ᤋᤥᤗᤡᤱᤛᤥᤔᤢ 22
22
ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤒᤪᤠᤜᤠᤶᤔᤧᤴ ᤁᤢᤏᤡᤱᤘᤠ᤹ ᤛᤠ᤹ᤖᤢ
1ᤁᤢᤓᤠ ᤕᤧᤶ ᤀᤣᤃᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤒᤪᤠᤜᤠᤶᤔᤧᤴ ᤁᤢᤏᤡᤱᤘᤠ᤹ ᤛᤠ᤹ᤖᤢ. ᤜᤧᤰᤁᤩᤠᤱ ᤂᤢᤏᤧ᤹ ᤔᤧᤳᤋᤢ. “ᤀᤒᤪᤠᤜᤠᤶᤔᤣ॥” #ᤜᤡᤒᤪᤢ ᥇᥇:᥇᥍-᥇᥏
ᤜᤶᤓᤧᤸᤗᤧ ᤂᤧᤸᤗᤧ ᤂᤢᤏᤧ᤹ ᤔᤧᤳᤋᤢ. “ᤜᤤ. ᤀᤠᤱᤃᤠ᤹ ᤀᤠᤶᤓᤠ ᤁ᤹ᤕᤥ ᤘᤠ᤹ᤀᤠᤖᤥ॥”
2ᤂᤧᤒᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤒᤪᤠᤜᤠᤶᤔᤧᤴ ᤔᤧᤳᤋᤢ. “ᤂᤧᤏᤧ᤹ ᤁᤧᤛ᤻ᤛᤠ. ᤂᤧᤏᤧ᤹ ᤛᤠ᤹ᤖᤡᤰ ᤗᤢᤱᤔᤠ᤹ ᤁᤧᤍᤢᤰᤋᤢᤒᤠ ᤗᤳᤌᤡᤰᤗᤰ ᤁᤧᤛ᤻ᤛᤠ ᤀᤡᤛᤜᤠᤰᤁᤧᤴ ᤔᤥᤖᤡᤕᤠᤜ ᤗᤠᤈᤣ᤹ᤀᤥ ᤋᤣ᤹ᤖᤧᤀᤠᤱ ᤐᤣᤃᤧ᤹ ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤥᤛᤣ᤺ᤴᤎᤠᤰᤏᤧᤒᤠ ᤁᤥ᤺ᤰᤔᤠᤀᤥ ᤂᤧᤴ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠ ᤁᤢᤀᤡᤛᤡᤰ ᤛᤡᤍᤢᤱᤈᤓᤠ ᤋᤥ᤺ᤴᤍᤧ᤹॥” #᥈ ᤛᤠᤵᤔᤢ ᥉:᥇
3ᤀᤒᤪᤠᤜᤠᤶᤔᤧᤴ ᤂᤠᤀᤥ᤺ᤳᤋᤧᤏᤢᤔᤧ᤺ᤴᤏᤣ ᤋᤠᤏᤠᤶᤛᤠ ᤐᤥᤃᤧᤀᤠᤱ ᤀᤍᤱᤅᤡᤴ ᤁᤰ ᤁᤢ᤺ᤳᤋᤢ. ᤜᤧᤰᤁᤩᤠᤱ ᤏᤧᤵᤑᤢ ᤁᤢᤛᤧᤘᤠᤖᤥᤒᤠᤜᤠ᤹ ᤏᤢ ᤁᤢᤛ᤻ᤛᤠ ᤀᤡᤛᤜᤠᤰᤁᤧᤴ ᤋᤣ᤹ᤖᤢᤛᤡ॥ ᤜᤧᤰᤁᤩᤠᤱ ᤘᤕᤠᤃᤧᤴ ᤛᤡᤍᤢᤱᤈᤓᤠ ᤔᤡᤎᤡᤱᤔᤠ ᤛᤡᤱ ᤂᤧᤖᤢ. ᤂᤧᤒᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤧᤳᤋᤢᤒᤠ ᤋᤧᤴᤏᤥ ᤂᤢᤏᤧ᤹ ᤌᤠᤛᤡᤱ॥ 4ᤗᤠᤶᤍᤡᤰ ᤔᤧᤈᤥᤃᤧᤒᤠ ᤛᤢᤶᤕᤠᤴ ᤁᤧᤖᤧᤸᤗᤧ ᤀᤒᤪᤠᤜᤠᤶᤔᤧᤴ ᤀᤰᤂᤣ ᤀᤥᤔᤕᤧ. ᤜᤧᤰᤁᤣ᤺ᤸᤗᤧ ᤂᤢᤏᤧ᤹ ᤂᤧᤴ ᤋᤧᤴᤏᤡᤴ ᤔᤠ᤺ᤱᤄᤠᤗᤠᤶ ᤏᤡᤛᤢ॥ 5ᤂᤧᤒᤩᤠᤱ ᤀᤒᤪᤠᤜᤠᤶᤔᤧᤸᤗᤧ ᤂᤧᤴ ᤏᤧᤵᤑᤢ ᤁᤢᤛᤧᤘᤠᤖᤥᤒᤠᤜᤠ᤹ ᤔᤧᤳᤋᤢᤛᤡ. “ᤂᤧᤴᤇᤡ᤹ ᤜᤠᤒᤠ ᤁ᤹ᤕᤥ ᤀᤍᤱᤅᤡᤴᤏᤢ ᤕᤢᤅᤧᤛᤧ᤹॥ ᤁᤴ ᤆᤢᤰᤐᤧᤴ ᤏᤢ ᤀᤠᤱᤃᤠ᤹ ᤆᤡᤏᤠᤏᤠᤰ ᤐᤡᤳᤇᤡᤃᤧ ᤜᤧᤰᤁᤩᤠᤱ ᤔᤠᤱᤛᤧᤘᤠ ᤆᤥ᤺ᤰᤛᤡᤃᤧᤀᤠᤱ ᤂᤧᤴᤇᤡ᤹ᤀᤥ ᤀᤠᤴᤇᤡᤃᤣ ᤏᤢ᤺ᤱᤛᤡᤃᤧ ᤑᤧᤴᤇᤡᤃᤧ॥”
6ᤀᤒᤪᤠᤜᤠᤶᤔᤧᤸᤗᤧ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤘᤕᤠᤃᤧᤴ ᤛᤡᤍᤢᤱᤈᤓᤠ᤺ᤸᤗᤧ ᤗᤠᤃᤡ ᤛᤡᤱᤅᤡᤴ ᤐᤰᤂᤢᤀᤠᤱ ᤀᤡᤛᤜᤠᤰᤁᤧᤴ ᤁᤢ᤺ᤳᤋᤢ. ᤜᤧᤰᤁᤩᤠᤱ ᤔᤡ ᤏᤢ ᤁᤠᤷᤍᤠ᤺ᤴ ᤕᤠᤱᤛᤡᤱ॥ ᤀᤰᤂᤣᤗ᤹ᤖᤡᤰ ᤂᤧᤱᤜᤠ᤹ ᤏᤧᤵᤔᤈᤠᤱ ᤛᤥᤖᤡᤰ ᤐᤣᤃᤧᤳᤇᤡᤖ ᤐᤳᤇᤧᤛᤡᤸᤗᤧ. 7ᤀᤡᤛᤜᤠᤰᤁᤧᤸᤗᤧ ᤁᤢᤶᤒᤠ ᤀᤒᤪᤠᤜᤠᤶᤔᤧᤴ ᤔᤧᤳᤋᤢ. “ᤀᤠᤶᤒᤦ᥅”
ᤁᤢᤶᤒᤠᤖᤧ ᤔᤧᤳᤋᤢ. “ᤌᤣᤃ ᤐᤠᤒᤢᤀᤣ᥅”
ᤁᤢᤛ᤻ᤛᤠ᤺ᤸᤗᤧ ᤔᤧᤳᤋᤢ. “ᤁᤴ ᤔᤡᤴ ᤏᤢ ᤛᤡᤱᤅᤡᤱᤃ ᤘᤠ᤹. ᤁᤖ ᤘᤕᤠᤃᤧᤴ ᤛᤡᤍᤢᤱᤈᤓᤠ ᤋᤥ᤺ᤶᤔᤠ ᤌᤢ᤺ᤶᤒᤠ᤺ᤱᤃ ᤀᤠᤳᤋᤡ ᤘᤠ᤹ᤒᤣ᥅”
8ᤀᤒᤪᤠᤜᤠᤶᤔᤧᤸᤗᤧ ᤔᤧᤳᤋᤢ. “ᤀᤠᤛ᤻ᤛᤠᤀᤣ. ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤘᤕᤠᤃᤧᤴ ᤛᤡᤍᤢᤱᤈᤓᤠᤖᤧ ᤗᤠᤃᤡ ᤌᤢ᤺ᤶᤒᤠ᤺ᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤒᤠᤅᤣ ᤋᤠᤖᤢ ᤀᤠᤒᤡ᤹॥” ᤜᤧᤰᤁᤩᤠᤱ ᤂᤧᤱᤜᤠ᤹ ᤏᤧᤵᤔᤠᤱ ᤛᤥᤛᤥᤖᤡᤰ ᤐᤣᤛᤡ॥
9ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤧ᤹ ᤔᤧᤳᤋᤢᤒᤠ ᤋᤧᤴᤏᤥ ᤂᤢᤴᤇᤡ᤹ ᤁᤧᤖᤧᤳᤇᤡ. ᤜᤧᤰᤁᤩᤠᤱ ᤀᤒᤪᤠᤜᤠᤶᤔᤡᤸᤗᤧ ᤂᤧ᤹ᤕᤥ ᤗᤳᤇᤠ ᤗᤧᤳᤋᤡ ᤋᤥ᤺ᤶᤔᤠᤍᤧᤴ ᤌᤡᤰ ᤆᤥᤃᤢᤀᤠᤱ ᤛᤡᤱᤅᤡᤴ ᤂᤧ᤹ᤕᤥ ᤁᤢᤎᤠ᤹ᤁᤢᤎᤠ᤹ ᤛᤧᤳᤋᤢ॥ ᤜᤧᤰᤁᤩᤠᤱ ᤁᤢᤛ᤻ᤛᤠ ᤀᤡᤛᤜᤠᤰᤁᤧᤴ ᤀᤡᤄᤣ᤺ᤰᤂᤢᤀᤠᤱ ᤗᤧᤳᤋᤡ ᤋᤥ᤺ᤶᤔᤠ ᤋᤧᤴᤏᤥ ᤛᤡᤱᤛᤶᤎᤠᤱ ᤏᤧᤛ᤻ᤛᤢ॥ #ᤕᤠᤁᤢ ᥈:᥈᥇ 10ᤂᤧᤒᤩᤠᤱ ᤀᤒᤪᤠᤜᤠᤶᤔᤡᤸᤗᤧ ᤀᤠᤒᤠᤅᤣ ᤁᤢᤛ᤻ᤛᤠᤴ ᤘᤕᤠᤃᤧᤴ ᤛᤡᤍᤢᤱᤈᤓᤠ ᤆᤥ᤺ᤰᤔᤠᤖᤧ ᤗᤠᤃᤡ ᤁᤠᤷᤍᤠ᤺ᤴ ᤌᤠ᤺ᤱ ᤑᤥ᤺ᤰᤂᤢ॥ 11ᤁᤖ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤗᤠ ᤀᤡᤱᤒᤠᤎᤡᤰ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤀ᤺ᤰᤋᤧᤀᤠᤱ ᤔᤧᤳᤋᤢ. “ᤀᤒᤪᤠᤜᤠᤶᤔᤣ. ᤀᤒᤪᤠᤜᤠᤶᤔᤣ᥄”
ᤂᤢᤏᤧ᤹ ᤔᤧᤳᤋᤢ. “ᤀᤠᤱᤃᤠ᤹ ᤜᤠᤒᤠ ᤁᤵᤔᤥᤀᤣ ᤘᤠ᤹ᤀᤠᤖᤥ॥”
12ᤂᤧᤸᤗᤧ ᤔᤧᤳᤋᤢ. “ᤂᤧᤴ ᤆᤢᤰᤐᤧᤴ ᤜᤢᤰᤔᤧᤕᤠᤰᤋᤧᤴᤏᤧ᤹ᤀᤥ. ᤜᤧᤰᤁᤩᤠᤱ ᤂᤧᤴ ᤌᤣᤀᤠᤱ ᤔᤧᤔᤧᤳᤋᤧᤴᤏᤧ᤹ᤀᤥ॥ ᤂᤧᤏᤧ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤁᤧᤃᤡᤖᤳᤇ ᤁᤧᤗ᤹ᤒᤠᤴ ᤀᤠᤸᤗ ᤀᤠᤱᤃᤠ᤹ ᤏᤡᤱᤘᤠ᤹ ᤂᤥᤛᤢᤱᤗᤥ. ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤁᤧᤛ᤻ᤛᤠ. ᤗᤳᤌᤡᤰᤌᤡᤰ ᤁᤧᤛ᤻ᤛᤠ᤺ᤴᤏᤠᤱ ᤀᤠᤱᤃᤠ᤹ᤗᤠᤶ ᤁᤧᤴᤍᤠᤱᤄᤢᤴ ᤁᤧᤴᤕᤢᤰᤂᤢᤸᤗᤥ॥”
13ᤀᤒᤪᤠᤜᤠᤶᤔᤧᤴ ᤌᤥ ᤗᤧᤵᤔᤠᤱ ᤀᤥᤔᤕᤧ ᤜᤧᤰᤁᤣ᤺ᤸᤗᤧ ᤂᤢᤏᤧ᤹ ᤗᤳᤇᤠ ᤌᤢ᤺ᤶᤒᤠᤎᤡᤰ ᤑᤠᤳᤋᤠᤵᤐᤥ ᤁᤢᤍᤠᤱᤅᤡᤴ ᤜᤠᤵᤋᤢᤀᤠᤱ ᤕᤧᤒᤧᤒᤠ ᤏᤡᤛᤢ॥ ᤜᤧᤰᤁᤩᤠᤱ ᤂᤢᤏᤧ᤹ ᤐᤣᤀᤠᤱ ᤂᤧᤴ ᤌᤢ᤺ᤶᤒᤠ᤺ᤴ ᤕᤢᤖᤢ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤛ᤻ᤛᤠ᤺ᤸᤗᤧ ᤁᤢᤗᤧᤰᤘᤠ ᤂᤧᤴ ᤘᤕᤠᤃᤧᤴ ᤛᤡᤍᤢᤱᤈᤓᤠ ᤋᤥ᤺ᤴᤍᤢ॥ 14ᤂᤧᤸᤗᤧᤆᤥᤃᤢᤸᤗᤧ ᤀᤒᤪᤠᤜᤠᤶᤔᤧᤸᤗᤧ ᤂᤧᤴ ᤋᤧᤴᤏᤡᤴ “ᤕᤜᤘᤣ ᤍᤠᤱᤒᤠᤸᤗᤧ ᤋᤱᤃᤠᤶ ᤆᤥᤃᤢ ᤀᤠᤒᤡ᤹” ᤔᤡᤱ ᤘᤠ᤺ᤳᤋᤢ॥ ᤔᤏᤠᤜᤠ᤹ᤖᤧ ᤀᤠᤸᤗ ᤌᤠᤖᤡᤰᤛᤠᤱ “ᤕᤜᤘᤣ ᤍᤠᤱᤒᤠᤸᤗᤧ ᤁᤢᤃᤥ᤺ᤰᤔᤠᤀᤥ ᤋᤱᤃᤠᤶ ᤆᤥᤃᤢ ᤀᤠᤒᤡ᤹” ᤑᤠ᤹ᤀᤠᤱ ᤔᤧᤒᤠ᤺ᤳᤋᤢᤖᤥ॥
15ᤕᤜᤘᤣ ᤍᤠᤱᤒᤠᤸᤗᤧ ᤁᤢᤔᤠᤱᤗᤠ ᤀᤡᤱᤒᤧᤸᤗᤧ ᤏᤡᤛᤡᤃᤣᤰᤐᤠᤗᤧᤱ ᤀᤒᤪᤠᤜᤠᤶᤔᤧᤴ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤀ᤺ᤰᤋᤧᤀᤠᤱ ᤔᤧᤳᤋᤢ. 16“ᤕᤜᤘᤣ ᤍᤠᤱᤒᤠᤸᤗᤧ ᤐᤠ᤺ᤳᤋᤢ. ‘ᤀᤠᤱᤃᤠ᤹ ᤀᤠᤒᤠᤅᤣ ᤀᤠᤔᤡᤱᤅᤥ ᤔᤠᤱᤜᤧᤰᤛᤡᤱᤅᤠᤀᤠᤱ ᤘᤠ᤹ᤀᤠ. ᤂᤧᤏᤧ᤹ ᤁᤱ ᤕᤠ᤺ᤶᤒᤰᤁᤡᤴ ᤁᤧᤈᤥᤃᤢᤒᤠᤸᤗᤧ ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤛ᤻ᤛᤠ. ᤗᤳᤌᤡᤰᤌᤡᤰ ᤁᤧᤛ᤻ᤛᤠ᤺ᤴᤏᤠᤱ 17ᤁᤧᤴᤍᤠᤱᤄᤢᤶᤒᤠᤸᤗᤧ ᤆᤥᤃᤢᤸᤗᤧ ᤀᤠᤱᤃᤠ᤹ ᤛᤧᤰᤂᤠᤀᤣ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤐᤡᤏᤧ॥ #ᤜᤡᤒᤪᤢ ᥌:᥇᥉-᥇᥊ ᤂᤧᤏᤧ᤹ ᤁᤧᤔᤢ᤹ᤀᤡᤍᤠᤛᤠᤜᤠ᤹ ᤑᤥᤛᤢᤱᤛᤡᤱᤅᤠᤱ ᤋᤠᤱᤛᤠᤰᤁᤥᤒᤠ ᤂᤣ᤺ᤶᤛᤡᤰᤐᤠᤜᤠ᤹ ᤏᤢ ᤘᤖ᤺ᤱᤅᤡᤸᤗᤧ ᤁᤢᤕᤠᤀᤥᤒᤠ ᤕᤧ᤺ᤱᤄᤠ ᤕᤠᤖᤡᤰ ᤕᤖᤡᤰ ᤆᤥᤃᤢᤱᤛᤡᤱ᤹॥ ᤂᤧᤏᤧ᤹ ᤁᤧᤔᤢ᤹ᤀᤡᤍᤠᤱᤛᤠᤜᤠ᤹ᤖᤧ ᤂᤢᤏᤡ᤹ ᤏᤡᤱᤔᤡᤜᤠ᤹ᤖᤧ ᤂᤢᤴᤇᤡ᤹ ᤕᤧᤰᤕᤰᤜᤠ᤹ ᤔᤧᤏᤠᤵᤋᤢᤛᤡᤖᤥ॥ 18ᤂᤧᤏᤧ᤹ ᤁᤧᤔᤢ᤹ᤀᤡᤍᤠᤱᤛᤠᤜᤠ᤹ ᤗᤠᤶᤒᤠᤀᤣ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤔᤧᤄᤥᤛᤢ᤹. ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤀᤠᤱᤃᤠ᤹ ᤀᤠᤒᤠ᤺ᤴᤈᤠ᤺ᤰᤁᤡᤴ ᤁᤧᤄᤧᤵᤛᤢᤖᤥ॥’” #ᤛᤣ᤺ᤰᤕᤢᤰ ᥉:᥈᥋
19ᤂᤧᤒᤩᤠᤱ ᤀᤒᤪᤠᤜᤠᤶᤔᤧᤴ ᤛᤣᤘᤠᤖᤥᤒᤠᤜᤠ᤹ᤀᤥ ᤏᤢ᤺ᤰᤂᤧ ᤑᤧᤖᤧ. ᤜᤧᤰᤁᤩᤠᤱ ᤂᤧᤱᤜᤠ᤹ ᤒᤣᤷᤛᤣᤒᤠ ᤌᤠᤖᤡᤰ ᤛᤥᤛᤥᤖᤡᤰ ᤔᤧᤒᤣ॥ ᤜᤧᤰᤁᤩᤠᤱ ᤀᤒᤪᤠᤜᤠᤶᤔᤧᤴ ᤒᤣᤷᤛᤣᤒᤠ ᤕᤧᤰᤕᤰᤁᤥ ᤕᤢᤅᤧ॥
ᤏᤠᤜᤥᤖᤗᤧ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹
20ᤔᤡᤛᤠᤰ ᤕᤠᤱᤛᤡ ᤔᤡᤸᤁᤠ᤺ᤸᤗᤧᤀᤠᤱ ᤁᤧᤴᤛᤠ᤹ ᤏᤠᤜᤥᤖᤧᤴ ᤕᤧᤶᤒᤡᤳᤇᤠᤛᤠᤜᤠ᤹ ᤁᤳᤋᤢ ᤐᤡᤖᤢ ᤁᤧᤗ᤹ᤒᤠ ᤐᤠᤴ ᤀᤒᤪᤠᤜᤠᤶᤔᤡᤸᤗᤧ ᤂᤧᤵᤛᤢ॥
21ᤋᤢᤶᤒᤧᤴ ᤀᤢᤈ. ᤂᤧᤸᤗᤧ ᤁᤢᤴᤛᤠ᤹ ᤒᤢᤈ.
ᤜᤧᤰᤁᤩᤠᤱ ᤁᤔᤢᤀᤣᤗ (ᤀᤠᤖᤠᤶᤔᤡᤸᤗᤧ ᤁᤢᤶᤒᤠ).
22ᤜᤧᤰᤁᤩᤠᤱ ᤁᤣᤛᤣᤍ. ᤜᤈᤥ. ᤐᤡᤸᤍᤠᤛ. ᤕᤡᤍᤗᤠᤐ ᤏᤢ ᤒᤋᤢᤀᤣᤗ॥
23ᤒᤋᤢᤀᤣᤗᤖᤧ ᤖᤡᤒᤣᤁᤠᤴ ᤁᤳᤋᤢ॥
ᤁᤱ ᤕᤧᤳᤇᤡ ᤕᤧᤶᤒᤡᤳᤇᤠᤛᤠᤜᤠ᤹ ᤀᤒᤪᤠᤜᤠᤶᤔᤡᤸᤗᤧ ᤁᤢᤴᤛᤠ᤹ ᤏᤠᤜᤥᤖᤗᤠᤶ ᤔᤡᤸᤁᤠᤖᤧ ᤁᤳᤋᤢᤛᤡ॥
24ᤁᤱᤜᤠ᤹ᤏᤢ᤺ᤸᤗᤧ ᤘᤣ᤹ ᤖᤢᤔᤠ ᤔᤡᤱ ᤁᤧᤘᤠ᤺ᤵᤔᤠ ᤁᤢᤔᤣᤳ ᤐᤠ᤺ᤰᤔᤧᤸᤗᤧᤀᤠᤱ
ᤋᤣᤒᤜ. ᤃᤜᤔ. ᤋᤜᤛ ᤏᤢ ᤔᤠᤁᤠᤴ ᤔᤧᤵᤔᤏᤠᤒᤠ ᤛᤠᤜᤠ᤹ ᤁᤳᤋᤢᤛᤡᤖᤥ॥
© 2009, 2023, Wycliffe Bible Translators, Inc. All rights reserved.