Kɛkolu 11
11
Piyɛli ka dandɛɛli kɛ limaniyajama yɛ Jelusalɛmu teme
1Keladennu ni limaniyamɔɔ minu tɛɛ Jude koovi lɔ, wolu k'a mɛn ko siboloma gbɛlɛ mɔɔlu fana vɛ ai bolo sii Ala kumakan kɔlɔ. 2Wo lɔ, Piyɛli senin Jelusalɛmu, Jahudiya limaniyamɔɔlu vɛ a makumala, 3ai vɛɛ: «I jiyanin tɛɛ kɛnɛkɛbalilu le fɛlɔ, ani ka dɔnni kɛ ai fɛ!»
4Wo lɔ, Piyɛli ka ko timinninu ɲafɔ damina ai yɛ ka ta a damina ma. 5A vɛɛ: «Ǹ ka to Ala dalila Jopa so kɔnɔ, a ka ko dɔ lajɛlɛ ǹ ɲa ma. Ǹ ka fen dɔ jiitɔla ye ka bɔ sangbolo lɔ, min kɛnin tɛɛ iwo bilingan ba, min minanin tɛɛ a tungun naani la. A se m̀ ma, 6ǹ k'a lasaa ka tuukɔlɔsoo ni tuukɔlɔkɔnɔ ni fɔnfɔnnifennu ye a lɔ. 7Wo kɛ, ǹ ka kumakan dɔ mɛn, a vɛɛ: ‹Piyɛli, i wuli, i y'a dɔ faa k'a dɔn.› 8Kɛɛ ǹ k'a fɔ, ǹ ko: ‹Wo tɛ kɛ ǹ Tii, kamasɔlɔn m̀ ma fen sɛnɛyabali bila ba ǹ da bene, kumatɛ fen kɔsɔnin ma!› 9Kɛɛ kumakan wo ka bɔ sangbolo lɔ kɔtunun, a vɛɛ: ‹Ala na fen fen si lasɛnɛyala, i kà a fɔ wo ma ko fen kɔsɔnin.› 10Wo ka kɛ siɲa sawa le ka ban mingɛ, bilingan ni a kɔnɔlɔfen bɛ la ka jɛlɛ sangbolo lɔ kɔtunun ka tunun. 11Wo waate kelen, kɛ́ sawa ka se ǹ jiyabon ma, minu lananin tɛɛ ǹ kɔ ka bɔ Sezale. 12Ado Nii Sɛnɛyanin k'a fɔ ǹ yɛ ko ǹ kà sika, ǹ'i taa ai fɛ. Ài ɲa yi mɔ badenma wɔɔlɔ minu la yi ne, wolu ka taa ǹ fɛ, ado mɔ ka don Kɔɔnɛli ya bon na. 13A do ka dandɛɛli kɛ mɔ yɛ ko a na mɛlɛka dɔ lɔnin yena aa bon na, min k'a fɔ a yɛ, a vɛɛ: ‹I yi mɔɔ dɔlu lataa Jopa so kɔnɔ ka Simɔn kili, ai y'a fɔla min ma ko Piyɛli. 14A kɛtɔ samakan lasena i ma, ile ni iya bonnamɔɔlu kisitɔ min fɛ.› 15Ǹ ka kuma damina mingɛ, Nii Sɛnɛyanin ka jii ai kɔkan iwo a na jiila mɔ kɔkan teme a damina lɔ. 16#Kɛkolu 1.5.Wo waate kelen, ǹ hangili ka bila mɔ Tii kumakan nɔ, ko: ‹Yaya tɛɛ mɔɔlu makola ji le le, kɛɛ àilu makotɔ Nii Sɛnɛyanin ne le.› 17A lagbɛnin ko Ala na siboloma gbɛlɛ mɔɔ wolu sɔla, iwo a na mɔ sɔla teme mɔ limaniya waate lɔ mɔ Tii Masa Tɔɔmasenin Isa ma. Wo lɔ saa, ǹe yi jene le k'a fɔ ko ǹ'i ǹ lɔ Ala ɲa?»
18Ai ka kuma wo mɛn mingɛ, ai k'aiya sɔsɔyali dabila ka Ala tanu, ai vɛɛ: «Tuɲa le, Ala vɛ diɲa a ma ko siboloma gbɛlɛ mɔɔlu fana y'ai dajoo mafalin, fɔsa ai yi niimaya sɔlɔn.»
Samakan Kein la ka se Antiyɔsi teme
19 #
Kɛkolu 8.1-4. Limaniyajama ka jangata min masɔlɔn Etiyɛn faa kɔ, wo le ka kɛ sabu le, ai ka jɛzɛn haan fɔɔ Fenisi gbɛkɛnɛ lɔ, ni Sipele kɔɔtɛmaduu lɔ, ani Antiyɔsi so kɔnɔ. Ai do tɛɛ tɛ Ala kumakan lasena mɔɔ suu suu ma, mafɔ Jahudiyalu dein. 20Kɛɛ Jahudiya kɛ́ dɔlu ka bɔ Sipele ni Silɛni ka se Antiyɔsi. Ai do vɛ mɔ Tii Isa ya Samakan Kein lasena siboloma gbɛlɛ mɔɔlu fana ma. 21Mɔ Tii ya seetiiya tɛɛ ai fɛ, wo lɔ, mɔɔ siyama ka limaniya k'ai jɛlɛ lasei mɔ Tii ma.
22Wo ko k'a fɔ Jelusalɛmu limaniyajama yɛ mingɛ, ai ka Baanabasi lataa Antiyɔsi. 23A ka se je ka Ala ya nɛɛma ye ai kan mingɛ, a ka sawa k'a fɔ ai yɛ k'a magbeleya ko ai y'ai sɛmɛdon mɔ Tii ya ko ma ai josokun bɛ la. 24Baanabasi tɛɛ mɔɔ ɲuma le le, min ya limaniya walanin tɛɛ kosɛvɛ, ani min joso lafanin tɛɛ Nii Sɛnɛyanin la. Wo le k'a kɛ, mɔɔ siyama ka limaniya mɔ Tii ma je.
25Wo kɔ, Baanabasi ka bɔ je ka taa Sawuli ɲininya lɔ Talese. 26A k'a ye mingɛ, a ka na a le Antiyɔsi. Ai ka san kelen kɛ je, ai vɛ ladɛn kɛla limaniyajama fɛ ka mɔɔ siyama kalan. Antiyɔsi sokɔnɔmɔɔlu le k'a fɔ Isa kɔbiladennu ma kunfɔlɔ le ko Keletiyɛnnu.
27Wo waate, kela dɔlu ka na Antiyɔsi ka bɔ Jelusalɛmu. 28#Kɛkolu 21.10.Ai lɔ mɔɔ kelen min tɔɔ tɛɛ ko Agabusi, wo k'i lɔ ka kuma Nii Sɛnɛyanin sabu la k'a fɔ ko kɔɔn fitina kɛtɔ donna dunuɲa fan bɛ lɔ. Kelayakuma wo ma ka fa Lɔmu masakɛ ba Kulodi ya waate lɔ. 29Wo lɔ saa, Isa kɔbiladen minu tɛɛ Antiyɔsi, wolu k'a latɛɛ ko ai kelenkelenna bɛ y'ai senko kɛ k'ai badenmalu madɛmɛn minu siinin tɛɛ Jude koovi lɔ. 30Ai do ka wo kɛ, ka madɛmɛlifen wo don Baanabasi ni Sawuli bolo, ko ai yi taa a le limaniyajama ɲamɔɔlu fɛ.
Manya Bible Translation, © SIM International, 2023