ᤋᤥᤗᤡᤱᤛᤥᤔᤢ 18
18
ᤀᤒᤪᤠᤜᤠᤶᤔᤡᤸᤗᤧ ᤁᤢᤛ᤻ᤛᤠ ᤐᤥᤱ ᤁᤧᤗ᤹ᤒᤠ ᤔᤠᤱᤜᤢᤵ
1ᤗᤧᤴᤍᤡᤰ ᤏᤠᤶᤛᤧ᤺ᤰᤋᤧᤸᤗᤧ ᤔᤔᤪᤣᤒᤠ ᤕᤶᤒᤠ ᤕᤜᤡᤒᤠ ᤛᤡᤱᤒᤢᤱᤜᤠ᤹ᤖᤧ ᤁᤢᤒᤣᤛᤠᤱᤒᤠ ᤀᤠᤒᤠᤅᤣ ᤁᤢᤛᤠ᤺ᤱᤃᤠ ᤜᤡᤶᤔᤡᤸᤗᤧ ᤗᤠᤶᤎᤣ᤺ᤵᤐᤢᤱᤅᤥ ᤀᤒᤪᤠᤜᤠᤶᤔᤡᤴ ᤕᤢᤅᤧᤃᤖᤧᤸᤗᤧ ᤕᤜᤘᤣ ᤍᤠᤱᤒᤠᤴ ᤂᤢᤏᤧ᤹ᤀᤥ ᤀᤥᤛᤣ᤺ᤴᤎᤠᤰᤛᤡᤱ॥ 2ᤀᤒᤪᤠᤜᤠᤶᤔᤡᤴ ᤀᤰᤂᤣ ᤀᤥᤔᤕᤧᤸᤗᤧ ᤂᤢᤏᤧ᤹ ᤁᤢᤒᤣᤛᤠᤱ ᤛᤢᤶᤛᤡ ᤔᤏᤠᤜᤠ᤹ ᤔᤧᤕᤧᤒᤧᤒᤠ ᤏᤡᤛᤢᤛᤡ॥ ᤂᤢᤏᤧ᤹ ᤂᤧᤱᤜᤠ᤹ ᤏᤡᤛᤢᤛᤡᤀᤠᤱ ᤛᤠ᤺ᤱᤃᤠᤜᤡᤶ ᤗᤠᤶᤎᤣ᤺ᤵᤐᤥᤗᤠᤶ ᤂᤢᤴᤇᤡ᤹ ᤐᤠ᤺ᤴᤇᤠ᤺ᤳᤇᤧ ᤗᤥ᤺ᤰᤋᤧ ᤐᤣ. ᤜᤧᤰᤁᤩᤠᤱ ᤂᤠᤶᤒᤠᤱᤅᤥ ᤌᤠᤖᤡᤰ ᤛᤠᤶᤒᤥᤴ ᤑᤴᤇᤡᤱ॥ #ᤜᤡᤒᤪᤢ ᥇᥉:᥈
3ᤜᤧᤰᤁᤩᤠᤱ ᤂᤢᤏᤧ᤹ ᤔᤧᤳᤋᤢᤛᤡ. “ᤀᤠᤍᤠᤱᤒᤠᤛᤣ. ᤀᤠᤱᤃᤠ᤹ ᤂᤧᤏᤡ᤹ ᤗᤢᤱᤔᤠ ᤋᤢᤰᤔᤧᤴ ᤂᤥᤛᤢᤱᤏᤧᤑᤃᤪ ᤀᤠᤜᤡᤶᤔᤥ ᤔᤧᤴᤕᤢᤱᤀᤣᤃ ᤔᤧᤒᤣᤃᤧᤶᤔᤡᤴᤏᤧ᤹ᤀᤥ॥ ᤂᤡᤏᤡ᤹ ᤛᤧᤘᤠ ᤆᤥ᤺ᤰᤛᤧ ᤁᤵᤔᤥ ᤘᤠ᤹ᤀᤠᤖᤥ॥ 4ᤀᤠᤱᤃᤠ᤹ ᤆᤫᤠ᤺ᤳᤆᤡ᤹ ᤑᤧᤳᤋᤢᤱ ᤜᤧᤰᤁᤩᤠᤱ ᤂᤡᤏᤡ᤹ ᤗᤠᤱ ᤘᤠᤜᤵᤋᤧᤶᤔᤧ᤹. ᤜᤧᤰᤁᤩᤠᤱ ᤜᤠᤒᤠ ᤁᤴ ᤛᤡᤱᤒᤢᤱᤅᤡᤸᤗᤧ ᤁᤢᤛᤡ᤺ᤰᤋᤥ ᤏᤠ᤺ᤶᤛᤡᤱᤅᤠᤶᤔᤧ᤹ᤀᤥ॥ 5ᤀᤠᤸᤗ ᤂᤧᤏᤡ᤹ ᤛᤧᤘᤠᤖᤥᤒᤠᤸᤗᤧ ᤁᤢᤜᤡᤶᤔᤥ ᤁᤧᤍᤩᤧ᤹ᤀᤡ. ᤀᤠᤱᤃᤠ᤹ ᤔᤡᤛᤠᤰ ᤁᤢᤈᤠᤈᤡ᤹ ᤜᤢ᤹ᤏᤡᤱ᤹ ᤂᤧᤸᤗᤧ ᤂᤡᤏᤡ᤹ ᤕᤠᤶᤈᤠ᤺ᤱᤘᤠ ᤁᤧᤒᤡᤖᤡ᤹॥”
ᤂᤧᤱᤜᤠ᤹ᤖᤧ ᤔᤧᤔᤧᤳᤋᤢ. “ᤂᤧᤏᤧ᤹ ᤁᤧᤒᤠ᤺ᤳᤋᤢᤒᤠ ᤀᤡᤛᤡ᤺ᤰ ᤆᤥᤃᤧ᤹ᤀᤥ॥”
6ᤂᤧᤒᤩᤠᤱ ᤀᤒᤪᤠᤜᤠᤶᤔᤡᤴ ᤆᤠᤳᤋᤧᤖ ᤛᤠ᤺ᤱᤃᤠᤜᤡᤶᤔᤥ ᤐᤣᤀᤠᤱ ᤛᤠᤖᤠᤴ ᤔᤧᤳᤋᤢ. “ᤜᤠᤖᤠ ᤑᤥᤗᤰ ᤅᤠᤛᤡ ᤕᤠᤖᤡᤰ ᤏᤢᤒᤠ ᤛᤡ ᤑᤣ᤹ᤖᤢᤶ ᤛ᤹ᤖᤧᤀᤠᤱ ᤂᤖᤧ᤺ᤱ ᤗᤧ᤺ᤰᤂᤧ᤹॥”
7ᤀᤒᤪᤠᤜᤠᤶᤔᤡᤱᤃ ᤐᤡᤳᤗᤢᤵᤐᤥ ᤗᤥ᤺ᤰᤋᤧ ᤐᤣᤀᤠᤱ ᤘᤖᤢᤵᤗᤢᤵᤐᤠ ᤏᤢᤒᤠ ᤐᤡᤳᤛᤠᤳ ᤌᤡᤰ ᤛᤣᤃᤢᤑᤧᤳᤋᤢᤀᤠᤱ ᤁᤢᤛᤣᤘᤠᤖᤠᤒᤠᤴ ᤐᤡᤖᤢ. ᤜᤧᤰᤁᤩᤠᤱ ᤂᤧᤴ ᤛᤧᤘᤠᤖᤥᤒᤧᤸᤗᤧ ᤛᤵᤑᤠᤖᤧᤛᤠ ᤛᤧᤖᤢ ᤆᤥᤃᤢᤀᤠᤱ ᤌᤥ᤺ᤰᤋᤢ॥ 8ᤜᤧᤰᤁᤩᤠᤱ ᤂᤢᤏᤧ᤹ ᤔᤡᤛᤠᤰ ᤏᤢᤍᤠᤰᤘᤠ ᤏᤢ ᤐᤡᤳᤏᤢ ᤜᤧᤰᤁᤩᤠᤱ ᤌᤥ᤺ᤰᤔᤏᤠᤒᤠ ᤐᤡᤳᤇᤠᤴ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤕᤢᤰᤛᤢ ᤐᤡᤖᤢᤛᤡ॥ ᤂᤧᤱᤜᤠ᤹ᤖᤧ ᤆᤠᤔᤠ ᤔᤧᤴᤇᤢ᤺ᤳᤋᤣ ᤌᤠᤖᤡᤰ ᤂᤢᤏᤧ᤹ ᤂᤢᤴᤇᤡ᤹ ᤐᤣᤛᤠᤱ ᤛᤡᤱᤒᤢᤱᤎᤡᤰᤗᤧ ᤁᤢᤒᤢᤱᤅᤥ ᤕᤧᤒᤧ॥
9ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤛᤣ᤺ᤴᤔᤧᤍᤥᤛᤢ. “ᤂᤧᤏᤧ᤹ ᤁᤧᤔᤣ᤺ᤳ ᤛᤠᤖᤠᤴ ᤀᤠᤳᤋᤠᤴ ᤘᤠ᤹ᤒᤣ᥅”
ᤂᤢᤏᤧ᤹ ᤔᤧᤳᤋᤢᤛᤡ. “ᤂᤢᤏᤧ᤹ᤃ ᤛᤠ᤺ᤱᤃᤠᤜᤡᤶᤔᤥ ᤘᤠ᤹ᤖᤥ॥”
10ᤂᤧᤒᤩᤠᤱ ᤕᤜᤘᤣ ᤍᤠᤱᤒᤠᤸᤗᤧ ᤔᤧᤳᤋᤢ. “ᤀᤠᤳᤏᤧᤶᤔᤠ ᤜᤠᤒᤠ ᤁᤴ ᤕᤧᤶᤔᤥ ᤀᤠᤱᤃᤠ᤹ ᤛᤧᤰᤂᤠᤛᤠᤱ ᤂᤧᤏᤧ᤹ᤀᤥ ᤏᤢ᤺ᤱᤀᤠ ᤋᤠᤀᤠ. ᤜᤧᤰᤁᤩᤠᤱ ᤀᤥᤔᤳᤋᤧ᤹ᤀᤥ. ᤁᤧᤔᤣ᤺ᤳ ᤛᤠᤖᤠ᤺ᤸᤗᤧ ᤕᤧᤶᤒᤡᤳᤇᤠ ᤛᤠᤎᤡᤰ ᤁᤳᤋᤢᤖᤥ॥” #ᤖᤥᤔᤡ ᥏:᥏
ᤛᤠᤖᤠ᤺ᤸᤗᤧ ᤁᤴ ᤐᤠ᤺ᤴᤏᤡᤴ ᤛᤠ᤺ᤱᤃᤠᤜᤡᤶ ᤗᤠ᤺ᤵᤔᤠ ᤗᤠᤶᤎᤣ᤺ᤵᤐᤥᤏᤢ ᤂᤧᤵᤛᤢᤖ ᤕᤢᤅᤧ॥ 11ᤀᤒᤪᤠᤜᤠᤔ ᤏᤢ ᤛᤠᤖᤠᤴ ᤛᤠ᤹ᤖᤡᤰ ᤁᤠᤵᤐᤥᤒᤠ ᤁᤠᤵᤔᤥᤔᤠ ᤋᤢᤶᤛᤧᤳᤇᤡᤀᤠᤱ ᤘᤕᤧᤛᤡ. ᤜᤧᤰᤁᤩᤠᤱ ᤛᤠᤖᤠ᤺ᤱᤃ ᤛᤠᤃᤵᤔᤠᤖᤧ ᤗᤠᤃᤡ ᤁᤢᤜᤵᤛᤡᤱᤔᤠᤀᤠᤱ ᤔᤕᤧᤒᤣᤀᤠᤱ ᤘᤕᤧ॥ 12ᤂᤧᤸᤗᤧᤆᤥᤃᤢᤸᤗᤧ ᤛᤠᤖᤠ᤺ᤸᤗᤧ ᤀᤰᤂᤣ ᤐᤠ᤺ᤳᤋᤢᤖ ᤀᤠᤒᤠᤅᤣ ᤀᤣᤖᤧ. “ᤀᤠᤱᤃᤠ᤹ ᤜᤧᤰᤋᤱᤔᤠ ᤁᤠᤵᤔᤥᤔᤠ ᤁᤧᤍᤢᤶᤔᤠᤸᤗᤧ ᤀᤠᤰᤂᤣᤀᤠᤱ ᤛᤠᤃᤵᤔᤠ ᤛᤢᤰᤋᤢᤱᤒᤠᤒᤣ᥅ ᤜᤧᤰᤁᤩᤠᤱ ᤀᤠᤕᤧᤶᤒᤠ᤺ᤴᤏᤠᤱ ᤁᤠᤵᤐᤥᤒᤠ ᤋᤢᤶᤛᤧᤒᤣᤀᤠᤱ ᤘᤠ᤹. ᤁᤴ ᤐᤠ᤺ᤴᤏᤥ ᤌᤣ ᤀᤠᤱᤃᤠ᤹ ᤛ᤺ᤵᤔᤠ ᤂᤥᤀᤠᤒᤡ᥅” #᥇ ᤐᤋᤪᤢ ᥉:᥌
13ᤜᤧᤰᤁᤣ᤺ᤸᤗᤧ ᤕᤜᤘᤣ ᤍᤠᤱᤒᤠᤸᤗᤧ ᤀᤒᤪᤠᤜᤠᤶᤔᤡᤴ ᤔᤧᤳᤋᤢ. “‘ᤀᤠᤃᤠᤵᤔᤢ ᤋᤢᤶᤔᤥᤀᤠᤱ ᤛᤠᤃᤳᤋᤢᤱᤒᤠᤒᤡ’ ᤐᤠ᤺ᤳᤋᤢᤖ ᤌᤣᤀᤠᤱ ᤛᤠᤖᤠᤴ ᤀᤣᤖᤧᤒᤠᤒᤣ᥅ 14ᤕᤜᤘᤣ ᤍᤠᤱᤒᤠᤸᤗᤧ ᤁᤢᤗᤠᤃᤡ ᤐᤥᤱᤔᤠ ᤔᤧᤴᤇᤢᤰᤔᤏᤠᤒᤠ ᤐᤠᤴ ᤌᤣ ᤘᤠ᤹ᤒᤣ᥅ ᤀᤠᤳᤏᤡᤶᤔᤠ ᤒᤠᤁᤴ ᤕᤧᤶᤔᤥ ᤀᤠᤱᤃᤠ᤹ ᤂᤧᤏᤧ᤹ᤀᤥ ᤏᤢ᤺ᤱᤀᤠᤸᤗᤧ ᤛᤠᤖᤠ᤺ᤸᤗᤧ ᤕᤧᤶᤒᤡᤳᤇᤠ ᤛᤠᤎᤡᤰ ᤁᤳᤋᤢᤖᤥ॥” #ᤗᤢᤁᤠ ᥇:᥉᥍
15ᤁᤖ ᤛᤠᤖᤠ᤺ᤸᤗᤧ “ᤀᤠᤱᤃᤠ᤹ ᤔᤧᤴᤕᤣ᤺ᤵᤐᤠᤖᤥ” ᤐᤠ᤺ᤳᤋᤢ. ᤜᤧᤏᤠᤱᤓᤧᤸᤗᤧ ᤂᤢᤏᤧ᤹ ᤁᤡᤛᤧ॥
ᤁᤖ ᤕᤜᤘᤣ ᤍᤠᤱᤒᤠᤸᤗᤧ ᤔᤧᤳᤋᤢ. “ᤂᤧᤏᤧ᤹ ᤁᤧᤀᤣᤖᤧᤒᤠᤀᤣᤖᤥ॥”
ᤛᤍᤥᤔ ᤕᤧᤰᤕᤰᤁᤡᤸᤗᤧ ᤁᤢᤗᤠᤃᤡ ᤀᤒᤪᤠᤜᤠᤶᤔᤡᤸᤗᤧ ᤆᤥᤃᤢᤒᤠ ᤐᤣᤗᤡ
16ᤜᤧᤰᤁᤩᤠᤱ ᤂᤧᤴ ᤔᤏᤠᤜᤠ᤹ ᤂᤧᤵᤔᤥᤗᤠᤶ ᤔᤧᤒᤥᤃᤧᤸᤗᤧ ᤛᤍᤥᤔ ᤗᤧᤵᤔᤠᤱ ᤕᤥ ᤀᤥᤔᤧᤔᤕᤧ॥ ᤜᤧᤰᤁᤩᤠᤱ ᤀᤒᤪᤠᤜᤠᤶᤔᤡᤴ ᤆᤡᤏᤠᤏᤠᤰ ᤌᤠᤖᤡᤰ ᤂᤢᤴᤇᤡ᤹ ᤛᤠᤛᤧ ᤐᤣᤃᤧ॥ 17ᤕᤜᤘᤣ ᤍᤠᤱᤒᤠᤸᤗᤧ ᤐᤠ᤺ᤳᤋᤢ. “ᤀᤠᤱᤃᤠ᤹ ᤆᤥᤃᤢᤱ ᤏᤧᤳᤋᤢᤱᤒᤠ ᤕᤠ᤺ᤶᤒᤰᤁᤡᤴ ᤌᤣ ᤀᤒᤪᤠᤜᤠᤶᤔᤡᤴ ᤔᤧᤔᤧᤳᤋᤠᤴᤒᤡ᥅ 18ᤀᤒᤪᤠᤜᤠᤶᤗᤠᤶᤒᤠ ᤛᤧᤰᤂᤠᤀᤣ ᤗᤳᤇᤠ ᤕᤶᤒᤠ ᤏᤢ ᤔᤢᤰᤛᤠᤶᤛᤠᤒᤠ ᤛᤢᤘᤠᤱ ᤔᤧᤒᤥᤱ. ᤜᤧᤰᤁᤩᤠᤱ ᤂᤧᤏᤡ᤹ᤗᤢᤶᤔᤥ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤔᤧᤄᤥᤛᤢᤖᤥ॥ 19ᤌᤣᤀᤠᤱᤓᤧᤸᤗᤧ ᤂᤧᤸᤗᤧ ᤀᤠᤒᤠᤅᤣ ᤁᤢᤛ᤻ᤛᤠᤜᤠ᤹ ᤏᤢ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ᤖᤧ ᤛᤠᤶᤕᤥ ᤏᤢ ᤂᤠᤛᤧᤴ ᤔᤧᤈᤥᤃᤢᤀᤠᤱ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤏᤡᤱᤘᤠ᤹ ᤜᤧᤰᤁᤣ ᤁᤢᤀᤡᤱᤈᤠᤱᤜᤠ᤹ ᤀᤡ᤺ᤵᤔᤠ ᤏᤠ᤺ᤵᤔᤠ ᤐᤠᤱᤄᤢᤛᤡᤖ ᤑᤠ᤹ᤀᤠᤱ ᤀᤠᤱᤃᤠ᤹ ᤂᤢᤏᤧ᤹ ᤛᤣᤃᤢᤱᤅᤠᤱ ᤘᤠ᤹॥ ᤂᤧᤸᤗᤧᤆᤥᤃᤢᤸᤗᤧ ᤕᤜᤘᤣ ᤍᤠᤱᤒᤠᤸᤗᤧ ᤀᤒᤪᤠᤜᤠᤶᤔᤡᤴᤏᤢ ᤆᤥᤃᤢᤒᤠ ᤔᤠᤱᤜᤢᤵᤐᤡᤴ ᤁᤧᤳᤗ ᤆᤥᤃᤢᤖᤥ॥”
20ᤜᤧᤰᤁᤣ᤺ᤸᤗᤧ ᤕᤜᤘᤣ ᤍᤠᤱᤒᤠᤸᤗᤧ ᤀᤒᤪᤠᤜᤠᤶᤔᤡᤴ ᤔᤧᤳᤋᤢ. “ᤛᤍᤥᤔ ᤏᤢ ᤃᤔᤥᤖᤠ ᤕᤧᤰᤕᤰᤜᤠ᤹ᤖᤧ ᤁᤢᤍᤰᤗᤧᤱᤘᤠᤀᤥ ᤕᤶᤒᤠ ᤀᤠᤵᤋᤡᤰ ᤐᤠᤴ ᤐᤥᤃᤧᤀᤠᤱ ᤘᤠ᤹. ᤜᤧᤰᤁᤩᤠᤱ ᤂᤧ᤹ᤕᤥᤒᤠ ᤔᤏᤠᤜᤠ᤹ᤖᤧ ᤔᤧᤈᤥᤃᤢᤒᤠ ᤗᤠᤕᤥᤴ ᤛᤠ᤹ᤖᤡᤰ ᤕᤖᤡᤰ ᤐᤥ᤺ᤰᤂᤧᤀᤠᤱ ᤘᤠ᤹॥ 21ᤀᤠᤸᤗ ᤀᤠᤱᤃᤠ᤹ ᤂᤧᤵᤛᤢᤱᤒᤠᤴ ᤛᤧᤰᤂᤠᤒᤡ ᤔᤣ᤺ᤶᤒᤡ ᤑᤠ᤹ᤀᤠᤱ ᤀᤥᤔᤧᤳᤇᤧ ᤕᤥ ᤌᤠᤛᤡᤱᤅᤠ ᤐᤣ᤺ᤰᤁᤠ॥ ᤜᤧᤰᤁᤣ ᤔᤣ᤺ᤴᤏᤧᤑᤃᤪ ᤛᤧᤰᤂᤠᤒᤡ ᤔᤣ᤺ᤶᤒᤡ ᤑᤠ᤹ᤀᤠᤱ ᤀᤠᤱᤃᤠ᤹ ᤏᤡᤱᤘᤠ᤹ ᤂᤥᤛᤢᤱᤗᤥ॥”
22ᤜᤧᤰᤁᤩᤠᤱ ᤂᤧᤴ ᤔᤏᤠᤜᤠ᤹ ᤛᤍᤥᤔ ᤗᤧᤵᤔᤠᤱ ᤔᤧᤎᤠᤛᤡᤱ ᤔᤧᤒᤣ. ᤁᤖ ᤀᤒᤪᤠᤜᤠᤶᤔᤡᤴ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤍᤃᤠᤱ ᤜᤠᤒᤠ ᤕᤧᤒᤧ॥ 23ᤂᤧᤒᤩᤠᤱ ᤀᤒᤪᤠᤜᤠᤶᤔᤡᤴ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤒᤣᤛᤠᤱ ᤐᤣᤀᤠᤱ ᤔᤧᤳᤋᤢ. “ᤛᤧᤰᤂᤠᤀᤣ ᤂᤧᤏᤧ᤹ ᤛᤠᤶᤕᤥᤒᤠᤜᤠ᤹ ᤗᤠᤕᤥᤒᤠᤜᤠ᤹ᤏᤢ ᤛᤥᤖᤡᤰ ᤁᤧᤔᤧᤰᤂᤢᤛᤡᤒᤠᤒᤡ᥅ 24ᤂᤧ᤹ᤕᤥ ᤅᤠᤒᤥᤱ ᤛᤠᤶᤕᤥᤒᤠ ᤔᤏᤠᤜᤠ᤹ ᤔᤧᤘᤠ᤹ᤀᤡᤸᤗᤧ ᤂᤧᤴ ᤕᤧᤰᤕᤰᤁᤡᤴ ᤁᤧᤔᤧᤰᤂᤢᤒᤡ᥅ ᤂᤧ᤹ᤕᤥ ᤁᤧᤘᤠ᤹ᤒᤠ ᤅᤠᤒᤥᤱ ᤛᤠᤶᤕᤥᤒᤠ ᤔᤏᤠᤜᤠ᤹ᤖᤧ ᤗᤠᤃᤡ ᤂᤧᤴ ᤕᤧᤰᤕᤰᤁᤡᤴ ᤁᤧᤴᤍᤠᤱᤄᤢᤴᤒᤡ᥅ 25ᤁᤢᤀᤡᤃᤧᤓᤧᤶᤒᤠ ᤔᤏᤠᤜᤠ᤹ᤏᤢ ᤛᤥᤖᤡᤰ ᤛᤠᤶᤕᤥᤒᤠ ᤔᤏᤠᤜᤠ᤹ ᤛᤧᤵᤔᤠᤛᤡ ᤕᤠ᤺ᤶᤒᤰ ᤂᤧᤏᤧ᤹ᤗᤠᤶ ᤀᤠᤓᤧᤸᤗᤧᤀᤠᤱ ᤔᤧᤒᤥᤱᤏᤧᤸᤗᤖᤥ॥ ᤗᤠᤕᤥᤒᤠ ᤔᤏᤠ᤺ᤸᤗᤧ ᤋᤢᤔᤢᤒᤠ ᤜᤧᤰᤋᤱᤒᤠ ᤛᤠᤶᤕᤥᤒᤠ ᤔᤏᤠ᤺ᤸᤗᤧ ᤂᤧᤏᤧ᤹ᤗᤠᤶ ᤋᤢᤶᤔᤠ ᤔᤧᤒᤥᤱᤏᤧᤸᤗ॥ ᤂᤧᤏᤧ᤹ᤀᤣ ᤁᤧᤖᤧᤰ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤂᤠᤛᤧᤴᤍᤠᤱᤒᤠᤏᤧ. ᤂᤧᤏᤧ᤹ ᤁᤢᤍᤥ᤺ᤵᤔᤠ ᤂᤠᤛᤧᤴ ᤁᤧᤴᤗᤥ᤺ᤴᤍᤢᤶᤒᤡ᥅”
26ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤠᤸᤗᤧ ᤔᤧᤳᤋᤢ. “ᤛᤍᤥᤔ ᤕᤧᤰᤕᤰᤁᤥ ᤅᤠᤒᤥᤱ ᤛᤠᤶᤕᤥᤒᤠ ᤔᤏᤠ ᤂᤥᤛᤢᤱᤛᤡᤱᤏᤧᤓᤃᤪ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤗᤠᤃᤡ ᤕᤧᤰᤕᤰᤁᤡᤴ ᤁᤧᤖᤧᤰ ᤋᤠᤱᤄᤢᤱ॥”
27ᤀᤒᤪᤠᤜᤠᤶᤔᤡᤸᤗᤧ ᤔᤧᤳᤋᤢ. “ᤀᤥᤔᤧᤳᤋᤧ᤹ᤀᤥ. ᤀᤠᤱᤃᤠ᤹ ᤂᤠᤶ ᤏᤢ ᤌᤠᤵᤐᤢᤀᤠᤖᤰᤛᤠᤱ ᤕᤜᤘᤣ ᤍᤠᤱᤒᤠᤴᤏᤢ ᤕᤠᤶᤔᤥ ᤋᤠ᤹ᤈᤧᤱᤔᤠ ᤀᤠ᤺ᤴᤇᤡᤱᤀᤠᤖᤥ॥ 28ᤅᤠᤒᤥᤱᤀᤥ ᤅᤠᤛᤡᤖᤰ ᤛᤢ᤺ᤸᤗᤡᤰ ᤛᤠᤶᤕᤥᤒᤠ ᤔᤏᤠ ᤔᤧᤘᤠ᤹ᤏᤧᤑᤠ᤹ᤃᤪ. ᤅᤠᤛᤡᤖᤰ ᤔᤧᤛᤢ᤺ᤴᤏᤡᤸᤗᤧ ᤕᤧᤰᤕᤰᤁᤡᤴ ᤁᤧᤖᤧᤰ ᤂᤠᤵᤐᤢᤌᤩ᤺ᤱ ᤁᤧᤈᤥᤃᤢᤒᤡ᥅”
ᤕᤜᤘᤣ ᤍᤠᤱᤒᤠᤸᤗᤧ ᤔᤧᤳᤋᤢ. “ᤂᤧᤵᤔᤥ ᤗᤡᤒᤥᤱᤅᤠᤱ ᤅᤠᤛᤡᤖᤰ ᤁᤢᤍᤥ᤺ᤵᤔᤠ ᤔᤏᤠ ᤂᤥᤛᤢᤱᤛᤡᤱᤏᤧᤑᤠᤃᤪ ᤀᤠᤱᤃᤠ᤹ ᤂᤧᤴ ᤔᤧᤔᤧᤱᤅᤠᤴᤗᤥ॥”
29ᤕᤠᤶᤔᤥ ᤀᤒᤪᤠᤜᤠᤶᤔᤡᤸᤗᤧ ᤔᤧᤳᤋᤢ. “ᤂᤧᤵᤔᤥ ᤗᤡᤒᤥᤱ ᤔᤧᤘᤠ᤹ᤀᤡᤸᤗᤧᤃ᥅”
ᤕᤜᤘᤣ ᤍᤠᤱᤒᤠᤸᤗᤧ ᤔᤧᤳᤋᤢ. “ᤗᤡᤒᤥᤱᤗᤧ ᤗᤠᤃᤡᤀᤠᤱ ᤀᤠᤱᤃᤠ᤹ ᤜᤧᤰᤁᤣ ᤔᤧᤈᤥᤰᤁᤠᤴ॥”
30ᤂᤧᤒᤩᤠᤱ ᤀᤒᤪᤠᤜᤠᤶᤔᤡᤸᤗᤧ ᤔᤧᤳᤋᤢ. “ᤀᤠᤱᤃᤠ᤹ ᤕᤠᤶᤔᤥ ᤐᤠ᤺ᤳᤋᤠ ᤕᤜᤘᤣ ᤍᤠᤱᤒᤠᤴ ᤁᤧᤛᤡᤰ ᤔᤧᤒᤥᤃᤧᤴᤏᤧ᤹ᤀᤥ॥ ᤂᤧᤵᤔᤥ ᤛᤢᤶᤒᤥᤱ ᤂᤥᤔᤧᤍᤧᤳᤋᤡᤸᤗᤧᤃ᥅”
ᤂᤢᤏᤧ᤹ ᤔᤧᤳᤋᤢ. “ᤂᤧᤵᤔᤥ ᤛᤢᤶᤒᤥᤱᤗᤰ ᤂᤥᤛᤢᤱᤛᤡᤱᤛᤠᤱ ᤀᤠᤱᤃᤠ᤹ ᤜᤧᤰᤁᤣ ᤔᤧᤈᤥᤰᤁᤠᤴ॥”
31ᤀᤒᤪᤠᤜᤠᤶᤔᤡᤸᤗᤧ ᤔᤧᤳᤋᤢ. “ᤀᤠᤱᤃᤠ᤹ ᤐᤠ᤺ᤳᤋᤠ ᤕᤜᤘᤣ ᤍᤠᤱᤒᤠᤴ ᤁᤧᤛᤡᤰ ᤔᤧᤒᤥᤃᤧᤴᤏᤧ᤹ᤀᤥ॥ ᤂᤧᤵᤔᤥ ᤏᤡᤒᤥᤱ ᤂᤥᤔᤧᤍᤧᤳᤋᤡᤸᤗᤧᤃ᥅”
ᤂᤢᤏᤧ᤹ ᤔᤧᤳᤋᤢ. “ᤂᤧᤵᤔᤥ ᤏᤡᤒᤥᤱᤗᤰ ᤂᤥᤛᤢᤱᤛᤡᤱᤛᤠᤱ ᤀᤠᤱᤃᤠ᤹ ᤂᤧᤴ ᤂᤠᤵᤐᤢᤌᤩ᤺ᤱ ᤔᤧᤈᤥ᤺ᤰᤁᤠᤴᤗᤥ॥”
32ᤜᤧᤰᤁᤩᤠᤱ ᤂᤧᤸᤗᤧ ᤔᤧᤳᤋᤢ. “ᤀᤠᤸᤗ ᤌᤡᤰᤗᤧᤱᤗᤰ ᤐᤠ᤺ᤳᤋᤠ ᤕᤜᤘᤣ ᤍᤠᤱᤒᤠᤴ ᤁᤧᤛᤡᤰ ᤔᤧᤄᤧᤱᤏᤧᤸᤗ॥ ᤂᤧᤵᤔᤥ ᤌᤡᤒᤥᤱ ᤂᤥᤔᤧᤍᤧᤳᤋᤡᤸᤗᤧᤃ᥅”
ᤂᤢᤏᤧ᤹ ᤔᤧᤳᤋᤢ. “ᤌᤡᤒᤥᤱᤗᤧ ᤗᤠᤃᤡᤛᤠᤱ ᤀᤠᤱᤃᤠ᤹ ᤂᤧᤴ ᤔᤧᤔᤧᤱᤅᤠᤴ॥”
33ᤀᤒᤪᤠᤜᤠᤶᤔᤡᤴᤏᤢ ᤋᤠ᤹ᤈᤧᤱᤔᤠ ᤛᤢᤖᤢᤀᤠᤱ ᤕᤜᤘᤣ ᤍᤠᤱᤒᤠᤴ ᤁᤢᤗᤠᤶᤔᤥ ᤌᤠᤛᤡᤱ ᤐᤣ. ᤜᤧᤰᤁᤩᤠᤱ ᤀᤒᤪᤠᤜᤠᤶᤔᤧᤴ ᤁᤢᤛᤠ᤺ᤱᤃᤠ ᤜᤡᤶᤔᤥ ᤏᤢ᤺ᤰᤂᤧ॥
© 2009, 2023, Wycliffe Bible Translators, Inc. All rights reserved.