Mathew 26
26
1Naŋ me ge tamaike, i Jesus me vava paso o vavae ŋaŋ iloke, wa me vet munra tiŋqoro anana wa, 2Kamiu we gilala si o qoŋ nirua ti o rowolagau we wesu ma, wa te ukeg vano i Nat tanun si a woso teterpania. 3Paso nan ira oloolo liwoa, wa ira vatvatogo, wa ira tamtamaragai tamaira sul, me gogorag tuwale ilo masao iman i moe oloolo, we logia si i Kaiaphas, 4wa neira me nit sara tuwale naliŋara si neira taur i Jesus mun o galeva, wa we ge mateia; 5pa neira me vet si, Nipea alo lakalaka, nan o sul wa matikotiko wun apena.
6Naŋ alo i Jesus we toga a Bethania alo iman i Simon, i resresmavin, 7o tavine we mule ma suria mun o lasa o matevat o urai o tur gene tun alolona, wa ni me liŋ avune qatuna we pute siwo. 8Pa ira tiŋqoro anana me ilo, wa nalolora we anuanu apena; naŋ neira wa, Apesa we ge vanameag tamaike? 9Ape me wol reag lai o ike mun o som we qoqo, wa me la lai munra masara. 10Nava i Jesus me lolomaran apena, we vet muneira wa, Ape sava kam we vavagaile ro gene iloke? ape ni me gagapalag o gene we wia mun nau. 11Ape ra masara we toga vagae amen kamiu, pa inau na gate toga vagae amen kamiu. 12Wa ineia, alo ni me liŋ o urai iloke avune tarapek, me ge ape we salo nau alo qaraŋ tamate. 13We nun nau we vava mun ikamiu wa, Te maŋasag valvanua o lea we wia iloke alo marama nol, pa te kakakae ape gene iloke o tavine iloke me ge nake aia, mun namauluna.
14Paso nan i tuwale nanra numei nirua, we logia si i Judas Iskariot, me mule sur ira oloolo liwoa, 15we vet wa, Kamiu we maros we la ma o sava munau, wa na te ukeg vano ineia mun kamiu? Wa neira me tia munia o som o silver saŋavul tol. 16Wa nan o ine nane ni me sike o tanoi we wia sin maniriŋia.
17Naŋ alo qoŋ tuwale ape bread vatuga ira tiŋqoro me mule ma sur i Jesus, we varusia wa, Ko we maros kamam a ge taurmate muniko avea si ko te gana o rowolagau aia? 18Naŋ neia wa, Tur mule ilo laqlaqevanua mun i gene, wa tur vava munia wa si, I Vatogo we vet si, Naqoŋik me rasu ma; na we gagapalag o rowolagau alo imama, ikamam ira tiŋqoro anak. 19Naŋ ira tiŋqoro me ge tama i Jesus me vatraŋira ti apena; wa neira me wurvag taurmate o rowolagau. 20Naŋ me ravrav veta, wa ni we pute siwo tara o numei nirua; 21wa alo neira we ganagana, ni me vet wa, We nun nau we vava mun kamiu wa, si i tuwale tamen kamiu te maniriŋ inau. 22Wa nalolora me wono aneane, wa neira we qeteg varus tuwatuwale neia wa si, Inau, Lord? 23Pa ni me valuira, we vet wa, I gene kara we tuk tuwale ilo tapera, i gene ilone te maniriŋ inau. 24I Nat tanun te vanreag, tama me rave veta ti ape neia; nava magarosa o tanun ilone, amona te maniriŋ i Nat tanun! we wia ras munia si o tanun ilone gate wota ma. 25Naŋ i Judas i gene we maniriŋia me valuia, we vet wa, Inau, Rabi? Ti vet munia wa, Ko me vava. 26Naŋ alo neira we ganagana, i Jesus me taur o bread, wa me wievavae paso, we tuqe wora, we tirag munra tiŋqoro, ti vet wa, Taur, gana, iloke naturiak. 27Wa ni me taur o lasa, wa me wievavae, qara la at muneira, ti vet wa, Tur ima nol alo iloke, 28ape iloke nanarak tape vatavata we garaqa, we ge sale ape tanun tar si a ulsavrag o pugai ŋaŋ. 29Wa na we vava mun kamiu si, nan ilokenake na tete ima mulaŋ o lig wo vine, gai niŋa o qoŋ ilone na te ima we garaqa amen kamiu alo marana non Tamak. 30Naŋ me sur paso o as neira me rowolue i tauwe Olivet.
31Naŋ alo ine i Jesus ti vet muneira wa, Kamiu nol te tutuag ape nau qarig alo qoŋ; ape me rave veta si, Na te vus i altag goro sheep, wa o sheep talo vavtigiu te salsaleŋa apena. 32Pa nau me tavaraka kel paso nau qara tira moai kamiu i Galilea. 33Nava i Peter me valuia we vet munia wa, Pa si neira nol qe tutuag apeniko, wa nau tete tutuag ilo mok. 34I Jesus me vava munia wa, We nun na we vava muniko, si alo qoŋ nake iloke, o toa gate kokorako tiqa, ko te tala inau vagatol. 35I Peter we vet munia wa, Pa si tamok si na mate ran amaiko, na tete tala ilo iniko. Wa ira tiŋqoro nol me vava mulaŋ tamaine.
36Paso nan i Jesus, wa iragai amaia, we niŋa o vatine we log a Gethsemane, wa we vet munra tiŋqoro anana wa, Tur pute siwo iake, nau we mule we tataro iane. 37Naŋ ni me lav sea i Peter ratol rananatun Sebede pulrua, wa nalolona me wono raka wa me qisaŋia. 38Naŋ alo ilone ti vet mun ratol wa, Nalolok we wono aneane si a mate; tol toga galtag iake, wa tol mamata amen nau. 39Naŋ ti tira taso pa gate asau nan ratol, ti suragia ape nagona, ti tataro, ti vava wa si, Mama, sin qe lai o lasa iloke ni rowo reag nan nau; nava nipea tama nau we maros, nava tama ko we maros.
40Naŋ ti kel ma sur ra tiŋqoro, we ilo suar ratol we matur, wa ti vet mun Peter wa, Pa kamtol tamaike gate mamata lai amen nau o masao qoŋ tuwale? 41Tol mamata, wa tol tataro; kamtol wa mule pata ilo meregale. We nun o tinegaro alo atai, nava o visogoi we mageregere. 42Naŋ vagaruei mulaŋ ni me van at, wa me tataro, we vet wa, Mama, o lasa iloke ta tete rowo reag lai nan nau, si na qe tete ima, nom o maros ni lai. 43Naŋ ti kel ma mulaŋ, ti ilo suar ratol we matur; ape namataratol we mava. 44Naŋ ti toavtag mulaŋ ratol, ti vanreag, ti tataro vagatoliu, ti vava mulaŋ o vavae tuwale ilone. 45Paso nan ti kel sur ra tiŋqoro anana, ti vet munratol wa, Tol matur ilokenake, tol mapsag kamtol; ilo, o masao qoŋ me susurut ma, wa we maniriŋ i Nat tanun ilo panera ganganor. 46Tavaraka, nina mule; ilo, i gene we maniriŋ nau me susurut ma.
47Naŋ alo ni qale vava, ilo, i Judas, i tuwale nanra numei nirua, we susurut ma, wa o sul we qoqo amaia, mun o gasal wa o kere ŋaŋ, nanra oloolo liwoa tara tamaragai tamaira o sul. 48Naŋ i gene we maniriŋia me la veta o vaglala muneira, we vet si, I gene na qe nimnimia, ineia gina, tur taur varagetia. 49Wa gaplot ni me niŋa sur i Jesus we vet wa, We wia, Rabi; wa we nimnimia. 50Naŋ i Jesus me vet munia wa, Pulsala, ka ge tama ko me van ma apena. Paso nan neira me niŋa ma me map napanera avunan Jesus, we taur varagetia. 51Wa ilo, i tuwale nan ragai amen Jesus me kaka napanena, me naŋa lue non o gasal, me vus o rowrowovag anan i moe oloolo, me pura savrag naqorona. 52Pa i Jesus me vet munia wa, Saromag kel nom o gasal ilo tanona; apen rasei nol we taur o gasal te matevag o gasal. 53Sa si ko we nonom si na gate mana we paere lai mun i Tamak, wa ni te vatraŋ tuan ma o angel we qoqo sal legion saŋavul tuwale o numei nirua? 54Pa si ta tamaine, te ge tira gasei nia o raverave ŋaŋ, wa si tamaike ran? 55Naŋ alo masao qoŋ ilone i Jesus me vava mun o sul wa, Kam me rowolue ma tama goro o vus pal mun o gasal wa o kere ŋaŋ si a taur inau? Valqoŋ na me putepute ti we vatvatogo alo vatine we roŋo, wa kamiu gate taur varaget inau. 56Nava me ge nol o ike o manigiu si a ge tira ran o raverave ŋaŋ mora prophet. Paso nan ira tiŋqoro nol me rowo vitagia me totoa.
57Naŋ iragai me taur varaget i Jesus ti, me vanogagia ilo iman Kaiaphas i moe oloolo, ira vatvatogo tara tamaragai me vug veta ti aia. 58Nava i Peter me tataga neia ti aras gai niŋa namasao iman i moe oloolo; naŋ ni me kalo pata ilolona we pute siwo amaira gagapalag sin ilo o ulusui. 59Naŋ ira oloolo liwoa, tara tamaragai, wa o vavtig veveg nol, me sikesike o tila galegale goro i Jesus, si neira a ge mateia; 60nava gate ilo suar; pa we qoqo me mule ma we gaganag galegale apena. Paso nan pulrua me mule ma a tagir we gaganag wa si, 61I gene iloke me vava si, Nau we mana si a sese savrag o ima we roŋo non God, wa si a tape kel alo qoŋ nitol. 62Naŋ i moe oloolo ti tavaraka ti vava munia wa, Ko gate valui goro ilo? o sava iloke iragai iake we tila iniko apena? 63Pa i Jesus me taqa roroŋo. Naŋ i moe oloolo ti vet munia wa, Na we log nasasan God i esu muniko si ka gaganag mun kamam, si iniko i Christ Natun God. 64I Jesus me vet munia wa, Ko me vava. Panava na we vet muniko si, Aŋaisa kamiu te ilo momiu i Nat tanun we pute ape matua we mana, wa we siwo ma vawo maligo ŋaŋ tavunana. 65Naŋ alo ine, i moe oloolo me gape sare non o siopa, we vet si, Ni me liŋasapur veta God, nina we maros apesava mulaŋ ira gaganag we tira? ilo, kamiu me roŋotag momiu ilokenake non o vavae we liŋasapur God. 66Kamiu we nonom o sava? Naŋ neira me valuia we vava wa, We tira munia ape matea. 67Paso nan neira me anus goro nagona, me wosawosa neia; wa o tuarasei me towosia, 68we vava wa, Ka ligog mun kamam, i Christ, isei i gene me vusiko?
69Pa i Peter we putepute asau alo masao ima, wa o malamala tuwale we mule ma suria, we vava si, Iniko mulaŋ me toga amen i Jesus ta Galilea. 70Naŋ ni me tala ape nagora nol, ti vet wa, Na gate gilala o sava ko we vava. 71Naŋ ni me rowolue ape malmaluima, wa o tuara tavine me iloa, we vet munragai aia wa si, I gene iloke mulaŋ me toga amen i Jesus ta Nasaret. 72Wa ni me tala mulaŋ, me log nasasan God apena, wa si, Nau gate gilala o tanun iloke. 73Naŋ galewora iragai we tiratira me mule ma we vet mun Peter wa, Pa we nun iniko mulaŋ i tuwale nan neira, ape nom o gatogato we gaganag lueko. 74Naŋ alo ine ni me vivnag raka me vava vagogonag wa si, Na gate gilala o tanun iloke. Wa gaplot o toa ti kokorako. 75Wa i Peter qara lolomaran kel ape vavae amon Jesus me vet ti munia, wa si, O toa gate kokorako tiqa, ko te tala inau vagatol; wa ti sere lue ivarea ti taŋ areare.
New Testament was published by the British and Foreign Bible Society in 1931.