Mataayo 2
2
Abhamënyi bha chanchöta ˆbhaaghaye komusëngëra Yesu
1Yesu ꞉niibhwiru mo‑moghya o Bheserehemu mo‑mukööwa o Yuteya, eriibhagha re bhukangati bho mutëmi Herote Omokoro. Mbe, hano amariri kwibhoru, abhamënyi bha chanchöta bhano bharweriire roghoro bhakahika mo‑moghya o Yerusareemu. 2Bhakabhoori, “Hayi anyi uno ibhwiru Omutëmi o Bhayahuuti? Ntoyerooche anchöta yaache erarwera roghoro, gho ghayo, ntwichiri komusëngëra.”
3Hano omutëmi Herote oghwire amangʼana ghayo, aghiitumata, haghirohamu na abhaato bhoose bha Yerusareemu. 4Niho aghakoma abhakoro bha bhachaama bhoose na abheeghi bha meghiro, akabhabhoori akabhugha, “Kirisito hayi akwibhoru?”
5Nabho bhakamugharokeri bhakabhugha, “Nakwibhoru mo‑moghya o Bheserehemu mo‑mukööwa o Yuteya. Hangʼu nibhu Eryobha rebhughiri gho kohetera Amandëkö gha murööti kubha,
6‘Iye omoghya o Bheserehemu, mo‑mukööwa o Yuteya,
iye toonyi mosuuhu,
mo‑bhakangati bha mo‑mukööwa o Yuteya!
Koru ghokoocho nakorwera‑mu omukangati,
uno akobhakangata abhaato bhaane Isiraeri,
kinya omoriishi uno akoriishi changʼöndu cheeche.’#2:6 Mööhi Miika 5:2.”
7Niho Herote akabhabherekera abhamënyi bha chanchöta bhayo gho kobhisa kubha bhaache bhamobhoorere obhuhëënë n‑eriibhagha ke bharooche anchöta yiire. 8Akamara, akabhatoma Bheserehemu, gho kobhabhoorera arabhugha, “Mughëndë moseghaayi bhoheene mbagha mumënyë hano omoona uyo anyi. Mbe, moramara komorighi, mundëëtërë amangʼana bhwango kubha na neeni neghi komusëngëra.”
9Hano abhamënyi bhayo bha chanchöta bhooghwire amangʼana gha mutëmi, bhaghatanura. Mööhi, anchöta yiire ꞉bhaare bharayerighi roghoro ekabhakangata, ekiimeerera ighoro e haghiro hano omoona uyo are. 10Hano bharooche anchöta yiire, bhaghachömëru chwee. 11Mbe, bhaghasöha mo‑nyumba, bhakamorighi omoona haghirohamu na Mariyamu nyina waache, bhakiihiinya mbagha haase, bhakamusëngëra omoona uyo. Bhaghasaasura emerigho gheebho, bhakamoruuseri chaatuho che sahaabhu, ne ebheneeso na manemane. 12Rekamara, Eryobha rekabhashaangʼi mo‑riröötö kubha bhatagharuka wiiki o‑Herote. Gho ghayo, bhaghagharuka bhowaabho gho kohetera anchëra ayende.
Yesu na abhiibhori bhaache ˆbhakangʼösëra mo‑se e Miisiri
13Hano bhamariri ghutanura abhamënyi bha chanchöta, mööhi, marayika o Mutëmi akamorwera Yusubhu mo‑riröötö, akamobhoorera akabhugha, “Bhooka! Wimoki omoona na nyina waache, mungʼösërë mo‑se e Miisiri. Mwikare iyo iyo mbagha eriibhagha rino nekuucha kobhabhoorera, gho kubha Herote nakuucha komutabhara omoona uyo kubha amwite.” 14Niho Yusubhu akabhooka, akiimoki omukari waache no omoona, obhotiko bhuyo bhuyo bhaaghaye Miisiri. 15Aghiikara iyo mbagha hano Herote akuure. Amangʼana ghayo ngakoruru kubha rehikeerane rino righamburu no Omutëmi Waryobha gho kohetera omurööti kubha, “Nemobherekiire omoona waane koru Miisiri.”#2:15 Mööhi Hoseya 11:1.
Abhaana bha ghesubhe ˆbhaghiitu Bheserehemu
16Hano Herote amënyiri kubha abhamënyi bha chanchöta bhaare mbamongʼiiniri, aghakarara chwee. Akahatëka kubha abhaana bha ghesubhe bhoose bha Bheserehemu haghirohamu na ahaghiro hoose ha haghuhe, bhano bhaanyi ne emeeka ebhere ghugharuka haase, bhiitu. ꞉Naaköriri hangʼu kurëngʼaana ne eriibhagha riire abhooriiru na abhamënyi bha chanchöta. 17Niho ꞉ehikeriine angʼana yiire ighamburu no omurööti Yeremiya kubha,
18“Eriiraka ndyoghwiru mo‑moghya o Raama,
ekerero na kwihiinyërëra kwaru.
Raheeri nakobharerera abhaana bhaache,
nawe taakwënda ghosongoreru,
gho kubha abhaana bhaache bhataanyi‑ho.”#2:18 Mööhi Yeremiya 31:15.
Yesu na abhiibhori bhaache ˆbhaghagharuka koru Miisiri
19Hano Herote akuure, mööhi, marayika o Mutëmi Waryobha akamorwera Yusubhu mo‑riröötö iyo Miisiri, 20akamobhoorera akabhugha, “Bhooka! Wimoki omoona na nyina waache, mugharuke mo‑se e Isiraeri gho kubha bhaare ꞉bhaare bharëënda komwita omoona uyo, mbakuure.”
21Mbe, Yusubhu akabhooka, akamwimoki omoona na nyina, bhaghagharuka mo‑se e Isiraeri. 22Amare hano oghwire kubha Arikeraawo mwërëëti o Herote niwe aghukangata Yuteya, aghatiina ghuye iyo. Nawe akabha ashaangʼiru mo‑riröötö, aghatanura akamwimoki omukari waache no omoona, bhaaghaye mo‑mukööwa o Ghariraaya. 23Bhakahika na kumanya mo‑moghya o Nasareeti. Niho ꞉ehikeriine angʼana ino ighamburu ighoro e Yesu gho kohetera abharööti, kubha, “Nakobherekeru Omunasareeti.”
© 2022 Wycliffe Bible Translators, Inc. All rights reserved