যোহন 5
5
আর এক্কো পিড়েল্ল্যে গম্ অলঅ
1এ বেক্ ঘটনাগানির্ পরেদি যীশু যিরূশালেমত্ গেলঅ, কিয়া সেক্কে যিহূদীগুনোর্ এক্কো পরব্ এলঅ। 2যিরূশালেম ভেড়া-গেদো কায়কুরে এক্কো পোর্ আঘে; সিয়েনত্ পাচ্চান্ ছাল্-দিয়্যে জাগা আঘে। ইব্রীয় কধাদি পোর্বো নাঙান্ বৈথেস্দা। 3সেই বেক্ জাগায়ানিত্ সয়-সাগোজ্যে পিড়েল্ল্যে পড়ি থেদাক্। কানা, লেং, এমন্ কি যিগুনোর কিয়্যেগানি এক্কুবারে শুগেই যেইয়্যে সেবাবোত্যে মানুচ্অ তারা ভিদিরে এলাক্।
4এক্কো স্বর্গদূতে অক্ত অক্ত সে পোর্বোত্ লামিনে পানি এলোনি-ফেলোনি গুরিদো, আর সে পরেদি যে পৌইল্যা পানিত্ লামিদো তার্ যে কনঅ পিড়ে গম্ ওই যেদঅ। সেনত্তে বেক্ পিড়েল্ল্যেগুনে পানি লুরিবোদে আজায় সিধু পড়ি থেদাক্।
5আটত্রিশ বজর্ ধুরিনে পীড়েত্ ভুগের্ সেবাবোত্যে এক্কো মানুচ্অ সিয়েনত্ এলঅ। 6ভালোক্ দিন ধুরিনে তে এবাবোত্যেগুরি পড়ি আঘে কোই পারিনে যীশু তারে পুযোর্ গুরিলো, “তর্ কি গম্ অবার্ আওজ্ আঘে?”
7পিড়েল্ল্যেবো জোব্ দিলো, “মর্ এমন্ কনজন নেই যে, পানিগান্ লুড়ি উদোনার্ লগে লগে মরে পোর্বোত্ লামেই দে। মুই যাদে ন-যাদে আর এক্কো মঅ আগেদি লামেগোই।”
8যীশু তারে কলঅ, “উঠ্, তঅ পাদিবো তুলিনে আঢি বেড়া।” 9সেক্কেনে সেই মানুচ্চো গম্ ওই গেলঅ আর তা বিচ্ছোনান্ তুলিনে আঢা ধুরিলো। সেই দিন্নো এলঅ জিরেবার্ দিন্নো।
10ইয়েনত্তে যে মানুচ্চোরে গম্ গরা ওইয়্যে তারে যিহূদী নেতাগুনে কলাক্, “এচ্চ্যে জিরেবার্ দিন্; ধর্মর্ সুদোম্ মজিম্ পাদিবো তুলি লনা তর্ উজিত্ নয়।”
11সেক্কে তে সেই নেতাগুনোরে কলঅ, “মাত্তর্ যে মরে গম্ গোজ্যে তেয়ই মরে কোইয়্যেদে, ‘তঅ বিচ্ছোনান্ তুলি লোইনে আঢি বেড়া।’ ”
12তারা সেই মানুচ্চোরে পুযোর্ গুরিলাক্, “কন্না সেই মানুচ্চো, যে তরে কোইয়্যে, ‘তঅ বিচ্ছোনান্ তুলিনে আঢি বেড়া?’ ” 13মাত্তর্ যে মানুচ্চো গম্ ওইয়্যে তে কোই ন-পারিদো তে কন্না, কিয়া সে জাগানত্ সয়-সাগোজ্যে মানুচ্ ঘেজাঘেস্যে ওইয়োন বিলি যীশু সিয়েনত্তুন্ গেলগোই।
14ইয়েন পরেদি যীশু সে মানুচ্চোরে উবোসনা-ঘরত্ দেগিনে কলঅ, “চাহ্, তুই গম্ ওইয়োচ্। পাপ জিংকানি আর ন-কাদেচ্, যেন তর্ আর ক্ষতি ন-অয়।” 15সেক্কে সে মানুচ্চো যেইনে যিহূদী নেতাগুনোরে কলঅ, তারে যে গম্ গোজ্যে, তে যীশু।
পুয়োবোর্ অধিকার্
16জিরেবার্ দিনোত্ যীশু এ বেক্ কামানি গোজ্যে বিলি যিহূদী নেতাগুনে তারে মারে ফেলেবাত্তে চেষ্টা গুরিলাক্। 17সেক্কে তে সেই নেতাগুনোরে কলঅ, “ম বাপ্পো নিত্য কাম গরের্ আর মুইয়ো গরঙর্।”
18যীশুর এ কধানত্যে যিহূদী নেতাগুনে তারে মারে ফেলেবাত্যে ফন্দি গরা ধুরিলাক্, কিয়া তে যে বানা জিরেবার্ দিনুনোর সুদোম্ ভাঙে সিয়েন্ নয়, গোজেনরে নিজোর্ বাপ্ বিলি ডাগিনে নিজোরে গোজেন সং অ গোজ্যে।
19সেক্কে যীশু সেই নেতাগুনোরে কলঅ, মুই ঘেচ্চ্যেক্গুরি তমারে কঙর্, পুয়োবো নিজোত্তুন্ কিচ্চু গুরি ন-পারে। বাবরে যিয়েন্ গত্তে দেগে বানা সিয়েনই গুরি পারে, কিয়া বাবে যিয়েন্ গরে পুয়োবোয়ো সিয়েন্ গরে। 20বাবে পুয়োবোরে কোচ্পায় আর তে নিজে যিয়েনি গরে বেক্কানি পুয়োবোরে দেগায়। তে ইয়েনিত্তুন্ আরঅ দাঙর্ দাঙর্ কাম পুয়োবোরে দেগেব, যেন পুয়োবোরে সেই বেক্ কামানি গত্তে দেগিনে তুমি আমক্ অ। 21বাপ্পো যেবাবোত্যেগুরি মরাগুনোরে জিংকানি দিইনে তুলে ঠিগ্ সেবাবোত্যেগুরি পুয়োবোয়ো যিবেরে আয়োচ্ গরে তারে জিংকানি দে। 22বাবে কারঅ বিচের্ ন-গরে, মাত্তর্ বেক্ বিচেরর্ ভারান্ পুয়োবোরে দিয়্যে, 23যেন বাবরে যেবাবোত্যেগুরি বেক্কুনে সর্মান গরন্ সেবাবোত্যেগুরি পুয়োবোরেয়ো সর্মান গরন্। পুয়োবোরে যে সর্মান ন-গরে, যে তারে দিপাধেয়্যে সেই বাপ্পোরেয়ো তে সর্মান ন-গরে।
24মুই তমারে ঘেচ্চ্যেক্গুরি কঙর্, মঅ কধা যে শুনে আর মরে যে দিপাধেয়্যে তারে বিশ্বেজ্ গরে তার্ উমর্অ জিংকানি আঘে। তারে দুষি বিলিনে ঠিগ্ গরা ন-অবঅ; তে দঅ মরণত্তুন্ জিংকানিত্ পার্ ওই যেয়্যে। 25মুই তমারে ঘেচ্চ্যেক্গুরি কঙর্, এন্ অক্ত এজের্, বরং ইক্কিনে এচ্চ্যে, যেক্কে মরাগুনে গোজেন পুয়োবোর্ কধা রঅ শুনিবাক্ আর যিগুনে শুনিবাক্ সিগুনে জেদা অবাক্। 26ইয়েনর্ কারনান্ অলঅ, বাপ্পো নিজে যেবাবোত্যেগুরি জিংকানির্ অধিকারী সেবাবোত্যেগুরি তে পুয়োবোরেয়ো জিংকানির্ অধিকারী অবাত্তে দিয়্যে।
27বাবে পুয়োবোরে মান্জ্যর্ বিচের গুরিবার্ খেমতা দিয়্যে, কিয়া তে মান্জ্যপুয়ো। 28এ কধাগান্ শুনিনে আমক্ ন-অবা, কিয়া এন্ অক্ত এজের্, যিগুনে গোরত্ আঘন্ সিগুনে বেক্কুনে মান্জ্যপুয়োবোর্ কধা রঅ শুনিনে নিগিলি এবাক্। 29যিগুনে গম্ কাম গোজ্যন্ সিগুনে জিংকানি পেবাত্যে উদিবাক্, আর যিগুনে অন্যেয় কাম্ গুরিনে সময় কাদেয়োন্ সিগুনে সাজা পেবাত্যে উদিবাক্। 30মুই নিজোত্তুন্ কিচ্চু গুরি ন-পারং; যেবাবোত্যে শুনোং সেবাবোত্যে বিচের্ গরং। মুই গমেডালে বিচের্ গরং, কিয়া মুই মঅ আওজ্ মজিম্ কাম্ গুরিবাত্তে ন-চাং মাত্তর্ যে মরে পাধেয়্যে তা আওজ্ মজিম্ কাম্ গুরিবাত্তে চাং।
প্রভু যীশু পৌইদ্যেনে সাক্ষ্য
31মুই যুনি মঅ নিজোত্যে সাক্ষ্য দুয়োং সালে মর্ সেই সাক্ষ্যগান্ সত্য নয়। 32অন্য একজন আঘে যিবে মঅ পৌইদ্যেনে সাক্ষ্য দের্, আর মুই কোই পারং মঅ পৌইদ্যেনে তে যে সাক্ষ্যগান্ দে সিয়েন্ সত্য। 33তুমি যোহন ইধু পুযোর্ গুরিনে পাধেয়ো, আর তে সত্যর্ পক্ষে সাক্ষ্য দিয়্যে। 34খালিক্ মুই মান্জ্যর্ সাক্ষ্য উগুরে নির্ভর্ ন-গরং, মাত্তর্ যেন তুমি পাপত্তুন্ উদ্ধোর্ পঅ সেনত্তে এ বেক্ কধাগানি কঙর্। 35যোহনে এলদে সেই জোল্-জোল্যে চেরাক্কো যিবে জ্বলিনে পহ্র দের্; তুমি খানক্কনত্যে তার্ সেই পহ্রত্ হুজী গুরিবাত্তে রাজী ওইয়ো। 36মাত্তর্ যোহন সাক্ষ্যত্তুন্অ বেশ্ দাঙর্ সাক্ষ্য মর্ আঘে, কিয়া বাপ্পো মরে যে কামানি গুরিবাত্যে দিয়্যে সিয়েনি মুই গরঙর্। আর সিয়েনি মঅ পৌইদ্যেনে এ সাক্ষ্যগান্ দের্ যে, বাবা মরে পাধেয়্যে। 37সে বাপ্পো, যে মরে পাধেয়্যে, তে নিজে মঅ পৌইদ্যেনে সাক্ষ্য দিয়্যে। তুমি কনদিন্অ তা রবুয়ো ন-শুনো, চেঙেরায়ো ন-দেগঅ। 38সিয়েন বাদে তা কধানি তমা মনত্ ন-থায়, কিয়া তে যিবেরে দিপাধেয়্যে তা উগুরে তুমি বিশ্বেজ্ ন-গরঅ। 39তুমি পবিত্র বোইবো ভারী মনযোগ্ দিইনে পড়অ, কিয়া তুমি মনে গরঅ সিবেলোই উমর্অ জিংকানি পেবা। মাত্তর্ সে বোইবো দঅ মত্যেই সাক্ষ্য দে; 40তো তুমি জিংকানি পেবাত্যে মইধু এবাত্তে ন-চঅ।
41“মুই মান্জ্যর্ বাঈনী পেবাত্তে চেট্ট্যা ন-গরং, 42মাত্তর্ মুই তমারে হবর্ পাং। মুই হবর্ পাং তমা মনানিত্ গোজেন ইন্দি কোচ্পানা নেই। 43মুই মর্ বাবা নাঙে এচ্চ্যং আর তুমি মরে মানি ন-লর্; মাত্তর্ অন্য কেঅ যুনি তা নিজো নাঙে এজে তারে তুমি মানি লবা। 44তুমি একজন অন্যজনত্তুন্ বাঈনী পেবার্ আজা গরঅ, মাত্তর্ যে বাঈনীগান্ বানা গোজেনত্তুন্ পাহ্-যায় সিয়েনর্ চেট্ট্যায়ো ন-গরঅ। ইয়েনর্ পরেদি তুমি কিবাবোত্যেগুরি বিশ্বেজ্ গুরি পারঅ? 45মনে ন-গোজ্য যে, বাবা ইধু মুই তমারে দুষি গুরিম্; মাত্তর্ যে মোশি উগুরে তুমি আজা গুরি আগঅ সেই মোশিই তমারে দুষি গরের্। 46যুনি তুমি মোশিরে বিশ্বেজ্ গত্তা সালে মরেয়ো বিশ্বেজ্ গত্তা, কিয়া মোশি দঅ মঅ পৌইদেনে লেক্ক্যে। 47মাত্তর্ যেক্কে তা লেঘাগান্ তুমি বিশ্বেজ্ ন-গরঅ সেক্কে কিবাবোত্যেগুরি মঅ কধালোই বিশ্বেজ্ গুরিবা?”
Copyright © 2021 Bangladesh Bible Society