LUKA 22
22
Chaamset ne kichaame Judas Jesu
1Kirik anyun igorta ne bo makatinik che ma kinde mermerek, ne kiguure Paska. 2Ak kicheng’ tisiik che eechen ak sirik ole bartoi inendet; amu kiiywei ichek bik.
3Ak kichut Setani Judas ne kiguure Iskariot, ne ki age eng’ taman ak aeng’. 4Ak kiwa kong’alal ak tisiik che eechen ak kiptainik, ole ng’wektochindoi inendet ichek. 5Kiboiboitu anyun bichoto, ak kochamnyechi kogochi inendet fedaisiek. 6Kocham anyun inendet, ak kocheng’ boroindo kong’wekyi inendet ichek eng’ ole mami bik che chang’.
Chobet agobo Paska
7Ak kiit anyun betut ne bo makatinik che ma kinde mermerek, betut ne ki kanyol koeny aruetab paska. 8Ak kiiyokto Petero ak Johana, kole, Oba ochobwech paska, si kobiit keam. 9Ak kilenji, Imache kebe kechob eng’ ano? 10Ak kilenji ichek, Ogeero, ye omong’ji nganaset, kotuiyenok chito ne ibei teretab beek; osub inendet agoi got orit ole wendi. 11Ak omwachji chitab kobo got, olenji, Kateebenen Konetindet, kole, Mi ano gotab toek, ole anyone aame paska koboto alamalyennyu? 12Koboruok anyun got ne o ne mi barak ne tetotin tuguk: ochob eng’ oloto. 13Ak kiba anyun, ak konyor ko u ye kaga kemwachi: ak kichob paska.
Paska ne bo let
14Ak ye kingoit sait, koteb ng’ony, koboto che kiyoktoi. 15Ak kilenji ichek, Eng’ maget ko koamach aam paskaini kobotok kotom anyalil: 16amu amwawok ale, Koboch nguno ko ma aame, agoi kosulda eng’ bounatetab Jehovah.
17Ak kitaach kikombet, ak kingo kagogoito kongoi, kole, Onam ni, ak opchechige okwege: 18amu amwawok ale, Koboch nguno, ko ma aee che bo logoekab sabibuk, agoi koit bounatetab Jehovah.
19Ak kinam makatiat, ak kingo kagomwa kongoi, kobutul, ak kogochi ichek, ak kole, Ni bortanyu ne kigoitoi agobo okwek: oyae ko u ni eng’ kabwatet ne obwatena. 20Ko u noto kikombet agine, kingo kagobata amitwogik che bo lagat, kole, Arorutiet ne leel kikombani eng’ korotikyuk, che kitumdoi agobo okwek.
21Ago, ogeero, mi eutab inendet ne ng’wektaa kobota eng’ mesani. 22Amu wendi Weritab chi iman, ko u ye kiging’at: ago bwa eng’ chichoto ng’wektoi inendet!
23Ak kitoi anyun koteebegei ichegei, kole ng’o eng’ ichek ne yaei kii.
Etunatet ne bo iman
24King’eet anyun tiiyet eng’ kwenunywa, kole ng’o ne kiiti kele ne o eng’ ichek. 25Ak kilenji ichek, Laitorani laitorinik eng’ Bororiosiek: ak icheget che tinyei bounatet eng’ ichek keguure Toretik. 26Ago, ma u noto eng’ okwek: ago ingoigei ne o eng’ okwek ne ming’in; ak inendet ne o koigei ne otisiei. 27Ng’o ne o anyun, inendet ne tebyei eng’ amisiet, anan inendet ne otisiei? Tos ma inendet ne tebyei eng’ amisiet? Ago ami kwenung’wong’ ko u chito ne otisiei.
28Ago okwek ko o che kiotebi kobota eng’ yomsosiekyuk; 29ak kaagonok bounatet, ko u ye kigogona Baba, 30si kobiit oamisie ak koeeise mesennyu eng’ bounatennyu, ak tun otebe ng’echerok che bo laitornatet, oruokyini ortinwek taman ak aeng’ che bo Israel.
Sib kemwaei kole tiitos Petero
31Simon, Simon, keero, kagosom Setani kole konamak, si kosesak ko u nganok: 32ago kiasa agobo inye, si mabek kayaneng’ung’: ak ye kaiwalage, igimit che otupche. 33Ak kolenji inendet, Kiptaiyandani, kaachoboge kebe tuwai korgoret agot meet. 34Ak kimwa kole, Amwaun Petero, kotom kote kipsoiywet rani, iesioa konyil somok ile, mengena.
35Ak kilenji ichek, Kingayoktok ko motinye agot lolet, anan suberet, anan kweonik, ko tos kirarta kiy eng’ okwek? Ak kile, Ma raruech kiy. 36Ak kilenji, Ago inendet ne tinyei lolet koibot nguno, ak u noto suberet agine: ak inendet ne matinyei rotwetab chok, koalda ngoriennyi, si koale. 37Amu amwawok ale, kit ne kigisir ko kanyol kosulda eng’ ane, kele, Kigiit inendet koboto kiptengeginik: amu tinyei kagesunet ng’alek che kigisir agobo ane. 38Ak kile, Kiptaiyandani, keero, mi yu rotokab chok aeng’u. Ak kilenji ichek, Kagoyam.
Getsemane
39Komong’ sang’ anyun, ak kwo agoi tulwetab Emitik, ko u biteennyi; ak kiisub alamalyet inendet. 40Ak ye kingo kagoit oloto, kolenji ichek, Osa si mochut yomset. 41Ak kiistoegei ichek ye te ye itei koita ngewirta; ak kigutuny kosa, 42kole, Baba, ngicham, iistoena kikombani: ago ma ko u magennyu, ago ingoyaak ko u mageng’ung’. 43Ak kimong’ji inendet malaikaiyat ne kibunu kipsengwet kogimit inendet. 44Ak ye kimi inendet nyalilda ne ng’wan, kotes kosa mising’: ak kigergeitu kaotikyik ak korotik che sachin ng’ony.
45Ak kingong’eet eng’ saennyi, konyo ole mi alamalyennyi, ak konyor koruitos amu arogenet, 46ak kilenji ichek, Kalya si oruiye? Ong’eetye, osa, si mochut yomset.
Kenamei Jesu
47Ak kingota ko ng’alali, ogeero, tuiyet, koboto inendet ne kiguure Judas, age eng’ taman ak aeng’, kiindoune ichek; ak korikyi inendet Jesu si kong’utut. 48Ago kilenji Jesu, Judas, ing’wektoi Weritab chi eng’ ng’ututet? 49Ak kingogeer che kimi koboto inendet kit ne machei koyaak, kole, Kiptaiyandani, kieb eng’ rotwetab chok? 50Ak kieb age eng’ ichek otwogindetab tisiindet ne o, kieb itinnyi ne bo tai. 51Ago kiwolji Jesu kolenji, Obagakte; kagoyam. Ak kitwa itinnyi, kosoob.
52Ak kilenji Jesu tisiik che eechen, ak kiptainikab hekalut, ak boisiek che kigabwa kogirinda inendet, Kobwa ak rotokab chok ak siarisiek, ko u ye obwanjini rebindet? 53Ye kiami kobotok betut age tugul eng’ hekalut, ko ma oyogocha eunekwok: ago saing’wong’ ni, ak kimnatet ne bo mesundeito.
Kotiitos Petero Jesu
54Kinam anyun inendet, ak komut kwo gotab tisiindet ne o. Ak kiisubi Petero eng’ ye loo. 55Ak ye kiga kolal mat eng’ kok, koteb ng’ony tugul, ak kitebe Petero kwenunywa. 56Ak kingogeer chepto age inendet kotebyei eng’ ye mi lapkeiyetab mat, kochiilji kong’ inendet, kole, Kimi chichi agine koboto inendet. 57Ago kitiiyo, kole, Kobogoriondoni, mangen inendet. 58Ak ne matia kogeer chito age, ak kole, I agenge aginye eng’ ichek. Ak kile Petero, Chichi, ma bo bichoto.
59Ak ye kingogesgei olo bo sait agenge, kole chito age eng’ kimnatet, Iman kimi chichi agine koboto inendet: amu Galilindet inendet. 60Ago kile Petero, Chichi, mangen cho imwae. Ak kota komwaei, kote kipsoiywet ngunoto.
61Ak kiwelelgei anyun Kiptaiyat, ak kogeer Petero. Ak kiibwat Petero ng’olyotab Kiptaiyat, ko u ye kaga komwachi, kole, Kotom kote kipsoiywet rani, iesioa konyil somok. 62Ak kimanda sang’, kwo korir eng’ ng’wanindo.
63Ak kichombil bik Jesu che kinamei inendet, ak kobir. 64Ak kituch konyekyik, ak koteebe, kole, Ng’orse: ng’o ne kamasin? 65Ak kimwa ng’alek alak che chang’ che yaachen agobo inendet, kochurachuri inendet.
Jesu eng’ taitab tisiik che eechen
66Ak kingo kagoeech, koyumgei boisiekab bichoto, tisiik che eechen ak sirik; ak kiimut inendet kwo kapkiruogenywa, kole, 67Ngo i Kristo, imwawech. Ago kilenji ichek, Agot ndamwawok, ko moyani: 68ak ngot ateebenak, ko mowolu. 69Ago koboch nguno kotebe Weritab chi eutab tai ne bo kamuktaet ne bo Jehovah.
70Ak kile ichek tugul, Tos i Weritab Jehovah anyun? Kolenji ichek, Omwae ole a inendet. 71Ak kile ichek, Ta kemage nee baornatet age? Amu kagegas acheget eng’ kutinnyi.
God's word open for all
©Bible Society of Kenya, 2020