ᤋᤥᤗᤡᤱᤛᤥᤔᤢ 28
28
1ᤂᤧᤒᤩᤠᤱ ᤀᤡᤛᤜᤠᤰᤁᤧᤸᤗᤧ ᤕᤠᤁᤢᤒᤧᤴ ᤀᤢ᤺ᤳᤋᤢᤀᤠᤱ ᤔᤢ᤹ᤀᤡᤛᤠᤶ ᤐᤡᤖᤢ. ᤜᤧᤰᤁᤩᤠᤱ ᤀᤰᤂᤣ ᤔᤧᤳᤋᤢᤖ ᤀᤡᤱᤈᤠᤱ ᤐᤡᤖᤢ. “ᤂᤧᤏᤧ᤹ ᤀᤠᤳᤋᤡᤴ ᤁᤏᤠᤏᤡ ᤔᤧᤴᤇᤢᤔᤠᤜᤠ᤹ᤏᤢᤀᤠᤱ ᤔᤣ᤺ᤰᤂᤡᤶ ᤔᤧᤈᤥᤃᤧᤴᤏᤧ᤹॥ 2ᤐᤍ᤻ᤍᤏ ᤀᤠᤖᤠᤶᤔᤥ ᤁᤧᤶᤔᤠᤖᤧ ᤁᤢᤶᤒᤠ ᤒᤋᤢᤀᤣᤗᤖᤧ ᤁᤢᤜᤡᤶᤔᤥ ᤐᤣᤃᤧ᤹ᤀᤠᤱ ᤂᤧᤏᤧ᤹ ᤁᤧᤱᤃᤫᤠ ᤗᤠᤒᤠᤏᤧᤸᤗᤧ ᤁᤢᤛ᤻ᤛᤠ ᤔᤧᤴᤇᤢᤔᤠᤜᤠ᤹ᤀᤥ ᤌᤡᤰᤐᤠᤏᤢ ᤔᤣ᤺ᤰᤂᤡᤶ ᤆᤥᤃᤧ᤹॥ 3ᤔᤢᤰᤛᤠᤶᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ#᥈᥎:᥉ ᤔᤢᤰᤛᤠᤶᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱ—ᤜᤡᤒᤪᤢᤀᤥ ᤀᤧᤗ-ᤛᤠᤍ᤻ᤍᤤ॥ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤁᤧᤒᤡᤖ. ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤒᤥᤴ ᤁᤧᤎᤧ᤹ᤖ ᤆᤥᤃᤢᤀᤠᤱ ᤁᤧᤓᤥᤖ. ᤜᤧᤰᤁᤩᤠᤱ ᤂᤧᤏᤧ᤹ᤗᤠᤶ ᤕᤖᤡᤰ ᤔᤧᤴᤇᤠᤶ ᤛᤢᤘᤠᤱ ᤔᤧᤒᤥᤱᤗ॥ 4ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤏᤧ᤹ ᤏᤢ ᤁᤧᤔᤢ᤹ᤀᤡᤍᤠᤱᤛᤠᤜᤠ᤹ ᤀᤒᤪᤠᤜᤠᤶᤔᤡᤸᤗᤧ ᤂᤥᤛᤢᤒᤠ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶᤔᤡᤴ ᤁᤧᤒᤡᤖᤡᤖ॥ ᤂᤧᤏᤧ᤹ ᤁᤧᤕᤢᤱᤒᤠ ᤁᤴ ᤗᤠᤈᤣᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤒᤪᤠᤜᤠᤶᤔᤡᤴ ᤐᤡᤖᤢᤒᤠᤖᤥ. ᤂᤧᤴ ᤂᤧᤏᤧ᤹ᤀᤣ ᤁᤧᤕᤢᤰᤁᤥ ᤐᤥᤱᤗᤖᤥ॥” #ᤋᤥᤗᤡᤱ ᥇᥍:᥊-᥎ 5ᤀᤰᤂᤣᤗ᤹ᤖᤡᤰ ᤀᤡᤛᤜᤠᤰᤁᤧᤸᤗᤧ ᤕᤠᤁᤢᤒᤧᤴ ᤗᤠᤒᤠᤏᤧᤴ ᤘᤕᤧᤒᤠ ᤐᤍ᤻ᤍᤏ ᤀᤠᤖᤠᤶᤔᤥ ᤐᤠᤱᤄᤢᤍᤣᤛᤢ॥ ᤜᤧᤰᤁᤩᤠᤱ ᤗᤠᤒᤠᤏᤧᤴ ᤀᤖᤠᤔᤡ ᤒᤋᤢᤀᤣᤗᤖᤧ ᤁᤢᤛ᤻ᤛᤠ ᤜᤧᤰᤁᤩᤠᤱ ᤀᤣᤛᤠᤒᤧᤴ ᤏᤢ ᤕᤠᤁᤢᤒᤖᤧ ᤂᤢᤴᤇᤡ᤹ ᤔᤠ ᤖᤡᤒᤣᤁᤠ᤺ᤸᤗᤧ ᤁᤢᤶᤓᤢ᤹ ᤘᤕᤧ॥
ᤀᤣᤛᤠᤒᤧᤴ ᤘᤣ᤹ᤛᤔᤠ ᤔᤧᤴᤇᤢᤔᤠ ᤌᤡᤰᤏᤢ ᤔᤣ᤺ᤰᤂᤡᤶ ᤆᤥᤃᤧ
6ᤀᤠᤸᤗ ᤀᤡᤛᤜᤠᤰᤁᤧᤸᤗᤧ ᤕᤠᤁᤢᤒᤧᤴ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤐᤡᤖᤢᤀᤠᤱ ᤔᤧᤸᤗᤡᤱᤃᤧᤴ ᤔᤣ᤺ᤳ ᤋᤠ᤺ᤳᤇᤧ ᤂᤧᤵᤔᤥᤗᤠᤶᤒᤠ ᤐᤍ᤻ᤍᤏ ᤀᤠᤖᤠᤶᤔᤥ ᤐᤠᤱᤄᤢᤍᤣᤛᤢᤒᤠ ᤐᤠ᤺ᤴᤏᤡᤴ ᤀᤣᤛᤠᤒᤧᤸᤗᤧ ᤏᤡᤱᤘᤠ᤹ ᤂᤥᤛᤢ॥ ᤜᤧᤰᤁᤩᤠᤱ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤐᤡᤖᤢᤸᤗᤧ ᤕᤠᤁᤢᤒᤧᤴ ᤔᤧᤳᤋᤢ. “ᤂᤧᤏᤧ᤹ ᤁᤏᤠᤏᤡ ᤔᤧᤴᤇᤢᤔᤠᤜᤠ᤹ᤀᤥ ᤀᤠᤳᤋᤡᤴᤏᤢᤀᤠᤱ ᤔᤣ᤺ᤰᤂᤡᤶ ᤔᤧᤈᤥᤃᤧᤴᤏᤧ᤹॥” 7ᤜᤧᤰᤁᤩᤠᤱ ᤕᤠᤁᤢᤒᤧᤸᤗᤧ ᤁᤢᤶᤒᤠ ᤁᤢᤶᤔᤠᤛᤡᤖᤧ ᤂᤢᤴᤇᤡ᤹ ᤐᤠ᤺ᤴᤏᤡᤴ ᤂᤧᤶᤔᤠ ᤋᤧᤴᤍᤧᤀᤠᤱ ᤐᤍ᤻ᤍᤏ ᤀᤠᤖᤠᤔ ᤗᤧᤵᤔᤠᤱ ᤌᤠᤛᤡᤱᤅᤠᤱ ᤐᤣ ᤁᤧᤗ᤹ᤒᤠ ᤐᤠ᤺ᤴᤏᤡᤴᤏᤠᤱ ᤀᤣᤛᤠᤒᤖᤧ ᤏᤡᤱᤘᤠ᤹ ᤂᤥᤛᤢ॥ 8ᤁᤏᤠᤏᤡ ᤔᤧᤴᤇᤢᤔᤠᤜᤠ᤹ ᤁᤢᤶᤒᤠᤖᤧ ᤁᤢᤛᤡᤖᤠ᤹ ᤔᤧᤴᤎᤠᤱᤏᤧᤶᤒᤠᤖᤇ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤂᤢᤏᤧ᤹ ᤏᤡᤱᤘᤠ ᤂᤥᤛᤢ॥ 9ᤂᤧᤒᤩᤠᤱ ᤂᤢᤏᤧ᤹ ᤀᤡᤛ᤻ᤔᤠᤀᤣᤗᤖᤥ ᤐᤣ. ᤜᤧᤰᤁᤩᤠᤱ ᤂᤢᤏᤧ᤹ ᤘᤣ᤹ ᤁᤢᤔᤣ᤺ᤳᤜᤠ᤹ ᤔᤧᤘᤕᤧᤖᤛᤠᤱ ᤀᤒᤪᤠᤜᤠᤶᤔᤡᤸᤗᤧ ᤁᤢᤛ᤻ᤛᤠ ᤀᤡᤛ᤻ᤔᤠᤀᤣᤗᤖᤧ ᤁᤢᤛ᤻ᤛᤠ ᤔᤧᤴᤇᤢᤔᤠᤴᤏᤢ ᤏᤒᤠᤕᤥᤋᤖᤧ ᤁᤢᤴᤛᤠ᤹ ᤔᤜᤗᤋᤧᤴ ᤔᤣ᤺ᤳ ᤆᤥᤃᤢ ᤋᤠᤖᤢᤛᤡ॥
ᤕᤠᤁᤢᤒᤖᤧ ᤒᤣᤌᤣᤗᤀᤥ ᤛᤧᤵᤔᤠᤱ ᤔᤠᤰᤋᤢ᤹
10ᤕᤠᤁᤢᤒᤧᤸᤗᤧ ᤒᤣᤷᤛᤣᤒᤠ ᤋᤧᤴᤏᤡᤴ ᤗᤧᤖᤢᤀᤠᤱ ᤜᤠᤖᤠᤏ ᤗᤧᤵᤛᤠᤱ ᤌᤠᤛᤡᤱ ᤐᤣ॥ 11ᤏᤠᤶ ᤌᤩᤧ᤺ᤸᤗᤧ ᤂᤢᤏᤧ᤹ ᤗᤳᤇᤠ ᤋᤧᤴᤏᤥ ᤁᤧᤖᤧ. ᤜᤧᤰᤁᤩᤠᤱ ᤛᤧᤴᤍᤡᤰ ᤂᤧᤵᤔᤥᤀᤣ ᤕᤠᤱᤎᤥ᤺ᤰᤋᤧ ᤕᤠ᤺ᤰᤋᤧ॥ ᤂᤧᤴ ᤋᤧᤴᤏᤥᤒᤠ ᤗᤳᤇᤠ ᤗᤢᤱᤎᤡᤰ ᤋᤠᤖᤢᤀᤠᤱ ᤋᤠᤰᤂᤥ᤺ᤱ ᤁᤥ᤺ᤰᤛᤡᤱ ᤜᤧᤰᤁᤩᤠᤱ ᤀᤡᤶᤔᤠᤖᤧ ᤗᤠᤃᤡ ᤀᤠᤶᤓᤠ ᤂᤧ᤹ᤕᤥ ᤏᤧᤛᤡᤱ॥ 12ᤂᤢᤏᤧ᤹ ᤗᤳᤇᤠ ᤀᤰᤋᤱᤒᤠ ᤛᤧᤵᤔᤠᤱᤎᤡᤰ ᤔᤠᤰᤋᤢ. ᤂᤠᤶᤒᤣ᤺ᤰᤔᤥᤗᤠᤶ ᤛᤠᤱᤃᤪᤠᤶᤐᤣᤍᤠᤱ ᤌᤠᤖᤡᤰ ᤁᤧᤛᤢᤒᤠ ᤗᤳᤇᤠ ᤌᤖᤣ᤹ᤎᤡᤰ ᤕᤧᤒᤧ. ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤠᤱᤗᤠᤀᤡᤱᤒᤠᤜᤠ᤹ ᤂᤧᤴ ᤌᤖᤣ᤹ᤀᤥᤗᤠᤶ ᤕᤥ ᤔᤧᤎᤠᤛᤡᤱ ᤔᤧᤕᤧ ᤜᤧᤰᤁᤩᤠᤱ ᤌᤥ ᤔᤧᤗᤡᤅᤢ ᤔᤧᤍᤣ᤹ᤖᤢ॥ #ᤕᤢᤜᤢ ᥇:᥋᥇ 13ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤠᤴ ᤂᤧᤸᤗᤧ ᤁᤢᤛᤶᤎᤠᤱ ᤕᤧᤶᤛᤡᤱᤅᤠᤱ ᤕᤠᤁᤢᤒᤧᤴ ᤔᤧᤳᤋᤢ. “ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠ ᤁᤧᤴᤎᤧᤒᤠ ᤀᤒᤪᤠᤜᤠᤶᤔᤡᤸᤗᤧ ᤁᤢᤏᤡᤱᤘᤠ᤹ᤑᤢᤔᤠᤱ ᤜᤧᤰᤁᤩᤠᤱ ᤁᤧᤶᤒᤠ ᤀᤡᤛᤜᤠᤰᤁᤧᤸᤗᤧ ᤁᤢᤏᤡᤱᤘᤠ᤹ᤑᤢᤔᤠᤱᤀᤠ॥ ᤂᤧᤏᤧ᤹ ᤁᤧᤏᤧᤒᤠ ᤁᤴ ᤕᤥ᤹ᤒᤠᤴ ᤂᤧᤏᤧ᤹ ᤏᤢ ᤁᤧᤔᤢ᤹ᤀᤡᤍᤠᤱᤛᤠᤜᤠ᤹ ᤐᤡᤏᤡᤱ॥ #ᤋᤥᤗᤡᤱ ᥇᥉:᥇᥊-᥇᥋ 14ᤂᤧᤏᤧ᤹ ᤁᤧᤔᤢ᤹ᤀᤡᤍᤠᤱᤛᤠᤜᤠ᤹ ᤂᤠᤶᤒᤣ᤺ᤰᤔᤥᤒᤠ ᤂᤠᤶᤓᤢᤋᤪᤠ ᤕᤠᤖᤡᤰ ᤔᤧᤒᤥᤱ॥ ᤂᤧᤏᤧ᤹ ᤏᤠᤶᤃᤧᤳ. ᤏᤠᤶᤎᤠ. ᤌᤠᤱᤃᤧᤳ ᤏᤢ ᤗᤠᤱᤃᤧᤳ ᤐᤡᤛᤠᤱ ᤁᤧᤒᤥ᤺ᤴᤗ ᤁᤧᤒᤣ᤺ᤰ॥ ᤂᤧᤏᤧ᤹ ᤏᤢ ᤁᤧᤔᤢ᤹ᤀᤡᤍᤠᤱᤛᤠᤜᤠ᤹ ᤗᤠᤶᤒᤠᤀᤣ ᤀᤡᤰᤛᤠ ᤂᤠᤶᤒᤣ᤺ᤰᤔᤥᤒᤠ ᤁᤧᤖᤧᤰ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤖᤧ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤔᤧᤄᤥᤛᤢᤖᤥ॥ #ᤋᤥᤗᤡᤱ ᥇᥈:᥉. ᥈᥈:᥇᥎ 15ᤀᤥᤔᤧᤳᤋᤧ᤹. ᤀᤠᤱᤃᤠ᤹ ᤂᤧᤏᤧ᤹ᤏᤢ ᤘᤠ᤹ᤀᤠ ᤜᤧᤰᤁᤩᤠᤱ ᤂᤧᤏᤧ᤹ ᤀᤠᤳᤋᤡ ᤁᤧᤒᤣ᤺ᤰᤛᤠᤱ ᤀᤠᤱᤃᤠ᤹ ᤁᤶᤒᤪᤠᤱ ᤔᤧᤳᤏᤧ॥ ᤜᤧᤰᤁᤩᤠᤱ ᤀᤠᤱᤃᤠ᤹ ᤁᤴ ᤋᤧᤴᤏᤥ ᤂᤧᤏᤧ᤹ ᤏᤢ᤺ᤰᤏᤧ ᤋᤠ᤺ᤳᤏᤧ. ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤂᤧᤏᤧ᤹ ᤔᤧᤳᤏᤧᤒᤠ ᤐᤠ᤺ᤴᤏᤡᤴ ᤔᤧᤱᤃᤧᤳᤋᤣ ᤌᤠᤖᤡᤰ ᤔᤧᤗᤧᤳᤏᤧᤸᤗᤥ॥”
16ᤂᤧᤒᤩᤠᤱ ᤕᤠᤁᤢᤒᤧᤴ ᤁᤢᤔᤡᤰ ᤕᤢᤔᤠᤗᤠᤶ ᤛᤥᤖᤧ ᤗ᤺ᤴᤍᤧᤀᤠᤱ ᤐᤠ᤺ᤳᤋᤢ. “ᤛᤧᤰᤂᤠᤛᤠᤱ ᤁᤴ ᤋᤧᤴᤏᤥ ᤕᤜᤘᤣ ᤍᤠᤱᤒᤠᤴ ᤘᤠ᤹ᤖᤇ. ᤀᤠᤱᤃᤠ᤹ ᤁᤴ ᤔᤧᤴᤏᤡᤒᤧᤴ॥” 17ᤂᤢᤏᤧ᤹ ᤛᤠ᤹ᤖᤡᤰ ᤁᤡᤛᤧᤀᤠᤱ ᤐᤠ᤺ᤳᤋᤢ. “ᤁᤴ ᤋᤧᤴᤏᤡᤱᤃ ᤀᤠᤰᤋᤱᤒᤠ ᤁᤡᤵᤔᤠ ᤁᤧᤄᤢᤒᤠ ᤋᤧᤴᤏᤡᤃ॥ ᤁᤱᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤡᤶᤗᤥ॥ ᤁᤱᤃ ᤛᤠᤱᤃᤪᤠᤶᤐᤣᤍᤠᤱᤒᤠ ᤗᤠᤶᤎᤣ᤺ᤳᤏᤡᤖᤇ᥄”
18ᤕᤠᤁᤢᤒᤧᤴ ᤋᤠᤏᤠᤶ ᤀᤠᤴᤍᤣᤴ ᤐᤥᤃᤧ ᤜᤧᤰᤁᤩᤠᤱ ᤋᤠᤰᤂᤥ᤺ᤱ ᤁᤥ᤺ᤰᤛᤢᤒᤠ ᤗᤢᤱᤅᤡᤴ ᤛᤡᤳᤗᤠᤱ ᤜᤧᤰᤁᤣ ᤏᤡᤱᤘᤠ᤹ᤛᤥᤰᤗᤧ ᤗᤠᤃᤡ ᤋᤰᤐᤧᤳ ᤑᤥ᤺ᤰᤛᤢᤀᤠᤱ ᤁᤢᤛᤶᤔᤥ ᤏᤡ᤺ᤱᤃᤣᤸᤗᤧ ᤗᤧ᤺ᤰᤋᤢᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤥ ᤋᤥ᤺ᤴᤍᤢ॥ 19ᤂᤢᤏᤧ᤹ ᤂᤧᤴ ᤋᤧᤴᤏᤡᤸᤗᤧ ᤁᤢᤔᤡᤱ ᤒᤣᤌᤣᤗ (ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤡᤶ) ᤕᤢᤰᤂᤢ॥ ᤋᤃᤡ ᤂᤧᤴ ᤋᤧᤴᤏᤡᤸᤗᤧ ᤁᤢᤔᤡᤱ ᤗᤢᤈ ᤘᤕᤧ॥
20ᤂᤧᤒᤩᤠᤱ ᤕᤠᤁᤢᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖ ᤗᤳᤇᤠ ᤔᤠᤱᤜᤧᤰ ᤌᤡᤰ ᤆᤥᤃᤢ. “ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤠᤱᤃᤠ᤹ᤏᤢ ᤘᤠ᤹ᤀᤠᤱ. ᤀᤠᤗᤠᤶᤍᤡ᤺ᤰᤁᤥ ᤁᤶᤒᤪᤠᤱ ᤔᤧᤳᤋᤠ. ᤀᤠᤈᤠᤔᤠ ᤀᤠᤎᤢᤱᤔᤠ ᤁᤢᤈᤠ ᤏᤢ ᤀᤠᤈᤠᤱᤔᤠ ᤆᤠᤱ ᤐᤡᤀᤠ. 21ᤜᤧᤰᤁᤩᤠᤱ ᤔᤧᤱᤃᤧᤱ ᤔᤧᤴᤇ᤺ᤴᤀᤣ ᤌᤣᤀᤠᤱ ᤔᤧᤸᤗ᤹ᤀᤣ ᤀᤠᤱᤃᤠ᤹ ᤀᤠᤶᤒᤠᤖᤧ ᤁᤢᤜᤡᤶᤔᤥ ᤏᤢ᤺ᤱᤀᤠ ᤋᤠᤀᤠᤏᤣ ᤑᤠᤃᤪ. ᤕᤜᤘᤣ ᤍᤠᤱᤒᤠᤴᤏᤣ ᤀᤠᤱᤃᤠ᤹ ᤀᤠᤏᤡᤱᤘᤠ᤹ᤑᤢᤔᤠᤱ ᤐᤥᤱᤗᤥ॥ 22ᤜᤧᤰᤁᤩᤠᤱ ᤀᤠᤱᤃᤠ᤹ ᤛᤡᤳᤗᤠᤱ ᤜᤧᤰᤁᤣ ᤏᤡᤱᤘᤠ᤹ᤛᤥᤰᤗᤧ ᤗᤠᤃᤡ ᤜᤠᤰᤋᤢᤱᤒᤠ ᤁᤴ ᤗᤢᤱᤅᤡᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤡᤶ ᤐᤥᤱᤗᤥ. ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤧᤏᤧ᤹ ᤁᤧᤒᤡᤀᤠᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ᤗᤠᤶ ᤌᤡᤒᤥᤱᤗᤰ ᤐᤡᤏᤧᤖᤥ॥”
© 2009, 2023, Wycliffe Bible Translators, Inc. All rights reserved.