইনি কানন খৗন্তৗক আহাৰ, আৰা ইনি ছিঃয়োন খৗন্তৗক নৗঙি। 56যি মাৰাবা ইনি কান স্বাহনা আৰা ইনি ছিঃ নৗঙা, উম্রা ইনায় তৱা, আৰা আং উনায় তৱা। 57যেগেনান চৗল্পাকনাং আৱা আঙো বেসেততানা, আৰা আৱানি গৗমৗনসৗন আং হেংতা, উগুনান যি মাৰাবা আঙো স্বাহনা, উম্রাবান ইনি দ্বাৰায় হেংমৗন পাংঙা। 58স্বৗর্গায়প্রিং বৗৰতানি আহাৰ ইয়ৗন; অৗৱৗই অৗচুদো যেগেনান স্বাহঔ আৰা চিʼয়ৌ, উগুনা দংচা; যি মাৰাবা ই আহাৰ স্বাহআ, উম্রা বুসুঞ্চা লাগেত হেংঙা।”
59ই বেবাক ক্রৌৱোন উম্রা কফৰনাহুমায় দেপ্রেং লাওঙি সমায় আয়সান নগৱায় ব্রাকতানা।
বুসুঞ্চা চৗল্পাকনি বিষিনায়
60উম্প্রিং উনি শিষ্যদোনি মাজাৰায় তৗক্রৗই মাৰাবান ই ক্রৌ নায়মৗন ব্রাকৌ, “ই ক্রৌ খৗব ৰাখা চাং প্রেংঙা?”
61উনি শিষ্যদো ইগিনা তর্ক সায়তোঙি উৱো যীশু হাপাগ শুঙায় দাসামানমৗন, অনোকো ব্রাকৌ, “ই ক্রৌৱান ননোকো হাপাগ কান্দাত তিন্তা কনায়? 62উগুৰৗন মাৰাবনি স্বাৱা অৗগচাকৱায় তয়তোঙি হাদামাঙা দুংনাংতোঙি নৗকাৰৗন উতুং ব্রাঙা? 63আত্মাৱা চৗল্পাক লাওঙি, কানা কিচুন দংচা। আং ননোঙা যি যি ক্রৌ ব্রাকতা, উৱো আত্মা আৰা চৗল্পাক। 64নাত্নে ননোঙায় চাং-চাংবান তৱা, উৱো বিশ্বাস গাসায়চা।” (আৰা চাংবান উৱো শুতুৰনি চতঙায় গৗথৗই লাওঙা।) 65উম্রা আৰা ব্রাকৌ, “উনান গৗমৗন আং ননোকো ব্রাকতানা, যুদি আৱানায়প্রিং ক্ষমতা লাওঙি সায়চা, উগুৰৗন সাকসানান আৱানি খৗতৗইঙা ফৗই মাঞ্চা।”
66উবায়প্রিং উনি তৗক্রৗই শিষ্যদো বালবাকৗইমৗন, উমৗন অৗগ্রৗম লৗই ফৗই তাকচৌ। 67উম্প্রিং যীশুৱা ছিনিং শিষ্যদো ব্রাকৌ, “ননোকবান লৗইং গৗমৗন শুং সায়তা না উতুং?”
68 #
মথি 16:16; মার্ক 8:29; লুক 9:20 শিমোন পিতৰা জবাব লাওমৗন উৱো ব্রাকৌ, “প্রভু নিং চিনাঙা লৗইঙা? বুসুঞ্চা চৗল্পাক নিনায়সে তৱা। 69আৰা নিং বিশ্বাস গাসায়ৌ আৰা দাসামানৌ, নৗঙৗন ঈশ্বৰনি উ পিতাৰ মাৰাব।”
70যীশু অনোঙা জবাব লাওমৗন ব্রাকৌ, “ননোক ই ছিনিংঙো আং বাসায়মৗন লায়চান কনায়? আৰা ননোঙি মাজাৰায় সাকসা শয়তানা তৱা।” 71ই ক্রৌ ঈস্কৰিয়োতীয় শিমোননি স্বাবৗন্তৗই যিহুদানি বিষিনায় ই ক্রৌ ব্রাকৌ, “আতাঙা উ মাৰাবৗন উৱো শুতুৰনি চতঙায় গৗথৗই লাওঙা উম্রা ছিনিংনি মাজাৰায় সাকসা।”
The Bible Society of India
© 2023, Used by permission. All rights reserved. More