Mahtae 5
5
Yesuˊ sangsawnˊ Eun leukahˊ munˊ pang puimˊ
1Yam Yesuˊ nyu Eun peue cum heunˊ naˊ ce, Eun hukˊ pang puimˊ naˊ Eun mokˊ. Tapaeˊ Eun naˊ ce ingˊ ri Heun. 2Eun tangˊ ri sangsawnˊ ce. Eun lahˊ,
3“Peue yawng unˊ papuing ri Peucawoˊ Eun a unˊ pun naˊ kaw ce pun munˊ,
kopti kuingˊ pang maoˊ naˊ meuh ka isˊ ce.
4Peue kuit nyhapˊ kuit yak naˊ kaw ce pun munˊ,
kopti kaw ce pun ri rap ri ti hk'aˊ kuit nyawkˊ kuit samˊran cumyenˊ naˊ.
5Peue kueˊ hpumˊ nyomˊ jom tem naˊ kaw ce pun munˊ,
kopti kaw ce pun ri rap ri ti bhenˊ keuteˊ naˊ meuh a sinˊ ce.
6Peue sumˊ isˊ hk'aˊ leupaws seumeuˊ naˊ kaw ce pun munˊ,
kopti kaw ce pun ri isˊ seunˊ kuˊ sumˊ isˊ ce naˊ.
7Peue cang tukyak ri peue naˊ kaw ce pun munˊ,
kopti kaw ce tang pun ri rap ri ti hk'aˊ tukyak ri ce naˊ.
8Peue hpumˊ seungaˊ chakˊ naˊ kaw ce pun munˊ,
kopti kaw ce pun ri nyu Peucawoˊ Eun.
9Peue yeuh hk'aˊ htukˊlung ri puri naˊ kaw ce pun munˊ,
kopti kaw ce pun hk'aˊ klawng ri meuh konˊ Eun Peucawoˊ naˊ.
10Peue pun ri hkamˊ hk'aˊ keunhapˊ nokneh kopti meuh a hk'aˊ leupaws seumeuˊ naˊ kaw ce pun munˊ,
kopti kuingˊ pang maoˊ naˊ meuh a isˊ ce hawcˊ.
11Yam yeuh peue kuˊ unˊ nawpsang, keunhapˊ nokneh peˊ maeeˊ lahˊ lawng kuˊ unˊ kueˊ unˊ meuh naˊ ri peˊ kopti meuh a Uiˊ ri naˊ, kaw peˊ pun munˊ. 12Renˊkawn kuit nyawkˊ kuit samˊran reuˊ, kopti lapsawngˊ keuting naˊ kueˊ a pun peˊ nang kuingˊ pang maoˊ naˊ. Peue suip leukahˊ Eun Peucawoˊ kuˊ pucti nanggalˊ peˊ naˊ ce ku pun ri hkamˊ hk'aˊ keunhapˊ nokneh naˊ yeut.
Cis ka bhenˊ keuteˊ
13Meuh peˊ cis ka bhenˊ keuteˊ naˊ. Daecti eumˊ ka naˊ a lawn cuitˊ koˊ, a ciˊ kaw cang yeuh ri eumˊ baee yeuh saˊnhawˊ? A hkuinˊ kaw laee kueˊ munˊ, a naˊ pun ri bah ri tec ri, peue naˊ japˊbuin yawo a.
Kuˊ cengˊ ka bhenˊ keuteˊ
14Meuh peˊ kuˊ cengˊ ka bhenˊ keuteˊ naˊ. Veng tangˊ ri pang gong naˊ a hkuinˊ cang moˊ ri geupˊ. 15Seunˊ awnˊ na, aˊnhawˊ hkuinˊ duing tokˊ kawkˊ ngawl kuip a ri tengˊ saecˊ ti peue. Daecti punta kaw a tilˊ cengˊ ri peue nya naˊ ce ku peue naˊ, po a pang hpaˊrang naˊ. 16Seunˊ awnˊ na, punta peue gawmˊeucˊ naˊ kaw peue nyu kuˊ chakˊ yeuh peˊ naˊ maeeˊ kaw peue sukˊseunˊ Kuiingˊ peˊ Cawoˊ utˊ nang kuingˊ pang maoˊ naˊ Eun, yeuh kuˊ cengˊ peˊ naˊ cengˊ nanggalˊ peue reuˊ.
Leukahˊ ritroe
17Pawlaee hteumˊ Uiˊ lih yeuh leukahˊ ritroe naˊ maeeˊ leukahˊ ce peue suip leukahˊ Eun Peucawoˊ naˊ lu. Hpaw Uiˊ caˊ lih yeuh a lu, daecti lih yeuh Uiˊ a htonnuk. 18Uiˊ lahˊ a ri peˊ neumneum, cu yam bhenˊ keuteˊ maeeˊ maoˊ naˊ unˊ nang lulaic ka heulˊ naˊ, rot ti yam ku ceu gawmˊeucˊ naˊ pun a ri htonnuk hawcˊ naˊ, tuˊ htawm aetˊ, aˊkoˊ vang mhaiˊ aetˊ ka naˊ a hkuinˊ kaw raiˊ saecˊ ti tuˊ. 19Kop awnˊ na, aˊnhawˊ lawn unˊ ti aˊyeˊ ka leukahˊ ritroe vang aˊyeˊ aetˊ ka hk'aiˊ peue naˊ seucen, maeeˊ eun ku sangsawnˊ peue yeuh seunˊ kuˊ yeuh ti naˊ koˊ, eun kaw pun hk'aˊ sawnˊ ri meuh peue aetˊ hk'aiˊ peue hk'aˊnaee kuingˊ pang maoˊ naˊ. Daecti aˊnhawˊ lawn hotˊ ri yeuh leukahˊ ritroe naˊ maeeˊ sangsawnˊ hotˊ a koˊ, eun kaw pun hk'aˊ sawnˊ ri meuh peue keuting hk'aˊnaee kuingˊ pang maoˊ naˊ. 20Kopti Uiˊ lahˊ a ri peˊ, ‘Peˊ lawn unˊ kueˊ hk'aˊ leupaws seumeuˊ naˊ heunˊ hk'aiˊ peue Hparisaeˊ maeeˊ peue guil leukahˊ ritroe naˊ ce koˊ, peˊ hkuinˊ kaw pun ri lec hk'aˊnaee kuingˊ pang maoˊ naˊ neumneum.’
Hk'aˊ seungeuengˊ
21Pun peˊ ri mhawngˊ leukahˊ lahˊ ri ri peue leumahˊ naˊ ce hawcˊ. A lahˊ, ‘Pawlaee toh peue.#5:21 Pucti heulˊ 20:13 Aˊnhawˊ lawn toh peue koˊ, eun kaw pun ri hkamˊ hk'aˊ tawsˊ aˊmu naˊ.’ 22Daecti Uiˊ lahˊ a ri peˊ, ‘Aˊnhawˊ lawn seungeuengˊ ri ecˊawngˊ ri naˊ eun koˊ, eun kaw pun ri hkamˊ hk'aˊ tawsˊ aˊmu naˊ. Aˊnhawˊ lawn tangˊ ecˊawngˊ ri naˊ eun tem koˊ, eun kaw pun ri hkamˊ hk'aˊ tawsˊ aˊmu naˊ nanggalˊ ce muk peue tawsˊ aˊmu naˊ. Aˊnhawˊ lawn lahˊ ecˊawngˊ ri naˊ eun meuh peue ngaˊ koˊ, eun kaw pun ri hkamˊ hk'aˊnaee ngawl ka keutongˊnyarok naˊ.’
23Kop awnˊ na, yam buih tan peˊ kuˊ tan vang dum ri tan kuˊ tan naˊ peˊ lawn kuit rot ri ecˊawngˊ ri naˊ seungeuengˊ ce ri ti kop kuˊ ti ri ceu naˊ koˊ, 24puing uinˊ kuˊ tang peˊ naˊ nanggalˊ ka vang dum ri tan naˊ peˊ naˊ puing ingˊ yeuh ri htukˊlung ecˊawngˊ ri naˊ ce. Hawcˊ koˊ, peˊ naˊ koe hukˊ tan kuˊ tan ri naˊ reuˊ.
25Yam kuˊ tangˊ aˊmu ri peˊ naˊ buih va eun peˊ heulˊ ri vang tawsˊ aˊmu naˊ, coˊcaˊ ri yeuh ri htukˊlung eun langˊhk'aˊ naˊ vaeevaee reuˊ. A lawn unˊ yeuh keutitˊ koˊ, kaw eun ap peˊ ri cawoˊ tawsˊ aˊmu naˊ eun. Cawoˊ tawsˊ aˊmu naˊ eun kaw ap peˊ ri cawoˊ htawngˊ naˊ eun. Cawoˊ htawngˊ naˊ eun kaw seueˊ peˊ hk'aˊnaee htawngˊ naˊ. 26Uiˊ lahˊ a ri peˊ neumneum, ‘Peˊ lawn unˊ nang saiˊ kuˊma ri naˊ eucˊ hklelˊ koˊ, peˊ hkuinˊ kaw nang cang pun ri pucti lih hk'aiˊ htawngˊ naˊ.’
Hk'aˊ lenˊcu
27Leukahˊ lahˊ, ‘Pawlaee lenˊcu’,#5:27 Pucti heulˊ 20:14 naˊ pun peˊ ri mhawngˊ a hawcˊ. 28Daecti Uiˊ lahˊ a ri peˊ, ‘Aˊnhawˊ lawn keueˊ ri beunˊ naˊ eun maeeˊ kueˊ ri hpumˊ hkuitˊnawngˊtangˊ naˊ koˊ, hkawnˊ lenˊcu eun maeeˊ beunˊ awnˊ eun hk'aˊnaee hpumˊ ri naˊ hawcˊ.’ 29Ngaiˊ aˊtawmˊ mi naˊ a lawn yeuh mi yeuh mapˊ naˊ koˊ, koc ri tec a reuˊ. Mi saecˊ naˊ sum hk'eung ka tuˊ ri naˊ ti ceu koˊ, a naˊ jaen chakˊ hk'aiˊ pun mi ri lec nang keutongˊnyarok naˊ gawmˊ tuˊ ri naˊ. 30Seunˊ awnˊ na, tiˊ aˊtawmˊ mi naˊ a lawn yeuh mi yeuh mapˊ naˊ koˊ, rengˊ ri tec a reuˊ. Mi saecˊ naˊ sum hk'eung ka tuˊ ri naˊ ti ceu koˊ, a naˊ jaen chakˊ hk'aiˊ pun mi ri lec nang keutongˊnyarok naˊ gawmˊ tuˊ ri naˊ.
Hk'aˊ tec puri
31Kueˊ a leukahˊ lahˊ ri yeuhkiˊ, ‘Aˊnhawˊ lawn tec beunˊ ri naˊ eun koˊ, eun kaw kah ri temˊ ri tuilˊ licmat tec puri naˊ ri beunˊ ri naˊ eun.’#5:31 Sawnˊ leukahˊ munˊ 24:1 32Daecti Uiˊ lahˊ a ri peˊ, ‘Pon hk'aiˊ meuh a kopti lenˊcu naˊ aˊnhawˊ lawn tec beunˊ ri naˊ eun koˊ, hkawnˊ yeuh eun beunˊ ri naˊ eun meuh peue lenˊcu. Aˊnhawˊ lawn tang ti ri isˊ beunˊ awnˊ eun koˊ, hkawnˊ eun ku meuh peue lenˊcu yeut.’
Leukahˊ hkamˊ
33Pun peˊ ri mhawngˊ leukahˊ lahˊ ri ri peue leumahˊ naˊ ce hawcˊ. A lahˊ, ‘Pawlaee va leukahˊ hkamˊ peˊ naˊ lhoˊlheˊ, daecti hotˊ ri yeuh a hotˊ seunˊ leukahˊ hkamˊ mi ri Peucawoˊ Eun naˊ reuˊ.’ 34Daecti Uiˊ lahˊ a ri peˊ, ‘Pawlaee lahˊ leukahˊ hkamˊ naˊ saecˊ peunaeˊ. Pawlaee lahˊ leukahˊ hkamˊ naˊ ri cu peˊ kuingˊ pang maoˊ naˊ, kopti kuingˊ pang maoˊ naˊ meuh a vang mokˊ Eun Peucawoˊ. 35Aˊkoˊ, pawlaee lahˊ leukahˊ hkamˊ naˊ ri cu peˊ bhenˊ keuteˊ naˊ, kopti bhenˊ keuteˊ naˊ meuh a vang tangˊ cung Eun Peucawoˊ. Aˊkoˊ, pawlaee lahˊ leukahˊ hkamˊ naˊ ri cu peˊ veng Yeruˊsalaem naˊ, kopti veng Yeruˊsalaem naˊ meuh a veng Eun Peucawoˊ Cawoˊ Hkunˊhawˊhkamˊ keuting naˊ. 36Aˊkoˊ, pawlaee lahˊ leukahˊ hkamˊ naˊ ri cu peˊ cingˊ ri naˊ, kopti huikˊ peˊ naˊ ti nyeng yawo a kaw paing a kaw lawng naˊ peˊ hkuinˊ cang yeuh a. 37A meuh neum koˊ, lahˊ a “meuh neum”, a unˊ meuh koˊ, lahˊ a “unˊ meuh”. Lahˊ a lheuˊ aenˊ a koˊ, meuh a leukahˊ ingˊ neum seucaˊ rai naˊ.’
Ngaiˊ tangˊ ngaiˊ
38Leukahˊ lahˊ, ‘Peue lawn yeuh ngaiˊ peˊ naˊ lu koˊ, tang yeuh isˊ peue naˊ lu, peue lawn yeuh rangˊ peˊ naˊ lu koˊ, tang yeuh isˊ peue naˊ lu’#5:38 Pucti heulˊ 21:24; Faeeˊ 24:20; Sawnˊ leukahˊ munˊ 19:21, naˊ pun peˊ ri mhawngˊ a hawcˊ. 39Daecti Uiˊ lahˊ a ri peˊ, ‘Pawlaee toˊtamˊ peue rai naˊ ce. Peue lawn dah beh aˊtawmˊ peˊ naˊ koˊ, peˊ ku naˊ tang hpawtˊ ri tung beh aˊveˊ naˊ ri peue reuˊ. 40Peue lawn tangˊ aˊmu tecˊteng ri ti hk'o hk'aˊnaee peˊ naˊ koˊ, peˊ ku naˊ tang tuilˊ hk'o dalˊ ri naˊ ri peue yeut reuˊ. 41Peue lawn tecˊteng kah peˊ heulˊ tuilˊ hk'aˊ ri ti lakˊ koˊ, heulˊ maeeˊ peue lalˊ lakˊ reuˊ. 42Peue hk'oˊ ri peˊ naˊ tuilˊ ce isˊ reuˊ. Pawlaee hpawtˊ ri hk'uih ri peue sumˊ keucan ri peˊ naˊ ce.’
Leumeusˊ ransu
43Leukahˊ lahˊ, ‘Leumeusˊ peue utˊ keunam caonaoˊ ri naˊ ce, ces ri ransu ri naˊ ce reuˊ’#5:43 Faeeˊ 19:18, naˊ pun peˊ ri mhawngˊ a hawcˊ. 44Daecti Uiˊ lahˊ a ri peˊ, ‘Leumeusˊ ransu peˊ naˊ ce. Hk'oˊ munˊ pun peue keunhapˊ nokneh peˊ naˊ ce reuˊ.’ 45Punta kaw peˊ meuh konˊ Eun Aˊkuiingˊ utˊ nang kuingˊ pang maoˊ naˊ Eun. Kopti kah Eun seunyi ri naˊ pucti cengˊ tilˊ pun peue rai maeeˊ peue chakˊ naˊ ka gawmˊ alˊ naˊ. Eun ku tuilˊ lheˊ naˊ pun peue leupaws seumeuˊ maeeˊ peue unˊ leupaws seumeuˊ naˊ ka gawmˊ alˊ yeut. 46Peˊ lawn leumeusˊ yawo peue kuˊ hk'oˊ ce leumeusˊ peˊ naˊ ce palkoe koˊ, peˊ ciˊ kaw pun lapsawngˊ keunhawˊ? Saecˊ meuh peue cepˊ hkawnˊ naˊ ce ku yeuh keutitˊ yeut, unˊ meuh ka aw? 47Peˊ lawn yeuh yawo aˊmawo ce ecˊawngˊ ri naˊ palkoe koˊ, peˊ ciˊ chaeeˊ kaw chat peue seubu naˊ ce yeuh saˊnhawˊ? Saecˊ meuh peue unˊ meuh peue ceu Yuˊda naˊ ce ku yeuh keutitˊ yeut, unˊ meuh ka aw? 48Kop awnˊ na, seunˊ Kuiingˊ peˊ Cawoˊ utˊ nang kuingˊ pang maoˊ naˊ chakˊ htonnuk Eun naˊ, yeuh peˊ chakˊ htonnuk yeut reuˊ.
© (Active), Wycliffe Bible Translators, Inc. All rights reserved.