Génesis 39
39
José ka Potifariri tempa
1Ismaeli anapuechasksï Joseni Ejiptu paspti, ka jima Ejiptu anapu ma piantaspti Joseni enka Putifari jakankurhimpka, ima enka piantapka irecheri p'urhek'uti urhets'ïkurispti. 2ACHA, Joseni iámentu ampe jarhoatasïrempti, ACHA úspti eska Joseni kánekua sési nikupirinka, jima enka Ejiptu jantspeni jápka. 3Imeri juramuti exespti eska ACHA imani jinkuni jarhaspka ka eska iámentu ampe enka úempka kánekua jarhoatasïrempka, 4imeri juramitu Joseni kánekua xenchasïrempti, Joseni míntaspti iámu ánchekorheta k'umanchekuarhu anapu eska ima juramupirinka. 5Jiáni uératini enka José míntanhapka k'umanchekua ka jatsikorhekua Ejiptu anapu, ACHA Joséni jimpo úch'akuraspti k'umanchekua, jatsikorhekua ka juátarhu jápka k'umanchekua. 6Ejiptu anapu iámentu ampe Joseni míntaspti, ka imeri juramuti nóteru ampe uantanheasïremptia, t'irekuak'uterusï uantanheuantia. José kánekua sési jáxespti.
7Sani ióni jimpo juramutiri tempa, Joseni ninharhikusïrempti ka arhisïrempti:
Ju jínteni jinkuni k'uini.
8K'óru ima no uékaspti ka juramutiri tempa arhispti: Jucheti juramutirini míntsikasti, eskari na exeni jaka, iámentu amperini jinteni mintasti.
9Íni k'umanchekuarhurini iámu juramukua íntskusti, k'órurini no íntskusti eskakini uák'a úcheni ampe enkani ji uékaaka, jimpokari t'u imeri tempeska, ji no úpirinka xáni k'éri k'amanharhintani Diósïni.
10Ima nanachi mántani pauani arhisïrempti eska ima jinkuni k'uipirinka, k'óru Jose ísku kurhasïrempti, 11ma jurhia ima imeri juramutio inchaspti ánchekorheni ka jima no nema jarhaspti, 12ima uarhiti inchantimespti ima jinkuni k'uikuekani ka xukuparhakua jupikuspti ka arhispti:
Jínteni jinkuni k'uita. Ima xasku uéntaspti jima uératini jimpo sïpakorhekuspka.
13Enka ima exepka na enka sïpakorhepka uéntani ka xukuparhakua jurarkuni ka ima jupikatini pakatani, 14ima nanachi uantap'aspti máteru tatachichani enkasksï jima jamani jápka ánchekorheni ka arhiaspti: Exe je, inte Ebreo anapu enka jucheti tatachi juáka, uékasïntits'ïni k'uratsetani, inchachestirini jinteni jinkuni uékani k'uini, ka ji chérakorhespka ka uinhachaska, 15ka enka kurhapka eskani ji uinhachaxapka sïpakorhesti uéntani ka jima jurarkusti interu xukuparhakua.
16Ima patsaspti xukuparhakua enka jamperi uampa junkuapirinka. 17Ka mák'ueni aiánkuspti: Ebreo anapu enkari juáka inchachestirini uékani jinteni jinkuni k'uini, 18enkani uinhachapka sïpakorhespti ka ima jima jurarkuspti imeri xukuparhakua. 19Enka Joseri juramuti kurhaapka ampe enka témpa uantantapka ka arhini: Ísïrini kámaspti chéti jántspiri, ima kánekua ikiaspti.
20Ima Joseni jupikatarkorhespti ka ónhaspti, jima ónhaspti enkaksï irecheri jupikatecha jaka, ka ónhakata pakaraspti. 21K'óru ACHA, Joseni jarhuataspti, ka úspti eska k'ataperakuarhu anapu urhets'ïkuri sési exepirinka Joseni. 22Ka k'ataperakuarhu anapu urhets'sïkuri Joseni míntaspti eska ima exeani japirinka máteru k'atakatechani, ka ima juramukukuasïrempti ampe enka úkua japirinka. 23K'ataperakuarhu anapu úrhets'sïkuri no uantanhiasïrempti ampe enka xáni Joseni mítapka, jimpoka ACHA jarhuatasïrempka ka iámentu ampe sési uerasïrempti.
Biblia en P´urhépecha, Michoacán, México © Sociedad Bíblica de México, A.C.