TOKSAKHAIH 5
5
Ananias hoi Safira Kawng
1To-e kami longto ahmin Ananias to a oh moa a zu loa Safira ni, anih hnit mah a tawnh ih hmuenmae to a zawh hoi thoemh. 2To-e a zu ih naakrakhaih hoiah tangka ahap apai to angmah hanah a suek moa ahap to kawkpatoehnawk ban ah a paek. 3Piter mah anih khaeah, “Ananias, tipongmaw Setan mah na uksak moa hmuenmae tho na hnuk ih tangka to na um thoemh moa Cai Pakhra to na ling loa? 4Hmuenmae to na zaw ai nahlanah nangmah iah oh; na zawh pacoengah doeh tangka to nangmah iah ni oh. Totisoe nahaeloa, tipongmaw tobatih hmuen to sak hanah palung thungah na dawn? Kami khaeah namlai ai moa Sithaw khaeah ni namlai,” tiah a naa. 5Ato lok to Ananias mah a thaih phrat hoiloa amtim moa duek roep; hi kawng hae ka thaih kaminawk boih mah zit moa tasoeh o. 6Thendoengnawk to angkun o, a qok to kahni hoiah abam o moa tacawt o haih, moa aquih o.
7Nitue thumto kra pacoengah hmuen ka om to panoek ai hoiah a zu to angkun toeng. 8Piter mah anih khaeah, “Na thui ah, hi tangka hae hmuen zawh tho na hnuk hoi ih tangka boih boah maw?” tiah a duengh moa anih mah,
“Ue, hi boih boah ni,” tiah a pathim pae.
9Tona-ah Piter mah anih khaeah, “Tipongmaw na sava hoi mi hnetto ah Angraeng ih Pakhra to tanoek hanah palung na due hoi? Na sava ka phum kaminawk vaihi thokkhang taengah oh o, anihcae mah nang doeh angzawn o toengh tih” tiah a naa pae. 10Nawnetta ah anih ih khokkung ah amtim moa duek. Thendoengnawk ang kun o moa kadueh to a hnuk o na-ah angzawn o moa a sava haek ah to aphum o. 11Khrihca kangkom bum boih hoi ato kawng ka thaih kaminawk boih mah zit tasoehhaih hoiah oh o.
Dawnraihaih hoi Matsakhaih
12Dawnraihaih hoi matsakhaih zetpui to kawkpatoehnawk mah mipui salak thungah to a sak o. Taangcanawk boiboih loa Solomon Imhup ah angqum o cu. 13Minawk mah anihcae to pakoeh o parai eloa abu tasabang kami loa mita doeh anihcae khaeah a paa o vam ai. 14To-e kaminawk loa anihcae kangkom thungah angthap o aep aep moa Angraeng ka taang nongpa hoi nongpui kangkom kalen puiah coengh. 15Kawkpatoehnawk ih toksakhaih ranghoiah ngoinanawk to vangthung lam bangah angzawn o moa Piter to a caeh taroi ah thoemto to a pakhra mah tahlipthuih na soe tiah iihkroeng hoi phak nuiah pasongh o. 16Topacoengah Jerusalem taenghaek ih vangnawk hoitoah mipui to angzoh o mang moa ngannanawk doeh, taqawk ka tawn kaminawk doeh, angzoh o haih moa atonawk boih to ngantui o king.
Kawkpatoehnawk Pacaekhlaekhaih
17Topacoengah Qaihma Kalen hoi anihcae ih ampuinawk boiboih, to ih ka om Sadusi kaminawk thungih kaminawk mah kawkpatoehnawk to a ut o phi pongah maemaeto sak hanah aram o. 18Kawkpatoehnawk to a naeh o moa mipui thongim ah to paung o. 19To-e ato qum ah Angraeng ih vanmi longto mah thongim khongkha to paong moa kawkpatoehnawk to tacawt haih moa, 20“Caeh o aloa Tempal thungah angdoe o aloa hi hinghaih kangtha kawng hae minawk boih khaeah thuih pae oah,” tiah a naa pae o. 21Kawkpatoehnawk loa lok tahngai o moa khawnthaw huek ah Tempal ah akun o moa patukhaih ih amtong o.
Qaihma Kalen hoi anih ih ampuinawk lokcaekhaih Kawngsi acupui to sak hanah Judah kacoetanawk boiboih to a kawk cu; topacoengah kawkpatoehnawk to anihcae hma-ah angzoh haih hanah thongim ah kaminawk to patoeh o. 22To-e patoeh ih kaminawk to ang phak o na-ah kawkpatoehnawk to thongim thungah hnuh o ai pongah lokcaekkung kawngsinawk khaeah amlaem o moa a thuih pae o, 23“Thongim ka phak o na-ah hoihdak ta-ah angkhah moa ka congkungnawk to khongkha ah to a oh o king; to-e khongkha to ka paong o na-ah a thungah mita doeh ka hnuh o ai,” a naa pae o. 24Qaihma kacoetanawk hoi tempal congkungnawk ih angraeng mah ato lok to a thaih o na-ah, kawkpatoehnawk nuiah tihmuen maw ka pha boah, tiah dawn anghmang o. 25Topacoengah nongpa longto angzoh moa anihcae khaeah, “Tahngai oah! Nangcae mah thongim thungah paung o ih kaminawk loa Tempal thungah oh o moa kaminawk to a patuk o,” tiah a naa pae. 26Topongah tempal congkungnawk ih angraeng loa angmah ih kaminawk hoiah a caeh o moa kawkpatoehnawk to anghoih o let. Anihcae mah thatha hoiah sah o ai, kawmawtiah mipui mah hlung hoiah vah o tih tito a zit o.
27Anihcae mah kawkpatoehnawk to anghoih o moa lokcaekhaih Kawngsi hma-ah to angdoetsak o, moa Qaihma Kalen mah anihcae to lok a duengh. 28Anih mah, “Hi kami hmin hoiah na patuk o han aiah lok kang paek o na ai maw? To-e na sak o ih hae khen oah! Nangcae ih patukhaih ih mah Jerusalem bum boih ah na koisak o boah, moa hi kami duekhaih kawng pongah kaicae hae na pakung hanah na koeh o!” tiah a naa.#Mat 27:25
29Piter hoi kalah kawkpatoehnawk mah, “Kaminawk ih lok tahngai pongloa Sithaw ih lok tahngai han oh. 30Nangcae mah Jesuh to na hum o pacoengah kraws ah to na takhing o, to-e aicae saezanawk ih Sithaw mah anih to duekhaih thung hoitoah angthawksak let. 31Israel kaminawk zae dawn pakhuemhaih atue kahoih to paek han hoi anihcae zaehaih ihnawk to tahmen thai hanah Sithaw mah anih to angthawksak let moa Pahoikung hoi Pahlongkung batiah angmah bantang bangah anghnutsak boah. 32Hi hmuennawk boih panoek haih bomkung saksi loa aicae hae ni; kaicae khueh na ai moa Sithaw mah angmah ih lok tahngai kaminawk khaeah langrae ah a paek ih Kai Pakhra hae doeh panoekkung saksi ah oh toeng,” tiah a thuih o.
33Hi lok hae Kawngsi thungih kaminawk mah a thaih o na-ah katingai palungphui o moa kawkpatoehnawk to hum king han a koeh o. 34To-e anihcae thungih longto, mi boiboih mah khangza ih Farasi kami ahmin Gamaliel to Kawngsi hma-ah angdoet moa kawkpatoehnawk to nawnetta ah tasabang ah tacawtsak rae hanah lok a paek. 35Topacoengah Kawngsi kacoetanawk khaeah, “Israel kaminawk, hi kaminawk nuiah hmuen na sak o ih kawng pongah hae acoe oah. 36Zanghnii pangah Theudas naa pae o ih to tacawt moa kai hae kami romram na ai ni, a ti moa kami cumvaipalito roekrak mah a hnukah baang o. To-e anih to hum o moa angmah hnukbangnawk loa ampra o dung moa a toksakhaih ih to doeh a duek roeprap. 37Topacoengah milu kroekhaih tue ah Galili kami Judas to doeh tacawt toeng; kami paroeai mah anih hnukah baang o, to-e anih to doeh hum o toeng moa a hnukbangnawk to loa ampra o king toengloeng bae. 38Topongah vaihi ih kawng pongah hae kang thuih o, hicae nuiah hae kawbang doeh sah o hmah, om o tak romram ah! Anihcae mah patoephaih ih hoi a sak o ih hae kami mah sak romram iah om nahaeloa anghma let tih. 39To-e Sithaw khae hoitoah angzo nahaeloa nangcae mah na pazawk o thai pom mak ai, Sithaw ka aekkung ah na coeng o moeng tih,” tiah a naa pae o. Kawngsinawk loa Gamaliel mah poekhaih kahoih paek ih to pazui o.
40Kawkpatoehnawk to a kawk o, cungpraek hoiah a boh o moa Jesuh hmin hoiah natuek doeh lokthuih han aiah lok a paek o, moa a prawt o. 41Kawkpatoehnawk loa Kawngsi kacoetanawk khae hoitoah tacawt o na-ah paroeai anghoe o, kawmawtiah anihcae to Jesuh hmin pongah azat phawhhaih pauep hanah a tueng roe tiah Sithaw mah a dawn pongah ni. 42Nithokkruek ah Tempal thung hoi minawk im ah Messiah naa pae ih Jesuh kawng Tamthang Kahoih to patuk o moa a thuih o toemoe.
Asang Khongso New Testament in Eastern Khumi © Bible Society of Myanmar, 2023.