'Olic 9
9
O Pikansiya to Mo^celay a Dmak no Kawas
O 'olic ni Tafiti. Mapatorod i kakridan no paradiway, o Patay no fa'inayan a wawa sanay a soni ko saparadiw. O no <<Mud-lapin>> a hacong ko saparadiw.
1 Tapangaw, sarocoden ako ko faloco' a pahmek i Tisowanan,
o papalosiyangen ako ko kafahka'an a dmak Iso a ma^min.
2O nano Miso ko sakalipahak ako a romadiw,
o Isatakaraway a Tapangaw, o papahmeken ako a romadiw ko nika tadamaan no ngangan Iso.
3Yo sadak sa Kiso i, tangsol a tararikol a milaliw ko 'ada ako,
tahafikod cangra a matolo' a ma^min a mapatay.
4Kiso o maro'ay i tadamaanay a kamaro'an a milahciay to mo^celay a pisawkit a Kawas,
pa'adingen kako, ta caay ka lasawad ko kacitodong ako.
5Kakteren Iso ko roma a finacadan,
tkopen Iso ko tatiihay a tamdaw,
padengen Iso ko ngangan nangra a tahada'oc.
6Awaayto ko 'ada ako,
matkopto Iso ko niyaro' nangra,
awaayto a maharateng cangra a ma^min.
7Nikawrira, mida'ocay ko pikowan no Tapang,
tanektek a tomireng ko tadamaanay a kamaro'an Ningra a misawkit.
8O mo^celay ko pikowan Ningra to hkal,
o malalenay ko pisawkit Ningra to kasafinawlan.
9O piki'adingan no masamsamay a tamdaw ko Tapang,
o piki'adingan haca no mapadesay a tamdaw Cingra.
10 Tapangaw, o pitadi'ecan no mafana'ay i Tisowanan Kiso,
nawhani caay pifalah Kiso to milongocay i Tisowanan.
11Pahmeken a romadiw koya mikowanay i Cion a Tapang.
Palosiyangen i kasakitakit ko dmak Ningra.
12O miharatengay ko Kawas to mapadesay a tamdaw,
caay pitawal Cingra to longoc nangra,
tfocen Ningra ko mikari'angay i cangraan.
13 Tapangaw, kaadayayenho kako.
Nengnengenho ko pikari'ang no mi'intelay i takowanan.
Tapangaw, pa'oripenho kako a paliyas nai patay,
14Ta ma^deng kako a tomireng i ka'ayaw no tamdamdaw no Yirusalim a
palosiyang i cangraan to nika hmek ako to polong no nga'ayay a dmak Iso.
Malipahak kako a pahmek to nano pipa'orip Iso i takowanan.
15Matfad ko roma a finacadan i nikarkaran nangra a rfong,
o talakal#9.15 talakal -- o roma i, tker, tilo. nangra i, cangra ko tahalakalay.
16Pakaynien no Tapang i nika mo^cel no pisawkit Ningra ko pipatalahkal to tireng Ningra,
saka, tahafikod a mapolin ko tatiihay a tamdaw to nano raraw nangra.
17O tatiihay ko dmak a tamdaw a ma^min,
o mana'ayay to Kawas a tamdaw i,
o tatayra a matfad i kaitiraan no mapatayay.
18O pakosiya a tamdaw i, caay ka tahada'oc a matawal,
o pafaloco'an no masamsamay i, caay ko mamalasawad.
19 Tapangaw, kalomowadto,
aka haydaen ko pi^pec no hkal a tamdaw i Tisowanan.
Nanay pasa'opoen Iso ko roma a finacadan i ka'ayaw Iso, sawkiten cangra.
20 Tapangaw, nanay patalawen Iso cangra,
pakafana'en cangra to nika o mamapatapatay aca a tamdaw cangra.
© The Bible Society in Taiwan, 2019