LUKA 24
24
Yesu Dam: Daui: To" Li" Ru
(Mathe 28.1-10; Marku 16.1-8; Yohan 20.1-10)
1Laban ba ne, seim no' mug: qab qab bo" li" we' ai: myiqe: qe wa yao: bam nyhang" seim" to" ra" sheim nae pyo" ra" xau jham ci yang:- lab khyo ye" lo" ko" ra". 2Lab khyaung nhad' mae" laug zang tau: lhang" pye' to: va" rure yao: bam yemyao mung:- 3Lab khyaung khug khyo vao ye" ako"- ngadqere: Asang Yesu mao gaung re yao: bam maye: myao ko" ngad: ra". 4Ce:khyo re yao: bam mug' ye; jo, ko" au:- Qu" ge,- Qhui qhui qhag qhag mung: bao: ra" mai bau: ve; ci: ra" byu shid' yaug wa yao: bam: nhae mae ye; jo; ako". 5Ai: myiqe: qe wa din: gyaug mung:- myid gaung mae goe; jo; ako". Ai shid' yaug wa yao: bam re daui: na: ra" yaug re shid: ra" mo; phaung mae naonhaung" pe"mung: qho: na ko" i? ga: ta" ako". 6Yao: wa cetau mae mana lo:- Daui: to" lo" va"- yao: Galile mae na shi" au:- (24.6)* 7Byu: Yao: Zo: wa qobo shad' lhoe" ra" mo; lo, khyo ab byid' ru qhug' mung:- pyao: zang mae jin" se' pye' ru qhug' li" nae"- amung: sam ba thao re dam: daui: to" li" nae" ngad:- ga: yao: naonhaung" re ta" to" ra" dao: re myid: beim: ge,- ga: yao: bam re ta" ako".
8Alao"- ai: myiqe: qe wa Yesu dao: re myid: beim: mung:- 9Lab tau mae" dam: phao: lo" mung:- yao: bam wa mho"zo: daxe: dayaug we' gaje qe alhab' mo, re ai: khyo lota" kyo" ako". 10Lagyo: qere ai: khyo lota" kyo" ra" myiqe: qe wa Magadala Mari- Yoana- Yaku yao: myhi" Mari we' yao: bam we' daga" bobo: ra" gatau myiqe: qe ngad: ako". 11Lagyo: qe wa ai: myiqe: qe ta" ra" dao: re dao: keim ngad:- ga: myid gemung:- yao: bam ta" rure malam" ko" ngad: ra". 12Ngadqere: Petru wa to" yang: lab khyo tao" ye" lo" mung:- lab khyaung re yegam" qu" ke' re- mao gaung re thab' ra" jid: mo" pin: dau reza: yao: myao: ra". Ailao" yao: wa ai: khyo re myid: mug' mung:- yham khyo dam: tug' phao: lo" ra".
Ema-u Vogaung: Khyo Su" Ye" Lo" Ru
(Marku 16.12-13)
13Ai: ba reyao: Yesu mho"zo: shid' yaug wa Yerusalem vogaung: we' khyo nhad' man: ko va" ra" Ema-u vogaung: khyo ye" lo" na: ako". 14Yao: shid' yaug wa boe" lai: lo: ra" khyo jham re yao: cao: jho" ta" ako". 15Yao: shid' yaug wa yao: cao: jho" ta" jho" myid: mung:- ye" lo" na ko" au:- Yesu wa yao: yao: te' te' su" ye: mung:- yao: shid' zo: we' daga" ye" lo" ra". 16Yao: shid' zo: wa- Yesu re myao gengad yang: re: daru: zang mung yang: yao: re maqu" se" ko" ngad: ra". 17Yesu wa yao: shid' zo: re- Ni" shid' yaug wa khyo su: zo" mae" pe" nam jho" ta" na ko" i? ga: myid' ra".
Ailao" yao: shid' zo: wa myo, nho sham sham mung: thang: ye; jo; ako". 18Yao: shid' zo: mae" Cleopa ga: mang: ra" yaug wa- Nao wa Yerusalem khyo joe" li" ra" bang" vo qemae" ana" gyo: shi" ai: vogaung: mae boe" lai: lo: ra" khyo re maba: ru nao dayaug za: ngad nhaung i? ga: ta" ra".
19Alao" yao: wa pe" boe" ra" i? ga: myid' ra".
Yao: shid' zo: wa Nazared mae" Yesu nho: khyo ngad: ra"- ceyaug wa lapa dayaug ngad mung: Mao"So: qhid' kheim: mae re: byu alhab' mo; qhid' kheim: mae re: dao: thoe we' lo, mau" qam: so' bo: ra" lapa ngad: ra". 20Ngonhaung" khinjaung qi: qe we' zug: ade, qe wa yao: re se' pye' nae" dao: phyid' nae"qhid' mae" ab byid' pye' mung:- yao: wa pyao: zang mae jin" se' pye' ru qhug' ra". 21Yao: wa Israel amyu" re lhoe' ke' byid: nae" yaug ngad: ra"- ein: ngonhaung" myid: lao" qu" va"- ai:tho' mago"- ana" wa ai: khyo: boe" va" rulao" re:- sam ba ngad: ava". 22Ngonhaung" phung: mae" myiqe: damyo" wa ngonhaung" re myid: mug' nhao: ako". Yao: bam wa ne, seim no' mae" lab khyo ye" lo" ko" ra"- ngadqere: Yesu mao gaung re mayemyao ko" ngad: ra". 23Alao" yao: bam wa dam: tug' phao: lo mung:- Yesu wa daui: na: ra"- ga: mug: lagyo: qe yao: bam re ta" kyo" ra" bao qab re the' myao va"- ga: ta" ako". 24Ngonhaung" phung: mae" daqhae: re: lab khyo yequ" ko" re ai: myiqe: qe lo:ta" ru we' dakhyo:- khyag' za: ngad: rure ye:myao: ako". Ngadqere: yao: bam wa Yesu re mamyao ko" ngad: ra"- ga: ta" ako".
25Alao" Yesu wa yao: shid' zo: re- Naonhaung" wa lapa qe ta" to" ra" dao: jham re phyad za: manug: lam" ko" ra"- Nhag' magyang" ra" mo, we"- 26Meshia wa airu" ra" khyag' qhui: rure kham zo: mung:- yao" phungbao khug mae vao ye: zai ngad: ra" mangad: i? ga: ta" ra". 27Amung: Yesu wa Moshe tung" to" rumae" qhid mung: lapa qe tung" to" ra" Jham: Mugsug' alhab' mae yao" khyo we' sin: mung:- tung" to" ra" Jham: dau jham: lajheim: re yao: shid' zo: re sho' kyo" ra".
28Yao: bam ye" lo" na ko" ra" vogaung: nhae mae joe" lao"- Yesu wa su" lai: ye" lo" nae" seim" ra". 29Ngadqere: yao: shid' zo: wa- Ba vao mug: cad' va" ra". Nga" shid' zo: we' daga" thang: na gelang:- ga: ta" mung: yao: re tam" ako". Airumung: Yesu wa yao: shid' zo: we' thang: na nae" qhid' mae" cao" ye" lo" ra". 30Yesu wa yao: shid' zo: we' daga" zozo: nae" zaung: jo, mung:- mug re yu: yu yang:- jeju bin: caung: lao"- khyoe' phai" mung: yao: shid' zo: re byid' ra". 31Alao"- yao: shid' zo: wa myo, bung" li" mung:- Yesu ngad: rure ba: ako". Ngadqere: Yesu wa yao: shid' zo" qhid' kheim: mae" byaug: lo" ra". 32Amung: yao: shid' zo: wa- Khyo mae nga" shid' zo: re yao: dao: jhau: ra" au: we' Jham: dao: lajheim: sho' kyo: byid' ra" au:- nga" shid' zo" nhag' lam: khug mae thug thug ga: laung: li" kyi: mangad: i? ga: yao: cao: jho" ta" ako".
33Ailao" jao" yao: shid' zo: wa to" mung:- Yerusalem khyo dam: tug' phao: lo: ako". Aimae mho"zo: daxe: dayaug we' zang" ham: na: bam ko" ra" mo, wa- 34Ai: Asang wa gaigai: yao: dam: daui: to" li" va" ra"- yao: wa Simon re na: thug' qhu" va"- ga: jho" ta" na ko" rure lo:myao: ako".
35Alao" yao: shid' zo: wa khyo mae boe" ru we' mug khyoe' phai" ra" au:- Asang re yao: shid' zo: qu" ba: se" ra" khyo alhab' yao: bam re ta" sho' kyo" ako".
Mho" Zo: Qere Yesu Yao" Gaung Qhu" Byid' Ru
(Mathe 28.16-20; Marku 16.14-18; Yohan 20.19-23; Lagyo: 1.6-8)
36Yao: shid' zo: yao: bam re airu: ta" kyo" na shi" au:- nyag din taung" Yesu wa yao" gaung re yao:- yao: bam: phaung mae li" ye; qhu" mung:- naonhaung" ngaui bau: yaug yo vageshao:- ga: yao: bam re ta" ra".
37Yao: bam myao: ru wa subyo ngad:- ga: jho mung:- gyaug: nin" ako". 38Ngadqere: Yesu wa yao: bam re- Naonhaung" pe"mung: gyaug: din ko" i? Naonhaung" aung khug mae pe"mung: aug' o: ko" i? 39Nga" khyid we' lo, re qu" ge,- naonhaung" myao: ra" yaug wa ngo yao: ngad va"- ngore soe' qu" ge,- pe"mung:ga"re subyo wa gaung sho: we' shoqug: shoqe mabo ngad: ra". Ngo wa naonhaung" myao: ru we' dakhyo:- gaung sho: we' shoqug: shoqe bo yaug ngad:- ga: ta" mung:-
40Yao" wa ceru: ta" mung: mho"zo: qere yao" khyid lo, jham qhu" byid' ra". 41Yao: bam: nhag' lam: mae ngaui bau" ru we' mug' ru saung" byang" jo, gemung:- yao: bam maqo" lam" shiko" ngad: ra"- Airumung: Yesu wa yao: bam re Naonhaung" cetau mae zo: nae" daja: ja: qo" ko" i? ga: myid' ra". 42Ailao" yao: bam wa ngo: nyo, datam" yao: re byid' ako". 43Yao: wa aire yu: yu mung:- yao: bam: qhid' kheim: mae zo" ra".
44Ai: thao Yesu wa yao: bam re Moshe Kham" To" Ra" Tarha" Jham: paug'- Lapa qe tung" to" ra" jham: paug' we' Caung:khin" Jham: paug' jham mae nga" khyo we' sin: mung: ta" to" ra" khyo jham wa jab byang" li" ca"- ein: naonhaung" we' ngo daga" na shi" au: mae" ai:gu: alhab' ngo naonhaung" re ta" to: va"- ga: yao: bam re ta" ra".
45Ai: thao Jham: Dao: jham re ba: gyo: genae" qhid' mae" yao: bam: myid re yao: phung" byid: mung:- 46Yao: bam re Meshia wa khyag' qhui: rure kham zo: mung:- sam ba thao re shid: rumae" dam: daui: to" li" ca" zai ngad:- 47Yao" mang re lao: yang:- myid tha" ra" khyo mungdao: we' qobo khyad' byid' ra" khyo re Yerusalem mae" qhid mung:- byumyu" cao jab alhab' re kho" kyo: byid: ca"- ga: Jham: Mugsug' mae ceru: tung" to" ra". 48Naonhaung" wa ai: khyo jham we' sin: mung: myo, myao sagse: qe ngad: ako". 49Airumung: nga" Pho" yang dao:so: byid' to" rure naonhaung" dao mae ngoyao: nhao: ke' byid: nae". Ngadqere: naonhaung" wa mug: tho' mae" qam: so' naonhaung" dao mae majoe" gyo" li" li" wa Yerusalem vogaung: mae lao" na ca" ako"- ga: ta" ra".
Yesu Mug: Gaung Khyo Do, Lo" Ru
(Marku 16.19-20; Lagyo: 1.9-11)
50Ai: thao Yesu wa mho"zo: qere Bethani vogaung: nhae khyo jhui" ye: mung: yao" lo, shid' shad' re tau yang:- yao: bam re shaman" byid' ra". 51Airu: yao: bam re shaman" byid' na: au:- Yesu wa mho"zo: qemae" gao" lo" mung:- mug:gaung khyo to' yu: ru qhug' ra". 52Yao: bam wa Yesu re goe; caung:pa" yang:- gyai ngaui bau" ru we' Yerusalem khyo dam: tug' phao: lo" mung:- 53Caung:pa" Yham mae abang mabyid na: jo, yang:- Mao"So: jeju re caung:khin" byid' ako".
© Bible Society of Myanmar 2009