Mathew 14
14
1Naŋ alo qoŋ ŋaŋ ilone i Herod i tetrark me roŋotag naroron Jesus. 2Wa me vet munra rowrowovag anana wa, Iloke i John i Vasugroŋo; ni me tavaraka ma nanra mate, wa o manigiu o ine o vasasa ŋaŋ iloke we gege alo ineia. 3Apen i Herod me takul veta i John, wa me rotia, wa me mapua ilo ima rotrot; wa o manigiu apena i Herodias rasoan i Philip i tasina. 4Apen i John me vet ti munia si, Gate tira ape lea si ka lavia. 5Pa ni me maros we ge mateia, pa we gogolo o sul, ape neira we nonom mora si neia o prophet. 6Wa o qoŋ me wesu i Herod me wota alolona, wa natun i Herodias iloke o tavine me lakalaka alo vatitnara, wa nalolon i Herod me wia munia apena. 7Naŋ alo ine ni me vava vagogonag, we vatavata munia sin la munia o sava tea ni ta paere lai apena. 8Wa ineia iloke, amon i ravevena me vasuratia ti apena, qara vet wa, Le ma iake alo tapera naqatun i John i Vasugroŋo. 9Pa i maranaga me lolowono; nava ape non o vava vatavata, wa apen ragai we putepute tuwale ape ganagana amaia, ni me vatraŋ si a le munia. 10Wa ni qara suware at, me ge sal mot naqatun John alo ima rotrot. 11Wa me tak ma naqatuna alo tapera, wa me la mun o malamala; naŋ ni me vantak at sur i ravevena. 12Pa ra tiŋqoro ŋaŋ anana me mule ma, me taur kalo natamatena, qara tavigia; naŋ neira me mule we gaganag mun i Jesus.
13Naŋ i Jesus me roŋotag apena, pa ni me toavtag o vatine alo aka ilo vanua vanameag asau; wa o sul me roŋotag apena, wa me tataga neia mun o raŋoi nan o laqlaqe vanua ŋaŋ. 14Naŋ i Jesus me rowolue ma me ilo o sul liwoa, wa me lolo magarosa ineira, me ge esura we mageregere amaira. 15Wa me malurav veta ma, wa ira tiŋqoro anana me mule ma suria, we vet wa, O vanua vanameag nake, wa o masao maran me paso veta; si ka vatoav reag o sul, si neira a mule ilo vutre vanua ŋaŋ si a wol gara sinaga. 16Nava i Jesus me vet muneira wa, O manigiu tagai apena si neira a totoa; tur la nagara si a ganagana. 17Naŋ neira munia wa, I tagai ran amen kamam iake, nava o bread tavelima, wa o iga nirua. 18Naŋ neia wa, Le ma sur nau ilo vatike. 19Paso nan ni me vareg mun o sul si neira pute siwo alo valis; wa ni me taur o bread tavelima wa o iga nirua, ti ate laŋ kalo ivunana, ti wievavae; wa ni me tuqe wora, me la o bread mun ra tiŋqoro, wa ra tiŋqoro mun o sul. 20Naŋ neira me ganagana nol, wa me toqo. Wa me sogon kalo o garate sinaga me tuqe ti, o gete saŋavul tuwale o numei nirua me ura gese. 21Pa iragai me gana, tama tar vagatavelima, o rereata, gate vasogo o retavine wa o nanatmera ŋaŋ.
22Naŋ gaplot ni me ge ira tiŋqoro si neira rap kalo vawo aka, wa si a sua levegao moai neia i tavala qilo, ni gai vatoav reag mona o sul. 23Pa ni me vatoav paso o sul, ni qara vara kalo i vawo tauwe alo pupuel sin tataro. Naŋ me ravrav veta, wa ineia magesena aia. 24Nava o aka alo tine qilo veta, me magarugaru ape rep; ape laŋ me qalo gorora. 25Naŋ alo masao mamamata o vavatiu ni me mule sur neira, we varavara avune qilo. 26Wa ira tiŋqoro me iloa we varavara avune qilo, natoqara me vile ris apena, wa neira me vet wa si o roŋo; wa we awoawo ape gogogolo. 27Pa i Jesus me vava gaplot muneira, we vet wa, Tur sov naapemiu, inau ran, turpea gogolo. 28Naŋ i Peter me valuia we vet wa, Lord, si qe iniko ran, ka vareg nau si na mule at suriko avune pei. 29Naŋ neia wa, Ka mule ma. Wa i Peter me siwo nan o aka, we varavara avune pei, si a mule sur Jesus. 30Nava ni me ilo o laŋ si we poa, wa we gogolo, wa we tul raka, we awoawo, we vet wa, Lord, ka vaesu inau. 31Naŋ gaplot i Jesus ti kaka napanena, ti takulia, ti vava munia wa, I nomqerqeret, ko me lolovaruarua ape sava? 32Wa rara me vega kalo ilo aka, o laŋ qara saw mot. 33Naŋ iragai me toga ti alo aka me vatieqau goroa, we vet wa, We nun iniko Natun God.
34Paso nan neira me levegao me niŋa o vanua a Genesaret. 35Wa o tanun ŋaŋ talo vanua ilone we gilala ineia, we vatraŋ nasalara ilo valvanua wawaliog ilone, we tak ma suria irasei nol we gopa, 36we paere munia si neira a taŋo vires ape non o golgolo siopa; wa irasei me taŋo mora lai, me vaesura nol apena.
New Testament was published by the British and Foreign Bible Society in 1931.