যোহন 9
9
কানা মানুচ্চো চোগেদি দেগিলো
1পধেদি যেবার্ অক্তত্ যীশু এক্কো কানা মান্জ্যরে দেগিলো। তে জর্মত্তুন্ ধুরি কানা এলঅ। 2সেক্কে শিচ্চ্যগুনে যীশুরে পুযোর্ গুরিলাক্, “মাষ্টরবাবু, কার্ পাপে এ মানুচ্চো কানা ওইনে জোর্মেয়্যে? তার নিজোর্, না তা মা-বাবর্?”
3যীশু জোব্ দিলো, “পাপ তে নিজেয়ো ন-গরে, তা মা-বাবেয়ো ন-গরে। ইয়েন্ ওইয়্যে যেন গোজেনর্ কামানি তারে দিইনে ফগদাং অয়। 4যে মরে পাধেয়্যে, বেল্ থাগদে থাগদে তা কামানি গরানা আমার্ দরকার্। রেত্ এজের্, সেক্কে কেঅ কাম্ গুরি ন-পারিবাক্। 5যেদক্ দিন মুই পিত্থিমীত্ আঘং মুই জগদর্ পহ্র।”
6এ কধাগান্ কবার্ পরেদি যীশু মাদিত্ ছেপ্ ফেলেনে প্যাক্ বানেল। পরেদি সে প্যাক্কান্ তে মানুচ্চো চোগোত্ বাজেই দিইনে কলঅ, 7“যাহ্, শীলোহ পোর্বোত্ যেইনে ধোই ফেলা।” শীলোহ মানে দিপাধা অলঅ।
মানুচ্চো যেইনে চোগ্ ধোই ফেলেল আর চোগেদি দেগিনে ফিরি এলঅ। ইয়েন্ দেগিনে তা পাড়াল্ল্যেগুনে আর যিগুনে তারে আগে ভিক্ষ্যে মাগদে দেক্ক্যন্ সিগুনে বেক্কুনে কুয়ো ধুরিলাক্, 8“ইবে কি সে মানুচ্চো নয়, যে বৈই বৈই ভিক্ষ্যে গুরিদো?”
9কেঅ কেঅ কলাক্, “অয়, ইবে সেই মানুচ্চো।” আরঅ কেঅ কেঅ কলাক্, “যুনিয়ো দেগদে তা ধোক্ক্যেন্ তো তে নয়।”
মাত্তর্ মানুচ্চো নিজে কলঅ, “অয়, মুয়ই সেই মানুচ্চো।”
10তারা তারে কলাক্, “মাত্তর্ কেধোক্ক্যেন্ গুরি তঅ চোগ্কুন্ মেলি গেলঅ?”
11তে জোব্ দিলো, যীশু নাঙে সে মানুচ্চো প্যাক্ বানেইনে মঅ চোগ্কুনোত্ বাজেই দিলো, “শীলোহ পোর্বোত্ যেইনে ধোই ফেলা। মুই যেইনে ধলুং আর দেগিলুং।” 12সিগুনে তারে কলাক্, “সে মানুচ্চো কুধু?”
তে কলঅ, “মুই কোই ন-পারং।”
13যে মানুচ্চো কানা এলঅ মানুচ্চুনে তারে ফরীশীগুনো ইধু নেযেলাক্। 14যেদিন্ন্যে যীশু প্যাক্ বানেইনে তা চোগ্কুন্ মেলি দিয়্যে সে দিন্নো এলঅ জিরেবার্ দিন। 15ইয়েনত্তে তারে ফরীশীগুনেয়ো আরঅ পুযোর্ গুরিলাক্, “তুই কেধোক্ক্যেন্ গুরি দেগিলে?”
তে ফরীশীগুনোরে কলঅ, “তে মঅ চোগ্কুনো উগুরে প্যাক্ বাজেই দিলো, আর মুই সিয়েন্ ধলে দেগিলুং।”
16সেক্কে ফরীশীগুনোত্তুন্ কয়েকজনে কলাক্, “সে মানুচ্চো গোজেনত্তুন্ ন-এজে, কিয়া তে জিরেবার্ দিন ন-পালায়।”
অন্য ফরীশীগুনে কলাক্, “যে মানুচ্চো পাপী তে কেধোক্ক্যেন্ গুরি এবাবোত্যে আমক্ অইদে কাম্ গুরি পারে?” এবাবোত্যেগুরি তারা ভিদিরে কধার্ অমিল্ দেগা দিলো।
17সেক্কে তারা সে মানুচ্চোরে আরঅ পুযোর্ গুরিলাক্, “তুই তা পৌইদ্যেনে কি কচ্? কিয়া তে দঅ তঅ চোগ্কুন্ মিলি দিয়্যে।”
মানুচ্চো কলঅ, “তে এক্কো ভাববাদী।” 18মাত্তর্ যিহূদী নেতাগুনে মানুচ্চোর্ মা-বাবরে ডাগিনে পুযোর্ ন-গরানা সং বিশ্বেজ্ ন-গুরিলাক্, সে মানুচ্চো আগেদি কানা এলঅ আর ইক্কিনে দেগের্। 19তারা মানুচ্চোর্ মা-বাবরে পুযোর্ গুরিলাক্, “ইবে কি তমার্ সেই পুয়োবো যিবে পৌইদ্যেনে তুমি কঅ যে, তে কানা ওইনে জোর্মেয়্যে? ইক্কিনে সালে তে কেধোক্ক্যেন্ গুরি দেগের্?”
20তা মা-বাবে জোব্ দিলাক্, “আমি কোই পারিই ইবে আমা পুয়ো, আর তে কানা ওইনে জোর্মেয়্যে। 21মাত্তর্ কেধোক্ক্যেন্ গুরি তে ইক্কিনে দেগের্ সিয়েন্ আমি কোই ন-পারিই; আর কন্না যে তা চোগ্কুন্ মেলি দিয়্যে সিয়েন্-অ কোই ন-পারিই। তার বয়চ্ ওইয়ে, তারেই পুযোর্ গরঅ। তে নিজো পৌইদ্যেনে নিজেই হোক্।”
22তা মা-বাবে যিহূদী নেতাগুনো দরে এই বেক্ কধানি কলাক্, কিয়া যিহূদী নেতাগুনে আগে ঠিগ্ গোজ্যন্, কনজনে যুনি যীশুরে মশীহ বিলিনে স্বীগের্ গরন্ সালে তারে সমাজত্তুন্ নিগিলেই দিয়া অবঅ। 23সেনত্তে তা মা-বাবে কোইয়োন, “তার্ বয়চ্ ওইয়ে, তারে পুযোর্ গরঅ।”
24যে মানুচ্চো আগেদি কানা এলঅ নেতাগুনে তারে দ্বিবার্ ডাগিনে কলাক্, “তুই সত্য কধা কোইনে গোজেনরে বাঈনী গর্। আমি দঅ কোই পারিই সে মানুচ্চো পাপী।”
25তে জোব্ দিলো, “তে পাপী না কি সিয়েন্ মুই কোই ন-পারং; মাত্তর্ এক্কান বেপার কোই পারং যে, আগেদি মুই কানা এলুং আর ইক্কিনে মুই দেগঙর্।”
26নেতাগুনে কলাক্, “তে তরে কি গোজ্যে? কেধোক্ক্যেন্ গুরিনে তে তঅ চোগ্কুন্ মেলি দিয়্যে?”
27জোবত্ মানুচ্চো তারারে কলঅ, “মুই দঅ আগেদি তমারে কোইয়োং, মাত্তর্ তুমি ন-শুনো। কিত্ত্যে সালে তুমি আরঅ শুনিবাত্তে চঅ? তুমিয়ো কি তার্ শিচ্চ্য অবাত্তে চঅ?”
28ইয়েন্দোই নেতাগুনে মানুচ্চোরে অমকদ গেইল্ দিইনে কলাক্, “তুই সে মানুচ্চোর্ শিচ্চ্য, মাত্তর্ আমি মোশির শিচ্চ্য। 29আমি কোই পারিই গোজেনে মোশি সমারে কধা কোইয়্যে, মাত্তর্ সে মানুচ্চো কুত্তুন্ এচ্চ্যে সিয়েন্ আমি কোই ন-পারিই।”
30সেক্কে সে মানুচ্চো তারারে জোব্ দিলো, “কি আমক্ অবার্ কধা! তুমি কোই ন-পারঅ তে কুত্তুন্ এচ্চ্যে অদচ তেয়ই মঅ চোগ্কুন্ মেলি দিয়্যে। 31আমি হবর্ পেই গোজেনে পাপীগুনো কধা ন-শুনে। মাত্তর্ যুনি কনঅ মানুচ্ গোজেন-ভক্ত অয় আর তার আওজ্-মজিম্ কাম্ গরে সালে গোজেনে তা কধা শুনে। 32পিত্থিমী সৃট্টির্ পরেত্তুন্ ধুরিনে কনদিন্অ শুনো ন-যায়, জর্মত্তুন্ ধুরি কানা এমন্ কনঅ মান্জ্যর্ চোগ্ কেঅ মেলি দিয়্যে। 33যুনি তে গোজেনত্তুন্ ন-এদঅ সালে কিচ্চু গুরি ন-পারিদো।”
34জোবত্ নেতাগুনে কলাক্, “তর্ জর্ম ওইয়্যেদে এক্কুবারে পাপত্তুন্, আর তুই আমারে শিক্ষ্যে দুয়োর্?” ইয়েন্ কোইনে তারা তারে সমাজত্তুন্ নিগিলেই দিলাক্।
35যীশু শুনিলো যে, নেতাগুনে মানুচ্চোরে নিগিলেই দুয়োন্। জেরেদি তে সে মানুচ্চোরে তোগেই পেইনে কলঅ, “তুই কি মান্জ্যপুয়োবো উগুরে বিশ্বেজ্ গরচ্?”
36তে জোব্ দিলো, “মাষ্টরবাবু, তে কন্না, মরে কঅ যেন তা উগুরে বিশ্বেজ্ গুরি পারং।”
37যীশু তারে কলঅ, “তুই তারে দেক্ক্যচ্, আর তে তঅ সমারে কধা কর্।”
38সেক্কে মানুচ্চো কলঅ, “মাষ্টরবাবু, মুই বিশ্বেজ্ গরং।” ইয়েন কোইনে তে যীশুরে সালাম্ গুরিনে গোজেনর্ সর্মান দিলো।
39যীশু কলঅ, “মুই এ পিত্থিমীত্ বিচের্ গুরিবাত্যে এচ্চ্যং, যেন যিগুনে ন-দেগন্ তারা দেগন্ আর যিগুনে দেগন্ তারা কানা অন্।”
40কয়েক্কো ফরীশীয়ো যীশু সমারে এলাক্। তারা এ কধাগান্ শুনিনে যীশুরে কলাক্, “সালে তুই কি কবাত্তে চাজ্ যে, আমি কানা?”
41যীশু তারারে কলঅ, “তুমি যুনি কানা অদা সালে তমার্ কনঅ দুচ্ ন-থেদঅ। মাত্তর্ তুমি কঅ, তুমি দেগঅ, সেনত্তে তমার্ দুচ্ আঘে।”
Copyright © 2021 Bangladesh Bible Society