Nugana 7
7
‘UPWA 7.
1Ta Ieoba Noa ‘ena ‘i ona, ‘Oio ta ‘imu susu maibo‘ana waga ‘ena wa da mai; ‘oio ia ‘itemu ta ‘enega ‘imu bubuna ‘i paruparuna epata tomota gete ‘ena mataguia. 2Bomitawa ‘esasena ‘e bweuna ‘e bweuna ‘enega ‘e sebeni ta ‘e sebeni ‘u da ‘ewa ‘emuia, me‘olotona ta ‘ina waine; ta bomitawa nigea‘esasena ‘ediega ‘e rua, me‘olotona ta ‘ina waine; 3wate mwatui manuidi, ‘e sebeni ta ‘e sebeni, me‘olotona ta mewainena: be ‘enega bare‘u maibo‘ana matanaia tubudiao si da bobo‘ana. 4Asiata ‘e sebeni si miami ta ‘enega, ga ‘usana ia da giedau bare‘uia asiata ‘e poti ta guguioi ‘e poti; ta iage maiawasidi iauna ni‘atu ia bubudi bwa‘a matanega ia da loesaooridi. 5Ta Noa ‘i guinua nadigega iage iauiauna Ieoba ‘i loina‘ena ‘enaia.
6Ta Noa ‘ana tuta iakwara ‘e sikisi anaredi ‘ena boasi murua bare‘uia ‘i miami. 7Ta Noa ‘i rugu, ta natunao me‘olotodi, ta mwanena, ta natunao mwanediao ma‘enao, waga ‘ena, murua ‘ina boasi manuna. 8Bomitawa ‘esasena ‘ediega, ta bomitawa nigea ‘esasena ‘ediega, ta manua ‘ediega, ta iage iauna bwa‘a ‘ena si lookawara ‘ediega, 9‘e rua ta ‘e rua Noa ‘ena si rugu waga ‘enaia, me‘olotona ta mewainena, na‘ieana Eaubada Noa ‘ena ‘i onaona. 10Ta gete ‘i apwesa asiata ‘e sebeni si gumwara, murua ‘ina boasi bare‘uia ‘i miami. 11Noa iawasina ‘ana iakwara ‘e sikisi anaredi nina, nawarae ‘e ruena, nawarae nina ‘ana asiata ‘e sebenitini nina, asiata tauna ‘enega ni‘u sinabwana ‘ana wewerupwa iauiauna si apwaapwaiama, ta garewa ‘ana ‘awa si egegena. 12Ta i ‘usa‘usanama bare‘uia asiata ‘e poti ta guguioi ‘e poti. 13Asiata tauna ‘enega Noa ‘i rugu, Sema ta, Ama ta, Iapeta ta, Noa natunao me‘olotodi, Noa mwanena ta, natunao mwanediao ‘e toi ma‘ediao ta, waga ‘enaia; 14taudi, ta bomitawa iauna adelina nadigega, ta lagolagowa iauiauna adelidi nadigega, ta iage lookawaridi iauna bare‘uia si kawakawara adelidi nadigega, ta manua iauna adelina nadigega, ta manua iauna mapapedi iauna ‘enega. 15Ta Noa ‘ena si rugu waga ‘enaia, esio iauiauna ‘enega ‘e rua ta ‘e rua ‘ena iawasidi ‘i miami. 16Ta taudi si rugu, esio iauiauna ‘enega me‘olotona ta mewainena si rugu, na‘ieana Eaubada ‘ena ‘i onaona: ta Ieoba ‘i gibodena. 17Ta murua asiata ‘e poti bare‘uia ‘i miami; ta boasi ‘i sinabwa, ta waga ‘i doedoena, ta ‘i tu‘etu‘e bare‘u debanaia. 18Ta boasi si ewaiwai, ta si tu‘e sinabwana bare‘uia; ta waga boasi debanaia ‘i doedoe. 19Ta boasi si sinabwa toila bare‘uia; ta ‘oea kesoradi iauiaudi garewa maibo‘ana ‘agaraunaia si miamiana si esiwa uiosina. 20Kubita e pipitini ni‘u ‘i sinabwa tu‘e; ga ‘oea si ‘e ni‘utaona. 21Ta esio iauiauna bare‘uia ‘i loniu ‘i elomwawasa, manua ta, lagolagowa ta, bomitawa ta, iage lookawaridi iauna bare‘uia si kawakawaraia be, tai iauna ta: 22iauiaudi ubusudi ‘edia iawasidi iaruiaruana ‘i miamiana, iauiaudi bwa‘a iadaiadana ‘ena si miamiana ‘ediega, si ‘elomwawasa. 23Ta iage maiawasina iauna bwa‘a matanaia ‘i miamiana ‘i loesaooridi, tai be, lagolagowa be, iage kawakawaridi be, garewa ‘ina manua be; ga si saoora bare‘uiega: ta Noa tebweuna ‘i tupwa, ta taudi ma‘enao wagaia si miamiana. 24Ta boasi si ewaiwai bare‘uia asiata ‘e wani anaredi ta pipiti.
Published by the British and Foreign Bible Society in 1919