M. Mattayo 9
9
1NIPO eloŵa mu wato etauka echiza ku munzi wake mwine. 2Lomba ŵonani, emletera muntu wa manjenje enzelele pa chisampi: naye Yesu poŵona mvwano waŵo emuuzya wa manjenje, Nkazika mtima, mwanawe; viipa vyako vyalekelewa. 3Nipo ŵonani, alembi ŵambi enena mkati mwaŵo, Uyu muntu omchitila Mlungu msikila. 4Yesu naye poziŵa malingililo ŵaŵo echiti, Mulingililanji chiŵichiŵi mmitima yanu? 5Pakuti chipepu ni chini, kunena, Viipa vyako vyalekelewa; kano kunena, Ima uyende? 6Ninga mziŵe kuti Mwana wa muntu ali nayo nsaka pansi pano yolekelela viipa (pamene apo echiti ku wa manjenje), Ima uule chisampi chako na kuya ku ng'anda yako. 7Naye eima eluta ku ng'anda kwake. 8Sembe maumba aŵo pechiŵona eyopa, emlemekezya Mlungu, wamene eŵapa ŵantu nsaka yoteti.
9Yesu naye pofumamo mula eŵona muntu zina lake Mattayo enzonkala posonkera msonko; emuuzya, Nikonke neo. Naye eima emkonka.
10Lomba yenzepo penzoseame yeve pakulya umo mnanda, ŵonani, amsonko na ŵoponta anyinji echizonkala pamo na Yesu na asambili ŵake. 11Naŵo Afarisayo akaŵone teti eŵanenera asambili ŵake, Msambizi wanu olyeranji pamo na amsonko na ŵoponta aŵa? 12Sembe yeve pechimvwa echiti, Ŵokosa ntosaka ng'anga yai, sembe ŵolwala niŵo. 13Nkamuyani mkasambile mfundo yake ichi, Nusakila lusungu, nte nsembe: pakuti niliyekuza kwaita ŵolungama, sembe ŵoponta.
14Pamene apo emzila asambili a Yohana echiti, Nga seo na Afarisayo, tulitaniranji vyakulya kaŵirikaŵiri, sembe asambili ŵanu pasalitana? 15Yesu enena naŵo, Kansi ŵana a ng'anda ya ntengo angolila, mtenzi pakali naŵo pamo? sembe aaze masiku ŵati alondewe mtenzi kwaŵo, ninga ŵalitane vyakulya. 16Paliye muntu otimilizyapo chapa cha nyula yalomba pa mwinjira wakale; pakuti iyo isakosinka chintumbwi yufumyapo pa mwinjira, na kupazuka kwakula. 17Soti ntotiramo mvinyu walero mmankomwa akale; pambi mankomwa opulika, na mvinyu utaika, na mankomwa ochenekeka: lomba otiramo mvinyu walero mmankomwa alomba, na vyonse viŵiri vusungiwa.
18Pakali elaŵira yeve naŵo ivi vintu, ŵonani, echiza mmbili emlambila echiti, Mwana wangu mwanakazi wafwa lomba pano: lomba izani mumsintilile kwanja kwanu, naye azaŵe moyo. 19Naye Yesu eima emkonka, na asambili ŵake kumo. 20Nipo ŵonani, mwanakazi enze na ntenda yakuvwa mlopa vyaka kumi na viŵiri echiza kuvuli kwake noikumya nzera ya chovwala chake: 21pakuti elinga yeka kuti, Chukanga nikumye chovwala chake cheka nipuzumushiwe. 22Sembe Yesu pocheuka emuŵona echiti, Nkazika mtima, mwanawe; mvwano wako wakupuzumusya. Nipo mwanakazi uyo epuzumushiwa chitatikile kamfunda kamene ako. 23Naye Yesu pechiloŵa mnanda ya mmbili uyo, eŵaŵona ŵolizya nsengwe na liumba luchita chiwawa, 24echiti, Fumani: pakuti kabutu aliyeufwe, ali mtulo. Naŵo emseka pwipwiti. 25Pamene likafumyiwe liumba eloŵamo yeve emkata kwanja, na kabutu euka. 26Na mbirikisi yake iŵirikila mcharo icho chonse.
27Lomba popita Yesu kufumila kwamene uko zimkonka mpofu ziŵiri zikuwa zichiti, Mtichitile lusungu, mwe mwana wa Davide. 28Naye akaloŵe mnanda mpofu zichiza kuli yeve: naye Yesu ezinenera, Kansi muzomera kuti nina mpamvu yochita ichi? Zimnenera, Inde, Asikuru. 29Pamene apo ezikumya mmenso echiti, Umo mmuzomelera chichitiwe kwanu. 30Nipo menso a zine etunamiwa. Naye Yesu ezichimula echiti, Ŵonani asaziŵa muntu yeka umo. 31Sembe zyeve ziimako ziŵirizya mbili yake mcharo icho chonse.
32Nipo penzofuma ŵeve, ŵonani, eletewa kwake silaŵila wokulamwiwa na chiŵanda. 33Nipo chikafumyiwe chiŵanda icho uyo silaŵila elaŵira: na maumba ezizwa echiti, Kale konse chiliyoŵonekamo choteti mwa Israeli. 34Sembe Afarisayo echiti, Ofumya viŵanda pamo na mfumu ya viŵanda.
35Yesu etantamo mmizinda yonse na mminzi kusambizya mmasunagoge ŵaŵo, noŵirizya evangelo yofumu nopozya ntenda zyonse na kulwala konse. 36Sembe peŵaŵona maumba mtima wake wichita chifundo pali ŵeve, pakuti ezingwa nomwazika nga ni mbelele zilive chiŵeta. 37Pamene apo eŵanenera asambili ŵake, Kuwezya kwapaka chendi, sembe amilimo ni ŵopendeka. 38Chifukwa choteti sengani Mwine wowezya kuti akalaizye amilimo ku kuwezya kwake.
Mapangano Alomba © Bible Society of Zambia, 1923.