LUKA 4
4
1Kyasia Yesu amwichuṟe Mumuyo Mwele, kawuya awuka kulya Yordanyi, katengesho-tengesho nyi Mumuyo kulya nuka mkonu makumi haana kechihesho nyi Satan womtewa. 2Nao mfiri iya nalelya kindopfo, yekisia, naalyo kawado nyi njaa. 3Satan kacha imbia, “Komkoya nyi ukeri mana o Ruwa lohi, kewia iho-lyo lihaluke liwe mkate nolye.” 4 Yesu kamhaluo, “Nyi kikiṟehie, Kindo mndu echitawulia nakyo moo chi mkate tupupfo.” 5Naalyo kamduo kamdosia handu, kamloṟa mawumangi hose ha wuyana-wu limu waṟu. 6Satan kambia, “Wuitoṟi-wu nyi njechikuinenga iyo wose na kiweṟe kyawo, kipfa nyi njimdambikie inyi, na njechikuinengia msa ngakumkunda. 7Kyasia iyo kopfira ndi sumuhana na inyi, konjiterewa, isho shose nyi shechikuṟwia shapfo.” 8 Yesu kahaluo kambia, “Nyi kii kiṟehie, nyii ochipfiria Ruwa Mndumii opfo ndi nomterewe, na imhidia nowemhidia o amonyi tupu!” 9Nao kamduo kulya Yerusalemu kamhoṟotsa alya huye kitongolo kya hekalu kambia, “Komkoya na ukeri mana o Ruwa, kuolotse alya wanda. 10 Kipfa nyi kii kiṟehie ke, njechikuwawasia wamalaika wake wakuringe. 11Kye nawo nyi wechikuduo na mahi hawo, kundu ulawone koikapa mtulia ihohu.” 12 Yesu kahaluo kambia, “Nyi kikihambe, Ma kulaheshe Ruwa Mndumii opfo.” 13Satan kekimarisa orio kyemhesha namtewe, kambuka, kamda, nawede iwuya shiheri shingi.
Yesu awooka iṟunda lyake kulya Galilaya
(Mat 4:12-17; Mar 1:14-15)
14Na Yesu kawuya na kulya Galilaya ai na pfinya ya Mumuyo; na kiṟumi kyake kikahenda kedung'ana shihongo shilya shikinganyi na oruka lulya shose. 15Kawewa molosha-losha kulya masinagogenyi hawo amichimbiṟe nyi wose.
Yesu apiṟo ipfo Nasareti
(Mat 13:53-58; Mar 6:1-6)
16Kacha na kulya Nasareti kundu ang'anyie, kaida na mbenyi ya sinagoge ili mfiri fo Sabato chando aweichiwie, kahoṟokaho nasome. 17Kainengio kitapu kya mwikimbi Yesaya, kekioṟowuo kitapu-kyo kakooya-pfo handu hahaṟehiye, 18 “Mumuyo fo Mndumii nyi huyako fui; cha kipfa njimshimbuo na mafuda, njihende yongoya wakiwa mbonyi tsiwode sia. Anjidumie njihende yongoya wapfungo yashuka, na wapfu meso wechiwuya iwona. Njihende ilekia iwo wai wafaṟe wakuashukie. 19Na yongoya maka fo Mndumii fukundikie.” 20Kaoṟowia kitapu kilya, kainengia msoṟo ulya moringa-ho kadamia, na walya wawei kulya sinagogenyi wose wakamkumba meso wechimṟisa. 21Nao kawooka-ng'u ideda nawo kawawia, “Shiṟehiyo-sho nyi inu shahoya ipfo madunyi hanu.” 22Kyasia wose wakachihiyo kyake, wakaṟihio shidedo shilya sheloda shilewuka dumbunyi lyake wakahamba, “Aka ichu chi mana o Yosefu?” 23Kawawia, “Kulako nyi mui injikaṟwo mhambye-fo fokehambo ke, Mhanga kekukiṟe-wo kumonyi. Ke shindo shilya shiwutikie kulya Kapernaumu lukashiicho, keweshiwutie na iya orukenyi lo kikunyi kyapfo.” 24 Kahamba, “Nkya lohi ngambia, Kuwode mdedi o Ruwa ekekundika ipfo orukenyi lo kikunyi kyakepfo. 25 Na lohi ngambia, Na kuweipfo waka wafoi wakusu kulya Israeli matika halya ha Elia, lilya mandi kulya ruwehu kuwei kupfunge maka iṟaṟu na meri iṟandaṟu, kuhaho njaa kulya orukenyi kose. 26 Elia naladumo ma ko umu-ho, shile na kulya Sarepta, mṟi fo oruka lulya lo Simon ko mka mkusu. 27 Na wandu wawodo nyi saka na wawepfo wafoi kulya Israeli mandi halya ha mdedi Elisa, kulakae-ho ma umu aleheṟemtso, shile na Naeman ulya Msiria.” 28Na walya wawei kulya sinagogenyi wakapfuluko wose waicho wado. 29Wakakure, wakamkumbalya-kumbalya na kulya kya patehu lya mṟi fulya, wakatana wamduo alya ohambehu lo ifumvu lilya liweiwike-ho mṟi fulya fowo ke wamwombotse-ho. 30Kyaindi o kaida kulya makiidi hawi hawo kakuhendia.
Mndu awodo mṟufu mbicho
(Mar 1:21-28)
31Kasoka kashika kulya Kapernaumu, mṟi fo Galilaya, kakaa-pfo, kawa mowalosha ili lya Sabato. 32 Nawo wakauma mkahai kipfa kya mloshiye foke, kyamba kidedo kyake kiwewode na pfinya. 33Na kulya sinagogenyi kuwekeripfo mndu awewodo nyi mumumyo fo mṟufu mbicho fo ngafu, nao kafihiṟa na ṟu ling'anyi kahamba, 34“Kudee! Nyiki luwodo na iyo Yesu o Nasareti? Nyi uchee nolurumatse! Na njiichi ke nyi ui u; ke nyi ui Mwele o Ruwa.” 35Na Yesu kamtilima kahamba, “Tsia-ng'u, nombuke!” Naalyo mumuyo ulya kamhutsa wanda alya kiidi kyawo, kambuka nalambike kifaṟe. 36Naalyo wakaṟihio wose, wakawiana mndu na odoe wakahamba, “Nyi kidedo kida ikyo katana awawasa mumuyo ya ngafu kui wukari na pfinya, nayo ikawuka!” 37Iki kyake kikakapo sumu kikadung'ana handu halya hakinganyi naho kose.
Yesu achiṟa wandu wafoi
(Mat 8:14-17; Mar 1:29-34)
38Nao kakure kulya sinagogenyi, kaida na mba ko Simon. Na mamka o Simon nyi awewodo nyi modo, kaaka keng', wakamumterewya. 39Nao katikirya-ho kaarama ahoṟoki, kakanga modo fulya fukamda; mamka ulya o Simon oweṟe kakure kawapfuṟukanyia. 40Koikiila orio walya wawode wandu wawo waluo ndaaṟe-tsi na itsi, wakawaende na alya handu ai; nao kawahekia mawoko umu umu kawachiṟa. 41Na wengi wafoi wakaweleko nyi mumuyo mbicho yechifihiṟa ikahamba, “Iyo nyi ui Mana o Ruwa!” Kawakanga, nalawalekie wahambe ke nyi wamwichi nyi ai Kristo.
Yesu aionguo mbonyi ipfo Yudaya
(Mar 1:35-39)
42Koikikya nao kawuka-pfo kakuhendya kundu kulawode wandu, na mamwingi fulya fukawewa mompfula; wakacha na kulyando awei wakamwima nalalekane nawo. 43Nao kawawia, “Na mṟi ingi nyi kinjiiwaṟi njihende yongoya mbonyi tsiwode sia tsa wumangi wo Ruwa, kyamba nkyondo njiimdumie.” 44Kawewa moongoya mbonyi kulya masinagogenyi ha Galilaya.
Yesu alaha wa kiloshyonyi wa kuwooka
(Mat 4:18-22; Mar 1:16-20)
Kimochi Bible © Bible Society of Tanzania, 2016.