IIMU/UUNGW 5
5
Tlahhoó Adam
(1Qom 1:1-4)
1Gaarí an umér xwaylár Adam. Baldá' Mungú hee nguwa tleéhh, guna tleéhh ar slaqsoó Mungú. 2Hhawaata nee /ameeni gina tleéhh, giri tsuúq. Baldá' ngiwa tleéhh giri báy, «Muu». 3Adam kureeraá tsiiru nee mibeeri tám gina ala hoót, na/aay guri laqwaál oo slaqsaywós, nee oo adoorós, umuuwós guri báy Seti. 4Kureeraá Adam aa hoót alaá Seti nguwa laqwaál a tsiire dakaát. Na/aá hatlá' gina laqwaál awa daaqaay nee awa dasuwo. 5Kureeraá Adam aa hoót a tsiire gwaleél nee mibeeraá tám, inós iri gwaá'.
6Seti kureeraá tsiiruú wák nee kooán ngiwa hoót, Enoshi guri laqwaál. 7Seti alaá Enoshi nguwa laqwaál, kureeri nga hoót a tsiire dakaát nee faanqw, na/ii gina laqwaál awa daaqaay nee awa dasuwo. 8Deelo sleémeero ar Seti aa hoót a kureeri tsiire gwaleél nee mibaá nee tsár, iri gwaá'.
9Enoshi kureeraá mibeeri gwaleél ngiwa hoót, Kenani guri laqwaál. 10Enoshi alaá Kenani nguwa laqwaál, kureeri nga hoót a tsiire dakaát nee mibaá nee kooán, na/ii gina laqwaál awa daaqaay nee awa dasuwo. 11Adoorihe deelo sleémeero ar Enoshi aa hoót, a kureeri tsiire gwaleél nee kooán, iri gwaá'.
12Kenani kureeraá mibeeri faanqw ngiwa hoót, Mahalaleli guri laqwaál. 13Kenani alaá Mahalaleli nguwa laqwaál, kureeraá aa hoót, a tsiire dakaát nee mibeeri tsiyáhh, na/ii giri laqwaál awa daaqaay nee awa dasuwo. 14Adoorihe deelo sleémeero ar Kenani aa hoót a kureeri tsiire gwaleél nee mibaangw, iri gwaá'.
15Mahalaleli kureeraá mibeeri lahhoó' nee kooán ngiwa hoót, Yaredi guri laqwaál. 16Mahalaleli alaá Yaredi nguwa laqwaál, kureeraá aa hoót, a tsiire dakaát nee mibeeri tám, na/ii giri laqwaál awa daaqaay nee awa dasuwo. 17Adoorihe deelo sleémeero ar Mahalaleli aa hoót, a kureeri tsiire dakaát nee mibeeri gwaleél nee kooán, iri gwaá'.
18Yaredi kureeraá tsiiru nee mibeeraá lahhoó' nee tsár ngiwa hoót, Enoki guri laqwaál. 19Yaredi alaá Enoki nguwa laqwaál, kureeraá aa hoót a tsiire dakaát, na/ii giri laqwaál awa daaqaay nee awa dasuwo. 20Adoorihe deelo sleémeero ar Yaredi aa hoót a kureeri tsiire gwaleél nee mibeeri lahhoó' nee tsár, iri gwaá'.
21Enoki kureeraá mibeeri lahhoó' nee kooán ngiwa hoót, Metusela guri laqwaál. 22Enoki nee Mungú tana aldinku'uús baraá hotaawose. Alaá Metusela nguwa laqwaál, kureeraá aa hoót a tsiire tám, na/ii giri laqwaál awa daaqaay nee awa dasuwo. 23Adoorihe deelo sleémeero ar Enoki aa hoót a kureeri tsiire tám nee mibeeri lahhoó' nee kooán. 24Enoki nee Mungú tana aldinku'uús baraá hotaawose, aluuwo iri ilaá wa qwaár, asma kuna ar tláy nee Mungú.
25Metusela kureeraá tsiiru nee mibeeri dakaát nee faanqw gina hoót, Lameki guri laqwaál. 26Metusela alaá Lameki nguwa laqwaál, kureeraá aa hoót a tsiire faanqw nee mibeeri dakaát nee tsár, na/ii giri laqwaál awa daaqaay nee awa dasuwo. 27Adoorihe deelo sleémeero ar Metusela aa hoót, a kureeri tsiire gwaleél nee mibeeri lahhoó' nee gwaleél, iri gwaá'.
28Lameki kureeriiwós tawa tsiiru nee mibeeri dakaát nee tsár, garma guri laqwaál. 29Guri umií tsaát, guri báy Noa, iri oó', «Kwí an kudá' atén ti gurkwa/ás baraá slahh'amkú gadiyér gawide, qoomár yaamuká' kiwa dooslaan, awa taa lu'ús nee Aako.» 30Lameki alaá Noa nguwa laqwaál kureeraá aa hoót a tsiire kooán nee mibeeri gwaleél nee kooán. 31Adoorihe deelo sleémeero ar Lameki aa hoót a kureeri tsiire faanqw nee mibeeri faanqw nee faanqw, iri gwaá'.
32Noa kureeriiwós tawa tsiire kooán, inós Shemu nee Hamu nee Yafeti gina laqwaál.
The Bible in Iraqw © Bible Society of Tanzania, 2004.