Yuuḥanna 4
4
YASUUV WA_L MARA MIN AS SAAMIRA
1Wa lamma_r Rabb virif al Farriisiyyiin simivu ’an Yasuuv bisawwi wa bivammid talaamiiz aktar min Yuuḥanna, 2mava ’innu Yasuuv nafsu maa kaan bivammid, laakin talaamiizu, 3hu xalla_l Yahuudiyya, wa masha kamaan le_j Jaliil. 4Wa kaan laazim yadxul fi_s Saamira. 5Wa waṣal le madiina min as Saamira isima Suuxaar, jamb as ziraava al addaaha Yavkuub le waladu Yuusif. 6Wa biir Yavkuub kaanat hinaak. Wa lamma Yasuuv kaan tavbaan min as safar, gavad jamb al biir. Wa kaan as saava iṭnaashar tagriiban.
7Wa mara min as Saamira jaat vashaan tashiil mooya. Wa Yasuuv gaal leeha, “Addiini mooya vashaan ashrab.” 8Vashaan at talaamiiz kaanu mashu le_l madiina yashtaru akil. 9Wa_l mara_s Saamiriyya gaalat leehu, “Keef taṭlub minni vashaan tashrab? wa inta Yahuudi, wa ana mara Saamiriyya?” Vashaan al Yahuud maa kaanu yajtamivu mava_s Saamiriyyiin. 10Yasuuv gaal leeha, “Inti iza kunti tavrifi hadiyyat Allaah, wa minu huwa al biguul leeki, Addiini vashaan ashrab, kunti ṭalabti minnu, wa hu kaan addaaki mooya ḥaiya.” 11Wa_l mara gaalat leehu, “Yaa Saiyid, maa vindak jardal, wa_l biir ghariiga. Min ween vindak al mooya al ḥaiya? 12Inta akbar min abuuna Yavkuub al addaana_l biir di, wa shirib minnaha, huwa wa awlaadu, wa_l bahaayim bitaavtu?” 13Yasuuv radda wa gaal leeha, “Kull al bishrab min al mooya di biyavṭash taani. 14Laakin al bishrab min al mooya_l ana addiiha leehu, maa biyavṭash taani abadan. Vashaan al mooya al ana baddiiha leehu, bitabga fiihu veen mooya yaṭlav le_l ḥayaat al abadiyya.” 15Al mara gaalat leehu, “Yaa Saiyid, addiini_l mooya di, vashaan maa bavṭash, wa maa baji bashiil mooya min hina.”
16Yasuuv gaal leeha, “Amshi wa naadi raajlik, wa tavaali hina.” 17Al mara gaalat leehu, “Maa vindi raajil.” Yasuuv gaal leeha, “Be_l ḥagg, gulti, Maa vindi raajil. 18Vashaan kaan vindik xamsa rujaal, wa_r raajil al mavaaki hassav, maa raajlik. Fi da gulti_l ḥagg.” 19Al mara gaalat leehu, “Yaa Saiyid, ana shaayifa ’innak nabi. 20Abahaatna vabadu fi_j jabal da, wa intu taguulu ’innu fi Uurushaliim al maḥall al laazim yavbudu fiihu.” 21Yasuuv gaal leeha, “Yaa sitt, ṣaddigiini, taji as saava, al maa fi_j jabal da walla fi Uurushaliim yavbudu_l Abu. 22Intu bitavbudu al maa bitavrifuuhu. Niḥna navbud al binavrifu, vashaan al xalaaṣ min al Yahuud. 23Laakin as saava taji wa hiya hassav, lamma_l vaabidiin be_l ḥagg yavbudu_l Abu be_r ruuḥ wa_l ḥagg. Vashaan al Abu biṭlub zei deel vashaan yavbuduuhu. 24Allaah huwa ruuḥ, wa_l yavbuduuhu laazim yavbuduuhu be_r ruuḥ wa_l ḥagg.” 25Al mara gaalat leehu, “Ana vaarfa ’innu Masiyya jaai, huwa_l bisammuuhu_l Masiiḥ. Wa lamma biji, biwarriina kullu shi.” 26Yasuuv gaal leeha, “Ana al batkallam mavaaki huwa.”
27Wa fi_l wakit da, talaamiizu jo. Wa kaanu bistaghrabu ’innu bitkallam mava mara. Laakin walla waaḥid minnahum gaal, “Inta daayir shinu?” walla, “Le shinu inta titkallam mava_l mara di?” 28Wa_l mara xallat burmat al mooya ḥaggata, wa mashat le _l madiina, wa gaalat le_n naas, 29“Tavaalu, shuufu zool gaal leiya kull al vamaltu muddat ḥayaati. Yimkin da yakuun al Masiiḥ?” 30Wa ṭalavu min al madiina, wa jo leehu.
31Wa fi_l wakit da, at talaamiiz gaalu leehu, “Yaa Muvallim, guum, ukul.” 32Wa gaal leehum, “Ana vindi akl vashaan aaklu, wa intu maa bitavrifuuhu.” 33Wa_t talaamiiz gaalu bavḍahum le bavḍ, “Yimkin zool jaab leehu shi vashaan yaaklu.” 34Yasuuv gaal leehum, “Al akl bitaavi huwa ’an avmil iraadat ar rassalni, wa akammil vamalu. 35Intu taguulu, Bavd arbava shuhuur, al ḥaṣaad yaji. Laakin ana baguul leekum, Arfavu vuyuunkum, wa shuufu_z ziraavaat jaahza vashaan yalimmuuha. 36Wa_l bilimm ad dura yaaxud ujratu, wa yalimm dura le_l ḥayaat al abadiyya. Vashaan kida, al muzaariv wa_l bilimm ad dura yafraḥu sawa. 37Vashaan kida, al kalaam al biguul, Waaḥid yazrav, wa taani yalimm, huwa al ḥagg. 38Ana rassaltakum vashaan talimmu_l maa tivibtu fiihu. Naas taanyiin tivibu, wa intu daxaltu fi tavbum.”
NAAS KUTAAR MIN AS SAAMIRA YA’AAMINU
39Wa Saamiriyyiin katiiriin min al madiina di aamanu beehu be sabab kalaam al mara al kaanat bitash‐had, “Hu gaal leiya kull al vamaltu.” 40Wa naas as Saamira, lamma jo leehu, sa’aloohu vashaan yagvud mavaahum. Wa gavad hinaak yoomeen. 41Wa naas kutaar xaaliṣ aamanu beehu be sabab kalaamu. 42Wa gaalu le_l mara, “Bavd da niḥna maa aamanna valashaan al kalaam bitaavik bass, laakin vashaan niḥna be zaatna simivna, wa virifna ’innu da huwa be_l ḥagiiga_l Masiiḥ, Muxalliṣ ad dunya.”
SHIFA WALAD MUWAẒẒAF AL MALIK
43Wa bavd al yoomeen, marag min hinaak, wa masha le_j Jaliil. 44Vashaan Yasuuv nafsu shihid ’innu nabi maa vindu iḥtiraam fi waṭanu. 45Wa lamma wiṣil le_j Jaliil, naas aj Jaliil gibloohu, vashaan hum kaanu shaafu kull al vamalu fi Uurushaliim fi_l viid. Vashaan hum kamaan mashu le_l viid.
46Vashaan kida, Yasuuv ja marra taanya le Gaana_j Jaliil, al makaan al ghayyar fiihu_l mooya le_l xamr. Wa kaan fih muwaẓẓaf al malik, fi Kafranaaḥuum. Wa waladu kaan vaiyaan. 47Wa lamma simiv Yasuuv ja min al Yahuudiyya le_j Jaliil, hu masha leehu, wa sa’alu ’an yanzil wa yashfi waladu al kaan gariib min al moot. 48Wa Yasuuv gaal leehu, “Intu maa bit’aaminu abadan iza maa tashuufu valaamaat wa vajaayib.” 49Wa muwaẓẓaf al malik gaal leehu, “Yaa Saiyid, anzil gubbaal maa waladi yamuut.” 50Yasuuv gaal leehu, “Amshi. Waladak ḥai.” Wa_r raajil aaman be_l kilma al gaal leehu Yasuuv, wa masha. 51Wa lamma kaan naazil, xaddaamiinu gaabaloohu wa kallamoohu, “Waladak ḥai.” 52Wa sa’alum van as saava al walad ibtada yakuun aḥsan. Wa gaalu leehu, “Umbaariḥ fi_s saava waaḥda, al ḥumma xallatu.” 53Wa_l abu virif da ḥaṣal fi nafs as saava al fiiha Yasuuv gaal leehu, “Waladak ḥai.” Wa huwa aaman, wa kullu ahl beetu. 54Wa di kamaan al valaama_t taanya al vamala Yasuuv, lamma ja min al Yahuudiyya le_j Jaliil.
Published by Bible Alliance Mission in 1978, now part of SIM - Serving in Mission.