Pulim 1
1
Wonnu maama pulim taane
1Boboa kam ne to mo Wɛ naane wɛyuu de tega baŋa.#Jɔn 1:1 2Tega baŋa kam maama déem jage jeiga maama mo. Kolokolo ya ta tera ka baŋa ne. Na-fɔrɔ kom baŋa maama ye lim yerane. Wɛ Siu kom maa kare wɛɛne ko via na bam baŋa ne.
3Wɛ ma ta o we, “Pa se pwooni taa wora!” Pwooni ma seene de ba.#2 Korinti 4:6 4Wɛ ma na we pwooni dem lana, ye o wo pwoli. O déem ma pa se pwooni dem de lim dem pɔɔre daane. 5Wɛ déem ma bwoŋi pwooni dem we ‘wea’, ye o daare o bwoŋi lim dem we ‘tete’. Tega ma ba ka yi ye ka daare ka poore. Boboa dɛ dem mo konto.
6Wɛ déem daa ma ta o we, “Pa se laŋa taa wora na bam tetare ne se ba pɔɔre yera yera kuni belei.” 7Wɛ ma ke laŋa o ma pɔɔre na balo na wo ka kuri ne to, de na balo na wo ka baŋa ne to daane. Ko ma seene ko ke konto. 8Wɛ ma bwoŋi laŋa kam we ‘wɛyuu’. Tega ma ba ka yi ye ka daare ka poore. Da yalei dɛ dem mo konto.
9Wɛ daa ma ta o we, “Pa se na balo na wo wɛyuu kom kuri ne to la ba tigisi jeiga dedoa ba daare se te-kora taa wora.” Ko ma seene ko ke konto. 10Wɛ ma bwoŋi te-kora kam we ‘tega baŋa’, ye o daare o bwoŋi na-fɔrɔ kom na lage daane to we ‘naneo’. Wɛ ma na we ko lana, ye o wo pwoli.
11Wɛ laam ma ta o we, “Pa se gaaro de teeni puli tega kam baŋa ne, gaaro telo na tiŋi te wo-dwa to, dedaane teeni na leiri bia de ba wo-dwa to, tio maama de ko dwi.” Ko ma seene ko ke konto. 12Tega kam maa puli ga-lɛɛro dwi maama, de teeni dwi maama na leiri bia to, dedaane te wo-dwa dwi dwi. Wɛ ma na we, o na ke kolo to lana, ye o wo pwoli. 13Tega ma ba ka yi ye ka daare ka poore. Da yatɔ dɛ dem mo konto.
14Wɛ daa ma ta o we, “Pa se wonnu telo na nyeene to dwi dwi taa wo wɛyuu kom ne se te pɔɔre wea de tete daane. Te wó taa ye memaŋa te bere yadɛ dedaane te-pwoŋa. Te ta wó taa bere da yam, de bena yam, dedaane chane sem maŋa maama. 15Te wó taa nyeene wɛyuu ne se te taa pae pwooni tega kam baŋa ne.” Ko ma seene ko ke konto. 16Wɛ déem ma ke wo-nyen-kamuna yalei pa se kolo na nyeene ko gaale to yeini ko taa nyeena wea ne, ye kolo na muri to taa nyeena tete ne. O daa ta ma ke chalechwe sem de o woli da. 17Wɛ ma ke wo-nyenno tem konto o zege wɛyuu ne se te taa pae pwooni yi tega kam baŋa. 18Te wó taa nii wea de tete baŋa ne ye te ta wó pɔɔre pwooni de lim daane. Wɛ ma na we, o na ke kolo to lana, ye o wo pwoli. 19Tega ma ba ka yi ye ka daare ka poore. Da yana dɛ dem mo konto.
20Wɛ daa ma ta o we, “Pa se na-fɔrɔ kom wo su de wonnu telo na ŋwe to dwi maama, se zuna de taa jaana ba beera wɛyuu kom jei sem maama ne.” 21Wɛ déem ma naane naneo wo vare-kamuna de wonnu telo na kare te yɛ na wone to dwi maama. O ta ma naane zuna balo na kare ba jaane wɛyuu ne to ba dwi ba dwi. Wɛ ma na we, o na ke kolo to lana, ye o wo pwoli. 22Wɛ ma daare o swɛ te maama swolim ye o we, “Ta‑á lore-na á puli á su naneero tem wo maama. Nam ta pa se zuna bam de puli ba taa daga logo baŋa ne.” 23Tega ma ba ka yi ye ka daare ka poore. Da yanu dɛ dem mo konto.
24Wɛ daa ta ma ta o we, “Pa se tega kam baŋa taa jege wonnu telo na ŋwe to dwi dwi, sɔŋɔ vara de ga-vara, de tega-veila dwi maama.” Ko ma seene ko ke konto. 25Wɛ déem ma ke logo baŋa vara bam konto, ba dwi ba dwi, kago-vara de sɔŋɔ vara, de tega-veila dwi maama. Wɛ ma na we, o na ke kolo to lana, ye o wo pwoli.
26Wɛ laam maa we, “Pa-na se dé mɔ nabiina se ba taa nye de debam, ye ba jege debam tete kamɔgɔ. Banto wó taa jege dam ba taa tei naneo wo ywona yam, de wɛyuu zuna bam, dedaane vara de wonnu telo maama na kare te vei tega kam baŋa ne to.” 27Wɛ déem ma seene o naane nabiina se ba taa jege o tete kamɔgɔ. O déem naane-ba baaro de kaane mo.#Pulim 2:21-24 28O ma swɛ ba swolim, ye o ta de-ba we, “Ta‑á lore-na bia á puli dedɛ se á jage tega baŋa maama ne se á daare á ta‑á tei-ko. Ta‑á di-na dam naneo wo ywona yam, dedaane wɛyuu zuna bam, de wonnu telo maama na kare te vei tega ne to baŋa ne.”
29Wɛ ma daare o ta de-ba we, “Nii-na, a kwei gaaro telo na tiŋi te wo-dwa to, dedaane teeni na leiri bia de ba wo-dwa to, a ke abam jeŋa ne se te taa ye wodiiru te pa abam. 30Ko daare ko ná ye logo baŋa vara bam maama, de wɛyuu zuna bam, de wonnu telo maama na jege ŋwea ye te kare te vei tega baŋa ne to, amo kwei gaaro tem de teeni vɔɔro tem mo a pa-te se te taa di.” Ko ma seene ko ke konto.
31Wɛ ma fɔge o nii kolo maama o na ke to, ye o na we ko tiini ko lamma. Tega ma ba ka yi ye ka daare ka poore. Da yaredo dɛ dem mo konto.
© 2020, Ghana Institute of Linguistics, Literacy and Bible Translation (GILLBT)