Mattĕo 5

Dèhôwî Ahmô̆ Lwīthô

1Jezŭ tcahtî bija òèòò d́ō, Za htagè khò̆mu dèmè̆ akho. Kî b́ĕ Za sańă hwă nu, Zo bōhmubicè tòcò lehtîgè Cè. 2Ca b́ăhta Zò lòmò kî Cò d́òŭd́ò̆sagè lōwa tòcò gōjo:

Dèhôwî Ahnèhnè

(Lŭka 6.20-23)

3“Ab́èhôwî ḿî bija assègnè̆ d́ŏ atha bu tòcò nu;

manè̄, Mò̄kho Ahtĭage ḿî cè è̆.

4Ab́èhôwî ḿî bija athoothao, joha tòcò nu,

manè̄, dè gè̄ mèmòhtagekò̆ ca tha.

5Ab́èhôwî ḿî bija athob́îthajū tòcò nu,

manè̄, zi gī nibèkò̆ htĭge.

6Ab́èhôwî ḿî bija athaẃithaò̆ dèdî̄dèhma tòcò nu,

manè̄, ca kā ab́èko ò̆b́èkokò̆.

7Ab́èhôwî ḿî bija akhòwèdè tòcò nu,

manè̄, dè gò̄ khòwèhmòb́èkò̆ cè.

8Ab́èhôwî ḿî bija athowîthatcă tòcò nu,

manè̄, ca ka tcahtîb́èkò̆ Kib́ĭcè.

9Ab́èhôwî ḿî bija amèjīmèd́wădè tòcò nu,

manè̄, dè gō jokò̆ cè Kib́ĭcè apho.

10Ab́èhôwî ḿî bija akhab́è dèlômèssègnè̆ dèdî̄dèhma akhoacè̆ tòcò nu,

manè̄, Mò̄kho Ahtĭage ḿî cè è̆.

11“Thĭ b́èhôwî b́ĕ jo kho jè cè̆ bija kò d́òkè̆d́òô thĭ, bija gô̄ lô mèssègnè̆ thĭ, kî bija gā bāwè̄phrò thĭ lò dèkèḿè arră nu. 12Thaganāi kî thalōthalaibò̄. Manè̄, thĭ sô thĭ hlè̆ do thĕbwe d́ŏ Mò̄kho nu. Manè̄ kò̄ d́òdo dō, bija lô mèssègnè̆ lili htŏ Prò̆fèt htè aò ŭsugè thĭ tòcò nu.

D́ithè kî Dèhlî̆

(Mărko 9.50; Lŭka 14.34,35)

13“Thĭ ḿî lākho ad́ithè. D́ithè gī di scĭ ma ńò dō, da gè̄ mèscĭ d́ò̆ cè nè̄? Ada wanè be dè dimĭ ńò, ḿî bija gā bāphlòmĭ kî gè̄ khè̆htajāhta akho be lò.

14“Thĭ ḿî lākho adèhlî̆. U, htè aò khò̆mukho tu u nu, atò òb́i za ńò. 15Kîd́ò̆ bija dola hwă hmîte d́ō, bija da phlalaglŏ ṕahlu ńò, ḿî bija b́è̆hta ahtukho cab́ô̆htè agî̄ hlî̆lab́è bija lŏcăcè aò hibu tòcò nu. 16Mègōnu d́ō, thĭ dèhlî̆ gî̄ hlî̆ d́ò̆è bija ahlò̆mò̄, cab́ô̆htè bija gā tcahtî thĭ dèphîdèmè awîaè, kî bija gè̄ bè̄dòbè̄thebò̄ thĭ Pa aò d́ŏ Mò̄kho dèbwè nu.

Dèthèhlô̆ Ab́èkja Dèthôdèthò̆

17“Gomo ḿè Ja la mèkè̆ Mŏzè adèhmèla ḿîwî, prò̆fèt tòcò adèhtulahmèla ḿîwî ḿè. Ja da la mèkè̆ ńò, ḿî Ja la mè pĕhta dòkhò̆. 18Jò d́ò̆sa thĭ adî̄ahma, Mò̄kho kî lākho gè̄ hèwî̄hèkè̆ nòthò̆, dèhmèla gē de pĕhta lŏ hnî̆ńò athŭtherĕ, cèd́ŭ htî dimi dophlo ḿîwî, ane dene ḿîwî gè̄ dèhèwî̄hèkè̆ b́è ńò. 19Megōnu d́ō, bija akhè̆b́a dèhmèla asciphogudu jo aklè̆ dôhmô̆ kî athèihŭ bija agè̄ mègōnu dèbwè nu, cè kè̄ b́èjokò̆ asciphogudu d́ŏ Mò̄kho Ahtĭage abu nu. Barasă bija amèkô akă kî athèihŭ bija mègōnu dèbwè nu, cè kè b́èjokò̆ adogudŭ d́ŏ Mò̄kho Ahtĭage abu nu. 20Ḿî jò d́ò̆sa thĭ, thĭ dèdî̄dèhma ko to dolĭ ma Skrĭbāpho kî Pharizè̆pho tòcò è̆ ńò dō, thĭ de lenīb́è Mò̄kho Ahtĭage abu ńò.

Dèmèthĭ Bija

21“Thĭ thîhè̆b́è htŏ hlĕ dèd́ò̆sagè bija hlemo tòcò dè gōjo, ‘Nè dè mèthĭb́è bija ńò, kîd́ò̆ amèthĭ bija dèbwè nu cè kè̄ b́èkò̆ dècirra,’ nu. 22Ḿî Jè jo, Jò dò̆sa thĭ, bija dèbwèbwè gè thèhtèsô ma cè thè̆buwe dō, cè kè b́èkò̆ dècirra. Kîd́ò̆ bija dèbwèbwè gō jo ma cè thè̆buwe, ‘Răka!’ dō, cè kèb́è jolekò̆ d́ŏ anedothabwe ajŭkho nu. Kîd́ò̆ bija dèbwèbwè gō jo cè thè̆buwe ‘Agudunapă!’ d́ō za gā lab́èkò̆ Larrāhmîŭ abòbu. 23Mègōnu b́eḿĕ ne lei nè dèhlu d́ŏ dèthèb́è̆kho nu kî d́ŏnu no gomohtani nè thè̆buwe mò d́òhta nè dèkèḿè kò̄ ò dimimi d́ō, 24lè̄la mò̄kô nè dèhlu d́ŏ dèthèb́è̆kho ahlò̆mò̄ nu kî le mècomèmò ŭsu mò̄kô nè thè̆buwe kî nè amēzo nu, mèhwăge b́è̆htakò̆bò̄ nè dèhlu.

25“Mèlaglage plă bija adara nè dèbwè b́ĕ nè hèkôwe ca kă d́ŏ klèlò nu. Gî̄ dî ḿî ma ńò dō, adara nè dèbwè ki ilaphlòḿĭ nè acirradè dèbwè acukhòbu d́ō acirradè dèbwè ki ilaphlòḿĭ nè khî̆bwè acukhòbu d́ō na gā lab́è tèpwè dèkî̆dî̄ abu. 26Jò d́ò̆sa nè, ne de plege lŏ ne cwĕ hô̆ gô̆ ab́e ńò athŭtherĕ nè dè hèhtab́è tèpwè dèkî̆dî̄ abu ńò.

Thotha kî Dèneb́î̆cè Adèòplî̆òtcă

27“Thĭ thîhè̆b́è htŏ dèd́ò̆sagè bija hlemo tòcò gōjo, ‘Na da lakèḿè b́è ńò.’ 28Ḿî jè jo, jò d́ò̆sa thĭ, htè bija dèbwèbwè gā tcawè̄ amihmu dèbwè d́ŏ dèthaèni agarā abu d́ō, za lakèḿèkô htŏ lōwa d́ŏ ca thabu dòkhò̆. 29Na gādŭ adèhtwè dophlo gî̄ ḿî ma ni nikhĭ dèsèphrò klè d́ō, cîẃî̆phlòladē hwă hwĕphlòḿĭbò̄. Manè̄ kòd́òdo dō, aè d́okhlŏ ḿî gū su gā pa ge neb́î̆cè tòkò̆tîkî d́olĭkî gā ladēnī Larrā abu thèd́è̆bwè d́o dòkhò̆. 30Kîd́ò̆ nu cukhò adèhtwè dòkhò̆ gè̄ mè lakhunī nè dèkhòwè abu d́ō, klăhtè̆dū hwă d́ō hwĕphlòḿĭ cè. Manè̄ kòd́òdo dō, aè d́okhlŏ ḿî nu cu na kha tò ò ńò dòkhò̆ d́olĭ kî na ladēnī Larrā abu thèd́è̆bwè nu.

Dèbāphlòḿĭ Ahmè̆

(Mattĕo 19.9; Mărko 10.11,12; Lŭka 16.18)

31“Kîd́ò̆ dèd́ò̆sa ògè gōjo, ‘Bija dèbwèbwè gā hna hèphlòḿĭ zè hmè̆ d́ō ci ki i d́ò̆è lōwa cèlaphra.’ 32Ḿî Jè jo, Jò d́ò̆sa thĭ htè bija dèbwèbwè, gî̄ dî ḿî dèlathulakèḿè akhoacè̆ ńò, za gā hna hèphlòḿĭ zè hmè̆ d́ō, za hna lathulakèḿè lōwa lò. Kîd́ò̆ amikhŏ aphîge amihmu ab́èhnahè dèbwè nu ḿî ḿî zî ḿî alakèḿè lò lò.

Dèthèhlô̆ Ab́èkja Dèŏlăphlala

33“Tapla be, thĭ thîhè̆b́è htŏ dèd́ò̆sagè bija hlemo tòcò gōjo, ‘Nò dô hôbēsed́ă darază b́è ne ne ńò, ḿî nè mèkô b́è nè dèŏlăphlala Dèado tòcò nu.’ 34Ḿî Jè jo, Jò d́ò̆sa thĭ, hôd́ă ḿè taplă ḿè; hôd́ăi ḿè Mò̄kho ḿè, manè̄, Mò̄kho ḿî Kib́ĭcè Ana. 35Hôd́ăi ḿè lākho ḿè, manè̄, lākho ḿî Kib́ĭcè akhajāla. Hôd́ăi ḿè Jerŭsalèm u ḿè, manè̄, Jerŭsalèm u ḿî Saphrado dèbwè au. 36Hôd́ăi ḿè ńo ko ḿè, manè̄, nè dè mè b́ôthă, ḿî̆dîḿî ńò mè thĭpa kèhta khulŭ tòb́ò̆ ńò. 37Thĭ dèjî̄b́è gī ḿî d́ò̆è; ‘O d́ō o. Ńò d́ō ńò.’ Dèjî̄b́è aphlòtôlô kî ab́akho nu òhtakô kî dèkî̆kkè lò.

Dèthèhlô̆ Ab́èkja Dèmège Alī

(Lŭka 6.29,30)

38“Thĭ thîhè̆b́è htŏ dèd́ò, ‘gādŭ dophlo alī gādŭ dophlo, thô̆ tè b́è alī thô̆ tè b́è nu.’ 39Ḿî Jè jo, Jò d́ò thĭ, mègebò̄ ḿè dèkî̆kkè alī ḿè. Bija dèbwèbwè kè̄ d́è nè nèhtî adèhtwè dòkhò̆ d́ō, d́awè̄nikô cè atîcî dòkhò̆b́è. 40Bija dèbwèbwè gā thaè dara nè d́ŏ jŭkho nu kî gā thaè phîthĭwī nè ni scid́ŏ d́ō, i d́ò cè ni scid́ŏkhlŏ dòkhò̆. 41Bija dèbwèbwè gā thaè cwihè nè dèthèrè abu d́ō, lekôbò̄ ca kă gī thèrè dòkhò̆. 42Bija ada nè dè dèbwè, ibò̄ cè; kîd́ò̆ bija athaè lò dè d́ŏ ńò ò dèbwè, d́uphlòḿĭ ḿè ne ne ḿè.

Dèb́èlò̄ D́ĕd́òròkhè

(Lŭka 6.27,28,32-36)

43“Thĭ thîhè̆b́è htŏ dèd́ò, ‘Nè kè̄ b́èlò̄b́è nè thè̆buwe barasă nè dè wè̄ dè sè̆ za tèpwè ne d́ĕd́òròkhè.’ 44Ḿî Jè jo, Jò d́ò thĭ, b́èlò̄bò̄ thĭ d́ĕd́òròkhè, kîd́ò̆ thèb́è̆bò̄ bija alômèssègnè̆ thĭ kî ad́òkè̆d́òô thĭ mi thĭ khè̆ tòcò anikhĭ. 45Cab́ô̆htè thĭ gî̄ ḿîbò̄ thĭ Pa aò d́ŏ Mò̄kho htè ahna lumuhta bija awî kî akî̆kkè tòcò akho, kî ai hwè zula ni bija adî̄ahma kî adîdî̄dahma ńò tòcò akho dèbwè aphoali nu. 46Thĭ kè b́èlò̄ htĕ ab́èlò̄ thĭ tòcò lò d́ō, thĭ gī nib́è d́ò̆ thĭ sô thĭ hlè̆ danè̄? Adadèhmŭ tòcò hnò̆nu mèthè̆ gōnu lò lò tè b́è ńò ā? 47Thĭ gū hnŭsè htĕ thĭ thè̆buthè̆we tòcò lò d́ō, thĭ mè khlŏ d́ò̆ danè̄? Bwèthŭkupho tòcò hnò̆nu mèthè̆ gōnu lò lò tè b́è ńò ā? 48Acab́ô̆ thĭ Pa aò d́ŏ Mò̄kho dèbwè wîtcă pĕhtazòhta nu thĭ ḿî ḿî pĕhtazòhtakôbò̄ gōnu.”

目前選定：

Mattĕo 5: GRNT21

醒目顯示

複製

想在你所有裝置上儲存你的醒目顯示？註冊帳戶或登入

了解更多Geba Roman New Testament的詳情

Mattĕo 5

熱門經文出自
Mattĕo 5

聖經:

Karen, Geba

譯本: Geba Roman New Testament - GRNT21

Mattĕo 5

Mattĕo 5

熱門經文出自 Mattĕo 5

聖經:

Karen, Geba

譯本: Geba Roman New Testament - GRNT21

Mattĕo 5

熱門經文出自
Mattĕo 5