Luc Dingeninu
Dingeninu
Like asabange Sif. Asabange mu dibundu di digumi ne bebingitsi bebeye be Sesu, tumbe ayendange ne gilumbi gi musamu Nyambi, Pol, mu mivevilu mi andi, amwamusange mu gidyanzu gi andi. Like rende gwandi gisangumu gi Bidyanzu bi vagange bilumbi. Like ronde rende dikengi musamu wuboti negwambile mambu motsu me Sesu vagange. Like rende mambu mane gukyelu Sif ne batu be melongu menzusu, nonge bekuyabe re mambu me yawu belonzu mambu mengenze. Like yambile mbili mambu me girondu gi Sesu, neve arondile batu bakwesunzi, bagwengulu, begetu ne beni.
Gisangumu gigabilu nane:
Girini 1-2 Like gagwambili gukyelu duburu du Sambatisete ne du Sesu, bulengi bu Sesu. Agagwambili neve Mari, Sakari ne Simewu bedumisile dine di Nyambi ne nimbu. Mambu mane meserendu mu bisangumu binzusu.
Girini 3.1 - 4.13 Like galongi neve Sambatisete arugile gusetsonzige nzile yi Sesu, neve Sesu batisilu ne Sambatisete, neve Sate mumangile murime.
Girini 4.14 - 9.50 Like garigitsi di Sesu vage gu musyengi Galile. Gu yandi nenzile musamu Nyambi ne gubeluse bibedu.
Girini 9.51 - 19.28 Like garigitsi neve Sesu yusugile gu Galile ayende gu Serisalem. Gu girini gi gisangumu gigi, Like gagwambili mbili mambu meserendu mu bisangumu bifimbe birende (Matye, Marek ne San), ne mbili mambu me Sesu nenze, ne kugu mutu wuboti wu Samari, yi gikiti gisane pikile tsiboti ne kugu yi mwane wutsyemuge wukunde labene.
Girini 19.29 - 21.38 Like gagwambile mambu me Sesu vage gu Serisalem ne me yandi nenze gune.
Girini 22-23 Like gagwambili mukengu ne dufu du Sesu.
Girini 24 Sesu marambuge gu dufu, akwerigitse gu bebingitsi bandi, apande gu nzambi.
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES