Lúcas 20
20
Hesu pu’aka
1Ha peteĩ ára Hesu ombo’e jave hetãyguakuérape Ñanderuete rogaguasúpe ha omombe’úvo pe evangélio, oñemboja hendápe pa’i ruvichakuéra, umi kuatia haihára ha karai ancianokuéra,
2ha oñe’ẽ Hesu ndive, he’ívo: Eréna oréve mba’eichagua pu’aka rupi piko rejapopa ne milagrokuéra. Térãpa mávapa ome’ẽ ndéve ko pu’aka kóva.
3Upérõ Hesu he’i ichupekuéra: Che voi aporanduse peẽme peteĩ mba’e peẽ chembohovái raẽva’erã.
4Juan bautísmo piko yvagaguiogua térãpa kuimba’eguioguánte.
5Ha’ekuéra oñemongeta oñondive ha he’i: Ja’érõ yvagaguioguaha, Ha’e he’íta: Mba’érehe piko ndapegueroviái ichupe.
6Ha ja’érõ kuimba’eguiguaha, ñane retãyguakuéra ñandejukáta itápe, ichupekuéra g̃uarã Juan Bautísta peteĩ proféta.
7Ha he’i hikuái Hesúpe: Ndoroikuaái mamoguiguápa.
8Hesu he’i ichupekuéra: Péicharamo che nda’emo’ãi avei peẽme, mba’eichagua pu’aka rupípa che ajapopa umi milágro.
9Upérõ Hesu omombe’u hetãyguakuérape ko ñe’ẽ mbojoja kóva: Peteĩ kuimba’e oñotỹ heta parral, ha oiporuka hepýre umi oñangarekoséva pe parralty rehe ha oho hi’are hag̃ua tetã ambuépe.
10Umi ñemono’õ arakuéra rire pe parralty jára omondo hembiguáipe imba’e repyrã piári. Umi parralty ñangarekohára katu oinupã pe parralty jára rembiguáipe ha omosẽ ichupe po nandi.
11Upérõ pe parralty jára ombou ambue hembiguáipe, kóvape oja’o ha oinupã rire omosẽ avei ichupe po nandi.
12Upérõ pe parralty jára ombou ambueve hembiguáipe; kóvape oinupã avei hikuái ha omosẽ ichupe po nandi.
13Upémaramo pe parralty jára he’i: Mba’épa ajapovéta. Amondóta che ra’y ahayhuetévape, ikatu ningo omomba’e ichupe hikuái.
14Umi parralty ñangarekohára katu ohechávo ichupe ojepy’amongeta ha he’i: Kóva ningo ko yvy jararã, peju jajuka ichupe ha ko yvy kóva opytáta ñane mba’erã.
15Ha ombotyryry hikuái ichupe pe parralty oka gotýo ha ojuka ichupe. Mba’épa ojapóta pe parralty jára.
16Ha’e ouva’erã ohundipa hag̃ua umi parralty ñangarekohárape, ha ome’ẽva’erã iparralty ambue terekuápe. Umi ohendúva he’i: Anítei ko mba’e kóva ojehu.
17Hesu katu oma’ẽ hesekuéra ha he’i: Mba’épa he’ise umi ñe’ẽ ojehaíva Ñanderuete kuatiañe’ẽme: Pe itaguasu (Hesu Crísto) umi óga mopu’ãhára omombova’ekue, oñemoĩma ogarakua (esquína) ramo ha hi’ári Ñanderuete omopu’ã hóga, péva he’ise ijiglésia (Salmokuéra 118,22).
18Oimeraẽva ári ho’árõ pe ita, ojekapava’erã, ha pe ita ho’áva ári katuete iku’itimbova’erã.
Ija piko Israelguakuérape ome’ẽ Róma retã ruvichápe impuésto
19Ha umi kuatiañe’ẽ haihára ha pa’i ruvichakuéra oñeha’ã oapresa hag̃ua Hesúpe upepete voi, ohechakuaágui hesekuéra Hesu he’i hague pe ñe’ẽ mbojoja, okyhyjeiterei katu hetãyguakuéragui, ojejoko hikuái.
20Upévare omoñuhã hag̃ua Hesúpe, omondo hendápe ipyraguekuéra (omangeáva) ojapysaka porã hag̃ua opaite iñe’ẽ rehe, ha umía tova mokõi reheve ojerure gua’u Hesúpe ohekombo’e hag̃ua ichupekuéra, ome’ẽ hag̃ua Hesúpe iñe’ẽtee rupi mburuvichakuéra pópe.
21Upévare umi pyrague oporandu Hesúpe: Mbo’ehára, roikuaa ningo reñe’ẽ ha reporombo’eha hekoitépe ha neremomba’eiha yvyariguakuérape, reporombo’e uvei hekópe Ñanderuete rapére,
22orépa rome’ẽva’erã impuésto Róma retã ruvichápe térãpa nahániri.
23Hesu katu oikuaa omoñuhãseha ichupe iñembohovái rupi, upévare he’i ichupekuéra:
24Pehechauka chéve peteĩ monéda. Ha oporandu: Máva ra’ãnga piko upe oĩva hese, ha mba’épa ojehai ko monéda kóvare. Ha’ekuéra ombohovái: Pe monéda rehe ningo oĩ Róma ruvicha ra’ãnga ha ijerekuévo ojehai héra.
25Upémaramo Hesu he’i ichupekuéra: Aipórõ, peme’ẽ Róma retã ruvichaguasúpe imba’eteéva, ha avei Ñanderuetépe imba’eteéva.
26Ha ndaikatúi oity hikuái Hesúpe iñuhãme opavave renondépe, ha ohecharamoitévo iñembohovái, okirirĩmba hikuái.
27Ha umi saduceokuéra og̃uahẽ avei, ha’ekuéra ningo he’i umi omanomava’ekue ndoikovemo’ãveimaha araka’eve ha oporandu avei Hesúpe,
28he’ívo: Mbo’ehára, Moises ohaiuka ñandéve ikuatiañe’ẽme: Omano ramo peteĩ kuimba’e omendava’ekue ha opyta ita’yra’ỹre, ityvýra tomenda hembirekokuére, ha tomoñemoña ityke’ýra rérape, ani hag̃ua ityke’ýra réra opa rei Israel retãme.
29Oikova’ekue ningo ore apytépe 7 ojoryvýva, upe tenondevegua omenda ha omano ita’yra’ỹrehe,
30ha upe mokõiha omenda hembirekokue rehe, ha omano avei ita’yra’ỹre.
31Upéi upe mbohapyha omenda hese, ha upéicha avei umi ambue irundyve hembýva, opavave omano katu ita’yra’ỹre,
32ipahápe omano avei upe kuñakarai.
33Máva rembirekóta piko ha’e upe oñemoingove jevyha árape. Umi 7 omendava’ekue upe kuñakaraíre.
34Hesu katu ombohovái ichupekuéra: Yvyariguakuéra omenda ha oñemomenda.
35Umi ojeguerekótava heko potĩva ramo ha ohupitýtava hendag̃ua yvágape pe ára atyguasurãme, pévape nomendamo’ãi ni noñemomendamo’ãi.
36Ha’ekuéra ndaikatuvéimagui, omano oikóta angelkuéraicha, ha opytáta Ñanderuete ra’y ha rajy ramo, ha’ekuéra ningo pe jeikove jevy ra’y ha rajykuéra.
37Moises he’i ikuatiañe’ẽme, umi omanomava’ekue oñemoingove jevytaha, ha’e ojejohu ramoguare Ñanderuete ndive upe jukeri oĩ haguépe, ha upépe Ñanderuete he’i: Che ningo Abraham, Isaac ha Jacóbo Jára, (Éxodo 3,6).
38Ñanderuete ningo ndaha’éi voi omanomava’ekue Jára, oikovéva Jára uvei, opavave oikoveva’erã ichupe g̃uarãmante.
39Umi kuatia haihára he’i Hesúpe: Rembohovái porã ichupekuéra.
40Upe ára upéva guive noporanduvéi hikuái mba’eve Hesúpe.
Máva Ra’y piko Hesu Crísto
41Upérõ Hesu oporandu ichupekuéra: Mba’éicha piko oje’e Crísto, David ra’yha.
42David voi ningo he’i Salmokuéra kuatiañe’ẽme: Ñanderuete he’i voi che Járape: Eguapy che akatúape,
43Che amoĩ meve nderehe ija’e’ỹvape nde poguýpe, (Salmokuéra 110,1),
44upéicha David he’i Hesu Crísto rehe Ha’e Ijaraha.
45Ha hetãyguakuéra ohendu porã Hesu he’írõ hemimbo’ekuérape:
46Peñeñangarekóke kuatia haiháragui, ha’ekuéra oguatáva ao porãite reheve, ha oipotáva oñemomaitei karaiguasúicha oñohug̃uaitĩ jave tape rupi, ha oguapyséva pe guapyha tenondeveguápe Ñanderuete rógape, ha avei pe akã megua guapyha mesakuérape oñeconvida ramo ichupekuéra karuguasuhápe.
47Omonda umi viúda róga, ha oporombotavy hag̃ua oñembo’e pukuete hikuái, ko’ãvape ojehavira pohyiveva’erã pe ñembojovakeha árape.
Ñanderuete Ñe’ẽ Porã © MISIÓN ALEMANA ENTRE LOS NATIVOS DEL PARAGUAY - HARALD FÜRSTENAU, 2015.