MARKUS 11
11
Surak-surak si meriah ibas pintu gerbang kuta Jerusalem
(Mat 21:1-11; Luk 19:28-40; Joh 12:12-19)
1Asum Jesus ras ajar-ajarNa lanai ndauhsa ku Jerusalem, seh me IA i Uruk Seton, deherken Betpage ras Betani. Isuruh Jesus dua kalak ajar-ajarNa 2nina, “To lawes, leben kam ku kuta si arah lebendu ah. Seh kenca kam ku bas kuta e, idapetindu kari sada kelede tambat, si langa pernah iersak kalak. Osari nalina jenari baba kelede e ku jenda. 3Adi lit kari kalak nungkun man bandu, ‘Engkai maka itangtangindu?’ katakenlah, ‘Perlu Tuhan, minter ka kari iulihkenNa ku jenda.’ ”
4E maka lawes ajar-ajar si dua kalak ndai. Idapetina sada kelede deher dalan, tambat ibas pintun rumah. Asum ia ngosari nali kelede e, 5piga-piga kalak si tedis i je nungkun nina, “Engkai maka iosarindu kelede e?”
6Erjabap ajar-ajar bagi si enggo ikataken Jesus man bana, e maka ipelepas kalak ndai ibabana. 7Ibaba ajar-ajar si dua kalak ndai kelede e, e maka iersak Jesus. 8Nterem jelma ngkimbangken uisna ibas pasar, lit ka pe deba ngamparken lambe si itektekna i juma. 9Kerina jelma si ngikutken Jesus, si arah lebe ras si arah pu di mulai ersurak-surak nina, #Msm 118:25-26 10“Pujilah Dibata! Ipasu-pasu Dibata gelah IA si reh ibas gelar Tuhan. Dibatalah si masu-masu Kinirajan si mulihi ipanteki, e me Kinirajan bapanta Daud; Pujilah Dibata i bas ingan Simeganjangna!”
11Kenca seh Jesus i Jerusalem, lawes IA ku Rumah Pertoton. IperdiatekenNa kerina si lit i je. Tapi perbahan wari nandangi gelap e maka lawes IA ku Betani ras ajar-ajarNa si sepuluh dua kalak e.
Isumpahi Jesus batang ara
(Mat 21:18-19)
12Pepagina, kenca berkat ia kerina i Betani nari, melihe Jesus. 13I dauh-dauh nari idahNa sada batang ara, mbur bulungna. Lawes IA ku je ngenehen ntah lit kin buahna. Tapi kenca seh IA i je, la lit kai pe idatNa seakatan bulung si mbur e, sabap paksa si e la musim erbuah. 14E maka isumpahi Jesus batang ara ndai nina, “Lanai ise pe pagi man buahndu.”
Ajar-ajarNa pe megisa kai si ikatakenNa e.
Jesus lawes ku Rumah Pertoton
(Mat 21:12-17; Luk 19:45-48; Joh 2:13-22)
15Kenca seh ia kerina i Jerusalem, lawes Jesus ku Rumah Pertoton. IpelawesNa kerina si erbinaga ras si nukur ibas kesain Rumah Pertoton e. Meja-meja kalak si nukar duit ras bangku-bangku si erbinaga nderapati itunggalingiNa. 16La ibereNa ise pe maba barang arah kesain Rumah Pertoton e. 17Kenca bage iajariNa kalak si nterem nina, “Enggo isuratken ibas Pustaka Si Badia, maka nina Dibata, ‘RumahKu pagi igelari Rumah Pertoton man kerina manusia.’ Tapi enggo ijadikenndu jadi asar penamun.” #Jes 56:7; Jer 7:11
18Ibegi imam-imam si mbelin ras guru-guru agama pe kai si ikataken Jesus e, e maka idaramina dalan guna munuh Jesus. Mbiar ia ngenehen Jesus sabap cocok iakap jelma si nterem megi pengajarenNa.
19Nandangi gelap, Jesus ras ajar-ajarNa lawes ibas kuta e nari.
Pelajaren ibas batang ara nari
(Mat 21:20-22)
20Pepagina, erpagi-pagi si lampas asum Jesus ras ajar-ajarNa mentas, idahna batang ara si nderbih, enggo kerah seh ku uratna. 21Teringet Petrus kai si enggo jadi, e maka nina man Jesus, “O Guru, nehenlah batang ara si isumpahiNdu e, enggo kerah.”
22Ngaloi Jesus, “Ingetlah! Adi kam erkiniteken man Dibata, 23banci pe ikatakenndu man uruk-uruk enda, ‘Angkat bandu, janah miserlah ku lawit.’ Adi tetap ukurndu janah tek maka kai si ikatakenndu e jadi, la banci lang jadi nge bagi si ikatakenndu e. #Mat 17:20; 1Kor 13:2 24Perbahan si e Kukataken pe man bandu: Adi ertoto kam bage pe mindo janah tek maka enggo ialokenndu, ibere Dibata nge man bandu kai pe si ipindondu. 25Bage pe adi tedis kam ertoto, alemilah kerina kalak si ersalah man bandu, gelah Bapandu si i Surga pe ialemiNa dosa-dosandu. #Mat 6:14-15 [26Adi la ialemindu salah kalak si deban, Bapandu si i Surga pe labo ngalemi dosa-dosandu.]”
Penungkunen kerna kuasa Jesus
(Mat 21:23-27; Luk 20:1-8)
27Jesus ras ajar-ajarNa mulihken ka ku Jerusalem. Sanga Jesus erdalan ibas kesain Rumah Pertoton, reh imam-imam si mbelin, guru-guru agama ras peminpin-peminpin Jahudi ndahi IA. 28Isungkunna Jesus nina, “Kuasa kai kin si lit ibas Kam erbahan si enda kerina? Ise mereken kuasa e man baNdu?”
29Erjabap Jesus man kalak ndai, “Kusungkun kam lebe, alu sada penungkunen saja, janah adi ijabapndu, Kukataken ka pe man bandu kuasa kai kin si lit ibas Aku erbahan si enda kerina. 30I ja nari rehna kuasa Johanes Peridiken maka ia mperidiken? I bas Dibata nari ntah ibas manusia nari? Jabap dage!”
31E maka sisungkun-sungkunen ia sapih-sapih ia nina, “Kuga ninta? Adi ninta, ‘I bas Dibata nari,’ kugapa pe nina, ‘Adi bage ngkai maka la kam tek Johanes Peridiken?’ 32Tapi adi ninta, ‘I bas manusia nari ...’ ” (Mbiar ia ngenehen jelma si nterem, sabap kerina kalak tek maka Johanes Peridiken e tuhu-tuhu sekalak nabi.) 33E maka erjabap ia man Jesus, “La ieteh kami.”
Nina Jesus man bana, “Aku pe la Kukataken man bandu alu kuasa kai kin Kubahan enda kerina.”
Batak Karo Bible © Indonesian Bible Society, 2003.