Lúcas 17
17
Hesu ohekombo’e hemimbo’ekuérape jeikove pyahu rehegua
1Hesu he’i avei hemimbo’ekuérape: Tapia oĩva’erã umi oporomombiáva tape porãgui, opáichavo angái katu umi oporomombiáva.
2Iporãveva’erãmo’ã ichupekuéra oñeñapytĩ rire peteĩ ita tuicháva ijajúrare ha oñemombo yguasúpe, ha anítei omombia umi ojeroviávape cherehe pe tape porãgui.
3Cháke, nde ryvy oñemboheko vai ramo, eavisa porã ichupe, ha opoírõ heko vaígui, eperdona ichupe.
4Ha ha’e ojapo vai ramo nderehe 7 jevy jepeve peteĩ árape, ha 7 jevy ou ramo ne rendápe ha he’írõ ndéve añembyasy, añemboheko porãse nendive, eperdona tapia ichupe.
5Ha umi apóstol he’i Hesúpe: Embotuichavéna ore jerovia.
6Ha Hesu ombohovái ichupekuéra: Pende jerovia ojogua ramojepe peteĩ mostáza ra’ỹime peẽ pejéta ko móra mátape: Ejehapo’o ha tereho eñeñotỹ yguasúpe, ha’e iñe’ẽrenduva’erã peẽme.
7Mávapa pende apytégui he’íta hembiguáipe ou jeýva kokue rembiapógui térã pene rymba ñangarekohágui, eike ha eguapy mesápe.
8Nde’irichénepa uvei ichupe: Embosako’i che rembi’urã, ejeku’akua ha cheservi akaru ha hay’u hag̃ua, ha upéi nde rekaru ha rey’úta avei.
9 Oagradecénepa hembiguáipe, omba’apo haguére ichupe g̃uarã.
10Upeichaite peikova’erã avei peẽ, pejapopa rire opaite mba’e oje’éva peẽme pejapo hag̃ua, peje’arã: Ore ningo tembiguái pitúva, rojapónte umi mba’e rojapova’erãvante.
Hesu omonguera 10 ilépravape
11Ha ojehu ningo Hesu ohóvo Jerusalen gotýo, Ha’e ohasávo Samária ha Galiléa departaménto rembe’y rupi,
12ha Hesu oikévo peteĩ tava’ípe ojojohu 10 kuimba’e iléprava ndive, ha’ekuéra opyta mombyrymi ichugui,
13ha sapukái yvatépe he’i hikuái: Nde Hesu, mbo’ehára, oreporiahuverekomína.
14Ha Hesu ohechávo ichupekuéra he’i: Tapeho pejehechauka pa’ikuérape, ha oho jave tapére hikuái opyta ipotĩ ha okuera.
15Peteĩ umi 10 apytégui katu, ohechávo okuera hague, ojevy Hesu rendápe omomba’eguasu hag̃ua sapukaipópe Ñanderuetépe.
16Ha’e ojeity yvýpe Hesu py renondépe ha oagradece ichupe, ha ko kuimba’e kóva ningo peteĩ Samariaygua.
17Hesu katu he’i ichupe: Naipotĩri piko opytávo 10, moõ piko opyta umi ambue 9.
18Ambuekuéra oimo’ã natekotevẽiha omomba’eguasu Ñanderuetépe, ko tetã ambueygua kóva añómante.
19Ha Hesu he’i ichupe: Tereho, nde rejerovia haguére rejesalváma.
Ñanderuete retãguasu oñepyrũ Hesu ndive
20Upéi fariseokuéra oporandu Hesúpe: Araka’épa oúta Ñanderuete retãguasu. Ha Hesu ombohovái ichupekuéra: Ñanderuete retãguasu ndoumo’ãi ojehecha hag̃uáicha.
21Ndoje’emo’ãi: Kóina ápe, térã péina pépe. Ñanderuete retãguasu ningo oĩma voi pende apytépe.
22Upérõ Ha’e he’i hemimbo’ekuérape: Og̃uahẽta umi ára hi’ãnteva’erã peẽme pehecha yvyarigua Ra’y ára jepénte, ha ndapehechaiva’erã.
23Ha oje’éta peẽme: Kóina ápe, péina pépe, aníke pehótei, ani peho hapykuéri.
24Ku aratiri sapy’aite ohesape háicha peteĩ ára yke apy guive ambue ára yke peve, upéicha og̃uahẽva’erã avei pe yvyarigua Ra’y ára.
25Ha’e ohasa asyete raẽva’erã ha hetãyguakuéra omboykéta ichupe.
26Ha ojehu haguéicha Noe árape, upeichaite ojehu jevýta pe yvyarigua Ra’y árape.
27Ha’ekuéra okarúmi, omokõ (víno), omenda ha oporomomenda Noe oikeha ára peve ibarcoguasúpe, ha og̃uahẽvo pe amaguasu oñehundipa oĩva guive okápe.
28Ojehu haguéicha avei Lot árape, upéicha ojehu jevýta: Okaru joa, omokõ (víno), ojogua, oñemu, oñemitỹ, ojogapo joa hikuái.
29Ha pe ára Lot osẽ hague Sodómagui oky áraguio tata ha azúfre, ha ojukapa ichupekuéra.
30Upéichaite ojehu jevyva’erã avei yvyarigua Ra’y ojehechaukataha árape.
31Upe árape upe oĩvahína hóga ape ári, imba’ekuéra oĩ aja hóga ryepýpe, anítei oguejy ipiári, upéicha avei upe oĩva ikokuépe, ani ojevýtei.
32Peñemomandu’áke Lot rembireko rehe.
33Oimeraẽ hakate’ỹva hekovetee rehe ichupe g̃uarãnte, ohundíta hi’ánga ha hekove; upe ome’ẽva katu hekove osalváta hi’ánga ha hekove avei.
34Che ha’e peẽme, upe pyharépe mokõi oĩta ojopohéi hupápe, peteĩ ojeguerahava’erã ha ambue ojehejáta.
35Mokõi kuña oñembisóva oñondive, peteĩ ojeguerahava’erã, ha ambue ojehejáta.
36Mokõi oĩta ikokuépe, peteĩ ojeguerahava’erã, ha ambue ojehejáta.
37Ha oporandu hikuái Hesúpe ha he’i: Moõpa, ore Jára. Ha Hesu ombohovái ichupekuéra: Pe te’õngue oĩháme, upépe oñembyatytahína yryvukuéra.
Ñanderuete Ñe’ẽ Porã © MISIÓN ALEMANA ENTRE LOS NATIVOS DEL PARAGUAY - HARALD FÜRSTENAU, 2015.