MATIUS 3
3
Khotbah Yohanes Pambaptis
(Mrk. 1:1-8; Luk. 3:1-18; Yoh. 1:19-28)
1Hang tawuk yiru hi Yohanes Pambaptis hawi ma padang gurun hang Yudea balalu mulai bakhotbah. 2“Ware naun batobat teka kawan dosa naun,” eauni, “daya puang lawah lagi Alatalla sagar marentah kala Raja!” 3Hi Yohanes yiti ulun sa namaksud daya Nabi Yesaya hawuang lenganni kalayiti,
“Naan ulun nanterau anri lengan sa mehet hang padang gurun,
‘Sadia lalan ma Tuhan;
sanrata lalan ma hanye.’ ”
4Pakaian Yohanes naulah teka wulu unta. Ikat pinggangni teka kulit, kutaenni angkalap anri riu wani jumpun. 5Rama ulun hawi teka Yerusalem, teka litar tane Yudea pada teka kawan daerah hang kalilingan Hungei Yordan hawi nunung hi Yohanes. 6Here mangaku kawan dosa here, balalu hi Yohanes mambaptis here hang Hungei Yordan.
7Rama pada ulun Parisi anri Saduki hawi nunung hi Yohanes nampan nabaptis. Kude tawuk hanye kadinung here hawi, hanye kaeau nengkan here, “Naun ulun jahat! Hie sa iwara naun kaiyuh bakilah teka hukum Alatalla hanrian anrau? 8Tantarang anri pagawian naun sa naun tuu haut batobat teka dosa naun. 9Ada naun minda naun kaiyuh kaluar teka hukuman daya naun kaeau hi Abraham yiru datu nini naun. Ingat, teka kawan watu yiti, Alatalla sanggup ngulah turunan ma hi Abraham! 10Kapak haut tasadia umak neweng kakau namput kawan wakatni. Satiap kakau sa puang mua wua sa maeh sagar nateweng palus naumpe ma apui. 11Aku mambaptis naun makai ranu nampan nantarang bukti sa naun haut batobat teka kawan dosa naun; kude sa sagar hawi hanrian udi aku, sagar mambaptis naun makai Roh Alatalla anri apui. Hanye labis hante teka aku. Pakai nginsing sarumpahni likan aku sika puang patut. 12Hang tanganni naan dahuru pakai ngitap katuluh parei hampe barasis. Parei sagar nakumpul mawuang wirang, kude katuluh ape sagar natutungni mawuang apui sa puang tau pare.”
Yesus nabaptis
(Mrk. 1:9-11; Luk. 3:21-22)
13Hang tawuk yiru Yesus tulak teka Galilea ma Hungei Yordan. Hang yaru hanye hawi nunung hi Yohanes palus laku nabaptis. 14Kude hi Yohanes ngunu nampik pilakuanni yiru. Hi Yohanes kaeau, “Aku sa saharusni nabaptis dayanu. Itati likan hanyu sa hawi nunung aku.”
15Kude Yesus nuing, ‘Tampalusleh hang tawuk yiti. Daya anri kalayiru takam nampalus katuluh sa nakabahumen daya Alatalla.’ Balalu hi Yohanes mambaptis Yesus.
16Dami udi nabaptis, Yesus palus mambai teka wuang ranu hang hungei yiru. Salenga udi yiru langit pauka balalu Yesus kadinung Roh Alatalla kala wurung dara minau ma ambau Yesus. 17Kamulek naan rengei lengan Alatalla sa kaeau, “Hanye yiti Anakku sa nasintaku. Hanye ngampi sanang ateiku.”
@ LAI 1999 Indonesian Bible Society (Lembaga Alkitab Indonesia)