John 4
4
Iesu na enda Samaria evohu ga ke ena
1Eto embo isapamane Iesu ambo ambo uo bapataito eo John ta ambotani dembena avo Pharisee embomeni na ingia 2(rate Iesu na bapataito ae rate ambotani na bapataito ea.) Eto Pharisee embomeni na Iesu ta ambotani isapamane ea amita duru avo ingia avo Iesu na kito 3enda Judea toto enda Galilee ta pambuna. 4Eto enda Galilee ta pambasi pambuto enda Samaria orohuta pambuto 5da Sychar Jacob na meni Joseph ta enda ikena amita engihi 6Jacob ta umo timbari hoto ai puvuna, eto iji 12 o'clock unu degi koso avoeto jangu indesi umo timbari hoto engihita arumbeto mihinu 7-8amita ambotani indari humbasi da jo ta pahuo enda Samaria evohu vahai amo umo timbasi puvunu Iesu na kito evohu ta degi, “Na umo timbuto ike indone,” ainge enu, 9evohu amina ke mine einge ena, “Ke umo do ere. Judea embomeni na dago Samaria embomeni mane umoro eagora te inena nane umo timbuto ikana ke ere?” ainge enu, 10Iesu na ke einge ena, “Eto inena God ta hande te eto embo amuna no degi ta umo indesi penunu eria avo kiaehea amo inena daroho irari umo avo penunu eto umbaehea,” ainge enu, 11evohu amina ke mine einge ena, “Embo, no umo timbari ovu irae eto hoto emo hu be ta avoeto daingeto inena daroho umo timbuto nau ikao? 12Dagota mama Jacob te amita meniundi te o te aingeto indito umo hoto emo dagota ikarira te umo dagota mama Jacob dembari rete?” ainge enu 13Iesu na ke einge ena, “Eto embo amuna umo erevi indesuja amo ehako umo ujeje aisuja, 14rate umo nanena ikasona amo indou ambota ehako umo ujeje mane aisuja te amita jo ta kuru vivihe vasiri te daroho iresuja.” ainge enu 15evohu amina, “Embo, umo erea avo ikao indono umo ujeje mane ai, eto na umo ujeje ururou ehako ei umo timbasi mane puvuresona.” ainge enu, 16Iesu na, “Pambuto no ivu jage ejo puvuroi,” ainge enu 17-18evohu amina, “Ivu nau irae,” ainge enu Iesu na, “Ke be erea no ipone mahu tapa 5 rate vahai eha umoga mihia amo ivu no manera avoeto ivu no irae ke erea amo ke be ra.” Ainge enu 19evohu amina, “Embo, nane umo ere kogona amo perovetara, 20te dagota mamahamane na tiri ei ta God jakeka ere ijiahera te ungo na da Jerusalem ai ta God jakeka ara ke eagova.” Ainge enu, 21Iesu na ke einge ena, “Evohu, umo ke nau avo ke be ejo. Iji puvuto ere hua emo tiri ei eto da Jerusalem ai ta God Mamo avo mane jakeka aisora te amo eingera. 22Ungo Samaria embomeni amo God kiae rate teho jakeka eagova te dago Judea embomeni na God kogue jakeka eagora eto God na Judea enda ta eto embo tapa orekasuja 23eto iji mahu puvuto mihia emikote embomeni na jo te ahihi te ke be te na Mamo God jakeka aisora amo God na jakeka be aravo ingito osa aisuja. 24Eto God amo Ahihi avoeto embo na ke be te ahihi te na jakeka ara uje ere ua.” Ainge enu, 25evohu amina ke einge ena, “Na kogona amo Keriso, ungotenau hondate ari embo amo puvuto ke tapa au ingesora,” ainge enu, 26Iesu na, “Embo puvuresuja ke erea embo amo umo te ke eria, embo amo namora,” ainge ena.
27Eto ke ainge ijinu Iesu ta ambotani na egerembeto puvuto Iesu evohu amiga ke ijie mihinu kito ti kakambukea te do uje eto evohu amiga ke ere ijina avo eto ingae toa. 28Eto evohu amina amita umo timbari ovu tonu venu da ta huheveto pambuto amita embomeni ta degi ke einge ena, 29“Embo vahai puvuto mihia emina ari nau tapa do eagona avo harikehei ingena avo Keriso rete pambuto kivu.” Ainge enu, 30embomeni na da ta eto kesi pahuo, 31ambotani na Iesu indoja uje eto ke einge ea, “Ahe Poekari Embo, umo indari erevi humbuto inda,” ainge eo 32Iesu na einge ena, “Indari nau degi ta mihia amo ungo kiaera,” ainge enu, 33ambotani na ke ungo oenga mine ara eto einge ea, “Embo amuna indari ikehere indei?” Ainge eo, 34Iesu na ke einge ena, “Indari nau amo na ikari embo amita pure ana uje eto ikena avo ano irae aisuja. 35Eto ungo ke eagova amo ‘Hariga 4 irae au donda be gasa aisuja avo kahumbeto be humbasora’ ainge eagova te ungota degi erena, ungo pure poeto kivu, mahu gasa eto giroro eto kahumbari inono ehija. 36Eto be humbari embo na amita mine mahu humbuhe harau ta ikihe vasiri te daroho iresuja. Avoeto ve urari embo te eto humbari embo te ainge eto tunga javotoho ere ora. 37Eto timu hatirari ke erena amo ke be ra, embo nei ve uraguja eto embo nei amo be kahumbaguja, 38eto na ungo embo nei ta pure ta ikehene be ere kahumbihova. Amo embo nei na pure ngahia ena te ungo na pure ta mine avo ere uhova.” 39eto enda Samaria da ai ta mihahera amina evohu amita ari tapa avo Iesu na harikenu evohu amina ingina avo enu embomeni na ingito Iesu ke be 40eto puvuto Iesu avo embomeni amiga iroja uje eto penunu eo iji heriso Iesu na da ai mihie ke ijinu 41embomeni isapamane na Iesu ke be ea. 42Eto embomeni na evohu amita degi ke einge ea, “Dago ke no ehe ingera avo pere mane rate amita pe ta ke ei ingito amo enda ta orekari embo be ra ainge ijie ke be erera.”
Eto Iesu na embo okose ta meni enu kojena
43Eto Iesu na iji heriso irae enu enda Galilee ta pambuna. 44Eto Iesu na ke erevi mahu ena, “Da vahai embo na God ta peroveta asuja amo da vahai embomeni amita na mane osa aisora.” ainge ena, 45rate Galilee ta puvunu Jerusalem pondo ta ari neite neite enu avo embomeni na kito puvuto mihio Iesu puvunu kito pekea.
46Eto Iesu na da Cana enda Galilee ai ta umo enu ‘Wine’ ena da ai ta ehako puvuto mihinu 47koto humbari embo okose na amita meni avo da Capernaum ta mihie ambure sapura be humbuto pehari ahumpa be unu puvuto (Iesu da ta puvurari ke ingito puvuto) Iesu ta degi meni kojaja penunu enu 48Iesu na ke einge ena, “Umo teho na ke be mane asoa te vasiri te ari neite neite avo kihi kesi uje ere oete?” ainge enu, 49embo okose amina, “Embo, nau meni pehasi ere ua avoeto sausau ungote pambasira,” ainge enu, 50Iesu na, “Umo oenga pambu, no meni mahu erehija,” ainge enu, 51embo amina Iesu ta ke avo humota ue degi ta pahunu amita bande ta pure embo vahai na puvuto degi ta hambuto, “No meni mahu erehija,” ainge enu 52ingito ke einge ena, “Iji deina erehei.” ainge enu, “Iji mahu amita hure 1 o’ clock amina hamo vevere jamo ehija,” ainge enu 53embo amina Iesu na amita meni eraja ke ena amo iji 1 o’ clock unu ke ena avo hotembeto embo amite eto amita bande vahai embomeni te aingeto Iesu ke be ea. 54Eto Iesu na enda Judea ta eto pambuto Galilee eto orohuta hajire nei ena eto nei erevi ena.
© 1988, Wycliffe Bible Translators, Inc. All rights reserved.