মথি 2
2
আস্যাং যীশুগো পৈঞ্যাস্যাংরো হ্রাগেচা
1যিহুদিয়া প্রিনি বৈৎলেহম রুওয়ামা যীশুচা ফুওয়ালিইরি। য়াংখা হেরো মাং চুও হিকলিইরি। আহ্রিই প্রিগা পৈঞ্যাস্যাং লৈগায়ক যিরুশালেংমা লাঃরো প্রগেলিইরি, 2“যিহূদীরোমা মাং ম্যুইংরি, য়াংসুউ যাদেমালিঃ? আহ্রিইফাক গংখাংমা য়াংসুউ ক্রিগো ম্রাংরো ঙারো য়াংসুউগো হ্রিইখুফু লাঃগেতি।”
3দিঃ চাঃগা ক্রারো হেরোদ মাংনা য়াংদে হিকচা যিরূশালেংমা আখ্রা লুঃউরোলি চিই প্রাংগেরি। 4হেরোদ মাংচা প্রিমা হিকচা রিসিইনা কেইং ছারারোগু খঃরো মিংলিইরিচাগা, “ফোরা লংচা যামা ফুওয়াফুলিঃ।”
5য়াংসুউরো মাংগো প্রগেলিইরি, যিহূদিয়া বৈৎলেহম রুওয়ামা য়াংসুউচা ফুওয়াফু, আক্রংগা রিসিই দিঃ চাঃগা রুইলিইরি;
6‘যিহুদা প্রিমা বৈৎলেহম,
যিহুদা আতুওয়ংমা নাং তাখালি অাঞি মুহুক,
যাফুলিছুগি নাক আতুওয়ংগা নিংরোরা
লৈইন্হইঅং তয়ক ওকখ্যুকসুউ লাঃফু
যাসুউ ঙা ইস্রায়েল জেম্যুওগো চংস্যকফু।’
7য়াংখা হেরোদ মাংচা য়াং পৈঞ্যা স্যাংরোগু স্যুওরো খঃলিইরি অর সিকলো য়ুলিইরিচাগা যা আখিং কালামা ক্রিগো ম্রাংলিইরিলিঃ।
8মাংচা দিঃ চাঃগা প্ররো পৈঞ্যাস্যাংরোগু বেৎলেহমদুঃ রুওয়েলৈতি, “কুবাংরো লাঃরো আহ্লাপাশ্যি প্যাংরো য়াং আশ্যিগো হ্রাগেলিই। আশ্যিগো রাঃগি ঙা সাদাং পিইগে যাফুলিছুগি ঙালি লাঃরো য়াংসুউগো হ্রিঃ খুঃনৈংঅং।”
9মাংগ্রীঃ চাগাঃগো নাঃথং ব্রিইরেখা পৈঞ্যাস্যাংরোচা থুওয়ক লাঃখাগেতি। য়াংসুউরো আহ্রিইফাকদুঃ যা ক্রিগো ম্রাংগেলিইরি, য়াং ক্রিচা য়াংসুউরো হ্রিইগা লাঃলিইরি। আশ্যিচা যা ইংমা হিকলিইরি, য়াং ইং আথাক্কা মরক সাগ্রা ক্রিচা লাঃরো হিকলিইরি। 10-11ক্রিগো ম্রাংলো পৈঞ্যাস্যাংরোচা কংগং চিইমা আপ্য ফ্রইলো ইংদুঃ ওয়ংগেলিইরি অর য়াং আশ্যিগো মিখাং মরিয়মবামা ম্রাংগেলিইরি। য়াংখা য়াংসুউরো কেইংফামা ওয়েলো আশ্যিগো হ্রিইখুগেলিইরি অর য়াংসুউরোমা বাকসুওয়াগো হ্ললো রুয়িই, ম্যুয়িং অর আম্যুয়িং ছিই লাকফুয়িই কেলিইরি। 12য়াংনক য়াংসুউরোগো থাওরা ফোরাচা ইংমাকমা সিদিক পিইলিইরি, যাফুলিছুগি য়াংসুউরোচা হেরোদ মাংদুঃ প্রেং মাঃলারাঅং। য়াংখা য়াংসুউরোচা আখ্রা লেংগা কুঃ প্রিদুঃ প্রেং লাঃখাগেতি।
“হেরুমাংরো যীশুগো হ্রাচা আখ্রাং”
13পৈঞ্যাস্যাংরো লাঃব্রিনক ফোরা তেমেংদ তয়কচা ইংমাকমা যোষেফগো প্রালো প্রলিইরি, “থাআ, আশ্যিনা আমিংগো য়ুউলো মিশর প্রিদুঃ ব্রিইলিই অর ঙা মন্হকতয়ং মপ্রলি য়াংহ্লকরাক তৈঅং য়াংদেমা নিংলিই আক্রংগা সাঃশ্যিগো সেবৈফু আতুওয়ক হেরোদ মাংচা হ্রাফু।”
14-15য়াংখা যোষেফচা থাঃলো সাঃনা আমিংগো য়ুউলো য়াং ঞিমা মিসর প্রিদুঃ লাঃখারি অর হেরোদ মাং সিইঞ্যং য়াংদেমা হিকলিইরি। দিঃচারো প্রাসানা ফ্রইরি আক্রংগা রিসিইরোগা নিংলো ফোরা যা চাঃগা প্রলিইরি য়াংচারো আব্রিচুং ফ্রইঅং:
ঙা মিসর প্রিগা ঙা সাঃগো খঃ য়ুখালিইরি।
16পৈঞ্যাস্যাংরো কুঃগো লিংচাগো সিকরো হেরোদ মাংচা কংগং মেইং তাকলিইরি। য়াং পৈঞ্যাস্যাংরোগা যা আখিংগো আসিক য়ুউলৈতি য়াং আখিংআলৈই ন্হইন্হ অর য়াংচাথাক আশ্যি হিকচা সাঃরোগো বৈৎলেহমনা য়াং নেংবুনেংবা আলুংসুউগো সেবৈফু আঃনা পিইলিইরি। 17ছুগি রিসিই যিরমিয়গা নিংলো চাঃগা প্রচা আব্রিচুং ফ্রইরি:
18রামায়মা কংগং রংরাংছারো ঙুসেইং ক্রারারি;
রাহেলচা কুঃ সাঃরো আতুওয়ক ঙুরি,
তুখুবাং প্যাংলোলি তেংজিইফু মনৈং,
আক্রংগা য়াংসুউরো মিহিকব্যা।
19হেরোদ মাং সিইব্রিইনক ফোরা তেমেংদ তয়কচা যোষেফগো ইংমাকমা প্রারো প্রলিইরি, 20“থাআ, সাঃনা আমিংগো য়ুউলো ইস্রায়েল প্রিদুঃ প্রেং লাঃলিই। সাঃগো যাসুউরো সেবৈফু ক্রেংলিইরি য়াংসুউরো সিই লাঃখাব্যা।”
21য়াংখা যোষেফ থাঃলো সাঃনা অামিংগো য়ুলো ইস্রায়েল প্রিদুঃ লাঃখারি। 22যিহূদীয়া প্রিনিমা য়াংখা হেরোদ মাং নক য়াংসুউ সাঃ আর্খিলায়চা মাং তাকলিইরি। দিঃ চাঃগাগো ক্রালো যোষেফচা য়াংদুঃ লাঃফু ক্রকলিইরি। 23য়াংখা নাসরত নাঃমিনা রুওয়া তুরুওয়ামা লাঃরো লুক চাঃলিইরি। দিঃ প্রাসানারো ফ্রইচাগা রিসিইরোগা নিংলো প্রচা চাঃগারো আব্রিচুং ফ্রইঅং, “য়াংসুউগো নাসরতীয় ছুলো খঃগেফু।”
