Mataayo 3
3
Yohana Omubhatisaachi ˆaghaköra anchëra e Yesu
(Maariko 1:1–8; Ruuka 3:1–18; Yohana 1:19–28)
1Hano ghehetiri emeeka myaru, narweriire omooto umu akobherekeru Yohana Omubhatisaachi mo‑kibhara ke Yuteya. Yohana uyo naare araraghani arabhugha, 2“Motuukuune amasari ghaanyu, gho kubha obhutëmi bho Mwishaaro ˆbhoghatingʼi.” 3Yohana uyo niwe uno asiikiiru no omurööti Isaaya kubha,
“Eriiraka re mooto ndekobherekera mwibhara rerabhugha,
‘Mukörë anchëra e Mutëmi,
mughöröröki chanchëra chino akohetera.’”#3:3 Mööhi Isaaya 40:3.
4Changibho che Yohana nchikoruru kwo bhwishe bho ngamiya na naare ariinata oruköbha mo‑keribhichi.#3:4 Changibho chino Yohana Omubhatisaachi are arabheeka, ncheere kinya chiire che murööti Eriya. Mööhi 2 Abhatëmi 1:8. Ekiinyakurë keeche nkeere changighe no obhooke bho mwiteregho. 5Abhaato mbamutambiine koru mo‑moghya o Yerusareemu, na ase yoose e Yuteya, na chambaara choose che chambareka che rooche ro Yorotaani. 6Bhaakabha bharatuukuuna amasari ghaabho, nawe akabha arabhabhatiisa mo‑rooche ro Yorotaani.
7Amare hano Yohana arooche Amabharisaayo na Amasatukaayo bhakamutambana kwo bhwaru kubha abhabhatiise, akabhabhoorera akabhugha, “Inyu orwibhoro ro nchöka! N‑niwe abhabhooriire kubha, gho kubhatiisu moghwisacha obhororo bho Ryobha bhuno bhokuucha? 8Mbe, mukörë amaköri ghano ghakwërëki kubha, motuukuuniri amasari ghaanyu. 9Motabha moriihacha kubha mokwabhëru, gho kubha inyu m‑bha rwibhoro ro Abhurahamu moonyi. Mbe, ˆnekabhabhoorera, Eryobha ndeghotora komuha Abhurahamu abhaana koru mo‑mabhohe ghano! 10Ahaache nimariri ghotooru mo‑matina gha mete. Omote wowoose uno otaaghusönga amakorobhese amachömu nokonungu na kurëkëru mo‑mororo.
11“Eni nekobhabhatiisa kwo manche kwërëki kubha motuukuuniri amasari ghaanyu. Amare uno akuucha anyuma yaane, iwe nakobhabhatiisa gho Körö Ahörëëru na kwo mororo. Omooto uyo naanyi na changuru ghonkera, koru nteekurëngʼaanera ghughëgha ebhekwera bheeche. 12Ibheere Kirisito nakuucha, kwahukani abhaato bhano bhatuukuniri, na bhano bhaanyi na amasari, kinya omooto uno aghöötëriire orohongo mo‑mabhökö ghaache. Angano iyo nakoyekomera mo‑ghitara keeche, amare omokoonyo nakowute mo‑mororo, no omororo uyo tookorima naabha!”
Kubhatiisu kwo Yesu
(Maariko 1:9–11; Ruuka 3:21–22)
13Mbe, Yesu akaru Ghariraaya, aghaye mo‑rooche ro Yorotaani kubha abhatiisu na Yohana. 14Amare Yohana aghakiibhi komurëki, akamobhoorera akabhugha, “Ningaahe iye ˆokaacha ghokoone? Eni neeni nekwëndëru kubhatiisu na niiye.”
15Yesu akamugharokeri akabhugha, “Nwishereri ibhe hangʼu kwi ibheere, gho kubha ntokwëndëru ghuköra ghaare ghoose Eryobha rekwënda.” Mbe, Yohana aghiishereri, akamubhatiisa.
16Hano Yesu abhatiisuru na kohoroka mo‑rooche, mööhi, hayo hayo erishaaro reghiighoka, akarighi Akörö e Ryobha eriika kinya egheghuuti na ghwikara ighoro yaache! 17Eriiraka rekarwera Mwishaaro rerabhugha, “Uno n‑Omoona waane omosiighani, neghuchömëru nawe.”
© 2022 Wycliffe Bible Translators, Inc. All rights reserved