E’doza 29
29
Yakoboni azi ngazu Labani dri Rakeli pisi Lea beri
1 #
Kal 23:7; Hos 12:12 Yakobo nga di mu i ma ada, nga ca anzi etuni efuria ’diyi ma angua. 2Eri nga lu, te mi ndre, yi a’di ovu nyamukoa, te mi nderi fe kabilo ongulumu ongulumu na la ageinia; te yi adri yi a’di nderi fe kabilo ongulumuru dri. Oni yi a’di ma tiliari eri amboru. 3Kabilo ongulumu ongulumu dria nga yi oku ’dale; yi nga oni ogu yi a’di ma tiarisi, nga yi fe kabilo ongulumuru dri, nga oni ’ba i ma paria dika yi a’di ma tilia ndo.
4Yakobo nga ’yo yi tia, Ma adripi la, emi enga ngoa ya? Yi nga ’yo ra, Ama ’ba Harania ’diyi. 5Eri nga di ’yo yi tia, Emi ni Labani Nahori mvini ra ya? Yi ’yo ra, Ama ni eri ra. 6#E’do 43:27Eri nga ’yo yi tia, Eri onyiru ya? Yi nga ’yo ra kini, Eri onyiru; te mi ndre, zi Rakelini emu kabilo be! 7Eri nga ’yo ra, Mi ndre, etu nga ambo, etu tini ngazu yi okuzuri ecani nga ku; emi fe yi kabilo dri, emi mu di yi ocezu. 8Te yi ’yo ra, Ama econi ku, de nga kabilo ongulumu ongulumu ecani dria dria ku, de nga yi oguni oni yi a’di ma tiliasi ku; ama adri yi fe kabilo dri ndo.
9 #
Efu 2:16
Erini nga e’yo ’yoria yi be, Rakeli emu i ati ma kabilo be; erini yi agei telenirisi. 10#Efu 2:17Te eri nga eca ’dini, Yakobo ka Rakeli Labani i andri ma adripi ma zi pi ndre, kabilo Labani i andri ma adripini be, Yakobo nga esi ogogo, nga oni ogu yi a’di ma tiliasi, nga yi fe kabilo ongulumuru Labani i andri ma adripini dri. 11#E’do 33:4; 45:14; Rum 16:16; 1 Kor 16:20; 2 Kor 13:12; 1 Pet 5:14Yakobo nga Rakeli ma o’bolo ndru, nga wu mindresi o’duko urusi. 12#E’do 13:8; 24:28Yakobo nga di: ’yo Rakeli tia kini i ovu ati ma adri, kini i Rebeka ma mvi’i; eri nga di nzu ani e’yo nde olu i ati ma tia.
13 #
E’do 24:29
Eri nga eca ’dini, Labani ka e’yo i amvipi ma mvi Yakoboni ecazuri eri ’bo, eri nga nzu dri fuzu eri be, nga eri o’de, nga o’boloni ndru, eri ofizu jo inia. Eri nga di e’yo ’diyi olu Labani dri dria. 14#E’do 2:23; Lip 9:2; 2 Sam 5:1; 19:12, 13Labani nga di ’yo eri tia, Mi ma fala, ma kalanya be ada! Eri nga la eri vu mba alu.
15Labani nga ’yo Yakobo ria’i Mini ovule ma adripinirisi, mi di azi nga ma dri toko ya? Mi olu mani, oya mini ma ovu a’dini ya? 16Isu Labani nde ovu ezoanzi be iri, okori ma ru Lea’i, vileri ma ru Rakeli’i. 17Lea ma mileefi okpo kokoru, te Rakeli ovu ndrizaru, rua be alaru. 18#E’do 31:41; 2 Sam 3:14Yakobo le Rakelini ra; eri nga ’yo ra, Ma nga azi nga mi dri eli aziri Rakeli mi zi vilerisi. 19Labani nga ’yo ra, Eri onyiru ma ma fe eri mi dri, aga mani eri fezu ’ba azini driri ra; mi te ma be. 20#E’do 30:26; Ong 8:7Yakobo nga di azi nga eli aziri Rakeli ma e’yosi ra; eli nde ’diyi ovu eri ma milia o’du were toko, a’disikuni eri ma avani eri vale turisi.
21 #
Lip 15:1
Yakobo nga ’yo Labani ma tia, Mi fe oku mani ma dri fo, o’du mani ’diyini agale trerisi, ma ma fi eri vu ani. 22#Lip 14:10; Yoh 2:1Labani nga ’ba pari nde alia ’diyi oku dria tualu, omu ’bazu. 23Eri nga eca ’dini, ka ca ondresi eri nga i zi Leani ’du ji eri vu; eri nga fi eri vu. 24(Labani nga Zilipa zamva ini ati’boruri fe i zi Lea dri ovuzu eri ma ati’boru.) 25Eri nga eca ’dini, o’bitisi, te mi ndre, eri de Lea’i; eri nga ’yo Labani tia, E’yo mini ’yele ma vu ’diri ngoni ya? Ma ngani azi mi dri Rakelisi ku ya? Mi ici ma dri lokirisi a’disi ya? 26Labani nga ’yo ra kini, Angu amani ’doria ama adrini zamva vileri fe agupia zamva okorini oko ’dini ku. 27#Lip 14:12Mi de, ’diri ma o’du aziri oko raka, ama nga aziniri fe mi dri ndo, azi azini mini ngale ngale ma dri eli drile aziririsi. 28Yakobo ’ye ’dinile ra, nga o’du erini aziri de ra; eri nga di i zi Rakelini fe eri dri okuru ndo. 29(Labani nga Bila zamva ini ati’boruri fe i zi Rakeli dri ovuzu eri ma ati’boru.) 30#E’do 30:26; 31:41; Hos 12:12Eri nga fi Rakeli vu indi, azini vini le Rakelini aga Leani ra, eri nga azi azini nga eri dri eli aziri dika.
Anzi Yakoboni otile ’diyi
31 #
Zab 127:3; E’do 30:1 Yehova ndre kini ngu Leani onzi, eri nga ani eri ma opojo zi mva tizu; te Rakelini ondoni. 32#Efu 3:7; 4:31; Azi 26:7; Zab 25:18; 106:44Lea nga mva isu i ma alia, nga osi agupiani, nga runi ’da Rubeni’i; te eci ’yo ra, Yehova lu inzata mani vu ’bo; curu’do agupi ma vileri nga ma le ra. 33Eri nga vini mva isu dika, nga osi agupiani, nga ’yo ra, Yehovani e’yoni erile kini ngu ma onzirisi, fe vini mva ’diri ma dri ani; nga runi ’da Simeoni’i. 34Eri nga mva isu dika, nga osi agupiani, nga ’yo ra, Curu’do agupi ma vileri nga ri eci ma be, mani agianzi otile eri dri narisi; ’da ani runi Levi’i. 35Eri nga mva isu dika, nga vini osi agupiani, nga ’yo ra, Curu’do ’dorisi ma nga Yehovani inzi ra; eri ’da ani runi Yuda’i; nga di asi tizu ra.
Bible in Lugbara © United Bible Societies, 1966.