যোহন 1
1
যীশু লগাফুংদো লাইচা আখ্রাং
1পাথামা চাঃগা হিকলিরি, চাঃগাচা থাওরা ফুরানা হিকলিরি অর চাঃগা কুঃদৈং থাওরা ফুরা হিকলিরি। 2অর পাথামাকাবাং য়াংসুউচা থাওরা ফুরানা হিকলিরি। 3আলুংচা থুউ চাঃগাগা ফ্রইলিরি, অর যাবাং তিম্রিজলিরি, য়াংচারোগা তুখুউলি য়াংসুউগো আপি মফ্রলি। 4য়াং আতুওয়ংমা বাওয়া হিকলিরি অর য়াং বাওয়াচা হিকলিরি লুঃউরোবামা আলাং রং। 5য়াং আরংচা মুম্যুয়েংমা ঙিকলিরি ছুগি মুম্যুয়েংচা আলাং রংগো কোব্রাক মাঙাংনৈংলি।
6থাওরা ফুরাচা যোহন নাঃমিনা লুঃউ তয়ককো রুওয়েলৈতি। 7য়াংসুউচা আলাং আক্রংগো য়ুউলো সাকসিই ফ্রইলো সাকসিই লাকম্হে পিইফু লাঃলিইরি আক্রংগা আলুংসুউ য়াংসুউ সাকসিইগো ক্রালো ক্যুংগেঞ্যং। 8যোহনচা কুঃদৈং য়াং অালাং মিহিকলিই য়িগিলি য়াংসুউচা য়াং আলাং আক্রংগো য়ুউলো সাকসিই পিইফু লাঃচা।
9য়াংসুউ আলাংচা আম্হেং আলাং, যাসুউ তয়ক মুক্যুয়েংগো আলাং ল্হুউলিরি, য়াংসুউচা লঃগাফুংদুঃ লাঃলিইরি। 10য়াংসুউচা কাবামা হিকলিরি অর কাবাচা য়াংসুউগা নিংরো তিম্রিলিরি, য়িগিলি কাবামা লুঃউরোচা য়াংসুউগো মিঃসিগেলি। 11য়াংসুউচা কোঃ প্রিদুঃ লাঃলিইরি, য়িগিলি য়াংসুউমা কুঃদৈং লুঃউরো য়াংসুউগো লাক মেখেংগেলি। 12য়িগিলি মন্হয়কবাং য়াংসুউগো ক্যুংরো লাক খেংগেরি, য়াংসুউরো আলুংসুউগো য়াংসুউচা থাওরা ফুরা ঈ ফ্রইফু তাওয়েংগো পিইলিরি। 13য়াং লুঃউরোচা স্যুইনা পিদিসেংথি মুয়ুলি, কামা পংরো য়াংচা মুহুক্কিলি য়ক্ক্যা কামাগালি মফ্রলি, ছুগি ফ্রইচা ফ্রইতি থাওরা ফুরাগা ফ্রইরি।
14য়াং আসাকচা লুঃউ ফ্রইরো পিদিসেংথি য়ুলিরি অর ঙারোনা পংরো নিংলিরি। ফাখাং থাওরা ফুরামা তয়ক সাঃ ফ্রইরো, য়াংসুউমা যা তেংখুং য়াং তেংখুংগো ঙারো ম্রাংগেলিরি। য়াংসুউচা মিত্তানা করুনা আব্রিচুং হিকলিরি।
15যোহনচা য়াংসুউ আক্রংলিলাগো য়ুউরো, আসেং আগ্রিনা সাকসি পিইরো প্রলিরি, “য়াংসুউচা থুউ লুঃউ, যাসু আক্রংলিলাগো য়ুউরো ঙা প্রলিরিচাগা, যাসু ঙা নক্কা লাঃরি, য়াংসুউচা ঙা থাকপাং গুংধগ্রি, আক্রংগা য়াংসুউচা ঙাক আয়াংকাবাং হ্রিঃগা হিকচা।”
16ঙারো আলুংসুউ য়াংসুউমা আব্রিচুংগা মিত্তা আপমা অরলি আম্যা মিত্তা রাঃগেরি। 17মোশিগা নিংরো ক্যাংওয়ে তাঃরাগো পিইলিরি, য়িগিলি যীশু খ্রীট্গা নিংরো মিত্তানা করুনা রাঃগেরি। 18থাওরা ফুরাগো তাখালি তয়ক মাম্রাংগেলি। য়াংসুউনা নিংচা, থুউ সাগং তয়ক, যাসু কুঃদৈং থাওরা ফুরা, থাওরা ফোরাচা য়াংসুউগো তাং প্রালিইরি।
যোহন পিইচা সাকসি
(মথি ৩:১১; মার্ক ১:৬-৮; লূক ৩:১৫,১৬)
19যাখা যিহুদি গংখ্যুকরো যিরুশালেং ম্রুগা লৈগায়ক পুরোহিতনা লেরিয়গো যোহনদুঃ রুওয়েলৈতি য়াংখা যোহন য়াংসুউরোবামা সাকসি পিইলিরি। য়াংসুউরো মিংগেলিরি, “কুঃবাং যাসুলিঃ?”
20আফ্রিমা যোহন লাক মেখেং মিনিংব্রি প্রফুছুগি লাক খেংরো প্রলিরি, “ঙা মশীহ মুহু।”
21য়াংখা য়াংসুউরো যোহনগো মিংগেলিরি, “য়জংছুগি যাসুলিঃ? কুঃবাং এলিয় লঃ?”
যোহনচা প্রলিরি, “মুহু, ঙা এলিয় মুহু।”
য়াংসুউরো প্রগেলিরি, “য়জংছুগি কুবাংচা থুউ রিসিক লঃ?”
আফ্রিমা যোহন প্রলিরি, “মুহুক।”
22য়াংখা য়াংসুউরো প্রগেলিইরি, “য়জংছুগি কুবাংচা যাুসউলিঃ? যাসুউরো ঙুরোগো রুওয়েলৈতি য়াংসুউরোগোগা প্রেং লাঃলো আফ্রি পিইরাফু। কুবাংচা কুঃদৈংগো য়ুউলো যা প্ররিলিঃ?”
23যোহন প্রলিরি, ঙাচা য়াং লুঃউ, যাসুউগো য়ুউরো রিসিক যিশাইয় প্রলিরি,
সিলিই প্রাং আঃরামা তয়ক অঃরো প্রলিইরি,
নাংরো ফোরা লেংগু প্রব্রং প্যাংগে।
24যোহনদুঃ যাসুউরোগো রুওয়েলৈতি য়াংসুুরোচা ফরীশী হিকলিইরি। য়াংসুউরোচা যোহনগো মিংগেলিইরি, 25“কুবাংরা মশীহ মুহুক, এলিয়লি মুহুক রিসিইলি মুহুক য়িগি যাফু রিঃঙুক মাঙ্গালা পিইরিলিঃ?”
26যোহনচা য়াং ফরীশীরোগো প্রলিইরি, “ঙা রিইমা রিঃঙুক মাঙ্গালা পিইচা ম্হেংরি ছুগি কুবাংরোমা প্রফুচাঞ্যং লুঃউ তয়ক হিকরি যাসুউগো কুবাংরো মিসিক। 27যর্দান খ্যং থুউফাক কাইংদো বৈথনিয়া রুওয়ামা যোহন রিঃঙুক মাঙ্গালা পিইলিইরি।”
28যর্দন খ্যং অর তাব্রাক্কা বৈথানিয়া রুওয়ামা যাদেমা যোহন রিঃঙুক মাঙ্গালা পিইরি, য়াংদেমা দিঃচারো প্রাসানা ফ্রইলিরি।
29অর তারাকখা যোহন যীশুগো কুঃওবাদুঃ লাঃচাগো ম্রাংরো প্রলিরি, “ক্রিগে থাওরা ফুরা ঈ ছুয়িইশ্যি, যাসু লুঃউরোবামা হিকচা আলুং আপ্রইকো ছিই বৈফু। 30দিঃ লুঃউচা য়াং লুঃউ যাসুগো ঙা প্রলিরি, ঙা নক্কা অর তয়ক লাঃরি, যাসু ঙা থাকপাং গুংধগ্রি, আক্রংগা য়াংসুউচা আয়াংকাবাং ঙাক হ্রিঃগা হিকচা। 31ঙা য়াংসুউগো মিঃসিনৈংলি, ছুগি য়াংসুউচা ইস্রায়েলিরোবামা ক্যঞাজিফু আতুওয়ক, য়াংচা কিজু ঙা লাঃরো রিঃঙুক মাঙ্গালা পিইরি।”
32য়াংনক যোহনচা দিঃ সাকসি পিইলিরি, “ঙা সেংস্যাংস ওয়িঞেংচা খঃ অরুক ছাংরো নেঃফুংগা ছাং লাঃরো, য়াংসুউবামা নাঃচাগো ম্রাংলিরি। 33ঙা য়াংসুউগো মিসিকলি, য়িগিলি যাসু ঙাগো রিঃমা রিঃঙুক মাঙ্গালা পিইফু রুওয়েলৈতিলি, য়াংসুউরা ঙাগো প্রলিরি, ‘যাসু আঃপমা সেংস্যাংস ওয়িঞেংচা লাঃরো ক্যাচাগো ম্রাংফুলি, য়াংসুউচা, থুউ লুঃউ, যাসুউ সেংস্যাংস ওয়িঞেংনা মাঙ্গালাছং পিইফু।’ 34ঙা য়াংচাগো ম্রাংলিরি অর সাকসি পিইচাগা, দিঃসুউচা থাওরা ফুরা ঈ সাঃদ।”
যীশু পাথামা তিবি য়ুইচা
35নক তারাকখা যোহননা য়াংসুউ তিবি নৈয়কচা প্রেংরো য়াংদেমা হিকলিরি। 36য়াং আখিংমা যীশু লাঃচাগো ম্রাংরো যোহনচা প্রলিরি, “ক্রি, থাওরা ফুরা ঈ ছুয়িইশ্যি।”
37যোহন দিঃ চাঃগা প্রচাগো ক্রারো, থুঃউ নৈয়ক তিবিচা যীশু নক্কা নক্কা লৈকেতি। 38যীশু নকহ্লিরো ক্রিরিখা থুউসুউরো লাঃচাগো ম্রাংরো প্রলিইরি, “নাংরো যাচাগো হ্রাগেতিলি?”
যোহন তিবিরো মিংগেলিরি, “রব্বি (প্রফুছুগি ছারা), কোবাং যামা নিংরিলি?”
39যীশু য়াংসুউরোগু প্রলিরি, “লাঃরো ক্রিগে।” য়াংখা য়াংসুউরো লাঃরো যীশু যামা নিংরিলি, য়াং আঃরাগো ক্রিগেলিরি অর য়াং রাকনিং যীশুনা নিংগেলিরি। য়াংখা ঞাচাতেং লিঃনারি তিইব্যা।
40যোহন চাগাঃগো ক্রাঃলো যীশু নকা লৈসু ন্হৈয়কমা তয়কচা শিমোন পিতরঞি আন্দ্রিয় ফ্রইতি। 41আন্দ্রিয়চা পাথামা কুঃও ঞিং শিমোনগো হ্রা থুউরো প্রলিরি, “ঙারো মশীহ্(প্রফুছুগি খ্রীটগো) ম্রাংগেরি।” 42আন্দ্রিয়চা শিমোনগো যীশুবাদুঃ য়ুউ লাঃখারি।
যীশুচা শিমোনগো ক্রিরো প্রলিরি, “নাং যোহনমা সাঃ শিমোন, য়িগিলি নাককো কৈফা ছুরো খঃফু।” দিঃ নাঃমি আদিপিচা ফ্রইতি পিতর, প্রফুছুগি ক্যক।
43ন্হাকফ্রাইং নিখা (নকা তারানি) যীশুচা গালীল প্রেদো লাঃফোল্হো আতুওক খ্যালিরে থুউখা ফিলিপ্পুগো তওয়িলিরেখা “ঙা নকা লৈ ছোলো প্রঃরিলি।”
44ফিলিপচা আন্দ্রিয়'লা পিতর মুওয়িঃ ফুওয়াঃচা আরা বাজেদা ম্রোসাঃ লুঃউ ফ্রইতি। 45ফিলিপচা নথনেলগো তওয়িরেখা, “মোশি পৈঁঞাইতি ক্যাইংমা ফ্রৈচি প'রঃ'ফাকরো ক্যাইংমা ফ্রৈচি আসু আক্রংপ্রুলো রুইঃলো থাঃলিরে, নাসরত ম্রোসাঃ যোসেফ-এ সাঃ ফ্রৈসু যীশুগো ঙ'রো তওয়িগাইরে ছোলো থুউসুগো প্রঃরিলি।”
46নথনেল ফিলিপগো মিংলিরি, “নাসরকগা তুখুমাঃসা আকং লাঃফুঞ্যং হিকরিলঃ?”
ফিলিপ য়াংসুউগো অাফ্রি পিইলিরি, “লাঃরো ক্রি।”
47যীশু নথনেলগো কোঃবাদুঃ লাঃচাগো ম্রাংরো , য়াংসুউ আক্রংলিলাগো প্রলিরি, “ক্রি, আম্হেং চাংজ ইস্রায়েল তয়ক। য়াংসুউ চিইমা তুখুউলি অালিংছুচা মিঃহিক।”
48নথনেল যীশুগো মিংলিরি, “কোবাং যাপুয়েং প্যাংরো ঙাগো সিকরিলিঃ?”
যীশু আফ্রিমা য়াংসুউগো প্রলিরি, “ফিলিপ নাককো খঃফু হ্রিঃগা, যাখা নাং থুঃউঃ সুবুওয়েপাং আরাংমা হিকলিরি, ঙা য়াংখাকাবাং নাককো ম্রাংলিরি।”
49য়জংছুখা নথনেলচা যীশুগো প্রলিরি, “ছারা, কোবাংচা থাওরা ফুরা ঈ সাঃ, কোবাংরা ফ্রইতি ইস্রাইলরোমা মাং।”
50যীশু য়াংসুউগো প্রলিরি, “নাককো থুউ সাবুওয়েপাং আরাংমা ম্রাংলিরি, দিঃ চাঃগা প্ররিকিজুরা নাং ক্যুংচা লঃ? দিঃচা থাকপাং অরলি যে যে মাঙ্গালাহিক আলুককো ম্রাংরামিঃ।” 51নক্কা যীশু প্রলিরি, “ঙা নাংরোগু আম্হেং প্ররি, নাংরো গংখাং ফুং লঃপচাগো ম্রাংগেমিঃ, অরলি ম্রাংগেমিঃ থাওরা ফুরা ঈ তেমেংদরো মনুসাওয়া সাঃগা তাককেচা অর সাককেচাগো।”
