চঙি 11
11
বাবিলায়ঙি নৗগৌ চচ্রং
1অৗগচাকৱায় বেবাক বাসমাতায় গসৗন ক্রৌ, আৰা গসৗন মত তৱা। 2উম্প্রিং জিখৗমায় মাৰাবদো ৰাসান মুপাক পাতাং লৗইয়ৗং লৗইয়ৗং শিনাৰনি হাসঙায় গসা সমান হাদাম মানায়মৗন উবায় তয়ৌ। 3উবায় নৗঙো আঙো ব্রাকজিনৌ, “ফৗই নাং ইটা বানায়মৗন, উৱো পেনেমসা শৌঙা;” উম্প্রিং লোহংনি বৗদৗলায়, ইটা আৰা আলকাতাৰনি বৗদৗলায় হাʼকুমাৰ সায়ৌ। 4আৰা অনোক ব্রাকৌ, “ফৗই নাং আপ্রোং গৗমৗন গসা নগৰ আৰা ৰাংক্রাং গক ৰাৱা গসা খৗব চুনি নৗগৌ চচ্রং হামায়মৗন মুং দাংকা গাসায়ঙা; উগুনা দংচাৰৗন নাং বেবাকৗন বাসমাতায় চৗলৗই-বৗলৗই সায়ঙা।”
5মাৰাবনি স্বাজংদো যি নগৰ আৰা নৗগৌ চচ্রং হামতোঙিয়ো চৗইঙি গৗমৗন যিহোৱা ঈশ্বৰা বৗৰৗইমৗন ফৗয়ৌ। 6আৰা যিহোৱা ঈশ্বৰা ব্রাকৌ, “চৗই অনোক গসৗন জৗতি আৰা অনোঙি ক্রৌবান গসৗন; আৰা অনোঙি কৗমবান গসৗন তিসে চংতা; তি অনোক তৗৰৗই মাঞ্চানি গসানান তংচা; 7উনান গৗমৗন, ফৗই, নাং চৗদৗৰাং বৗৰনাংমৗন, অনোক সাকসা সাকসানি ক্রৌ বুজৗই মাঞ্চানি গৗমৗন উ হাদামায় ক্রৌ জৰায় তাকায় লাওঙা।” 8ইগিনা তাকায়মৗন যিহোৱা ঈশ্বৰা বেবাক বাসমাতানি পিৰায় অনোকো চৗলৗই-বৗলৗই গাসায় লাৱৌ; আৰা অনোক নগৰ বানায়ঙি বাদ লাৱৌ। 9উনান গৗমৗন উনি মুং বাবিল#11:9 কদেকঙি। তান্নি সায়ৌ। আতাংনা ব্রাকাৰৗন উ হাদামায়ৗন যিহোৱা ঈশ্বৰা বেবাক বাসমাতায়ঙি ক্রৌ জৰায় তাকৌ। আৰা উবায়প্রিং যিহোৱা ঈশ্বৰা অনোকো বাসমাতায়ৗন চৗলৗই-বৗলৗই তাকৌ।
শেমনি বংশদো
(১ বংশ ১:২৪-২৭)
10শেমনি বংশদো ইয়ৗন। শেমৱা শʼগসা বৗসৗৰ বয়স সায়মৗন চিকা বৗন্নি বৗসৗৰ অৗংনিং জিখৗমায় উনি স্বাবৗন্তৗই অর্ফকষদ মানৌ। 11অর্ফকষদৱো মান জিখৗমায়, শেম শʼবৗঙা বৗসৗৰ হেংমৗন পাংঙায়, উনি আৰা স্বাবৗন্তৗই স্বামিচিক মানৌ।
12অর্ফকষদনি থামছিবৗং বৗসৗৰ বয়স সায়মৗন, উনি স্বাবৗন্তৗই শেলহ মানৌ; 13শেলহনি জনম জিখৗমায়, অর্ফকষদৱা শʼব্রি থাম বৗসৗৰ হেংমৗন পাংঙায় উনি আৰা স্বাবৗন্তৗই স্বামিচিক মানৌ।
14শেলহনি থামছি বৗসৗৰ বয়স সায়মৗন, উনি স্বাবৗন্তৗই এবৰ মানৌ; 15এবৰনি জনম জিখৗমায়, শেলহৱা শʼব্রি থাম বৗসৗৰ হেংমৗন পাংঙায় উনি আৰা স্বাবৗন্তৗই স্বামিচিক মানৌ।
16এবৰা থামছিব্রি বৗসৗৰ বয়স সায়মৗন, উনি স্বাবৗন্তৗই পেলগ মানৌ; 17পেলগনি জনম জিখৗমায়, এবৰা শʼব্রি থামছি বৗসৗৰ হেংমৗন পাংঙায় উনি আৰা স্বাবৗন্তৗই স্বামিচিক মানৌ।
18পেলগৱা থামছি বৗসৗৰ বয়স সায়মৗন, উনি স্বাবৗন্তৗই ৰিয়ু মানৌ; 19ৰিয়ুনি জনম জিখৗমায়, পেলগৱা শʼঅৗংনিং সুকু বৗসৗৰ হেংমৗন পাংঙায় উনি আৰা স্বাবৗন্তৗই স্বামিচিক মানৌ।
20ৰিয়ুনি থামছিনিং বৗসৗৰ বয়স সায়মৗন, উনি স্বাবৗন্তৗই সৰূগ মানৌ; 21সৰূগনি জনম জিখৗমায়, ৰিয়ুৱা শʼঅৗংনিং সিন বৗসৗৰ হেংমৗন পাংঙায় উনি আৰা স্বাবৗন্তৗই স্বামিচিক মানৌ।
22সৰূগৱা থামছি বৗসৗৰ বয়স সায়মৗন, উনি স্বাবৗন্তৗই নাহোৰ মানৌ; 23নাহোৰনি জনম জিখৗমায়, সৰূগৱা শʼঅৗংনিং বৗসৗৰ হেংমৗন পাংঙায় উনি আৰা স্বাবৗন্তৗই স্বামিচিক মানৌ।
24নাহোৰা নিংছিসুকু বৗসৗৰ বয়স সায়মৗন, উনি স্বাবৗন্তৗই তেৰহ মানৌ; 25তেৰহনি জনম জিখৗমায়, নাহোৰা শʼগসায়মৗন ছিসুকু বৗসৗৰ হেংমৗন পাংঙায় উনি আৰা স্বাবৗন্তৗই স্বামিচিক মানৌ।
26তেৰহনি সিনছি বৗসৗৰ বয়স সায়মৗন, উনি স্বাবৗন্তৗই অব্রাম, নাহোৰ আৰা হাৰণ মানৌ।
তেৰহনি বংশদো
27তেৰহনি বংশদো ইয়ৗন। তেৰহনি স্বাবৗন্তৗই অব্রাম, নাহোৰ আৰা হাৰণ; হাৰণনি স্বাবৗন্তৗই লোট। 28হাৰণনা উনি আৱা তেৰহনি মাহাঙায় অৗপিনি জনম হাদাম কলদীয়দোনি ঊৰ নগৰায় চিʼয়ৌ। 29উনি জিখৗমায় অব্রাম আৰা নাহোৰ ই মৗনিঙৗন বিয়ৌ গাসায়ৌ। অব্রামনি মিচিকনি মুং সাৰী; নাহোৰনি মিচিকনি মুং মিলকা, উম্রা হাৰণনি স্বামিচিক। উ হাৰণনা মিলকা আৰা যিস্কানি আৱা। 30নাত্নে সাৰাজু বৗঞ্জৗই; উম্রাজু স্বাজং তংচা।
31জিখৗমায় তেৰহৱা অৗপিনি স্বাবৗন্তৗই অব্রামো, আৰা হাৰণনি স্বাবৗন্তৗই লোট মুঙায় অৗচুস্বাৱো, আৰা অব্রামনি মিচিক সাৰী নামসাজুৱোবান অৗগ্রৗম লায়মৗন, কনান হাসঙাং লৗইং গৗমৗন, কলদীয়দোনি ঊৰ নগৰায়প্রিং পতক নাঙৌ। নাত্নে হাৰণ নগৰ লাগেত লৗইমৗন, উবায় তয়ৌ। 32জিখৗমায় তেৰহৱা শʼঅৗংনিং বৗং বৗসৗৰ সায়মৗন হাৰণনায় চিʼয়ৌ।
The Bible Society of India
© 2023, Used by permission. All rights reserved. More