Kɛkolu 13
13
Ala ka Baanabasi ni Sawuli lɔ kawanilila teme
1Wo k'a talan kela ni kalanmɔɔ dɔlu tɛɛ limaniyajama tɛma Antiyɔsi so kɔnɔ. Wo dɔlu le ne: Baanabasi, Simiyɔn (ai tɛɛ a fɔla min ma ko Falafin), Lusiyusi ka bɔ Silɛni, Manayen (min ni jamanakunnasiiba Helodi ka buɲa i ɲɔɔ fɛ), ani Sawuli. 2Lon dɔ, ai ka to mɔ Tii batola, ai vɛ sun nɔ, Nii Sɛnɛyanin ka kuma ai yɛ, a vɛɛ: «Ài yi Baanabasi ni Sawuli bila ai ta fan ǹa baalekɛko lɔ, ǹ n'ai kilila min kanma.»
3Ai wɔlinin sundonna ani Ala dali, ai k'ai bolo la Baanabasi ni Sawuli kan k'ai lɔ Ala ya baale la.
Baanabasi ni Sawuli ka mɔɔlu kawani Sipele
4Nii Sɛnɛyanin ka Baanabasi ni Sawuli kelaya mingɛ, ai ka taa Selusi so kɔnɔ. Ai se je, ai ka don kulunba kɔnɔ ka taa Sipele, min yi kɔɔtɛmaduu le. 5Ai senin Salamisi so kɔnɔ, ai ka Ala kumakan lase damina Jahudiyalu ya Aladalibonnu la. Yohana (ai tɛɛ a fɔla min ma ko Malɛkɛ), wo tɛɛ ai madɛmɛnna.
6Ai wɔlinin kɔɔtɛmaduu wo lɔtiminna, ai ka se Pafɔsi so kɔnɔ ka wɔimakɛ dɔ ye je, min tɔɔ tɛɛ ko Baajasuwa. Jahudiya le tɛɛ a le, min tɛɛ a fɔla a jɛlɛ ma ko kela. 7Baajasuwa tɛɛ Sipele jamanatii bilankɔɲɔɔ dɔ le le. Jamanatii wo tɛɛ hangilima le le, min tɔɔ tɛɛ ko Sɛjiyɔ Pɔlusi. A do ka Baanabasi ni Sawuli kili, kamasɔlɔn a tɛɛ a fɛ ka Ala kumakan lamɛn. 8Kɛɛ wɔimakɛ Baajasuwa, ai tɛɛ a fɔla min ma Gɛlɛkikan nɔ ko Elimasi, wo vɛ Baanabasi ni Sawuli sɔsɔla fɔsa jamanatii la yi fili, wo kana limaniya. 9Kɛɛ Sawuli, ai tɛɛ a fɔla min ma fana ko Pɔli, wo joso lafanin tɛɛ Nii Sɛnɛyanin la. A do k'i ɲa kaa Elimasi lɔ kosɛvɛ, 10k'a fɔ a yɛ, a vɛɛ: «Ile Soitana den, ile min joso lafanin namala ni koyon suu bɛ la, ile kotelennin lɔtiɲaba, i tɛnala i nɔningɛla mɔ Tii ya siya telenninu lɔkulukulula? 11Wo lɔ saa, mɔ Tii v'a bolo lawuli i kanma k'i ɲa gbɛ. I do kɛtɔ waate dɔ kɛla, i tɛnala tele yena.» Telemanin, divi fin mainmain vɛ donna a ɲa ma. A do v'a bolo mɛmɛla ka mɔɔ ɲinin, min y'a bolo mina ka siya jiya a la. 12Jamanatii ka ko min kɛnin ye mingɛ, a ka limaniya, kamasɔlɔn mɔ Tii ya kalan k'a lakawakoya kosɛvɛ.
Pɔli ni Baanabasi ka mɔɔlu kawani Antiyɔsi teme min yi Pisidi koovi lɔ
13Wo kɔ, Pɔli ni a taamaɲɔɔlu ka don kulunba kɔnɔ Pafɔsi so kɔnɔ ka taa Pɛlɛga so kɔnɔ, min yi Panfili koovi lɔ. Yohana (ai tɛɛ a fɔla min ma ko Malɛkɛ), wo ka bɔ ai fɛ je le ka seikɔ Jelusalɛmu. 14Ai bɔnin Pɛlɛga, ai ka se Antiyɔsi so kɔnɔ, min yi Pisidi koovi lɔ. Nɔningɛlon senin, ai ka don Aladalibon na k'i sii. 15Mɔɔ dɔ vɛ Nabi Musa ya Taulati fan dɔ kalanna, ka kelalu ya kitabu fan dɔ fana kalan. Kalan wo bannin, Aladalibon ɲamɔɔlu ka kela lataa Pɔli ni Baanabasi ma, ai vɛɛ: «Mɔ badenmalu, ni kuma ka kɛ ài bolo k'a fɔ jama sɛmɛdonko lɔ, ài yi wo fɔ.»
16Wo lɔ, Pɔli v'i lɔla k'a bolo jate, a vɛɛ: «Bani Isilankalu ni Alaɲasiyanɲɛmɔɔlu bɛ, ài y'ài tolomalɔ. 17Bani Isilankalu Tii Ala le na mɔ bemanu tala k'ai siboloma siyaya aiya lonaya waate Misilan, ka ban k'ai labɔ je aa foniseleya lɔ. 18Ala k'aiya ko mina a ma fuwa lɔ san binaani (40) kɔlɔ. 19A ban kɔ siboloma wolowulan halakila Kanaan duu lɔ, a ka duu wo di mɔ bemanu ma k'a kɛ ai ta le. 20Ka ta a damina ma ka sii a laban na, wo bɛ ladɛnnin ka kɛ san kɛmɛ naani ni san biloolu (450) le le.
«Wo kɔ, Ala ka kititɛɛbalu lasii mɔ bemanu kunna haan fɔɔ Nabi Samuyɛli tele lɔ. 21Wo waate, ai k'a fɔ Samuyɛli yɛ ko a yi masakɛ dɔ lasii ai kunna. Wo fɔ, Ala ka Kisa denkɛ Sawuli di ai ma ka bɔ Bɛnjamin kabila lɔ, min ka san binaani (40) kɛ masaya la. 22Ala ka wo labɔ je mingɛ, a ka Dawuda lasii masaya la ai kunna. Ala do ka seleya di ka bɛn Dawuda ya ko ma, a vɛɛ: ‹M̀'ɛ Jese denkɛ Dawuda ye k'a fɔ ko aa ko bɛnnin ǹ josokun ma. A do kɛtɔ ǹ sawonanko bɛ kɛla.› 23Ala vɛ Lakisilikɛba lana Bani Isilankalu ma ka bɔ Dawuda bɔzɔn nɔ, min taanin kɛla Isa le, iwo a na lahedi tala teme. 24#Malɛkɛ 1.4; Luka 3.3.Kɛɛ jani Isa tɛɛ na, Yaya le tɛɛ Bani Isilankalu bɛ kawanila, ko ai y'ai dajoo mafalin k'ai mako ji kɔlɔ. 25#Yohana 1.20; Matiyu 3.11; Malɛkɛ 1.7; Luka 3.16; Yohana 1.27.Yaya tɛɛ aa baale laban boloma waate min nɔ, a k'a fɔ mɔɔlu yɛ, a vɛɛ: ‹Ài yi ǹ jatela mɔɔ min ne, ǹ tɛ wo le! Kɛɛ mɔɔ dɔgbɛlɛ natɔ ǹ kɔ. Hali ka aa samala julu fɔlin a yɛ, ǹe dɔɔyayine wo ma.›
26«M̀ badenmalu, Ibulahima bɔzɔnnu ni Alaɲasiyanɲɛmɔɔlu bɛ, Ala na kisiko kuma min lanala ǹu le ma. 27Jelusalɛmukalu ni aiya kuntiilu tɛɛ m'a lɔn Isa yi mɔɔ min ne, kumatɛ ka kelalu ya kumalu ɲaye. Wo le k'a kɛ, ai ka kiti bila Isa la ka kelalu ya kumalu mafa, minu yi kalanna Nɔningɛlon bɛ. 28#Matiyu 27.22, 23; Malɛkɛ 15.13, 14; Luka 23.21-23; Yohana 19.15.Hali ai ma dailu sɔlɔn min yi kɛ a faa kun ne, ai ka jamanatii Pilati dali ko a a faa. 29#Matiyu 27.57-61; Malɛkɛ 15.42-47; Luka 23.50-56; Yohana 19.38-42.Ai ka ban ko bɛ mafala mingɛ minu sɛvɛnin ka bɛn a ma, ai k'a lajii ka a bɔ kɔlɔman ma, k'a fuleni la kabulu kɔnɔ. 30Kɛɛ Ala k'a lawuli ka bɔ saya lɔ. 31#Kɛkolu 1.3.A do k'a jɛlɛ jiya a taamaɲɔɔlu la tele siyama kɔlɔ, minu ka taa a fɛ Jelusalɛmu ka bɔ Galile. Wolu le do kɛnin a selelu le maa mɔɔlu tɛma yi ne. 32Ǹu do yi wo le Samakan Kein lasena ài ma yi ne, k'a fɔ ko Ala na lahedi min tala mɔ bemanu yɛ, 33a vɛ wo mafa ǹu ai bɔzɔnnu yɛ, kamasɔlɔn Ala na Isa lawulila ka bɔ saya lɔ, iwo a sɛvɛnin teme Zabuli sula filana lɔ, ko:
‹Ǹ denkɛ le i le,
m̀'ɛ kɛ i fa le bi.›
34Ala ka Isa lawuli ka bɔ saya lɔ fɔsa a kana tolin habadan, iwo a n'a fɔla teme, ko:
‹Ǹ na kosɛnɛyanin min lahedi tala Dawuda yɛ,
ài yi la a la ko ǹ kɛtɔ nɛɛma wo dila àilu le ma.›
35Wo le y'a ma, Zabuli sɛvɛba na min ne fɔla sula gbɛlɛ lɔ, a vɛɛ:
‹I tɛnala diɲala iya Mɔɔ Sɛnɛyanin fuleni yi tolin kabulu lɔ.›
36Masakɛ Dawuda koni, a wɔlinin Ala ya ko latɛɛninnu kɛla a tele lɔ, a ka latɛɛ kɛ. Ai k'a sudoon a bemanu dafɛ, a do ka tolin. 37Kɛɛ Ala na mɔɔ min lawulila ka bɔ saya lɔ, wo fuleni ma tolin. 38Wo lɔ saa, m̀ badenmalu, ài y'a lɔn ko julumbu lɔkotoko la yi sena ài ma Isa le sabu la. 39Ado ni mɔɔ minu ka limaniya a ma, wolu bɛ la yi fɛlɛle k'ai bɔ aiya julumbu bɛ ma, k'a talan Nabi Musa ya seliya ma se ài lafɛlɛla. 40Wo le y'a ma, ài y'alama, fɔsa ko min sɛvɛnin kelalu ya kitabu kɔnɔ, wo kana ài masɔlɔn, ko:
41‹Ài y'a ye, àilu kolafeyabalu,
ài yi kawakoya ka ban ka halaki!
Kamasɔlɔn ǹ'i ko min kɛla àiya tele lɔ yi ne,
ài tɛnala lala wo la tuun,
hali ni mɔɔ tɛɛ wo ɲafɔ ài yɛ.› »
42Pɔli ni Baanabasi bɔtɔla Aladalibon na, mɔɔlu vɛ ai madiyala ko ai yi na Nɔningɛlon natɔ k'a dɔ la kalan wo kɔkan. 43Ladɛn ban kɔ, ai siyama ka bila Pɔli ni Baanabasi kɔ, Jahudiyalu ni Alaɲasiyanɲɛmɔɔ minu tɛɛ vɛ don Jahudiyalu ya diina lɔ. Pɔli ni Baanabasi ka kuma ai yɛ k'ai sɛmɛdon, ko ai yi to Ala ya nɛɛma siya kɔkan kudein.
44Nɔningɛlon wo kunɲɔɔ, sokɔnɔmɔɔ fanba k'ai ladɛn k'ai tolomalɔ mɔ Tii kumakan ma. 45Jahudiyalu ka jama wo ye mingɛ, wo ɲangbeya k'ai mina. Ai do ka Pɔli kumakan sɔsɔ damina k'a jɛvɛ. 46Wo kɛ, Pɔli ni Baanabasi k'ai javi josolagbeleya boloma, ai vɛɛ: «Ala kumakan la tɛɛ ka kan ka se àilu Jahudiyalu le ma kunfɔlɔ le. Komi ài v'i ban a lɔ, ani ka jate ko niimaya banbali bɛnnin tɛ ài ma, wo le n'a mɔ ɲa tiliminna siboloma gbɛlɛlu la. 47Kamasɔlɔn mɔ Tii na jamali min ne dila mɔ ma, ko:
‹M̀'ɛ i kɛ kɛnɛya le siboloma gbɛlɛlu yɛ,
fɔsa i yi kisiko lase haan fɔɔ dunuɲa dan na.› »
48Siboloma gbɛlɛ mɔɔlu ka wo mɛn mingɛ, ai bɛ ka sawa ka mɔ Tii kumakan buɲa, ado niimaya banbali latɛɛnin tɛɛ mɔɔ minu ma, wolu bɛ ka limaniya.
49Wo lɔ, mɔ Tii kumakan tɛɛ jɛzɛnna duu wo fan bɛ lɔ. 50Kɛɛ Jahudiyalu ka kɛ́ tɔɔlamalu lɔsun so kɔnɔ, ani Alaɲasiyanɲɛ mosolu minu dalayanin. Wo lɔ, ai ka Pɔli ni Baanabasi jangata ka ban k'ai gbɛn aiya koovi lɔ. 51#Matiyu 10.14; Malɛkɛ 6.11; Luka 9.5; 10.11.Ai mɔɔ fila bɔtɔla je, ai k'ai sennu magbasi ka gbangban bɔ ai ma, ka wo kɛ je mɔɔlu ban tɔɔmase le. Wo kɔ, ai ka taa Ikoniyɔmu so la. 52Ado Isa kɔbiladen minu tɛɛ Antiyɔsi, wolu joso lafanin tɛɛ sawa ni Nii Sɛnɛyanin la.
Manya Bible Translation, © SIM International, 2023