Génesis 44
44
Joseri ubasï itsïrhuta atarakua
1Jose k'umanchekuarhu anapu urhets'ïkurini juramukuspti: T'irekua sutupurhu uinirakua enkaksï xáni uáka páni, ka tumina tríju jatakuarhu jatsirakuantaa.
2Jucheti ubasï itsïrhuta atarakua mereari intecheri erachini jatsiraku. Ka ima ísï úspti eska Jose na arhipka.
3Enka na erantepkia, jauarasptiksï ka ch'anch'akichaniksï kuiparhatasptiksï ka níntasptiksï 4Uéakusptiksïa k'éri iretarhu, nótkiksï iauani niraxapti, enka Jose imeri k'umanchekuarhu urhets'ïkurini arhipka: Ni imani achetichani antakuani, enkari na antakuaskia arhiauakari: ¿Antits'ïsï xáni no amparhati k'uiripue? ¿Antits'ïsï ubasï itsïrhuta atarakua sïpa?
5Cháts'ï kánekua no sési úska, ubasï itsïrhuta atarakua sïpakuni jucheti achani, ima imani úrasïnti mítetarani ampe enka úkorheaka.
6Enka ima antakuapka, ísï arhiaspti eska na arhinhapka. 7Imaksï uantaspti: ¿Antits'ïnisï cha xáni no sési arhik'i? ¡Jucha amparhati k'uiripueska!
8Jucha ixu kámaxaka tumina imani enkachi tríju jatakuarhu exentapka, imani enkachi Kannani uératini juapka. ¿Jucha néna sïpapirini tiripiti ka mereari chéti juramutio k'umanchekuarhu? 9Enka nema p'ikuka imani ubasï itsïrhuta atarakua, eska ima uantikunhaaka, ka máteruechani jupikata pauaka.
10Ka ima uantaspti: Ísïchi uák'a eskats'ï na uantak'a. Ne enkachi exekuntaska ima juchari jántspiriuati, ka máteruechaksï no jupinhaati.
11Imaksï sóntu sóntu késkuspti ampe, ka mántani arhisptiksï mitaani t'irekua jatakuechani, 12Ima iámentu uénaspti eranhakuani k'erini uénani ka ísï nipani sapichuni jamperi, ka úbasï itsïrhuta atarakua Benjamini exekuntaspti. 13Imaksï karurhekorhentaspti xáni chéni, táchani kuiparhatantaspti ch'anchakini ka k'éri iretarhu k'uanhatsentasptiksï. 14Juda ka erachi jempecha niantapka Joseo, ima útasï jima jarhaspti. Tsérhukuaksï antakueraspti. 15Jose arhiaspti: ¿Ampets'ïsï ú?
¿Nóts'ï míteski eska ji jurhenaska exeni ampe enka úkorheaka?
16Juda uantaspti: Jucha nóma uaka úni, jimpo ACHAts'ïni exeska eskachi no sési úska. Ima enka sïpaka ka jucha ixu jarhaska, chári jántspiriuakachi.
17Jose uantaspti: Ji no uáka ísï úni, imakusï jatsiti jántspirini enka sïpaka, cháts'ï uáka chári táte jinkuni nintani.
Juda, Benjaminini kómu arhíp'ekusïnti
18Juda, Joseni antarheraspti ka arhispti: Acha, íntskurini sésikua eskakini arhintikuaka, acha, ásïri jama ikiacheni, cháts'ï xani juramukua jatsiska eska irecha, ásï jama ikiani.
19Cháts'ïni kurhamarhespka: ¿Cha útasï kámasïnki táteni o erachini?, 20Ka juchaksï arhispka: Jo, juchari táte t'arhepestia, ka juchari erachi tumpispti, juchari táte kánekua k'éritini kámaspti. Ka interi erachi ma uarhisti, ka interi nánteri uáp'a inteterkusï pakarat'ia, ka interi táte kánekua xénchasïnti. 21Ka cháts'ïni arhispka: Jua je, ji uékasïnka míteni. 22Ka juchaksïni arhispka: Tumpi no uát'i táte jempani jurakuni. Enka ima táteni jurak'uska, táte jempa xáni jirinhantani uarhiati. 23Cháts'ïni arhispka: Enkats'ï chári erachini no juáska, nóteru meniksï erakaaka.
24Enkani jucha táteo niántapka, jucha ísï aiankuntaspka eskats'ïni na arhipka. 25Enkats'ïni juchari táte arhipka: Ni je ménteru sánteru t'irekua piáni, 26Jucha arhispka: Nóchi úaka k'uanhatseni. Enkachi juchari erachi sapichu pát'aska, ísïchi úaka nirani, imani achani t'irekua piakuni. 27Juchari táte uantaspti: Sésits'ï mítetixaka eskarini jucheti uarhiti tsimani sapichani íntsaaska. 28Ma ixu uéraspti ka no k'uanhatsesti, ka iásï jamperi no junkuasti ka no exentaxa, mitetixaka eska manakorheri ikimenhari ma tsépunturhiska. 29Ka iásïts'ï jinteni japantiru íntuts'ï paxaka, enka inte ampe ma úkorhenchaska, ji uarhiaka xáni kómu p'ikurherani.
30Enkani ji iásï k'uanhatsentaaka jucheti táteni jinkuni, ka tumpi no nitani juchantsïni jinkuni, juchari táte kánekua p'interhesti tumpini. 31Enka ima místa eska tumpi no níantaska, jucha uántikuaka juchari táteni xáni kómu p'ikuastani. 32Ji arhiska juchari táteni eskani ji maiampentapirinka enka inte no sési úkorhenchapirinka, ji arhispka: Jucheti táte ji jukanchaaka méntku ísï jamperi enkakini no juankucheska chéti tumpini. 33Isï jimpo, kómu arhixakakini eskani ji tumpini jimpo pakaraaka. Ji chéti jántspiriuaka ka eska jucheti erachi sapichu nintaaka erachi jempechani jinkuni. 34Ji, neka k'uanhatsentaa jucheti táteo, no uékasïnka exeni na enka xáni no sési p'ikuarheraaka jucheti táte.
Biblia en P´urhépecha, Michoacán, México © Sociedad Bíblica de México, A.C.